Nshapita wa 18

Yone udi upueka, Yezu udi ùtanta

PANYIMA pa Pasaka wa mu muvu wa disampila mu 30 B.B., Yezu ne bayidi bende badi bumuka mu Yeruzaleme. Tshidibi, kabena bapingana ku mabu mu Ngalileya, kadi badi baya mu buloba bua Yudeya, mudibu baya kutambuisha bantu. Yone Mubatiji udi wenza muine mudimu eu kukadi mpindieu bu tshidimu tshijima, ne utshidi ne bayidi badi benzejangana nende mudimu.

Bushuwa, Yezu yeye muine kêna utambuisha muntu nansha umue, anu bayidi bende, ku bulombodi buende. Kutambuishangana kuabu kudi ne diumvuija dia muomumue ne kua Yone, bua bena Yuda, ntshimfuanyi tshia kunyingalala bua mpekatu mienza pa kusambuka tshiovo tshia Mikenji ya Nzambi. Kadi, panyima pa dibiishibua diende ku lufu, Yezu udi utumina bayidi bende dîyi dia kufila batismo udi ne diumvuija dishilangane. Batismo wa bena nkristo lelu’eu ntshimfuanyi tshia diditshipa kudi Nzambi bua kumusadila.

Ku ntuadijilu kua mudimu wa Yezu, bubidi buabu, Yone ne yeye muine, nansha mudibo batumika kabiyi muaba umue, badi balongesha ne batambuisha aba badi banyingalala. Kadi, bayidi ba Yone badi bavua bena lubabu, nunku badi balua kudiye ne badiabakena bua Yezu ne: “Rabbi, . . . tangila, nyawu utambuisha, ne buonso badi baya kudiye.”

Pamutu pa kudileja muena lubabu, Yone udi usanka bua kulubuluka kua Yezu ne ujinga bua bayidi bende basanke pabo. Udi ubavuluija ne: “Nuenu bine, nudi bamanye mumvua muambe ne: Tshiena Kristo meme to, kadi ndi mutuma kumpala kuende.” Pashishe udi utumika ne tshimfuanyi etshi tshilenga: “Udi ne mukaji ke bayende; Kadi mulunda wa bayende, udi yeye wimana apu, mumumvue ne matshio, udi ne disanka pa kumvua diyi dia bayende wa mukaji. Ke disanka dianyi; mpindiewu diapungakanyi.” (Mukenji Mulenga)

Yone, bu mulunda wa musedi, uvua musanke kukadi ngondo bu isambombo pakalubulaye bayidi bende kudi Yezu. Bamue ba kudibo bakalua aba bavua ne bua kuikala bena mu kasumbu ka mukaji wa mu diulu wa Kristo mu matuku atshilualua, kasumbu kikala kenza kudi bena nkristo bela manyi a spiritu. Yone udi ujinga bua bayidi bende ba mpindieu balonde pabu Yezu, bualu mudimu wende ng’wa kulongolola njila bua mudimu wa Yezu upatule bipeta bilenga. Ke padi Yone umvuija ne: “Muine au udi ne bua kuenda ùtanta, kadi meme ndi ne bua kuenda mpueka.”

Yone, muyidi mupiamupia wa Yezu, uvua pende diambedi muyidi wa Yone Mubatiji, udi ufunda pa bidi bitangila kudi Yezu mufume ne bua mushinga wa mudimu udiye ukumbaja bua lupandu lua bantu, wamba ne: “Yeye udi mufume mu diulu udi ku mutu kua bakuabu buonso. . . . Tatu mmunange Muana ne mmufile bintu bionso mu tshianza tshiende. Eu udi wenza midimu ya ditabuja mu Muana udi ne muoyo wa kashidi; eu udi muena bupidia kudi Muana kakumona muoyo to, kadi, tshiji tshia Nzambi netshikale kudiye.”

Padi Yone Mubatiji umanyisha imue ngenyi pa dipueka dia mudimu wende, lupolo luipi pashishe mukalenge Herodese udi umukuatshisha. Herodese mmuangate Herodiade, mukaji wa muanabo Filipe, mumuvuije mukajende, nunku padi Yone utandula mudi bienzedi biende bipange bukezuke, Herodese udi umuelesha mu buloko. Padi Yezu umvua bualu bua dikuatshibua dia Yone, udi umuka mu Yudeya ne uya ku Ngalileya ne bayidi bende. Yone 3:22–4:3, NW; Bienzedi 19:4; Matayo 28:19; 2 Kolinto 11:2; Mâko 1:14; 6:17-20.

▪ Batismo mufila ku bulombodi bua Yezu kumpala kua dibiishibua diende ku lufu udi ne diumvuija kayi? Kadi wa panyima pa dibiishibua?

▪ Mmunyi mudi Yone uleja se: midiabilu ya bayidi bende ki mmiashila pa kabingila kajalame?

▪ Bua tshinyi Yone mmuela mu buloko?