Nshapita wa 78

Nuikale amu badiakaje!

YEYE mumane kudimuija misumba pa lukuka ne mubele bayidi bende bua kabatambi kuteka mutshima ku bintu bia ku mubidi, Yezu udi ufila dikankamija edi: “Kanutshinyi, kasumbu kakese, bualu Tatuenu wanyishile bua kunupa bukalenge.” Nunku, udi usokolola ne: anu bungi bukese bua bantu (144 000, anu muasungulujibuabio pashishe) ke bikala mu Bukalenge bua mu diulu. Bavule ba ku bantu bapeta muoyo wa kashidi nebikale pa buloba bu bakokeshibue ba Bukalenge ebu.

“Bukalenge,” ndipa kayipu dia dikema! Umvuija ngandamuinu mukumbanyine wapetesha bayidi mushindu wa kupeshibua dipa edi, Yezu udi ubasaka ne: “Panyishayi bintu binudi nabi ne nufile mapa a luse.” Eyowa, badi ne bua kutumika ne bidibo nabi bua kupetesha bantu nabo masanka a mu nyuma, ne nunku kudibutshila “tshiuma tshidi katshiyi tshijika mu muulu.”

Pashishe, Yezu udi ukankamija bayidi bende bua bikale amu badiakaje bua dipingana diende. Udi wamba ne: “Nuikale badisuike mikaba mu bimono ne miendu mitemesha, ne nuenu bine nuikale bu bantu badi bindile mfumuabo padiye ufumina ku difesto dia dibaka, bua padiye ufika ne ukokola, bamunzuluile diakamue. Bena disanka mbapika badi mfumuabo usangana batabale mu kufika kuende! Bushuwa ndi nnuambila ne: Yeye muine neadisuike mukaba, abaadija ku mesa, mumane kusemena, neabasadile.”

Mu mufuanu eu, basadidi badi baleja mudibo badiakaje bua kusekelela mfumuabo mu kupingana kuende pa kufunyika nkanzu yabo mile ne bayisuike mikaba yabo, ne badi batungunuka ne kuenza midimu yabo too ne munkatshi mua butuku ku butoke bua miendu miwuja tente ne manyi. Yezu udi umvuija ne: ‘Biafika mfumu pa tshilu tshibidi [kubangila pa dîba bu 9 dia dilolo too ne munda-nkulu], peshi pa tshilu tshisatu [kubangila pa dîba bu munda-nkulu too ne pa dîba 3 patshiatshia], ne kubasangana badiakajilemu, badi ba diakalenga!’

Mfumu udi ufuta basadidi bende mu mushindu wa pa buawu. Udi ubaadija ku mesa ne utuadija kubasadila. Udi ubenzela malu, ki mbu bapika, apo bu balunda ba lulamatu. Ndifutu kayipu bulenga bua muvuabo batungunuke ne kuenzela mfumuabo mudimu butuku bujima pavuabo bindila dipingana diende! Yezu udi ukoma ne: “Nuenu penu, nuikale amu badiakaje, bualu Muana wa muntu udi ulua pa dîba dinudi kanuyi belele meji.”

Mpindieu Petelo udi ukonka ne: “Mukalenge, tuetu mbaudi wambila mufuanu eu peshi mbantu buonso kabidi?”

Pamutu pa kuandamuna buludi, Yezu udi ulonda mukuabu mufuanu. “Nnganyi udi bushuwa mulami wa lulamatu,” ke mudiye webeja, “watekibua kudi mfumuende ku mutu kua tshisumbu tshia bantu bende bua kubapeshaye biakudia biabo pa dîba diakane? Mupika au ng’wa diakalenga pikala mfumuende mu kufika kuende mumusangane wenza nunku! Bushuwa ndi nnuambila, Neamuteke ku mutu kua bintu biende bionso.”

“Mfumu,” anu mudibi bimueneka, nYezu Kristo. “Mulami” udi uleja “kasumbu kakese” ka bayidi mu tshi-bungi tshiabu, ne “tshisumbu tshia bantu bende” tshidi tshifunkuna kine kasumbu ka bayidi 144 000 badi bapeta Bukalenge bua mu diulu, kadi tshibikidilu etshi tshidi tshiela kashonyi pa midimu idibo bakumbaja muntu pa nkayende. “Bintu biende” bidi mulami wa lulamatu mutekibue ku mutu kuabi bua kukuba bidi bileja bipatshila bia bukalenge bua mfumu pa buloba, bidi bikongoloja ne bakokeshibue ba pa buloba ba Bukalenge.

Pa kutungunuka ne mufuanu, Yezu udi usokolola ne: bena mu kasumbu ka mulami, anyi mupika, kabakushala buonso balamatshi ba mikenji, umvuija ne: “Kadi biamba mupika au mu mutshima wende ne: ‘Mfumuanyi udi ujingakana bua kulua,’ ne biatuadijaye kututa basadidi balume ne basadidi bakaji, kuditua mu didia ne mu dinua ne mu dikuatshika, mfumu wa mupika au nealue dituku didiye kayi mumutekemene . . . , ne neamunyoke ne tshikisu tshikole.”

Yezu udi umvuija se: dilua diende ndituadile bena Yuda tshikondo tshia kapia kalaluki, bualu bamue badi banyisha malongesha ende ne bakuabu baabenga. Bidimu bisatu ne pa mutu biakumbanyi katshia watambuishibua mu mâyi, kadi mpindieu, batismo wende mu lufu udi usemena lukasa ku nkomenu wende, ne udi umvuija ne: “Ndi nkengakana too ne pajikaye!”

Yeye mumane kumanyisha bayidi bende malu aa, Yezu udi ukudimuka tshiakabidi kudi misumba. Udi udiabakena bua bujibale buabu bua dibenga kuitaba bijadiki binenke bia tshidiye ne mushinga wa bulelela ebu. “Panudi numona divuba dibanda lua ku bitupa bia Ouest,” ke mudiye umvuija, “nudi nuamba diakamue ne: ‘Mvula wa tshipupu udi ulua,’ ne bienzeka amu nanku. Ne panudi numona lupepele lua ku sud lututa, nudi nuamba ne: ‘Nekuenzeke luya lukole,’ ne bienzeka amu nanku. Badingidiji nue, nudi bamanye mua kukonkoloja mmuenekelu wa buloba ne diulu, kadi mmunyi munudi kanuyi bamanye kukonkoloja tshikondo etshi tshia pa buatshi?” Luka 12:32-59, NW.

▪ Mbantu bungi munyi badi benza “Kasumbu kakese,” ne ntshinyi tshidibo bapeta?

▪ Mmunyi mudi Yezu uzangikila bayidi bende dikengedibua dia kuikala badiakaje?

▪ Mu mufuanu wa Yezu, mbanganyi badi baleja bu “mfumu,” “mulami,” “tshisumbu tshia bantu bende” ne “bintu biende”?