Dilongesha dia 7

Disemena kudi Nzambi mu disambila

Bua tshinyi kusambila pa tshibidilu kudi ne mushinga? (1)

Nnganyi utudi ne bua kusambila, ne mmushindu kayi? (2, 3)

Tudi mua kusambila bua malu makanyine kayi? (4)

Ndîba kayi diudi ne bua kusambila? (5, 6)

Nzambi utu uteleja masambila onso anyi? (7)

1. Disambila ndiakula ne Nzambi ne budipuekeshi buonso. Udi ne bua kusambila Nzambi pa tshibidilu. Nunku udi mua kudiumvua pabuipi nende bu kudi mulunda kampanda wa pa muoyo. Yehowa mmutambe bunene ne bukole be, kadi udi uteleja masambila etu! Utu usambila Nzambi pa tshibidilu anyi?​—Musambu wa 65:2; 1 Tesalonike 5:17.

2. Disambila ntshitupa tshia ntendelelu wetu. Nunku, tudi ne bua kusambila anu Nzambi, Yehowa. Pavua Yezu pa buloba, uvua usambila amu Tatuende, ki mmuntu  mukuabu kayi yonso nansha. Tudi ne bua kuenza bia mmuomumue. (Matayo 4:10; 6:9) Kadi, masambila etu onso adi ne bua kuenjibua mu dîna dia Yezu. Ebi bidi bileja ne: tudi tunemeka muanzu wa Yezu ne se: tudi ne ditabuja mu mulambu wende wa tshia-bupikudi.​—Yone 14:6; 1 Yone 2:1, 2.

3. Patudi tusambila tudi ne bua kuakula ne Nzambi biumbukila mu mutshima wetu. Katuena ne bua kuenza masambila etu makuata mu mutu anyi kuabala mu mukanda kampanda wa masambila. (Matayo 6:7, 8) Tudi mua kusambila basombe, bimane, mu nsombelu kayi yonso muakanyine, dîba kayi dionso, pa muaba kayi wonso. Nzambi udi mua kumvua too ne masambila a mundamunda menzela mu mutshima wetu. (1 Samuele 1:12, 13) Mbimpe kukeba muaba mupole ùdì kauyi bantu bakuabu bua kuenza masambila etu a muntu pa nkayende.​—Mâko 1:35.

4. Udi mua kusambila bua malu a mushindu kayi? Tshintu kayi tshionso tshidi mua kuikala ne buenzeji pa bulunda buebe nende. (Filipoi 4:6, 7) Disambila dia tshitembelu didi dileja se: tudi ne bua kusambila bua dîna dia Yehowa ne dilongolola diende. Tudi kabidi mua kulomba bua makengela etu a bintu bia ku mubidi, bua mpekatu yetu kubuikidibuayi, ne bua diambuluishibua bua kutuila ditetshibua nkanana. (Matayo 6:9-13) Masambila etu kaena ne bua kuikala a budinangi. Tudi ne bua kusambila anu bua malu adi umvuangana ne disua dia Nzambi.​—1 Yone 5:14.

5. Udi mua kusambila dîba kayi dionso didi mutshima webe ukusaka bua kusamuna Nzambi anyi kumuela tuasakidila. (1 Kulondolola 29:10-13) Udi ne bua kusambila paudi ne ntatu ne padi ditabuja diebe mu ditetshibua. (Musambu wa 55:22; 120:1) Mbiakanyine bua kusambila kumpala kua wewe kudia biakudia biebe. (Matayo 14:19) Yehowa udi utulomba bua kusambila “diba dionso.”​—Efeze 6:18, Mukenji Mulenga.

6. Tudi tukengela kusambila nangananga patudi benze mpekatu munene. Mu bikondo bu nunku, tudi ne bua kulomba luse ne dibuikidila kudi Yehowa. Tuetu bamutondele mpekatu yetu ne benze muetu muonso bua kubenga kuyenzulula, Nzambi ‘mmudiakaje bua kuyibuikidila.’​—Musambu wa 86:5, NW; Nsumuinu 28:13.

7. Yehowa udi uteleja anu masambila a bantu bakane. Bua masambila ebe kutelejibuawu kudi Nzambi, udi ne bua kuikala uditatshisha muebe muonso bua kuikala ne nsombelu udi mu diumvuangana ne mikenji yende. (Nsumuinu 15:29; 28:9) Udi ne bua kuikala ne budipuekeshi paudi usambila. (Luka 18:9-14) Udi ne bua kudienzeja bua kuenza tshiudi usambidila. Nenku neujadike se: udi ne ditabuja ne: udi bushuwa ujinga tshiudi wamba. Anu biwenza nunku ke Yehowa kushisha kuandamuna ku masambila ebe.​—Ebelu 11:6.