Dilongesha dia 14

Mushindu udi Bantemu ba Yehowa badilongolole

Ntshikondo kayi tshiakabanga Bantemu ba Yehowa ba tshikondo tshietu etshi? (1)

Mmunyi mudi bisangilu bia Bantemu ba Yehowa bienjibua? (2)

Mmunyi mutu majinga a mfranga ajikijibua? (3)

Tshisumbu tshionso ntshilombola kudi banganyi? (4)

Mbisangilu binene kayi bitu bienzeka tshidimu tshionso? (5)

Mmudimu kayi udi wenjibua ku tshilombuelu ne ku biro bia filiale biabu? (6)

1. Bantemu ba Yehowa ba tshikondo tshietu etshi mbabange mu bidimu bia 1870. Bangabanga, bavua babikidibua ne: Balongi ba Bible. Kadi mu 1931 bakangata dîna dia mu Mifundu dia: Bantemu ba Yehowa. (Yeshaya 43:10) Kutuadijila ku mbangilu mikese bulongolodi mbudiunde bufike too ne ku miliyo ya Bantemu, badi badîne mu diyisha mu matunga mapite pa  230.

2. Bisumbu bia bungi bia Bantemu ba Yehowa bitu ne bisangilu misangu isatu ku lumingu luonso. Udi mubikidibue bua kubuela mu tshionso tshia ku bisangilu ebi. (Ebelu 10:24, 25) Bible ke nshindamenu wa bidibu balongesha. Bisangilu bitu bibanga ne bijika ne disambila. “Misambo minsanto” ìdì ilenga ku muoyo itu kabidi imbibua mu bia bungi bia ku bisangilu ebi. (Bena Efeze 5:18, 19, Mukenji Mulenga) Dibuelamu didi tshianana, ne kamuena disangisha makuta.​—Matayo 10:8.

3. Bisumbu bia bungi bitu bienzela bisangilu mu Nzubu wa Bukalenge. Nzubu eyi ìtù pa tshibidilu mibaka kudi Bantemu ba Yehowa bena budisuile itu ya ngashilu kayi mujingakane. Kuakusangana bimfuanyi, nkuruse, peshi bintu bikuabu bu abi mu Nzubu wa Bukalenge.  Majinga a mfranga adi akumbajibua ku mapa a ku budisuile. Bua aba badi basue kufila mapa, kudi kashete ka mapa.​—2 Kolinto 9:7.

4. Mu tshisumbu tshionso mudi bakulu, peshi batangidi. Mba-ntunga-mulongo mu dilongesha mu tshisumbu. (1 Timote 3:1-7; 5:17) Mbakuatshisha kudi basadidi ba mudimu. (1 Timote 3:8-10, 12, 13) Bantu aba kabena babandishibue ku mutu kua bena mu tshisumbu bakuabu to. (2 Kolinto 1:24) Kabena bapeshibue mianzu ya pa buayi. (Matayo 23:8-10) Kabena bavuala bilamba bishilangane ne bia bakuabu. Ne kabena bafutshibua bua mudimu wabu. Bakulu badi batabalela makengela a mu nyuma a tshisumbu ku budisuile. Badi mua kufila disambibua ne buludiki mu bikondo bia ntatu.​—Yakobo 5:14-16; 1 Petelo 5:2, 3.

5. Bantemu ba Yehowa batu kabidi benza mpuilu minene tshidimu tshionso. Bisumbu bivule bitu bilua pamue mu bikondo ebi bua programe wa pa buende wa dishidimunyibua diashila pa Bible. Batismo wa bayidi bapiabapia ke tshitupa tshia pa tshibidilu tshia programe wa mpuilu yonso.​—Matayo 3:13-17; 28:19, 20.

6. Tshilombuelu tshia buloba bujima tshia Bantemu ba Yehowa tshidi ku New York. Ke muaba udi Kasumbu Kaludiki, kasumbu kalombodi kenza ne bakulu bapiluke bàdì batangila bisumbu pa buloba bujima. Kudi kabidi biro bia filiale bipite pa 100 pa buloba bujima. Ku miaba eyi, bena budisuile badi bambuluisha bua kupatula ne kuabanya mikanda miumvuiji ya Bible. Bulombodi bua dilongolola mudimu wa buambi butu bufuminaku kabidi. Bua tshinyi kubenga kuenzaku programe bua kukumbula biro bia filiale bidi pabuipi nenu?