Nshapita wa 46

Ulengele tshilamba tshiende

LUMU lua difumina dia Yezu ku Dekapole ndumuangalake mu Kapernaume, ne musumba munene udi unguila ku muelelu wa mbuu bua kumuakidila. Kabiyi mpata, bakaadi bumvue lumu lua dibatamija dia tshipepele tshikole ne diondopa dia bantu bavua bakuata kudi ba-demon. Mpindieu, padiye utua makasa ku mpata, badi bamunyungulula, mitshima mibandisha ne ditekemena dionso.

Umue wa ku badi bazukila bua kumona Yezu ke Jairuse, umue wa ku batangidi ba nsunagoga. Udi upona ku makasa a Yezu ne umusengelela bikole ne: “Muananyi wa bakaji mutekete udi ne kusama kukole. Bu wewe mua kusua, vuaku umutenteke bianza, bua umvue bimpe ne ikale ne muoyo.” Muine eu bu mudiye wende umuepele ne mutshikale ne bidimu 12 patupu, mmutekela mutshima wa Jairuse.

Yezu udi wanyisha ne, mutua munyima kudi musumba, udi uya ku nzubu kua Jairuse. Tudiku mua kutshinka disansakata dia bantu badi batekemena kumona tshishima tshikuabu. Kadi mu musumba eu, mukaji kampanda mmutume ntema ku buende bualu bunene budi bumutonda.

Kukadi bidimu 12, mukaji eu udi ukenga ne disama dia mashi. Mmuye kudi baminganga kabukabu, mutule mfranga yende yonso bua kuondopibua. Kadi, ki mmupete diambuluisha; bishilangane, kusama kuende nkutambe kukola.

Anu muudi mua kutshinka, pa kumusha dibototoka dia mubidi, disama diende didi dimulubakaja ne dimufuisha bundu. Pa tshibidilu, muena disama edi kêna mua kuditela ku bantu. Kabidi, bilondeshile Mikenji ya Mozese, mukaji yonso udi ne disama dia mashi udi ne bukoya, eu yonso udi umulenga, yeye anyi bilamba biende bidi ne mashi, udi ne bua kuowa mâyi ne kushala muena bukoya too ne ku dilolo.

Mukaji eu umvuile bakula bua bishima bia Yezu, ne wamumonyi mpindieu. Bua bukoya buende, udi udifinya pa kusokoka tshidiye muende muonso, udiambila ne: “Meme mulenge anu bilamba biende bia pa mutu, nengumvue bimpe.” Padiye wenza nunku, diakamue udi umvua se: mashi ende akami!

“Nnganyi wandengi?” Mmunyipu mudi mêyi a Yezu aa ne bua kumupampakaja! Mmunyi mudiye mua kumanya? ‘Mulongeshi,’ ke mudi Petelo utontolola, ‘misumba mmikunyungulule ne ikufinakaja nseke yonso, mmunyi muudi mua kuebeja ne: “Nnganyi wandengi?”’

Ukenzakana bua kumona mukaji, Yezu udi umvuija ne: “Muntu mmundenge, bualu ngumvu bukole bupatuke munda muanyi.” Bushuwa, eku kulenga nkua pa buaku, bualu nkutuale luondapu ludi lufume ku bukole bua Yezu.

Padiye umona ne: muanda udiye muenze ki mmupange kumanyika, ne buôwa ne kuzakala, mukaji udi usemena ne upona ku makasa a Yezu. Kumpala kua bantu buonso, udi utonda bulelela buonso pa disama diende ne mushindu udiye muondopibue mpindieu.

Pa kumona ditonda diende dijima, Yezu udi umumvuila luse ne umukankamija ne: “Muananyi wa bakaji, ditabuja diebe diakupeteshi kusanguluka. Ndaku mu ditalala, wondopibue ku disama diebe dikole.” Mmunyipu mudibi bilengele bua kumanya se: Eu udi Nzambi musungule bua kukokesha buloba mmuntu wa musangelu, muena luse, mutabaledi wa bantu, kabidi udi ne bukole bua kubambuluisha! Matayo 9:18-22; Mâko 5:21-34; Luka 8:40-48; Lewitiki 15:25-27, NW.

▪ Jairuse nnganyi, ne bua tshinyi udi ulua kudi Yezu?

▪ Ndutatu kayi ludi nalu mukaji kampanda, ne bua tshinyi ki mbipepele bua yeye kulua kukeba diambuluisha kudi Yezu?

▪ Mmunyi mudi mukaji wondopibua, ne mmunyi mudi Yezu umukankamija?