Nshapita wa 52

Yezu udi udiisha binunu bivule mu tshishima

BAPOSTOLO 12 mbenze dinyunguluka dilenga dia bumanyishi mu Ngalileya. Mpindieu, katupa kîpi kunyima kua dishipibua dia Yone, badi bapingana kudi Yezu ne bamulondela malu a dikema adibu bamone ne benze. Pa kumona kupungila kuabu ne bu mudi bantu bavule bashintulukangana, bipangisha bapostolo mua kuela tshianza mukana, Yezu udi ubambila ne: ‘Tuyayi muaba mupengame, bua numone mua kuikisha.’

Badi babuela mu buatu buabu, imue misangu bidi pabuipi ne Kapernaume, biita batangile ku muaba mupengame, bimueneka bu lua ku Est wa Yordane, dishiya ku Betesaida. Kadi bantu bavule badi bamona mudibo bumuka, ne bakuabu bumvua babuakula. Buonso aba badi badianjila kumpala, benda ku muelelu wa mâyi, ne padi buatu butua dîulu ku mpata, bantu mbabindile.

Padiye utuluka mu buatu ne umona musumba eu munene, Yezu udi umvua luse, bualu badi bu mikoko mipange mulami. Nunku, udi wondopa babedi ne utuadija kubalongesha malu mavule.

Dîba didi dilembelela lukasa, ne bayidi ba Yezu badi basemena kudiye ne bamuambila ne: “Tudi muaba mupengame, ne dîba dikadi dimane kupita. Batume mu bitupa bia pabuipi ne mu misoko ya ku mpenge bua basumbe biakudia.”

Kadi, Yezu udi ubandamuna ne: “Nuenu bine bapeshayi biakudia.” Pashishe, bu mudi Yezu mumanye bimpe tshidiye pa kuenza, udi uteta Filipe pa kumuebeja ne: “Nkuepi kutuasumba mampa bua bine aba bapete tshiakudia?”

Bua Filipe, kakuena mushindu nansha. Pa kuamba, kudi balume 5 000, anyi imue misangu bantu bapite pa 10 000 bu tuetu mua kubala kabidi bakaji ne bana! Filipe udi wadamuna ne: “Ndenariyo nkama ibidi [ndenariyo umue ndifutu bua mudimu wa dituku dijima] bua mampa ki mbianji kukumbana bua muntu yonso kupeta kapese.”

Pamu’apa bua kuleja mudibi bikole bua kudiisha musumba munene nunku, André udi wela pende dîyi ne: “Kudi muana muaba eu ne mampa a orje atanu ne mishipa ibidi,” usakidila ne: “Bidi mene ne dikuatshisha kayi bu mudi bantu ba bungi nenku?”

Bu mudibi mu muvu wa disampila kumpala kua Pasaka wa mu 32 B.B., kudi tshisuku tshia bungi. Nunku, ku dîyi difila kudi Yezu, bayidi badi balomba bantu bua kusomba batangalake mu bisumbu bia bantu 50 ne 100 pa tshimue. Udi wangata mampa aa atanu ne mishipa eyi ibidi, ubandisha mêsu mu diulu ne usambila, pashishe utuadija kutshibula mampa ne kukosa mishipa mu bitupa. Udi ubipesha bayidi bende, ne bine aba babiabanyina bantu. Bualu bua dikema, bantu buonso badi badia ne buukuta pa nzala yabu!

Pashishe, Yezu udi wambila bayidi bende ne: “Sangishayi bitupa bionso bidi bishale, bua kakujiminyi kantu nansha kamue.” Padibo babisangisha, badi buwuja bisaka 12 ne bishadile bia bivua bidiibue! Matayo 14:13-21; Mâko 6:30-44; Luka 9:10-17; Yone 6:1-13, NW.

▪ Bua tshinyi Yezu udi ukeba muaba mupengame bua bapostolo bende?

▪ Yezu udi uya ne bayidi bende penyi; ne bua tshinyi badi’anu bapanga kuikisha?

▪ Padi dîba dipita bikole, bayidi badi bapesha Yezu lungenyi kayi, kadi mmunyi mudiye uleja ditabalela diende bua bantu?