Nshapita wa 133

Yezu udi ukumbaja bionso bidi Nzambi umulomba

NEBIKALE kabingila kayipu ka kusankila dîba didi Mukalenge-Muluanganyi Yezu Kristo umusha Satana ne bulongolodi buende bubi! Ndekelu wa bionso, Bukokeshi bua Bidimu Tshinunu bua ditalala bua Yezu nebutuadije!

Ku bulombodi bua Yezu ne bua bakalenge beleshangana nende maboko, bapanduki ba ku Armagedon nebenze disukula pa kumusha bukoya bushiya kudi mvita eyi miakane. Anu mudibi bimueneka, bapanduki pa buloba nebalele kabidi bana bua lupolo kampanda, ne bine aba nebaditue pabu mu mudimu wa musangelu wa didima buloba bua kubuvuija budimi bulengele.

Mu matuku adi alonda, Yezu neapatule miliyo ya bantu bungi kabuyi kubala mu nkita yabu bua kulabulabu masanka a mu Mparadizu eu mulengele. Neenze muanda eu bua kukumbaja dilaya diende nkayende dia se: “Diba didi divua dikala bonso badi mu nkita [ya tshivulukilu, NW] bapatukamu.” (Mukenji Mulenga)

Munkatshi mua aba badi Yezu ubiisha nemuikale muenji wa malu mabi wa kale wakafua ku luseke luende pa mutshi wa tshinyongopelu. Vulukayi muvua Yezu mumulaye ne: “Bushuwa ndi nkuambila lelu’eu ne: newikale nanyi mu Mparadizu.” Muntu eu kakuambuibua mu diulu bua kukokesha bu mukalenge pamue ne Yezu, anyi Yezu kakuvua tshiakabidi muntu wa pa buloba ne kusomba nende mu Mparadizu pa buloba nansha. Kadi, Yezu neikale ne muenji wa malu mabi eu wa kale mu ngumvuilu wa se: neamubiishe bua ikale ne muoyo mu Mparadizu ne neatabalele bua kumupetesha bidiye ukengela ku mubidi ne mu nyuma, anu mudibi bileja mu tshimfuanyi pa nyima pa dibeji edi.

Anjibi kutshinka! Ku ditabalela dia dinanga dia Yezu, dîku dijima dia bukua-bantu​—bapanduki ba ku Armagedon, ndelanganyi yabu, ne binunu bia miliyo ya bafue babiishibue bena butumike—​nebalubuluke bua kupeta bumuntu bupuangane. Ku butuangaji bua Muanende muena-bukalenge, Yezu Kristo, Yehowa neasombe ne bukua-bantu, mu ngumvuilu wa mu nyuma. “Ne,” anu mudi dîyi difume mu diulu diumvua kudi Yone diamba, “neakupule tshinsonji tshionso ku mesu abo, ne lufu kaluakuikalaku kabidi, nansha madilu, nansha mbila, nansha bisama kabiakuikalaku kabidi.” Muntu nansha umue kakutata peshi kusama.

Ku ndekelu kua Bukokeshi bua Bidimu Tshinunu bua Yezu, nsombelu neikale anu muvua Nzambi mupangadije ku tshibangidilu pakambilaye bena dibaka babidi ba kumpala, Adama ne Eva, bua kuvulangana ne kuwuja buloba. Eyowa, buloba nebuwujibue tente ne nsangilu muakane wa bantu bapuangane. Muanda eu newenzeke bualu muntu yonso nealamikibue mabenesha adi afuma ku mulambu wa tshia-bupikudi wa Yezu. Lufu lutuala kudi mpekatu wa Adama kaluakuikalaku nansha kakese!

Nunku, Yezu neikale mukumbaje bionso bivua Yehowa mumulombe. Bua kabingila aka, ku ndekelu kua bidimu ebi tshinunu, neapingajile Tatuende Bukalenge ne dîku dia bukua-bantu bapuangane. Pashishe, Nzambi neasulule Satana ne ba-demon bende bua bapatuke mu dijimba, nsombelu wa dibotoloka mufuanangane ne lufu. Mbua kipatshila kayi?

Ee, pabuipi ne ku ndekelu kua bidimu ebi tshinunu, bavule ba ku basombi ba mu Mparadizu nebikale babiishibue bena ditabuja ditu kadiyi dianji kutetshibua. Kumpala kua kufua, kabavua bamanye malaya a Nzambi nansha kakese ne, pa nanku, kabavuaku mua kuleja ditabuja mu mine malaya aa. Kabidi, panyima pa dibiishibua ne dilongeshibua malelela a mu Bible, bivua bipepele bua kusadilabu Nzambi mu Mparadizu, bualu buluishi nansha bukese kabuvuaku. Kadi bu Satana mua kupeshibua mushindu bua yeye kuteta mua kubiimanyika bua kabatungunuki ne kusadila Nzambi, nebikale mua kudileja bena bulamatshi ku mikenji mu mateta anyi? Bua kuandamuna ku lukonko elu, Satana neasuludibue.

