Nshapita wa 38

Yone wakapanga ditabuja anyi?

YONE Mubatiji, udi mu lukanu kudi mpindieu tshidimu tshijima, udi upeta lumu lua kubiishibua kua muana wa balume wa mukamba wa mu Nayine. Kadi, Yone mmusue kupeta diumvuija dia muanda eu didi difuma buludi kudi Yezu nkayende, nunku udi utuma babidi ba ku bayidi bende bua kuebeja ne: “Eu udi ne bua kulua ng’wewe peshi tudi ne bua kuindila mukuabo mushilangane?”

Lukonko elu ludi mua kumueneka kaluyi lukumbanyine, nangananga bualu pavuaye utambuisha Yezu kukadi bidimu bu bibidi, Yone wakamona spiritu wa Nzambi upuekela Yezu ne kumvua dîyi dia kuanyishibua kuende kudi Nzambi. Lukonko lua Yone ludi mua kusaka bamue ku nkomenu wa se: ditabuja diende diakateketa. Kadi, kabiena nanku to. Bu Yone mutuadije kuela mpata, Yezu kavua mua kuamba mêyi malenga pa bidi bimutangila dine dîba adi to. Kadi, bua tshinyi Yone udi mene wela lukonko elu?

Yone mmusue anu kupeta tshijadiki tshia kudi Yezu tshia se: udi Masiya. Ebi nebitambe kupuijila Yone bukole bu mudiye wenda uzengela mu lukanu. Kadi, mbimueneke se: Yone udi ne tubingila tukuabu, pa kumusha kine aka, tudi tumusake ku diela lukonko elu. Bua kuamba bulelela, udi ujinga kumanya bikalaku mukuabu údí ne bua kulua, mumupinganyi, mu ngakuilu kampanda, wavua kujikija dikumbana dia malu wonso mamanyisha avua Masiya ne bua kukumbaja.

Bilondeshile milayi ya mu Bible idi Yone mumanye bimpe, Muela manyi wa Nzambi udi ne bua kuikala mukalenge, musungidi. Pabi, Yone utshidi’anu mukuata bu muena lukanu, nansha mukadi ngondo mivule mipite katshia Yezu watambuishibua. Nunku, mbimueneke se: Yone udi webeja Yezu ne: ‘Údí bushuwa eu údí ne bua kujadika Bukalenge bua Nzambi pa kuleja bukole, peshi kudi mukuabu, mupinganyi, utudi ne bua kuindila bua avue kukumbaja milayi ya dikema idi itangila butumbi bua Masiya?’

Pamutu pa kuambila bayidi ba Yone ne: ‘Bushuwa, ndi eu uvua ne bua kulua!’ Yezu udi wenza pa dine dîba adi bilejilu bia dikema pa kuondopa babedi bavule, ubuondopa ku masama ne bulema bia mishindu yonso. Pashishe udi wambila bayidi ne: “Ndayi, numanyishe Yone ebi binuamonyi ne binumvu: bafofo badi bapeta lumonu, balema badi benda, bena nsudi badi bakezudibua ne bampudi-matshi badi bumvua, bafue badi babiishibua, bapele badi bamanyishibua lumu luimpe.”

Mu makuabu mêyi, lukonko lua Yone ludi mua kuikala ne ditekemena dia se: Yezu neenze bivule kupitshisha pa bidiye wenza ne pamu’apa kupikula Yone muine. Kadi, Yezu udi wambila Yone bua kubenga kutekemena bivule kupita pa bishima bidiye wenza.

Padi bayidi ba Yone bumuka, Yezu udi ukudimuka kudi misumba ya bantu ne ubambila ne: Yone udi “mutumibue” wa Yehowa mumanyisha mu Malaki 3:1, udi kabidi muprofete Eliya mumanyisha mu Malaki 4:5, 6. Nunku, udi utemba Yone, umuteka mulongo umue ne muprofete yonso uvua ne muoyo kumpala kuende, umvuija ne: “Bushuwa ndi nnuambila ne: Munkatshi mua aba badi baledibue kudi bakaji ki nkubiike udi mutambe Yone Mubatiji; kadi eu udi mutambe bukese mu bukalenge bua mu diulu mmunene kumutamba yeye. Kadi kubangila ku matuku a Yone Mubatiji too ne mpindieu bukalenge bua mu muulu ntshipatshila tshidi bantu balumbila ne diluishakaja.”

Apa Yezu udi uleja se: Yone kakuikala mu Bukalenge bua mu diulu to, bualu mutambe bukese wa muin’emu mmunene kupita Yone. Yone mmulongoluele Yezu njila, kadi udi ufua kumpala kua Yezu kudia tshiovo, peshi kupunga, ne bayidi bende, bua bikale bakokeshi pamue nende mu Bukalenge buende. Ke bua tshinyi Yezu udi wamba ne: Yone kakuikala mu Bukalenge bua mu diulu to. Kadi, Yone neikale umue wa ku bakokeshibue ba Bukalenge bua Nzambi ba pa buloba. Luka 7:18-30; Matayo 11:2-15, NW.

▪ Bua tshinyi Yone udi webeja pa bidi bitangila Yezu bikalaye Eu udi ulua peshi mukuabu mushilangane udi ne bua kutekemenyibua?

▪ Mmilayi kayi idi Yezu wamba ne: Yone mmukumbaje?

▪ Bua tshinyi Yone Mubatiji kakuikala mu diulu ne Yezu?