Nshapita wa 41

Tshikebeshi tshia dikokangana ku mêyi

LUPOLO luîpi yeye mumane kudiolola kua Simone, Yezu udi utuadija luendu luibidi lua buambi mu Ngalileya. Mu luendu luende lua musangu mushale mu teritware eu, bavua bamufile kudi bayidi bende ba kumpala, Petelo, André, Yakobo ne Yone. Kadi musangu eu bapostolo 12 badi nende, pamue ne bamue bakaji. Ku bine aba kudi Mariya Madelene, Suzane ne Jane, muena bayende udi muena mudimu wa mukalenge Herodese.

Bu mudi mudimu wa Yezu wenda walabala, dikokangana ku mêyi pa mudimu wende didi padi dienda divula. Badi batuadila Yezu muntu mukuata kudi ba-demon, kabidi mufofo ne kamama. Padi Yezu umuondopa, pa kumupikula ku bukokeshi bua ba-demon ne muikale mpindieu mua kuakula ne kumona, misumba idi ikatshila. Badi batuadija kuamba ne: “Muine eu kêna mua kuikala Muana wa Davidi anyi?”

Misumba mivule idi idiunguija ku nzubu kudi Yezu mutuudile, bimupangisha yeye ne bayidi bende mua kudia biakudia. Pa kumbusha aba badi bela meji se: udi mua kuikala “Muana wa Davidi” mulaya, kudi baskribe ne Bafarizeyi badi bafumine ku Yeruzaleme bua kumupula lumu. Padi balela ba Yezu bumvua lumu lua diyoyo didi dijuke bua Yezu badi balua ne lungenyi lua kumuangata. Mbua kabingila kayi?

Bualu, nansha bana babo ne Yezu ki mbanji kuitaba ne: udi Muana wa Nzambi. Kabidi, diyoyo ne dikokangana bidiye mujudije mbibengangane menemene ne tshivua Yezu uvuabo bamanye pavuaye ukola mu Nazarete. Nunku, badi bela meji se: lungenyi luende ndulubakane. “Wajimiji lungenyi,” ke mudibo bakomesha, ne badi bajinga kumukuata bua kuya nende.

Mu mishindu yonso, tshilelela ntshia se: Yezu mmuondope eu uvua mukuata kudi ba-demon. Baskribe ne Bafarizeyi mbamanye ne: kabena mua kuvila bulelela bua muanda eu. Nunku, bua kupula lumu lua Yezu, badi bambila bantu ne: “Muntu eu kêna mua kuipata ba-demon kabiyi ku bukole bua Belzebube, mfumu wa ba-demon.”

Pa kujingulula ngeledi wabu wa meji, Yezu udi ubikila baskribe ne Bafarizeyi pabuipi nende ne wamba ne: “Buonso bukalenge budi bupanduluke, nebuvue kunyanguka, kabidi musoko wonso ne nzubu mupanduluke, kêna wimanakana. Pikala Satana wipata Satana nende, mmupanduluke, kadi bumfumu buende nebushindame munyi?” (Mukenji Mulenga)

Mmêyi kayipu mena bulelela bushimbudi! Bu mudi Bafarizeyi bajadika se: bamue ba kudibo mbipate ba-demon, Yezu udi webeja kabidi ne: “Meme bingikala ngipata ba-demon ku bukole bua Belzebube, bana benu badi bipata ku bukole bua nganyi?” Mu mêyi makuabu, ditumpi diabu kudi Yezu ndikumbane bushuwa kubalamikadi buobo pabo. Pashishe, Yezu udi udimuija ne: “Kadi, bingikala ngipata ba-demon ku bukole bua spiritu wa Nzambi, nanku bukalenge bua Nzambi buamanyi kufika kunudi.”

Pa kufila mufuanu bua kuleja se: dipata diende dia ba-demon ntshijadiki tshia mudiye ne bukokeshi pa Satana, Yezu udi wamba ne: “Nganyi udi mua kubuela mu nzubu mua tshilobo, kupawula bintu bidimu, kayi muanji kusuika tshilobo awu? Amu yeye mumusuike ke kushishaye kupawula bidi mu nzubu muende. Udi kayi kundi, mmumbenge, udi kayi unguija nanyi bintu udi ubimuangalaja.” (MMM) Bafarizeyi badi bushuwa balundukila Yezu, badileja mudibo bena mudimu ba Satana. Badi bapambuisha bena Izalele bua kabalondi Yezu.

Nenku, Yezu udi udimuija baluishi bende bena dia Satana ne: “disendeka dionso dia spiritu kabakudibuikidila.” (MMM) Udi umvuija ne: “Eu yonso udi wamba Muana wa muntu dîyi dia nsendà, nebamubuikidiledi; kadi eu yonso udi wamba dîyi dia nsendà bua spiritu munsantu, kabakumubuikidiladi, tòo, nansha mu bulongolodi ebu bua malu peshi mu ebu butshilualua.” Baskribe ne Bafarizeyi aba mbenze mpekatu wa muomumue ukena kubuikidila, bualu, ne muoyo mubi, mbambike Satana tshijadiki tshikena kudiwula tshia dienza bishima tshia spiritu munsantu wa Nzambi. Matayo 12:22-32; Mâko 3:19-30; Luka 8:1-3; Yone 7:5, NW.

▪ Nku tshinyi kudi luendu luibidi lua Yezu mu Ngalileya lushilangane ne lua kumpala?

▪ Bua tshinyi balela ba Yezu badi bateta mua kumukuata?

▪ Mmunyi mudi Bafarizeyi bateta mua kudiwula bishima bia Yezu, ne mmunyi mudi Yezu wimansha matumpi abu?

▪ Bafarizeyi aba mbena tshibawu bua muanda kayi, ne mbua tshinyi?