Nshapita wa 7

Yezu ne bena lubuku lua mitoto

BALUME bungi kampanda badi bafumina ku Est. Ke bena lubuku lua mitoto​—bantu bàdì bamba mudibo bajandula malu masokome pa kulonga dijalama dia mitoto. Pavuabo kuabu ku Est, bakamona mutoto mupiamupia, ne bakawulonda mutantshi wa kilometre nkama mivule too ne ku Yeruzaleme.

Padi bena lubuku lua mitoto babuela mu Yeruzaleme, badi bakonka ne: “Eu udi muledibue mukalenge wa bena Yuda udi penyi? Bualu tuvua bamone mutoto wende patuvua ku est ne tudi balue bua kumunemekela.”

Padi mukalenge Herodese mu Yeruzaleme umvua lumu elu, mutshima udi umumata mashi. Nunku udi ubikidisha bakuidi bamfumu ne ubebeja muaba udi Kristo ne bua kuikala muledibue. Pa kushindamena pa Mifundu, badi bandamuna ne: “Mu Beteleme.” Umvua nanku, Herodese udi ubikidisha bena lubuku lua mitoto ne ubambila ne: “Ndayi, nukebe muana bitulu bitulu, panuamumona nuvue kummanyisha, bua meme panyi nye, kumunemekela.” Kadi bushuwa, Herodese udi ujinga kumanya muaba udi muana bua kumushipa!

Padibo bamata mu njila, bualu bua dikema budi buenzeka. Mutoto uvuabo bamone pavuabo ku Est udi wenda kumpala kuabo. Mbimueneka se: Ki mmutoto bu mikuabu miena-dîna to, kadi mmupatula anu bua kubalombola. Bena lubuku lua mitoto badi batungunuka ne kuwulonda too ne padiwu wimana pa mutu pa nzubu udi Yozefe ne Mariya basombele.

Padi bena lubuku lua mitoto babuela mu nzubu, badi basangana Mariya ne muanende mutekete, Yezu. Diakamue, buonso buabu badi bamuinamina. Pashishe, badi bapatula mu mabuki abu milambu ya ngolo, manananshi a oliban ne a myrrhe. Pashishe, pakadibu pa kupingana bua kuambila Herodese muaba udi muana, Nzambi udi ubadimuija mu tshilota bua kubenga kuenza nunku. Nunku, badi balukila ku ditunga diabu pa kulonda njila mukuabu.

Buebe wewe, nnganyi uvua mumueneshe mutoto mu diulu bua kulombola bena lubuku lua mitoto? Uvuluka se: mutoto ki mmubalombole buludiludi too ne kudi Yezu mu Beteleme nansha. Kadi, bakanji kulombodibua too ne mu Yeruzaleme muakamonanganabo ne mukalenge Herodese, uvua ujinga kushipa Yezu. Ne ke tshivuaye mua kuikala muenze bu Nzambi kayi muenze bualu kampanda pa kudimuija bena lubuku lua mitoto bua kubenga kuambila Herodese muaba uvua Yezu. Muena lukuna wa Nzambi, Satana Diabolo, ke uvua musue bua Yezu ashipibue, ne wakatumika ne mutoto eu bua kuteta mua kukumbaja kipatshila kende. Matayo 2:1-12, NW; Mika 5:2.

▪ Ntshinyi tshidi tshileja se: mutoto mumona kudi bena lubuku lua mitoto kawuvua bu mikuabu miena-dîna?

▪ Yezu udi penyi dîba didi bena lubuku lua mitoto bamumona?

▪ Bua tshinyi tudi bamanye se: Satana ke uvua mumueneshe mutoto bua kulombola bena lubuku lua mitoto?