Nshapita wa 82

Yezu udi uya mutangile tshiakabidi ku Yeruzaleme

MU KATUPA kîpi Yezu udi utua tshiakabidi makasa mu njila, wenda ulongesha ku tshimenga ne ku tshimenga, ku musoko ne ku musoko. Bidi bimueneka se: udi mu distrike dia Pereya, dia muamua dia Musulu wa Yordane buludiludi ne Yudeya. Kadi udi uya mutangile ku Yeruzaleme.

Bu mudi bena Yuda, bilondeshile nkindi yabo, bamba ne: anu bantu bungi butshintshikila ke bapeta lupandu, ke tshidi pamu’apa tshisaka muntu kampanda ku diebeja ne: “Mfumu, bantu bapanda nebikale bungi bukese anyi?” Ku diandamuna diende, Yezu udi usaka bantu ku dielangana meji pa tshidi tshikengela kuenza bua kupeta lupandu: “Kebayi ne tshikandi [anyi: nuluangane, nuditatshishe] bua kubuelela ku tshiibi tshibulakane.” (NW)

Bidi bikengela kuluangana ne tshikandi ne mitalu yonso “bualu,” ke mudi Yezu utungunuka, “ba bungi nebakebe mua kubuela kabayi bamona.” Mbua kabingila kayi? Udi umvuija ne: “Pikala mfumu wa nzubu mumane kujuka, muinjile tshiibi, nuenu bashale pambelu, nukokola ku tshiibi nuamba ne: ‘Mukalenge, tunzuluilaku,’ yeye neanuandamune ne: ‘Ngumbukilayi apu, nuenu benji ba bibi, tshiena mumanye kunudi nufuma.’”

Bidi bimueneka se: bantu bashiya pambelu mbavue ku tshiibi pa dîba didi dibalengelela buobo nkayabu. Kadi tshiibi, peshi dîba diakanyine, ntshimana kukanga ne tshitua tshikuvu. Bua kubuela, bavua ne bua kulua kumpala kua dîba, nansha bikala dîba difunda kadivua dibalengelela. Bushuwa, diakabi ndindile aba badi bindija bua kuteka ntendelelu wa Yehowa pa muaba wa kumpala mu nsombelu wabu!

Bena Yuda badi Yezu mutumibue kudibo bua kubasadila mbapangile mua kubabidila, bua bavule ba kudibo, mushindu mulenga mubapetesha bua kuanyisha ndongoluelu muangata kudi Nzambi bua lupandu. Ke bualu kayi Yezu udi wamba ne: nebadile ne nebasumakaje menu pedibo pambelu. Bishilangane, bantu “nebafume kudi dîba dipatukila ne kudidio dibuelela, ku mutu ne ku manda kua ditunga,” ee, bafumina mu matunga wonso, “basombe ku mesa mu [bukalenge bua Nzambi, NW].”

Yezu udi utungunuka ne: “bushuwa, ba ndekelu [aba badi kabayi bena Yuda bapetudibue, pamue ne bena Yuda bakengeshibue] nebikale ba kumpala, ba kumpala [bena Yuda bakume dikasa pa bidi bitangila bintu bia ku mubidi ne mianda ya ntendelelu] nebikale ba ndekelu.” Bantu aba bena lulengu ne babule dianyisha nebikale ba ndekelu mu ngumvuilu wa se: kabakubuela nansha kakese mu Bukalenge bua Nzambi.

Mpindieu, Bafarizeyi badi balua kudi Yezu ne bamba ne: “Umuka munenu, uye, bualu Herodese [Antipase] udi ukeba kukushipa.” Imue misangu Herodese yeye muine ng’udi muendeshe dinunganyi edi bua kusaka Yezu ku dinyema mu buloba ebu. Herodese uvua pamu’apa utshina bua kubuelakana mu bumanji bua mukuabu muprofete wa Nzambi, bu muvuabi bua Yone Mubatiji. Kadi Yezu udi wambila Bafarizeyi ne: “Ndayi nuambile mukenge au ne: ‘Tangila! Ntshidi ngipata ba-demon ne ngondopa lelu ne makelela, dituku disatu nengikale mujikije.’” (NW)

Mumane kujikija mudimu wende muinemu, Yezu udi utungunuka ne luendu luende mutangile ku Yeruzaleme bualu, anu mudiye umvuija: “Ki mbianyishibue bua muprofete kushipibua pambelu pa Yeruzaleme.” (NW) Bua tshinyi mbiakanyine bua Yezu kushipibua anu mu Yeruzaleme? Bualu Yeruzaleme ke tshimamuende wa bukalenge, mudi musanganyibua Sanhedrin, kabadi kakulu kenza ne bantu 71, kabidi, ke mudibo balambula milambo ya nyama. Nunku, kabiena mua kuanyishibua bua “Muan’a mukoko wa Nzambi” kushipibua muaba mukuabu, kabiyi mu Yeruzaleme.

“Yeruzaleme, Yeruzaleme, mushipi wa baprofete ne muashi wa badi batumibua kudiye mabue,” ke mudi Yezu usambana, “mmisangu bungi munyipu imvua mujinge kusangisha bana bebe bu mudi nzolo ukonga tuana tuende mu mapuapua, kadi nuenu nansha kuanyisha! Monayi! Banulekeledi nzubu wenu.” (NW) Bu mudidio dipidia Muana wa Nzambi, ditunga edi didi dipia tshibawu.

Bu mudi Yezu utungunuka ne luendu mutangile ku Yeruzaleme, mfumu kampanda wa Bafarizeyi udi umubikidisha kuende. Bu mudibi dituku dia Nsabatu, bantu badi bamubemba bikole, bualu kuineku kudi muntu ne disama dia munana, anyi dikunga dia mâyi mu mubidi, imue misangu mu maboko ne mu mikolo. Utangila kudi Bafarizeyi ne bamanyi bapiluke ba Mikenji badi pinapu, Yezu udi ukonka ne: “Mbianyishibue peshi ki mbianyishibue mu Mikenji bua kuondopa muntu dituku dia nsabatu?” (NW)

Kakuena udi umukudimuna dîyi. Nunku, Yezu udi wondopa muntu ne umualukija. Pashishe, udi webeja ne: “Nnganyi wa kunudi, biapona muanende anyi ngombe wende mu tshiina, e kupanga kumupatula diakamue, bualu ndituku dia nsabatu?” Musangu eu kabidi, kakuena udi wandamuna muaku. Lukase 13:22–14:6, MMM; Yone 1:29, NW.

▪ Yezu udi uleja tshinyi tshidi tshikengedibua bua kupeta lupandu, ne bua tshinyi bavule mbashiyibue pambelu?

▪ “Ba ndekelu” badi balua ba kumpala, ne “ba kumpala” badi balua ba ndekelu mbanganyi?

▪ Bua tshinyi, pamu’apa, badi bamba mudi Herodese ujinga kushipa Yezu?

▪ Bua tshinyi ki mbianyishibue bua muprofete kushipibua pambelu pa Yeruzaleme?