Nshapita wa 109

Yezu udi wela baluishi bende patoke

YEZU mmufuishe baluishi bende bena malu a Nzambi bundu menemene, ne bakadi batshina bua kumukonka kabidi pa bualu kampanda. Nunku, udi ubakula muaku bua kuela dipanga diabu patoke. “Nudi nuela meji bishi bua Kristo?” ke mudiye ukonka. “Mmuana wa nganyi?”

“Ng’wa Davidi,” ke mudi Bafarizeyi bandamuna.

Nansha mudi Yezu kayi uvila se: Davidi nnkambua wa ku mubidi wa Kristo, anyi Masiya, udi ukonka ne: “Apo mmunyi mudi Davidi, ku buenzeji bua spiritu [mu Musambu wa 110] umubikila ‘Mukalenge,’ pa kuamba ne: ‘Yehowa wakambila Mukalenge wanyi ne: “Somba ku tshianza tshianyi tshia balume too ne pangateka bena lukuna bebe muinshi mua makasa ebe”’? Nunku, bikala Davidi umubikila ‘Mukalenge,’ mmunyi mudiye muanende?”

Bafarizeyi badi bashala bapuwe, bualu ki mbamanye kudi Kristo, anyi muela manyi, mufumine bushuwa. Masiya ki mmuntu tshianana, umue wa ndelanganyi ya Davidi bu mudi Bafarizeyi bitaba nansha, kadi uvua ne muoyo mu diulu ne uvua munene kutamba Davidi, anyi Mukalenge wende.

Ukudimuka mpindieu kudi misumba ne kudi bayidi bende, Yezu udi ubadimuija bua baskribe ne Bafarizeyi. Bu mudi balongeshi aba ba Mikenji ya Nzambi “badishikike mu nkuasa wa Mozese,” Yezu udi wamba ne: “Malu wonso adibu banuambila, nueenze ne nualame.” Kadi udi usakidila ne: “Kanuenji bilondeshile bienzedi biabu, bualu badi bamba kadi kabena benza.”

Mbadingidiji, ne Yezu udi ubela patoke ku ngakuilu wa muomumue ne eu wa dîba divuaye udia mu nzubu mua Mufarizeyi kampanda kukadi ngondo mikese. “Midimu yonso idibo benza,” ke mudiye wamba, “badi benza bua kubamonabu kudi bantu.” Ne udi ufila bilejilu, umvuija ne:

“Badi badiundisha tushete tudi ne mvese ya mu Mifundu tudibu bavuala bu bia-budikubi.” Tushete etu tukese, tuvuala pa mpala anyi ku diboko, tudi ne bitupa binayi bia Mikenji: Ekesode 13:1-10, 11-16; ne Dutelonome 6:4-9; 11:13-21. Kadi Bafarizeyi badi badiundisha bunene bua tushete etu bua kuleja bantu mudibu bena tshisumi mu ditumikila Mikenji.

Yezu udi utungunuka ne: badi “balepesha bizembe bia malenda bia bilamba biabu.” Mu Nomba 15:38-40 bena Izalele mbalombibue bua kuenza bazembe bia malenda ku bilamba biabu, kadi Bafarizeyi badi bilepesha biabu kupita bia bantu buonso. Tshionsu tshidibo benza ng’anu bua kudileja! Yezu udi ujadika se: “Mbasue miaba minene mipite kutàlama.”

Bia dibungama, bayidi bende bine bavua pabu bakune lukuka elu lua kuikala pa miaba minene. Nunku udi ufila mubelu eu: “Kadi nuenu, kanubikidibu ne: Rabbi, bualu umue ke udi mulongeshi wenu, apo nuenu buonso nudi bana ba muntu. Kabidi, kanubikidi muntu nansha umue pa buloba ne: tatu, bualu umue ke udi Tatuenu, Eu wa mu diulu. Nansha kanubikidibu ne: ‘balombodi,’ bualu Mulombodi wenu udi umue, Kristo.” Bayidi badi ne bua kudilama ku dijinga dia kuikala ba kumpala! “Mutambe bunene munkatshi muenu udi ne bua kuikala musadidi wenu,” ke mudi Yezu usengelela.

Pashishe, udi wamba mulongolongo wa milawu ne uyilamika baskribe ne Bafarizeyi, ubabikila musangu wonso ne: badingidiji. “Badi binjila bukalenge bua mu diulu kumpala kua bantu,” ke mudiye wamba, ne “buobu ke badi babumbula nzubu ya bakaji bakamba ne bua kubinga badi benza masambila male.”

“Diakabi dienu, balombodi bafofo,” ke mudi Yezu wamba. Udi upiisha Bafarizeyi bualu kabena ne kujingulula kujalame kua bidi biakanyine kuambika mushinga mu nyuma, bu tshijadiki, tuangate matapulula akena majalame adibu benza. Tshilejilu, badi bamba ne: ‘Biaditshipa muntu pa kutela ntempelo kakuena bualu, kadi biaditshipaye pa kutela ngolo wa ntempelo, mmupie tshilumbu.’ Pa kuzangika ngolo wa ntempelo kupita mushinga wa mu nyuma wa muaba eu wa ntendelelu, badi batandula bufofo buabu pa malu malomba tshishiki.

Pashishe, anu muvuaye muenze kumpala, Yezu udi upiisha Bafarizeyi bua dilengulula dia “malu a mushinga mukole a mu Mikenji, mumue ne: buakane, luse ne lulamatu,” eku batabalela ne ntema mikole bua kufuta tshia-dikumi, peshi tshimue pa bitupa dikumi, tshia bisekiseki bikena ne mushinga.

Yezu udi ubikila Bafarizeyi ‘balombodi bafofo, badi bataata kambuinkidi kadi bamina kamelo.’ Badi bataata kambuinkidi kapone mu mvinyo, ki ng’anu bualu nkiishi, apo bualu nkabipe bilondeshile bilele bia ntendelelu. Nunku, dipepeja diabu dia malu a mushinga mukole a mu Mikenji ndifuanyikijibue ne dimina kamelo, paku kikale nyama mubipe bilondeshile bilele bia ntendelelu. Matayo 22:41–23:24; Mâko 12:35-40; Luka 20:41-47; Lewitiki 11:4, 21-24, NW.

▪ Bua tshinyi Bafarizeyi badi bapuwa padi Yezu ubakonka pa mêyi a Davidi adi mu Musambu wa 110?

▪ Bua tshinyi Bafarizeyi badi badiundisha tushete tuabu tua mvese ya mu Mifundu ne balepesha bizembe bia malenda bia bilamba biabu?

▪ Mmubelu kayi udi Yezu upesha bayidi bende?

▪ Mmatapulula kayi akena majalame adi Bafarizeyi benza, ne mmunyi mudi Yezu ubapiisha bua dilengulula dia malu a mushinga mukole?