Nshapita wa 37

Yezu udi wepula tshinyongopelu tshia mukamba

LUPOLO luîpi panyima pa diondopa musadidi wa mfumu wa basalayi, Yezu udi uya mu Nayine, tshimenga tshidi mutantshi wa kilometre 30 ku sud-est wa Kapernaume. Mmutua munyima kudi bayidi bende ne musumba munene. Dîba dikadi imue misangu bu ku dilolo padibo basemena ku mpenge kua Nayine. Apa, badi basambakena ne musumba wa bajiiki ba mufue. Badi bapatuka ne tshitalu tshia nsongalume kampanda pambelu pa tshimenga bua kutshijiika.

Mamu wa mufue udi mu nsombelu mukole menemene, bualu mmukamba ne eu ke wende muana umuepele. Pakafua bayende, uvua mua kukolesha muoyo pa kutekela muanende wa balume mutshima. Matekemena, majinga ne bipatshila biende bivua bisuikakaja ku nsombelu wa muanende wa matuku atshilualua. Kadi mpindieu, kêna kabidi ne muntu wa kutekela mutshima bua kusambibua. Tshinyongopelu tshiende ntshipite bukole padi bena mu tshimenga baya kumufila mu nkita.

Padi Yezu umona mukaji eu, mutshima wende udi usunsuka ne dibungama dikole. Ne dîyi diengeleka, kabidi dikolesha mushindu wa kupetesha dishindika dia disambibua, udi umuambila ne: “Lekela kudila.” Luidi luende ne bidiye wenza bidi bikoka ntema ya musumba. Nunku, padiye usemena ne ulenga kalalu kadibo bambuile tshitalu, bakambudi badi biimana. Bushuwa, buonso badi ne bua kudiebeja tshidiye musue kuenza.

Mbia bushuwa se: aba badi benda ne Yezu bakaadi bamumone muondope babedi bavule mu tshishima. Kadi, mbimueneke ne: ki mbanji kumumona mubiishe muntu ku lufu. Udiku mua kuenza bualu bua mushindu’eu anyi? Utangila tshitalu, Yezu udi utuma dîyi ne: “Nsongalume, ndi nkuambila, Juka!” Muntu e kusomba! Yeye kutuadija kuakula, ne Yezu kumupesha mamuende.

Padi bantu bamona se: nsongalume udi ne muoyo bushuwa, badi batuadija kuamba ne: “Muprofete munene mmubiishibue munkatshi muetu.” Bakuabu bamba ne: “Nzambi walukiji ntema yende kudi tshisamba tshiende.” Ne lukasa luonso, lumu lua muanda eu mukemeshi ludi lumuangalaka mu Yudeya mujima ne ku mpenga kuende kuonso.

Yone Mubatiji utshidi mu lukanu, ne mmusue kumanya bivule pa bidi bitangila midimu idi Yezu ukumbaja. Bayidi ba Yone badi bamuyukidila pa bishima ebi. Ngandamuinu wende udi tshinyi? Luka 7:11-18, NW.

▪ Ntshinyi tshidi tshienzeka padi Yezu usemena pabuipi ne Nayine?

▪ Mmunyi mudi mutshima wa Yezu ulengibua bua muanda udiye umona, ne udi wenza tshinyi?

▪ Tshishima tshia Yezu tshidi ne buenzeji kayi kudi bantu?