Nshapita wa 96

Yezu ne mfumu nsonga mubanji

PADI Yezu ukosolola distrike dia Pereya mutangile ku Yeruzaleme, nsongalume kampanda udi wasa lubilu ne utua binu kumpala kuende. Muntu eu udi ubikidibua mfumu, ebi bidi pamu’apa buimvuija ne: udi ne muanzu munene mu nsunagoga wa muaba eu peshi udi mene muena mu Sanhedrin. Kabidi, mmubanji wa menemene. “Mulongeshi muimpe,” ke mudiye webeja, “ndi ne bua kuenza tshinyi bua kupiana muoyo wa kashidi?”

“Bua tshinyi udi umbikila muimpe?” ke mudi Yezu upindulula. “Kakuena muntu muimpe nansha umue, pa kumusha umuepele, Nzambi.” Pamu’apa nsongalume eu udi utumika ne muaku “muimpe” bu muanzu, nunku Yezu udi umumanyisha ne: muanzu bu nunku udi bua Nzambi nkayende.

“Kadi,” ke mudi Yezu utungunuka, “biwikala ujinga bua kubuela mu muoyo, utungunuke ne kutumikila mêyi-matuma.”

“Ng’epi awu?” ke mudi muntu eu webeja.

Pa kutela atanu a ku Mêyi-matuma Dikumi, Yezu udi wamba ne: “Ee, kuena ne bua kushipa muntu, kuena ne bua kuenda masandi, kuena ne bua kuiba, kuena ne bua kufila bujadiki bua dishima, unemeke tatuebe ne mamuebe.” Ne pa kusakidila dîyi-dituma dikuabu dia mushinga mukole, Yezu udi wamba ne: “Udi ne bua kunanga muntu nebe bu wewe muine.”

“Malu aa wonso ndi mualame katshia ku buana,” ke mudi muntu eu wandamuna ne muoyo umue. “Ntshinyi tshikuabu tshidi tshinshadile?”

Pa kuteleja dilomba edi diondoke dienza ne muoyo umue, Yezu udi umvua dinanga bua nsongalume. Kadi Yezu udi ujingulula mudi muntu eu mulamate ku bintu bia ku mubidi ne udi umusokoluela tshidiye ukengela: “Nkukushadile tshintu tshimue: Yaku, usumbishe bintu bionso biwudi nabi ne upeshe bapele, neupete tshiuma mu diulu, ne uvue mundondi.”

Muntu udi ujuka ne uya mubungame bikole, Yezu pende mumutangile, kabiyi mpata, ne dimumvuila luse. Bubanji buende mbumufofomije bua kajinguludi mushinga wa tshiuma tshilelela. “Mmushindu kayipu,” ke mudi Yezu udiabakena, “wikalabi bikolele aba badi ne mfranga bua kubuelabo mu bukalenge bua Nzambi!”

Mêyi a Yezu adi akemesha bayidi. Kadi, badi bakemeshibua bipitshidile padiye utungunuka pa kumanyisha dîyi-diakaji kampanda didi ditangila buonso: “Mbitambe kupepela bushuwa bua kamelo kupitshila mu disu dia kashingi kupita muntu mubanji bua kubuelaye mu bukalenge bua Nzambi.”

“Nanku, nnganyi udi mua kusungidibua?” ke mudi bayidi bakengela kumanya.

Ubatuishila mesu, Yezu udi upindulula ne: “Bua bantu, kabiena mua kuenzeka, kadi ki mbua Nzambi, bualu, bua Nzambi malu wonso adi’anu mua kuenzeka.”

Umvuija mudibo benze disungula dishilangane bikole ne edi dia mfumu nsonga mubanji, Petelo udi wamba ne: “Tangila! Tuetu tudi bashiye bintu bionso ne bakulonde.” Nunku, udi webeja ne: “Ntshinyi bushuwa tshikalaku buetu tuetu?”

“Dîba dia difukulula,” ke mudi Yezu ulaya, “padi Muana wa muntu usomba pa muoba wende wa butumbi, nuenu bavua bandonde nenusombe penu pa mioba dikumi ne ibidi, nulumbuluisha bisa dikumi ne bibidi bia Izalele.” Eyowa, Yezu udi uleja ne: nekuikale difukulula dia nsombelu ya pa buloba, ne ndekelu wa bionso, bintu nebivue anu muvuabi mu budimi bua Edene. Petelo ne bayidi bakuabu nebapete difutu dia kuikala ne Kristo bakokesha Mparadizu eu mualabale pa buloba bujima. Bushuwa, difutu dia mpatshi dia mushindu’eu ndikumbanyine kudipangisha tshintu kayi tshionso!

Kadi, nansha mpindieu kudi mafutu kampanda, anu mudi Yezu ujadikilamu ne: “Kakuena muntu udi mushiye nzubu anyi bana babo ba balume anyi bana babo ba bakaji anyi mamuende anyi tatuende anyi bana bende balela anyi madimi bua bualu buanyi ne bua lumu luimpe, wapanga kupeta misangu lukama mpindieu mu tshitshia etshi tshia tshikondo, nzubu ne bana babo ba balume ne bana babo ba bakaji ne ba-mamuende ne bana bende balela ne madimi, pamue ne makengeshibua, ne mu ndongoluelu wa malu utshilualua, muoyo wa kashidi.”

Anu mudi Yezu ulaya, kuonso kudi bayidi bende baya pa buloba bujima, badi mu malanda makole ne masheme adi abasuikakaja ne bena nkristo nabo kupita aa adi pankatshi pabo ne bena dîku diabu dibalela. Anu mudibi bimueneka, mfumu nsonga mubanji eu udi udipangisha difutu edi pamue ne muoyo wa kashidi mu Bukalenge bua mu diulu bua Nzambi.

Pashishe, Yezu udi usakidila ne: “Kadi, bavule badi ba kumpala nebikale ba ndekelu, ne ba ndekelu nebikale ba kumpala.” Udi usua kumvuija tshinyi?

Udi usua kumvuija ne: bantu bavule badi ba “kumpala” ku dibabidila masanka kampanda mu malu a ntendelelu, bu mudi mfumu nsonga mubanji eu, kabakubuela mu Bukalenge. Nebikale “ba ndekelu.” Kadi bavule, kusangisha bayidi badipuekeshi ba Yezu, badi bapepejibua kudi Bafarizeyi badikokodi mudibo bakane pa kubabala bu “ba ndekelu”​—bu bantu ba pa buloba, anyi ‘am ha·’aʹrets—​nebavue “ba kumpala.” Kulua “ba kumpala” eku kudi kumvuija ne: nebapete muabi wa kulua bakokeshi pamue ne Kristo mu Bukalenge. Mâko 10:17-31; Matayo 19:16-30; Luka 18:18-30, NW.

▪ Anu mudibi bimueneka, nsongalume mubanji udi mfumu wa mushindu kayi?

▪ Bua tshinyi Yezu udi ubenga bua kubikidibua muimpe?

▪ Mmunyi mudi muanda wa mfumu nsonga uleja patoke njiwu ya kuikala mubanji?

▪ Mmafutu kayi adi Yezu ulaya bamulondi?

▪ Mmunyi mudi ba kumpala balua ba ndekelu, ne ba ndekelu balua ba kumpala?