Nshapita wa 128

Yezu udi ne muoyo!

PADI bakaji basangana lukita lua Yezu munda mutupu, Mariya Magdalene udi unyema bua kumanyisha Petelo ne Yone. Kadi, anu mudibi bimueneka, bakaji bakuabu badi bashala ku lukita. Katupa kîpi pashishe, muanjelu udi ubamuenekela ne ubalomba bua kubuela munda mualu.

Muinemu, bakaji badi bamona muanjelu mukuabu, ne umue wa ku banjelu aba udi ubambila ne: ‘Nuenu, kanutshinyi to. Ndi mumanye ne: nudi nukeba Yezu uvuabo bele ku mutshi. Kena apa to, ukadi [mubiishibue, NW] ku lufu bu muvuaye muambe. Kanumonayi muaba uvuaye mulale. Ndayi lukasa, nuambile balongi bende ne: [mmubiishibue, NW] ku bafue.’ (MMM) Nunku, ne kutshina kabidi ne disanka divule, bakaji aba badi pabu baya lubilu.

Mu mutantshi eu, Mariya mmupetangane ne Petelo ne Yone, ne udi ubambila ne: “Bakumusha Mukelenge mu lukita [lua tshivulukilu, NW], katuena bamanye kuakumuladikabo.” Diakamue, bapostolo aba babidi badi baya lubilu. Yone mmuena lubilu lukole​—bumue mbua patshidiye nsongalume—​ne udi ufika ku lukita kumpala. Dîba edi bakaji bakadi bumuke, ne kakutshiena muntu pabuipi. Padiye winama, Yone udi ukenketa mu lukita ne umona mikaba, kadi udi ushala muimane pambelu.

Padi Petelo ufika, kêna yeye welakana, kadi udi ubuela diakamue. Udi umona mikaba panshi, pamue ne tshilamba tshivuabu bajingile Yezu ku mutu. Ntshivunga pa nkayatshi ku luseke. Yone udi ubuela pende mu lukita mpindieu, ne udi witaba bumanyishi bua Mariya. Kadi, nansha Petelo anyi Yone, kakuena udi ujingulula se: Yezu mmubiishibue, nansha muvuaye mubambile misangu mivule ne: neabiishibue. Ne kulubakana, bubidi buabu badi bapingana ku nzubu, kadi Mariya, udi mualukile ku lukita, udi yeye ushalaku.

Mu lupolo elu, bakaji bakuabu badi bambuluja bua kuambila bayidi ne: Yezu mmubiishibue, anu muvua banjelu babatumine dîyi. Bu mudibu benda banyema muabu muonso, Yezu udi usambakena nabu ne wamba ne: “Muoyo wenu au!” Badi bapona ku makasa ende, bamunemekela. Pashishe Yezu udi wamba ne: “Lekelayi kutshina! Ndayi nuambile bana betu, baye mu Ngalileya, nebammuenene momo amu.” (MMM)

Musangu mushale pakenzeka tshikumina ne pakamueneka banjelu, basalayi bateka bua kulama lukita bakuuma ne buôwa ne kuenza bu bafue. Bamane kukankamana, bakaya diakamue mu tshimenga ne kuambila bakuidi bamfumu tshivua tshienzeke. Bamane kuela tshipangu ne “bakulu ba ditunga” ba bena Yuda, bakangata dipangadika bua kutetabu mua kujibakaja muanda eu pa kubuejila basalayi. Bakabatumina dîyi edi: ‘Nuambe ne: Patuakadi balale tulu, bayidi bende bakalua butuku, bakamuiba.’

Bu mudi basalayi bena Roma mua kunyokibua pa kushipibua bua dipona mu tulu ku miaba yabu ya mudimu, nunku bakuidi badi balaya ne: “Biumvua ngovena tshilumbu etshi [tshia kupona kuenu mu tulu], netumuitab[ijij]e, netunusungile, kanuena ne bualu.” Bu muvuabu bapeshibue mfranga ya nkosa-mishiku bungi bukumbane, basalayi bakenza anu muvuabu babatumine dîyi. Bu tshipeta, lumu lua dishima lua kuiba kua mubidi wa Yezu luakatangalaka bikole munkatshi mua bena Yuda.

Mariya Magdalene, mu dishala diende ku lukita, udi umvua dibungama dikole. Nkuepi kudi Yezu mua kuikala? Padiye winama kumpala bua kutangila mu lukita, udi umona banjelu babidi bavuale bilamba bitoke, bamumuenekela tshiakabidi! Umue mmusombe ku mutu ne mukuabu ku makasa, muaba uvuabu baladike tshitalu tshia Yezu. “Muka[j]i, udi udidila tshinyi?” ke mudibu bebeja.

“Bua bakuya ne mukelenge wanyi,” ke mudi Mariya wandamuna, “tshiena mumanye kuakumuladikabo.” Pashishe udi ukudimuka ne umona muntu, eu udi wambulula luine lukonko elu ne: “Muka[j]i, udi udidila tshinyi?” Ne muine eu udi webeja kabidi ne: “Udi ukeba nganyi?”

Pa kutshinka se: muntu eu udi ne bua kuikala mukubi wa budimi mudi lukita, udi umuambila ne: ‘Mukelenge, biwikala mumumushe kun[eku], ungambile kuwakumuladika, nemmuangate.’

“Mariya!” ke mudi muntu eu wamba. Diakamue, ku ngakuilu wende wa pa tshibidilu, udi umanya ne: nYezu. “Rab·bo’ni!” (mmumue ne: “Mulongeshi!”) (NW) ke mudiye utua tshikemu. Ne disanka dikena mikalu, udi umukuata pambidi. Kadi, Yezu udi wamba ne: “Kundengi tshianza, bualu bua tshiena muan[ji] kuya kulu kudi Tatu; ya kudi bana betu, ubambile ne: Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu.”

Mariya udi unyema mpindieu mutangile ku muaba udi bapostolo ne bena diabu bayidi basangile. Udi usakidila buende bumanyishi ku lumu lukavua bakaji bakuabu bamane kufila pa bidi bitangila kumona kuabu kua Yezu mubiishibue. Kadi, anu muvuabu babenge kuitaba mêyi a bakaji ba kumpala, bantu aba badi bamueneka kabayi bitaba nansha mêyi a Mariya. Matayo 28:3-15; Mâko 16:5-8; Luka 24:4-12; Yone 20:2-18.

▪ Panyima pa disangana lukita munda mutupu, Mariya Magdalene udi wenza tshinyi, ne mmalu kayi adibu bamona kudi bakaji bakuabu?

▪ Ngandamuinu wa Petelo ne Yone udi tshinyi padibu basangana lukita munda mutupu?

▪ Padibu baya bua kumanyisha bayidi dibiishibua dia Yezu, nnganyi udi bakaji bakuabu basambakena nende?

▪ Ntshinyi tshiakenzekela basalayi bateka bua kulama lukita, ne ndiandamuna kayi diakafidibua ku lumu luakatuadilabu bakuidi?

▪ Ntshinyi tshidi tshienzeka padi Mariya Magdalene ushala nkayende ku lukita, ne ngandamuinu wa bayidi ku ngumu mituala kudi bakaji udi tshinyi?