Nshapita wa 59

Yezu nnganyi menemene?

PADI buâtu budi buambule Yezu ne bayidi bende bufika mu Betesaida, bantu badi bamutuadila mufofo ne bamulomba bua kulenga muntu eu bianza ne kumuondapa. Yezu udi ukuata muntu ku tshianza too ne pambelu pa musoko ne, yeye mumane kumutuila mata pa mesu, udi webeja ne: “Udiku umona tshintu anyi?”

‘Ndi mmona bantu,’ ke mudi muntu wandamuna, ‘bualu ndi ntangila bimueka bu mitshi, kadi bidi bienda.’ Utenteka bianza biende pa mesu a mufofo, Yezu udi wakajilula lumonu luende, ne udi umona bimpe. Pashishe, Yezu udi walukija muntu kuende, umukandika bua kubuela mu musoko.

Mpindieu, Yezu udi umuka ne bayidi bende, uya mu misoko ya ku Sezaré wa Filipoi, ku Nord menemene wa Palestine. Sezaré mmusoko udi mu buloba bulengele budi kubanda metre matue ku 350 kumukila pa mutu pa mbuu, ne njila udi ufikishaku udi ubanda kilometre mitue ku 50. Luendu ludi lunenga pamu’apa matuku abidi.

Mu njila, Yezu udi uditola bua kusambila. Nkumushadile anu ngondo bu tshitema anyi dikumi bua kuakamaye lufu luende, ne udi welangana meji bua bayidi bende. Bavule bakadi balekele kumulonda. Bakuabu pabu badi bamueneka belakana ne batekeshibue ku muoyo bualu uvua muimanshe madikolela a bantu bua kumuteka bu mukalenge, ne kabidi bualu kakafila tshimanyinu tshia mu diulu bua kujadika mudiye mukalenge musangu wakamuteta baluishi bende. Bapostolo bende badi bela meji kayi pa bumuntu buende? Padibu balua kumusangana muaba udiye usambila, Yezu udi ubebeja ne: “Misumba idi yamba ne: ndi nnganyi?”

“Bamue badi bamba ne: Yone Mubatiji,” ke mudibo bandamuna, “bakuabu ne: Eliya, bakuabo pabo ne: Yelemiya anyi umue wa ku baprofete.” Eyowa, bantu badi bela meji ne: Yezu ng’umue wa ku bantu aba mubiishibue ku bafue!

“Kadi nuenu, nudi nuamba ne: ndi nnganyi?” ke mudi Yezu webeja.

Diakamue Petelo udi wandamuna ne: “Udi Kristo, Muana wa Nzambi udi ne muoyo.”

Yeye mumane kuanyisha diandamuna dia Petelo, Yezu udi wamba ne: “Ndi nkuambila, Wewe udi Petelo, ne pa dibue edi nengibakilepu tshisumbu tshianyi, ne biibi bia Hadès kabiakutshipita bukole.” Apa, diambedi Yezu udi umanyisha ne: neibake tshisumbu ne nansha lufu luine kaluakulama kashidi bena mu tshisumbu etshi panyima pa nsombelu wabu wa lulamatu pa buloba. Pashishe, udi wambila kabidi Petelo ne: “Nenkupeshe nsapi ya bukalenge bua mu diulu.”

Apa, Yezu udi usokolola ne: Petelo udi ne bua kupeshibua masanka a mudimu a pa buawu. Tòo, Petelo kêna upeshibua muaba wa kumpala munkatshi mua bapostolo, peshi utekibua tshishimikidi tshia tshisumbu nansha. Yezu yeye muine udi dibue, pa dibue edi ke pibakiibua tshisumbu tshiende. Kadi Petelo udi ne bua kupeshibua nsapi isatu, yatumikaye nayi bua kunzulula, mu ngakuilu kampanda, muabi bua bimue bisumbu bia bantu kubuela mu Bukalenge bua mu diulu.

Petelo neakuate mudimu ne nsapi wa kumpala dia Pentekoste wa 33 B.B. bua kuleja bena Yuda banyingaladi tshidibu ne bua kuenza bua kupandishibua. Neakuate mudimu ne nsapi muibidi lupolo luîpi pashishe bua kunzuluila bena Samariya bena kuitabuja muabi wa kubuela mu Bukalenge bua Nzambi. Pashishe, mu 36 B.B. neakuate mudimu ne nsapi muisatu bua kunzuluila Bampangano bakena batengula, Korneliyo ne balunda bende, muabi wa muomumue.

Yezu udi utungunuka ne kuyukidilangana kuende ne bapostolo bende. Udi ubabungamija padiye ubambila bua makenga ne lufu biakamaye mu katupa kîpi mu Yeruzaleme. Bua kupanga kujingulula se: Yezu neabiishibue bua kuikala ne muoyo mu diulu, Petelo udi ukoka Yezu ku luseke. “Mukalenge, dilejaku bulenga wewe muine,” ke mudiye wamba. “Kuakututa dikasa dibi dia mushindu’eu nansha.” Kadi, Yezu udi ukudimuka, umuamba ne: “Pita munyima muanyi, Satana! Udi tshilenduishi kundi, bualu meji awudi wela, ki mbilondeshile ngenyi ya Nzambi, apo mbilondeshile ya bantu.”

Bidi bimueneka se: pa kumusha bapostolo, bakuabu bantu badi benza luendu ne Yezu, nunku udi ubabikila mpindieu kudiye ne ubumvuija ne: kabiakuikala bipepele bua kuikala bamulondi to. “Biasua muntu kundonda,” ke mudiye wamba, “adipidie yeye muine ne angate mutshi wende wa tshinyongopelu ne atungunuke ne kundonda. Bualu, eu yonso udi musue kupandisha anyima wende neamujimije, kadi eu udi ujimija anyima wende bua bualu buanyi ne bua lumu luimpe neamupandishe.”

Eyowa, biasuabu kudileja bakumbanyine kuanyishibua kudiye, balondi ba Yezu badi ne bua kuikala bena dikima ne nsombelu wa didipangisha amue masanka. Udi wamba ne: “Bualu eu yonso udi ufua bundu bualu buanyi ne bua miaku yanyi munkatshi mua tshipungu etshi tshiena masandi ne mpekatu, Muana wa muntu neafue pende bundu bualu buende, padiye ufika mu butumbi bua Tatuende pamue ne banjelu bansanto.” Mâko 8:22-38; Matayo 16:13-28; Luka 9:18-27, NW.

▪ Bua tshinyi Yezu udi welangana meji bua bayidi bende?

▪ Bantu badi ne mmuenenu wa se: Yezu nnganyi?

▪ Nnsapi kayi idi Petelo upeshibua, ne mmunyi muakuataye nayi mudimu?

▪ Ndilengejibua kayi didi Petelo upeshibua, ne mbua tshinyi?