Nshapita wa 91

Padi Lazare ubiishibua

YEZU udi ufika mpindieu, pamue ne aba badi bamulonda, ku lukita lua tshivulukilu lua Lazare. Bushuwa, ndubinga lubuikidija dibue ku tshibueledi. “Umbushayi dibue,” ke mudiye wamba.

Marta udi upindulula, kayi muanji kujingulula tshidi Yezu natshi mu lungenyi bua kuenza. “Mfumu,” ke mudiye wamba, “ukadi ununka; edi ndituku dinayi.”

Kadi Yezu udi webeja ne: “Tshivua mukuambile ne: biwikala witabuja, newikale mua kumona butumbi bua Nzambi anyi?” (NW)

Nunku, badi bumusha dibue. Pashishe, Yezu udi ubandisha mesu muulu ne usambila ne: “Tatu, ndi nkuanyisha bua paudi munteleje. Ndi amu mumanye ne: utu unteleja matuku onso, kadi ndi ngakula bua bonso badi bannyungulule aba bitabe ne: wewe ngudi muntume.” Yezu udi usambila patoke bua bantu bamanye ne: bualu bukadiye pa kuenza nebukumbajibue ku bukole bupeta kudi Nzambi. Nunku udi wela lubila ne dîyi dikole ne: “Lazare, patuka, vuakunu!”

Ku mêyi aa, Lazare udi upatuka. Bianza biende ne makasa bitshidi bijingila mikaba ya dijiika, ne mpala wende mubuikila tshilamba. “Mukutululayi, numulekele aye.”

Padibo bamona tshishima etshi, bavule ba ku bena Yuda bavua balue kusamba Mariya ne Marta badi bitabuja Yezu. Kadi, bakuabu badi baya kulondela Bafarizeyi tshidi tshienzeke. Bine aba pamue ne bakuidi banene badi bapunga dîyi diakamue bua kuenzeja tshisangilu tshia kabadi kakulu ka bena Yuda, Sanhedrin.

Sanhedrin udi ukongoloja Kayifase, muakuidi munene udi kuoko mpindieu, pamue ne Bafarizeyi ne Basaduseyi, bakuidi bamfumu, ne bakuidi banene ba kale. Balumiana badi badiabakena ne: “Tuenze tshinyi? Muntu ewu udi wenza bishima bia bungi. Tuetu bamulekele ubienza, bantu bonso nebamuitabe. Bena Roma nebalue ne [nebanyenge muaba wetu ne ditunga dietu popamue, NW].”

Nansha mudi bamfumu aba ba malu a Nzambi bitaba se: Yezu “udi wenza bishima bia bungi,” tshintu tshimue tshidibo basumpakena tshidi’anu muanzu ne bukokeshi biabu. Dijudibua dia Lazare mmukumu mukole wa pa buawu muambika Basaduseyi, bualu kabena ne ditabuja mu dibiishibua.

Kayifase, udi imue misangu Musaduseyi, udi wasa diakula mpindieu, wamba ne: “Kanuena bajingulule bualu ebu to. Padi muntu umue ufuila bantu bonso, bua tshisa tshijima katshibutuki, kanuena numona ne: ndiakalenga dienu anyi?”

Nzambi ng’uvua musake Kayifase ku diamba mêyi aa, bualu mupostolo Yone ufundile pashishe ne: “[Kayifase] kavua muakule nanku ku bukole buende nkayende.” Bushuwa, tshivua Kayifase usua kumvuija tshivua se: Yezu uvua ne bua kushipibua bua kumupumbisha ku ditamba kudimbakaja bukokeshi ne buenzeji bidi mianzu yabu ibapetesha. Nunku, bilondeshile Yone, ‘Kayifase wakafila mulayi ne: Yezu uvua mufundila kufua ki ng’anu bua ditunga, apo bua bana ba Nzambi bikale ne bua kusangishibua mu buobumue.’ (NW) Bushuwa, dilongolola dia Nzambi didi se: Muanende afue bu tshia-bupikudi bua buonso.

Kayifase udi mpindieu ufika ku ditabijija Sanhedrin ku diela tshitungu bua kushipa Yezu. Kadi Yezu, pamu’apa munungena bua tshitungu etshi kudi Nikodeme, umue wa ku bena mu Sanhedrin wa pa muoyo wende, udi umuka muinemu. Yowanese 11:38-54, MMM.

▪ Bua tshinyi Yezu udi usambila patoke kumpala kua kubiishaye Lazare?

▪ Ngandamuinu wa bamonyi ba dibiishibua edi udi tshinyi?

▪ Ntshinyi tshidi tshisokolola muoyo mubi wa bena mu Sanhedrin?

▪ Ndungenyi kayi luvua Kayifase upangadija, kadi Nzambi mmutumike nende bua kumanyisha mulayi kayi?