Nshapita wa 15

Tshishima tshia kumpala tshia Yezu

KUAPITSHI anu dituku dimue anyi abidi katshia André, Petelo, Yone, Filipe, Natanaele ne imue misangu Yakobo balua bayidi ba kumpala ba Yezu. Badi mpindieu mu njila wa kuabu ku distrike dia Ngalileya, kuakaledibuabo buonso. Badi baya mu Kana, tshimenga tshidi Natanaele muledibue, tshidi mu tukunakuna, pabuipi ne Nazarete, mudi Yezu mukolele. Bavua babikidibue mu difesto dia dibaka mu Kana.

Mamuende wa Yezu mmuvue pende mu difesto edi. Bu mudiye mulunda wa basedianganyi, mbimueneke se: Mariya udi wabanyina babikidibue bavule bidibo bakengela. Nunku, udi ujingulula lukasa dipangika dia tshimue tshintu, ne udi umanyisha Yezu ne: “Kabatshiena ne mvinyo.”

Padi Mariya, kabiyi mpata, ulomba Yezu bua kuenza bualu kampanda bu mukavua mvinyo mupangike, diambedi Yezu udi wanji kuleja dibenga. “Ndi nebe bualu kayi? ” Ke mudiye umuebeja. Bu mudiye Mukalenge musungula kudi Nzambi, dîku diende anyi balunda bende ki mbadi ne bua kumulombola mu bidiye ne bua kuenza to. Nanku, Mariya udi uleja meji pa kushiya bualu ebu mu bianza bia muanende, wambila anu basadidi ne: “Tshionso tshianuambilaye, nuenze.”

Kudi milondo ya mabue minene isambombo idibu bela mâyi, wonso wa kudiyu udi mua kuwula kupita pa litre makumi anayi. Yezu udi utumina basadidi aba dîyi ne: “Uwujayi milondo tente ne mâyi.” Basadidi badi bayuwuja tente ne pa milomolomo. Pashishe, Yezu udi wamba ne: “Mpindieu, tuntayi ndambu ne ndayi kupesha mulombodi wa difesto.”

Mulombodi udi ukema mushindu udi mvinyo musheme, kayi mua kujingulula ne: mmupatula mu tshishima. Ubikila musedi, udi umuambila ne: “Muntu yonso utu ufila mvinyo musheme diambedi, pashishe pakadi bantu bakuatshike, wa nankunanku. Wewe walami mvinyo mupite kushema too ne mpindieu.”

Etshi ntshishima tshia kumpala tshia Yezu, kutshimona kudi kukolesha ditabuja dia bayidi bende bapiabapia. Pashishe, pamue ne mamuende ne bana babo bakuabu ba balume, badi benza luendu batangile ku tshimenga tshia Kapernaume, pabuipi ne Mbuu wa Ngalileya. Yone 2:1-12, NW.

▪ Ntshikondo kayi tshia mudimu wa Yezu tshidi difesto dia dibaka dienzeka mu Kana?

▪ Bua tshinyi Yezu udi uleja dibenga bua dilomba dia mamuende?

▪ Ntshishima kayi tshidi Yezu wenza, ne tshidi ne buenzeji kayi kudi bakuabu?