Dilongesha 4

Diabolo nnganyi?

Satana Diabolo​—wakafumina kuepi? (1, 2)

Mmunyi mutu Satana upambuisha bantu? (3-7)

Bua tshinyi údí ne bua kutuila Diabolo nkanana? (7)

1. Muaku “diabolo” udi umvuija muntu udi wamba mashimi mabi pa bidi bitangila muntu mukuabu. “Satana” udi umvuija muena lukuna peshi muluishi. Ke mêna mapesha muena lukuna munene wa Nzambi. Kumpalampala, uvua muanjelu mupuangane mu diulu muvuaye ne Nzambi. Kadi kunyima, wakadiangata ne mushinga mupite pa uvuaye nawu ne kukeba ditendeledibua didi diakanyine Nzambi.​—Matayo 4:8-10.

2. Muanjelu eu, Satana, wakakula ne Eva pa kutumika ne nyoka. Pa kumuambila mashimi, wakamufikisha ku dibenga kutumikila Nzambi. Nunku, Satana wakaluisha tshidi tshibikidibua ne: “bumfumu bukena mikalu” bua Nzambi, anyi muanzu wa bu-Mutambe-Kutumbuka. Satana wakela mpata pa muanda wa se: Nzambi udi ukokesha mu mushindu muakanyine ne bua masanka a bantu Bende. Satana wakajula kabidi milandu pa muanda wa se: muntu nansha umue kavua mua kushala ne bulamatshi kudi Nzambi. Pa kuenza nanku, Satana wakadienza nkayende muena lukuna wa Nzambi. Ke bua tshinyi wakalua kubikidibua Satana Diabolo.​—Genese 3:1-5; Yobo 1:8-11; Buakabuluibua 12:9.

3. Satana udi uditatshisha bua kushimakaja bantu bua bamutendelele. (2 Kolinto 11:3, 14) Mushindu umue udiye upambuisha bantu nku diambuluisha dia tshitendelelu tshia dishima. Bikala tshitendelelu kampanda tshilongesha mashimi pa bidi bitangila Nzambi, tshidi bushuwa tshitua tshipatshila tshia Satana nyama ku mikolo. (Yone 8:44) Bena bitendelelu bia dishima badi mua kuela meji ne muoyo mujima se: badi batendelela Nzambi mulelela. Kadi mu bulelela badi basadila Satana. ‘Nnzambi wa bulongolodi ebu.’​—2 Kolinto 4:4, NW.

4. Spiritisme ke mukuabu mushindu utu Satana ukoka bantu muinshi mua bukokeshi buende. Badi mua kubila spiritu [mibi] bua kubakuba, bua kuenzela bakuabu bibi, bua kudianjila kuamba malu atshilualua, peshi bua kuenza bishima. Satana ke bukole bubi bùdì panyima pa ngenzelu yonso eyi. Bua kusankisha Nzambi, katuena ne bua kubuelakana mu mushindu nansha umue wa spiritisme to.​—Dutelonome 18:10-12; Bienzedi 19:18, 19.

5. Satana utu kabidi upambuisha bantu ku diambuluisha dia diditambisha bua dikoba  ne ku dikukuila malongolodi a tshididi. Bamue bantu batu bela meji ne: ditunga anyi dikoba diabu ndipite dia bakuabu. Kadi ki mmuomu nansha. (Bienzedi 10:34, 35) Banga batu batangidila malongolodi a tshididi bua kujikija ntatu ya bantu. Pa kuenza nunku, badi babenga Bukalenge bua Nzambi. Buobu ke tshiamu tshimuepele bua dijikija ntatu yetu.​—Danyele 2:44.

6. Munga mushindu utu Satana upambuisha bantu mpa kubateta ne majinga a mpekatu. Yehowa udi utuambila bua kuepuka ngenzelu ya mpekatu bualu mmumanye se: neyituenzele bibi. (Galatia 6:7, 8) Bamue bantu badi mua kusua ne: uditue nabu mu ngenzelu eyi. Kadi, wavuluka se: mu bulelela Satana ng’udi musue bua wewe kuenza malu aa.​—1 Kolinto 6:9, 10; 15:33.

7. Satana udi mua kutumika ne dikengeshibua anyi buluishi bua kukufikisha ku dilekela Yehowa. Bamue ba ku banangibue bebe badi mua kufiika munda bikole bualu udi ulonga Bible. Bakuabu badi mua kukuela nsenda. Kadi muoyo webe udi mu bianza bia nganyi? Satana mmusue kukutshingisha bua se: wimanyike dilonga pa bidi bitangila Yehowa. Kulekedi Satana ukutshimuna! (Matayo 10:34-39; 1 Petelo 5:8, 9) Pa kutuila Diabolo nkanana, udi usankisha Yehowa ne uleja se: udi utua bumfumu Buende bukena mikalu nyama ku mikolo.​—Nsumuinu 27:11.

[Bimfuanyi mu dibeji 9]

Tshitendelelu tshia dishima, buena-ditunga bunekesha, ne spiritisme bidi bipambuisha bantu

[Tshimfuanyi mu dibeji 9]

Tuila Satana nkanana pa kutungunuka ne kulonga pa bidi bitangila Yehowa