Dilongesha 6

Bukalenge bua Nzambi ntshinyi?

Bukalenge bua Nzambi budi muaba kayi? (1)

Nnganyi udi Mukalenge wabu? (2)

Kudiku bakuabu bakokesha ne Mukalenge eu anyi? Bikalabuku, badi bungi munyi? (3)

Ntshinyi tshidi tshileja ne: tudi mu matuku a ku nshikidilu? (4)

Ntshinyi tshienzelabu bantu kudi Bukalenge bua Nzambi mu matuku atshilualua? (5-7)

1. Pavuaye pa buloba, Yezu wakalongesha bamulondi bua kusambila bua Bukalenge bua Nzambi. Bukalenge mmbulamatadi mulombola kudi mukalenge. Bukalenge bua Nzambi mmbulamatadi wa pa buende. Mbushikika mu diulu ne nebukokeshe buloba ebu. Nebusantuishe dîna dia Nzambi, peshi kudivuija dinsantu. Nebuenzeje bua se: disua dia Nzambi dienzeke pa buloba bu mutudi dienzeka mu diulu.​—Matayo 6:9, 10.

2. Nzambi wakalaya se: Yezu uvua ne bua kulua Mukalenge wa Bukalenge Buende. (Luka 1:30-33) Pavua Yezu pa buloba, wakajadika se: uvua ne bua kuikala Mukokeshi mulenga, muakane, ne mupuangane. Pakapinganaye mu diulu, kakatekibua mu nkuasa diakamue bu Mukalenge wa Bukalenge bua Nzambi. (Ebelu 10:12, 13) Mu 1914, Yehowa wakapa Yezu bukokeshi buvuaye mumulaye. Katshia ku tshikondo atshi, Yezu mmukokeshe mu diulu bu Mukalenge muteka kudi Yehowa.​—Danyele 7:13, 14.

3. Yehowa mmusungule kabidi bamue balume ne bakaji ba lulamatu pa buloba bua kuyabu mu diulu. Nebakokeshe ne Yezu bu bakalenge, banzuji, ne bakuidi pa bukua-bantu. (Luka 22:28-30; Buakabuluibua 5:9, 10) Yezu wakabikila bakokeshi nende ba mu Bukalenge buende aba ne: “kasumbu kakese.” Badi 144 000.​—Lukase 12:32, MMM; Buakabuluibua 14:1-3.

4. Diakamue pavua Yezu mulue Mukalenge, wakipata Satana ne banjelu bende babi mu diulu ne kubelaye pa buloba. Ke bua tshinyi malu mmalue mabipe panu pa buloba katshia ku 1914. (Buakabuluibua 12:9, 12) Mvita, biyole bia nzala, bipupu bia masama, didiunda dia dipetula dia mikenji​—bionso ebi ntshitupa tshia “tshimanyinu” tshidi tshileja ne: Yezu udi  ukokesha ne se: ndongoluelu eu udi mu matuku ende a ku nshikidilu.​—Matayo 24:3, 7, 8, 12; Luka 21:10, 11; 2 Timote 3:1-5.

5. Mu katupa kîpi emu Yezu nealumbuluishe bantu, ubatapulula bu mutu mulami utapulula mikoko ne mbuji. “Mikoko” ng’aba bikala bamane kudileja mudibu bakokedi bende bena bulamatshi. Nebapete muoyo wa kashidi pa buloba. “Mbuji” ng’aba bikala bamane kubenga Bukalenge bua Nzambi. (Matayo 25:31-34, 46) Mu matuku makese atshilualua emu, Yezu neabutule bonso badi bafuane mbuji. (2 Tesalonike 1:6-9) Biwasua kuikala umue wa ku “mikoko” ya Yezu, udi ne bua kuteleja mukenji wa Bukalenge ne kutumika ne biudi ulonga.​—Matayo 24:14.

6. Mpindieu buloba mbuabulukangane mu matunga mavule. Ditunga dionso didi ne wadi mbulamatadi. Misangu mivule matunga aa atu aluishangana dimue ne dikuabu. Kadi Bukalenge bua Nzambi nebupingane pa muaba wa mbulamatadi yonso ya bantu. Nebukokeshe bu mbulamatadi umuepele pa buloba bujima. (Danyele 2:44) Nenku mvita, dibunda bibawu, ne tshikisu kabiakuikalaku kabidi. Bantu bonso nebikale pamue mu ditalala ne mu buobumue.​—Mika 4:3, 4.

7. Mu Dikokesha dia Bidimu Tshinunu dia Yezu, bantu bena lulamatu nebalue bapuangane, ne buloba bujima nebulue mparadizu. Ku ndekelu kua bidimu tshinunu, Yezu neikale mumane kuenza malu onso avua Nzambi mumulombe bua kuenza. Nenku neapingaje Bukalenge kudi Tatuende. (1 Kolinto 15:24) Bua tshinyi kubenga kuambila balunda ne banangibue bebe malu alua Bukalenge bua Nzambi kuenza?

[Tshimfuanyi mu dibeji 13]

Muinshi mua dikokesha dia Yezu, kakuakuikala kabidi lukuna anyi difuikakaja meji mabi