Nshapita wa 42

Yezu udi ukanyina Bafarizeyi

BIKALAYE wipata ba-demon ku bukole bua Satana, ke mêyi a Yezu, nunku Satana mmuditapulule. “Nudi nuvuija mutshi muimpe ne bimuma biawu bimpe,” ke mudiye utungunuka, “anyi nudi nuvuija mutshi mubole ne bimuma biawu bibole; bualu mutshi udi umanyika ku bimuma biawu.”

Ki mbia meji bua kutumpila Yezu ne: tshimuma tshiende tshimpe tshia diipata ba-demon ntshipeta tshia mudimu udiye usadila Satana. Bikala bimuma bimpe, mutshi kawena mua kuikala mubi to. Kadi, bimuma bibole bia Bafarizeyi, matumpi abu a bupumbe ne buluishi buabu bukena nshindamenu kudi Yezu ntshijadiki tshia se: buobo bine mbabole. “Ndelu ya nyoka,” ke mudi Yezu utua tshikemu, “mmunyi munudi mua kuamba malu mempe, panudi bantu babi? Bualu, mukana mudi muakula ku dibodiama dia bidi mu mutshima.”

Bu mudi mêyi etu aleja ngikadilu wa mitshima yetu, bitudi tuamba bidi bifila tshishimikidi bua dilumbuluishibua. “Ndi nnuambila,” ke mudi Yezu wamba, “Wonso muaku wa tshianana wikala bantu bakule, nebawupile tshilumbu dituku dia tshilumbuluilu. Bualu miaku yebe ke yakubingisha, miaku yebe ke yakupisha kabidi.” (Mukenji Mulenga)

Nansha mudi Yezu muenze midimu mivule ya bukole, baskribe ne Bafarizeyi badi bamulomba ne: “Mulongeshi, tudi basue kumona tshimanyinu tshia kuudi.” Nansha bikala bantu aba bafume ku Yeruzaleme kabayi badimuene bishima biende, badi ne bijadiki bidimuenekele ne mêsu bikena kuvila. Nunku, Yezu udi wambila bamfumu ba bena Yuda ne: “Tshipungu tshibi ne tshiendi tshia masandi tshidi tshitungunuka ne kukeba tshimanyinu, kadi tshimanyinu katshiakufidibua pa kumusha tshimanyinu tshia Yona muprofete.”

Pa kumvuija tshidiye musue kuamba, Yezu udi utungunuka ne: “Anu muvua Yona mushale munda mua mushipa munenanenayi matuku a munya asatu ne a butuku asatu, ke muashala Muana wa muntu mu mutshima wa buloba matuku a munya asatu ne a butuku asatu.” Panyima pa mushipa mumane kumumina, Yona wakapatuka bu mubiisha ku lufu, nunku Yezu udi umanyisha ne: neafue ne neapingajibue ku muoyo dituku disatu. Pabi, nansha padi Yezu ubiishibua pashishe, bamfumu ba bena Yuda badi bimansha “tshimanyinu tshia Yona.”

Nunku, Yezu udi wamba ne: bantu ba mu Ninive bakanyingalala bua bumanyishi bua Yona nebabiishibue dîba dia dilumbuluisha bua kupiisha bena Yuda badi bapidia Yezu. Bia muomumue, udi ufuanyikija kabidi muanda eu ne mukalenge mukaji wa ku Sheba, wakafumina ku mfudilu kua buloba bua kuteleja meji a Solomo ne wakakatshila bua malu akamonaye ne kumvua. “Kadi, tangilayi!” ke mudi Yezu ujadika, “kudi tshidi tshitambe Solomo apa.”

Pashishe, Yezu udi ulonda mufuanu wa muntu udi spiritu ukena mukezuke upatuka munda. Kadi, muntu eu udi upanga kuwuja muaba mushiya mutupu ne bintu bilenga, nunku, spiritu mipite bubi muanda-mutekete idi ilua kupàta munda muende. “Ke muikalabi kabidi bua tshipungu etshi tshibi,” ke mudi Yezu wamba. Ditunga dia Izalele diakakezudibua ne diakapeta mashintuluka​—muanda udi mua kufuanyikijibua ne kuya bua matuku makese kua spiritu mubi. Kadi, kubenga kuadi kua baprofete ba Nzambi, kudi kufike mu tshitupa tshibi ne buluishi buadi kudi Kristo yeye muine, kudi kusokolola ne: ngikadilu wadi wa bubi mmupite wa ku ntuadijilu.

Padi Yezu wakula, mamuende ne bana babo ba balume badi bafika ne biimana pabuipi ne musumba. Nunku, muntu kampanda udi umuambila ne: “Mona! Mamuebe ne bana benu ba balume mbimane pambelu, bakeba mua kuakula nebe.”

“Mamuanyi nnganyi, ne bana betu ba balume mbanganyi?,” ke mudi Yezu webeja. Wolola tshianza kudi bayidi bende, udi wamba ne: “Tangilayi! Mamuanyi ne bana betu ba balume! Bualu eu yonso udi wenza disua dia Tatuanyi udi mu diulu, yeye ke wanyi muanetu wa balume, ke wanyi muanetu wa bakaji, ke wanyi mamu.” Mushindu’eu, Yezu udi uleja se: nansha bamba bukole bua bisuikidi bidi bimusuikakaja ne dîku diende, malanda adi amusuikakaja ne bayidi bende mmakole bobobo. Matayo 12:33-50; Mâko 3:31-35; Luka 8:19-21, NW.

▪ Mmunyi mudi Bafarizeyi bapange mua kuvuija “mutshi” ne “bimuma” bimpe popamue?

▪ “Tshimanyinu tshia Yona” ntshinyi, ne mmunyi muditshi tshimanshibua pashishe?

▪ Mmunyi mudi ditunga dia Izalele dia mu siekele wa kumpala difuane muntu udi spiritu ukena mukezuke mupatuke munda muende?

▪ Mmunyi mudi Yezu uzangika bukole bua malanda adi amusuikakaja ne bayidi bende?