Nshapita wa 99

Yezu udi ulongesha mu Yeriko

LUPOLO luîpi pashishe, Yezu ne misumba ya badi nende mu luendu badi bafika mu Yeriko, tshimenga tshidi tshishilangane ne Yeruzaleme mutantshi bu wa luendu lua munya mujima. Mbimueneke se: Yeriko mmuenza ne bimenga bibidi, tshimenga tshia kale tshia bena Yuda tshidi mutantshi bu wa kilometre umue ne tshitupa ne tshimenga tshipiatshipia tshia bena Roma. Bu mudi misumba ipatuka mu tshimenga tshia kale ne yenda isemena mu tshimenga tshipiatshipia, bafofo babidi balombi ba ka pa luse badi bumvua mutoyi wayi. Umue wa kudibo udi ubikidibua Bartimeyi.

Padibo bamanya ne: Yezu ng’udi upita awu, Bartimeyi ne muinende badi batuadija kuela lubila ne: “Mfumu, Muana wa Davide, tufuilaku luse!” Padi musumba ubakanyina bua kupuwa, buobo badi babandisha dîyi ne bela mbila mipite bukole ne: “Mfumu, Muana wa Davide, tufuilaku luse!”

Padiye umvua kutayika kua mbila eyi, Yezu udi wimana. Udi ulomba aba badi nende bua kubikila bedi ba mbila eyi yonso. Aba pabo badi baya kudi bafofo balombi ba ka pa luse ne bambila umue wa kudibo ne: “Kolesha muoyo, juka panshi, udi ukubikila.” (NW) Ne kusansakata kukole, mufofo eu udi wimansha tshilamba tshiende tshia pa mutu, usoloka mutangile kudi Yezu.

“Nudi basue nnuenzele tshinyi?” ke mudi Yezu webeja.

“Mfumu, tudi basue bua mesu etu atabale,” ke mudi bafofo aba babidi bamusengelela.

Musakibue kudi luse, Yezu udi ulenga mesu abu. Bilondeshile muyuki wa Mâko, Yezu udi wambila umue wa kudibo ne: “Ndaku, ditaba diebe ndikupandishe.” Diakamue, bafofo aba balombi ba ka pa luse badi bapeta lumonu, ne kabiyi mpata bubidi buabo badi batuadija kutumbisha Nzambi. Padi bantu buonso bamona tshidi tshienzeke, buobo pabo badi basamuna Nzambi. Kabiyi kujingakana, Bartimeyi ne muinende badi batuadija kulonda Yezu.

Mu dikosolola diende dia Yeriko, Yezu mmunyungulula kudi misumba bungi bua dikema. Muntu yonso mmusue kumona eu udi muondape bafofo. Bantu badi bafinakaja Yezu nseke yonso, nanku, bamue badi bapanga nansha mua kumumona. Munkatshi muabo mudi Zakayo, mfumu wa balambuishi ba bitadi mu Yeriko ne mu misoko ya ku mpenga. Bua dipita kushawuka, kêna mua kumona bidi bienzeka.

Nunku, Zakayo udi unyema lubilu kumpala ne ubanda ku mutshi wa mfigi udi ku muelelu wa njila udi Yezu upitshila. Kumukila ku muaba eu muzangame, udi mua kubandila bimpe tshionso tshidi tshienzeka. Bu mudi misumba yenda isemena, Yezu udi ubikila mutangile ku mutshi eu ne: “Zakayo, tuluka lukasa, bualu lelu ndi ne bua kutula kuebe.” Zakayo udi utuluka ne disanka dionso ne wambuluja makasa mutangile kuende bua kulongolola bintu bua muenyi wende munene.

Kadi, padi bantu bamona tshidi tshienzeka, buonso buabo badi batuadija kunungana. Badi bamona kabiyi bikumbanyine bua Yezu kuikala muenyi wa muntu bu nunku. Nuvuluke se: Zakayo mmuvue mubanji ku bienzedi bia dipanga bululame bia dinyenga mfranga mu midimu yende ya dilambuisha bitadi.

Bantu bavule badi balonda mu nyima, ne padi Yezu ubuela mu nzubu wa Zakayo, badi badiabakena ne: “Wabuedi bua kutuula kua muena mpekatu.” (NW) Pabi, Yezu udi ujingulula mudi Zakayo muakaje mutshima bua kunyingalala. Yezu kêna mene wedibua mâyi ku makasa to, bualu Zakayo udi wimana ne umanyisha ne: “Tangila! Mukalenge, ndi mpesha bapele tshiabibidi tshia bintu bianyi, ne tshionso tshimvua munyenge kampanda pa kumushiminyina ndi mmupingajilatshi pa kuvudija misangu inayi.” (NW)

Zakayo udi ufila tshijadiki tshia se: kunyingalala kuende nkua bushuwa pa kupesha bapele tshiabibidi tshia bubanji buende ne pa kutumika ne tshiabibidi tshikuabu bua kupingajila aba bavuaye mudinge. Mbimueneke se: pa kutumika ne mikanda yende ya bulambuishi, udi mua kubadika ne kupeta bungi bujalame bua bidiye ne bua kupingajila bantu aba. Nunku, udi utshipa mutshipu bua kupingajilangana bintu bivudija misangu inayi, mu diumvuangana ne mukenji wa Nzambi udi wamba ne: ‘Muntu yeye muibe mukoko, neikale ne bua kupingaja inayi ya mu tshisumbu pa mutu pa mukoko umue.’ (NW)

Yezu udi ne disanka bua mushindu udi Zakayo ulaya bua kuabanya bubanji buende, bualu Udi wamba ne: “Lupandu ndubuele mu nzubu emu lelu, bualu yeye ewu pende udi [muana wa Abrahame, NW]. Bualu, Muana wa muntu mmuvue kukeba ne kupandisha bivua bijimine.”

Kukadi lupolo luîpi, Yezu uvua mufuanyikije nsombelu wa [bena mpekatu] ‘bajimine’ pa kulonda muyuki wa muana wa bitulatula. Mpindieu, tudi ne tshilejilu tshia bualu buenzeke tshia muntu mujimine wakapetshibua. Nansha mudi bamfumu ba bitendelelu ne babalondi babu banungana ne badiabakena bua kutabalela kudi Yezu muleje bantu bu mudi Zakayo, Yezu udi’anu utungunuka ne kukeba ne kuakajilula bana aba bajimine ba Abrahame. Matewuse 20:29-34; Markuse 10:46-52, MMM; Luka 18:35–19:10; Ekesode 22:1.

▪ Anu mudibi bimueneka, mpenyi padi Yezu upetangana ne bafofo balombi ba ka pa luse, ne ntshinyi tshidiye ubenzela?

▪ Zakayo nnganyi, ne bua tshinyi udi ubanda ku mutshi?

▪ Mmunyi mudi Zakayo ufila tshijadiki tshia dinyingalala diende?

▪ Ndilongesha kayi ditudi mua kupetela ku malu adi Yezu muenzele Zakayo?