Buakabuluibua bupesha Yone budi busokolola ne: panyima pa Bukokeshi bua Bidimu Tshinunu bua Yezu, Satana neafike ku dipambuisha bantu bungi bukena bujadika bua balekele kusadila Nzambi. Kadi, padi diteta edi dia ndekelu ditua ku tshibungubungu, Satana, ba-demon bende, pamue ne aba bonso bikalaye mufike ku didinga nebabutudibue bua kashidi. Ku lukuabu luseke, bapanduki bena bulamatshi ku mikenji bikala batetshibue tshishiki nebatungunuke ne kuikala ne muoyo bua kulabula bua kashidi mabenesha mabupumuina kudi Tatuabu wa mu diulu.

Kakuyi mpata, Yezu mmukumbaje, ne neatungunuke ne kukumbaja, mudimu wa mushinga mukole mu dikumbana dia malongolola a dikema a Nzambi. Nnsombelu bulenga kayipu mu matuku atshilualua mutuoluela mu tshianza bu tshipeta tshia bionso bidiye ukumbaja bu Mukalenge munene wa mu diulu muteka kudi Nzambi! Kadi, katuena mua kupua muoyo bionso bivuaye muenze pavuaye muntu wa pa buloba.

Yezu wakalua pa buloba ku budisuile ne kutulongesha pa bidi bitangila Tatuende. Kabidi, ku bienzedi biende wakaleja ngikadilu ya mushinga mukole ya Nzambi. Mitshima yetu mmilengibue patudi tuvuluka dikima diende dinenke ne dikama muoyo dia buana bulume, meji ende akena kuelekeja, nzanzu yende ya kuanyina bu mulongeshi, bulombodi buende bua bukitu, luse luende luengeleki ne diumvuilangana diende. Patudi tuvuluka kukengeshibua kukena kumvuija kuakakamaye bua kufila tshia-bupikudi, tshidi anu ku diambuluisha diatshi nkayatshi, tshitupetesha mushindu wa kupeta muoyo, bushuwa mitshima yetu idi ne bua kuwula tente ne dianyisha buende!

Bushuwa, mmuntu kayipu eu wa pa buende utudi bajandule mu dilonga edi dia nsombelu wa Yezu! Bunene buende mbumueneke patoke ne mbudisunguluje menemene. Tudi basakibue ku diambulula mêyi a nguvernere muena Roma Ponsio Pilato ne: “Monayi! Ke muntu eu!” Eyowa, bushuwa, “muntu eu,” mmuntu mutambe bunene wa katshia ne katshia!

Bituanyisha ndongoluelu wa mulambu wende wa tshia-bupikudi, tudi mua kupikudibua ku bujitu bua mpekatu ne lufu bituakapiana kudi Adama, ne Yezu udi mua kulua wetu “Tatu wa Kashidi.” Aba buonso badi bajinga kupeta muoyo wa kashidi badi ne bua kupeta dimanya, ki ng’amu dia Nzambi, apo ne dia Muanende, Yezu Kristo. Dibala diebe ne dilonga dia mukanda eu bikuambuluisheku bua kupeta dimanya edi dipeteshi dia muoyo! 1 Yone 2:17; 1:7; Yone 5:28, 29; 3:16; 17:3; 19:5; Luka 23:43; Genese 1:28; 1 Kolinto 15:24-28; Buakabuluibua 20:1-3, 6-10; 21:3, 4; Yeshaya 9:6, NW.

▪ Mmuabi kayi wa disanka wikala nawu bapanduki ba ku Harmagedon ne bana babu?

▪ Pa kumbusha bapanduki ba ku Harmagedon ne bana babu, mbanganyi bakuabu batshionkomoka mu Mparadizu, ne mmu ngumvuilu kayi muikala Yezu nabu?

▪ Nsombelu neikale munyi ku ndekelu kua bidimu ebi tshinunu, ne pashishe Yezu neenze tshinyi?

▪ Bua tshinyi nebasulule Satana mu dijimba, ne ndekelu wa bionso ntshinyi tshiamufikila, yeye ne aba buonso bamulonda?

▪ Mmunyi mudi Yezu mua kulua wetu “Tatu wa Kashidi”?