Nshapita wa 11

Yone udi ulongolola njila

BIDIMU dikumi ne muanda-mutekete bikadi bipite katshia ku dituku divua Yezu muana wa bidimu 12 ukonka balongeshi mu ntempelo. Tudi mu muvu wa disampila wa tshidimu tshia 29 B.B., ne bidi bimueneka se: muntu yonso udi wakula bua Yone, muana wa mamuende mukuabu wa Yezu, udi ulongesha mu misoko yonso idi ku mpenga kua Yordane.

Yone mmuntu udi ukemesha bushuwa, ku luidi luende ne ku ngakuilu wende. Tshivualu tshiende ntshienza ne miosa ya kamelu, ne mmuvuale mukaba wa tshiseba mu tshimonu. Biende biakudia mmpasu ne buitshi bua mu tshisuku. Kadi mukenji wende udi munyi? “Nyingalalayi, bualu bukalenge bua mu diulu bukadi pabuipi.”

Mukenji eu udi ukoka ntema ya bamuteleji. Bantu badi baleja dikengedibua diabu dia kunyingalala, mbuena kuamba se: kushintulula mmuenenu wabu ne kulekela nsombelu wabo wa kale pa kumuangata bu udi kayi muimpe. Nunku, bantu bavule badi bapuila kudi Yone, bafumina mu misoko yonso idi minyunguluke Yordane, too ne ku Yeruzaleme mene, udi ubabatiza pa kubiina mu mâyi a Yordane. Mbua tshinyi?

Batismo wa Yone udi uleja peshi ushindika se: aba badi bamupeta badi banyingalala ne muoyo mujima bua mpekatu mienza pa kushipa tshiovo tshia Mikenji ya Nzambi. Ke bua tshinyi, padi bamue Bafarizeyi ne ba-Saduseyi balua ku Yordane, Yone udi ubapiisha. “Nuenu ndelanganyi ya ntoka,” ke mudiye wamba. “Kuamayi mamuma adi makanyine dinyingalala; kanutshinki bua kudiambila munda munda ne: ‘Tudi ne Abrahama bu tatu.’ Bualu ndi nnuambila ne: Nzambi mmukumbane mua kupatula bana bua Abrahama ku mabue aa. Kasuyi nkamana kuladika ku muji wa mitshi; nunku, mutshi wonso udi kawuyi ukuama mamuma malenga udi ne bua kukoshibua ne kukupibua mu kapia.”

Bua ntema yonso idi Yone upeshibua, bena Yuda badi bamutumina bakuidi ne bena Lewi. Bine aba badi bamuebeja ne: “Wewe udi nganyi?”

“Meme tshiena Kristo nansha,” ke mudi Yone utonda.

“Kadi udi nganyi?” ke mudibo bamukonka. “Udi Eliya anyi?”

“Tshiena muine au to,” ke mudiye ubandamuna.

“Udi Muprofete anyi?”

“Tòo!”

Ke kuebejabo ne difiatutuka ne: “Udi nganyi? Bua tuye kuandamuna badi batutume. Udi wamba bishi buebe wewe muine?”

Yone udi umvuija ne: “Ndi dîyi dia kampanda udi ukobola mu tshipela ne: ‘Lulamijayi njila wa Yehowa,’ anu bu muakamba muprofete Yeshaya.”

“Nunku, bua tshinyi udi ubatiza,” ke mudibu basue kumanya, “biwikala wewe muine kuyi Kristo peshi Eliya anyi Muprofete mene?”

“Meme ndi mbatiza mu mâyi,” ke mudiye wandamuna. “Munkatshi muenu mbimane kudi kampanda unudi kanuyi bamanye, eu udi ulua munyima muanyi.”

Yone udi ulongolola njila pa kusaka bantu ku didima ngikadilu wa mutshima mukumbanyine mua kuitababu Masiya, eu walua Mukalenge. Bua Mukalenge eu, Yone udi wamba ne: “Eu udi ulua munyima muanyi mmuntambe bukole, sandala yende meme tshiena mukumbane mua kuyikopola.” Yone udi mene wamba kabidi ne: “Eu udi ulua munyima muanyi wakandianjidila, bualu yeye ukavuaku kumpala kuanyi.”

Nunku, mukenji eu wa Yone wa ne: “bukalenge bua mu diulu bukadi pabuipi,” ndimanyisha dia patoke dia se: mudimu wa Yezu Kristo, Mukalenge musungula kudi Yehowa, ukadi pa kutuadija. Yone 1:6-8, 15-28; Matayo 3:1-12; Luka 3:1-18; Bienzedi 19:4, NW.

▪ Yone mmuntu wa mushindu kayi?

▪ Bua tshinyi Yone udi ubatiza bantu?

▪ Bua tshinyi Yone udi mua kuamba ne: Bukalenge bukadi pabuipi?