Nshapita wa 112

Pasaka wa Yezu wa ndekelu udi pabuipi

PADI Dibidi dia 11 Nizan disemena ku ndekelu, Yezu udi ujikija kulongesha bapostolo bende pa Mukuna wa Olive. Ndituku kayipu diuwule ne bia kuenza ne dizengeji! Mpindieu, pamu’apa mu dipingana ku Betaniya bua kupitshishaku butuku, udi wambila bapostolo bende ne: “Nudi bamanye ne: panyima pa matuku abidi kumukila ku mpindieu pasaka udi wenzeka, ne Muana wa muntu udi ne bua kufidibua bua kupopedibua pa mutshi.” (NW)

Anu mudibi bimueneka, makelela mu Disatu dia 12 Nizan, Yezu udi ushala mu muaba mupole ne bapostolo bende. Mayipi, uvua mukanyine bamfumu ba bitendelelu patoke, ne mmumanye bimpe se: badi bakeba kumushipa. Nunku kêna udileja patoke mu Disatu, bualu ki mmusue bua tshintu kampanda tshimupumbishe bua kuenza difesto dia Pasaka ne bapostolo bende dilolo didi dilonda.

Mu mutantshi eu, bakuidi banene ne bakulu ba ditunga mbadisangishe mu lubanza lua Kayifase, muakuidi munene. Basuya kudi mêyi makole avua Yezu mubambe dituku dishale, badi bela tshifufu bua kumukuata ne budimu bukole ne kumushipesha. Kadi badi bamba ne: “Katuenji bualu ebu munkatshi mua tshibilu, bua bantu kabayi kujula mutoyi.” Badi batshina bantu, bualu Yezu mmuanyishibue kudibu.

Padi bamfumu ba bitendelelu bela tshifufu ne muoyo mubi bua kushipa Yezu, mubakumbudi kampanda udi ufika. Bia kukema, ng’umue wa ku bapostolo bine ba Yezu, Yudase Iskaryote, eu udi Satana mukune lungenyi lua muendi munda bua kutungila Mfumuende! Mmushindu kayipu udibu basanka padi Yudase webeja ne: ‘Tshinudi basue kumpa ntshinyi bua mmufile mu bianza bienu?’ Badi bitaba ne musangelu wonso bua kumufuta bitshiele bia argent 30, mushinga wa mupika bilondeshile tshiovo tshia Mikenji ya Mozese. Kutuadijila pa dîba adi, Yudase udi ukeba mushindu mulenga wa kufila Yezu mu bianza biabu, musumba kawuyi kuoko.

Dia 13 Nizan didi dituadija mu Disatu ku dibuela dia dîba. Yezu uvua mufume ku Yeriko mu Ditanu, nunku ebu mbutuku buisambombo ne bua ndekelu budiye upitshisha mu Betaniya. Dituku didi dilonda, mu Dinayi, nebikengele kuenza malongolola a ndekelu bua Pasaka udi utuadija ku dibuela dia dîba. Ke dîba didi muan’a mukoko wa Pasaka ukoshibua mutu ne pashishe woshibua mujima. Mmuaba kayi wenzelabu difesto, ne mbanganyi balongolola bidi bikengedibua?

Yezu ki mmuanji kufila imue ngenyi pa bualu ebu, pamu’apa bua kupumbisha Yudase ku dimanyisha bakuidi bamfumu bua kabavu kujikila Yezu munkatshi mua difesto dia Pasaka. Kadi mpindieu, misangu mikuabu mu Dinayi ku ntuadijilu kua mapingaja, kumukila ku Betaniya Yezu udi utuma Petelo ne Yone, ubambila ne: “Ndayi ne nutulongoluele pasaka bua tuvue kudia.” (NW)

“Udi musue tumulongoluele penyi?” ke mudibu bebeja. (NW)

“Panuabuela mu tshimenga,” ke mudi Yezu umvuija, “nenusambakene ne muntu muambule mulondo wa mâyi. Numulonde ne ku nzubu kuabuelaye, nuambile muena nzubu awu ne: ‘Mulongeshi udi ukukonka ne: “[Tshibambalu tshia benyi mundi mua kudiila pasaka ne bayidi banyi tshidi penyi, NW]?”’ Yeye neanuleje tshibambalu tshinene tshia kuulu, tshilengeja ne misamu; nulongoluelemu biadidia.”

Kabiyi mpata, muena nzubu eu mmuyidi kampanda wa Yezu udi pamu’apa muindile dilomba dia Yezu bua kutumikaye ne nzubu wende bua muanda eu wa pa buawu. Mu mishindu yonso, padi Petelo ne Yone bafika mu Yeruzaleme, badi basangana bionso anu muvua Yezu mumanyishe. Nunku, bubidi buabu badi batabalela bua muan’a mukoko ikale muakaja ne bia kulongolola bikuabu bionso bikale bipunga bua basekeledi ba Pasaka 13, Yezu ne bapostolo bende 12, bapete bionso bidi bikengedibua. Matewuse 26:1-5, 14-19; Markuse 14:1, 2, 10-16; Lukase 22:1-13, MMM; Ekesode 21:32.

▪ Anu mudibi bimueneka, ntshinyi tshidi Yezu wenza mu Disatu, ne mbua tshinyi?

▪ Ntshisangilu kayi tshidi tshienjibua kua muakuidi munene, ne Yudase udi ukumbula bamfumu ba bitendelelu bua kipatshila kayi?

▪ Mbanganyi badi Yezu utuma mu Yeruzaleme mu Dinayi, ne mbua kipatshila kayi?

▪ Ntshinyi tshidi batumibue aba basangana tshidi tshisokolola tshiakabidi mudi Yezu ne makole a dienza bishima?