Dilongesha 2

Nzambi nnganyi?

Nzambi mulelela nnganyi, ne dîna diende nnganyi? (1, 2)

Udi ne mubidi wa mushindu kayi? (3)

Nngikadilu kayi mitambe bunene idiye nayi? (4)

Tudi ne bua kutumika ne bimfuanyi ne bifuanyikijilu mu dimutendelela dietu anyi? (5)

Mmishindu kayi ibidi itudi mua kulonga pa bidi bitangila Nzambi? (6)

1. Bantu batu batendelela bintu bivule. Kadi Bible udi utuambila ne: kudi anu Nzambi umuepele MULELELA. Wakafuka bintu bionso bidi mu diulu ne pa buloba. Bu mudiye mutupeshe muoyo, yeye ke muntu Umuepele utudi ne bua kutendelela.​—1 Kolinto 8:5, 6; Buakabuluibua 4:11.

2. Nzambi udi ne mianzu mivule kadi udi anu ne dîna dimuepele. Dîna adi n’YEHOWA. Mu Bible ya bungi, dîna dia Nzambi ndiumbusha ne mbapingaje pa mutu padi mianzu bu mudi Mukalenge, Mfumu, ne Maweja. Kadi pavua Bible mufundibue, dîna edi Yehowa divuamu misangu bu 7 000!​—Ekesode 3:15; Musambu wa 83:18.

3. Yehowa udi ne mubidi, kadi kawena bu wetu. “Nzambi udi Spiritu,” ke mudi Bible wamba. (Yone 4:24, NW) Spiritu  mmuntu udi ne muoyo mutambe kule menemene wetu muoyo. Muntu nansha umue katu muanji kumona Nzambi. Yehowa udi mu diulu, kadi udi mua kumona bintu bionso. (Musambu wa 11:4, 5; Yone 1:18) Kadi, spiritu munsantu ntshinyi? Ki mmuntu bu mudi Nzambi to. Bishilangane, mbukole buenzeji bua Nzambi.​—Musambu wa 104:30.

4. Bible udi utusokoluela bumuntu bua Yehowa. Udi utuleja ne: dinanga, buakane, meji, ne bukole ke ngikadilu yende mitambe bunene. (Dutelonome 32:4; Yobo 12:13; Yeshaya 40:26; 1 Yone 4:8) Bible udi utuambila ne: udi kabidi muena luse, bulenga, dibuikidilangana, kalolo, ne muena lutulu. Bu bana batumikidi, tudi ne bua kuditatshisha bua kumuidikija.​—Efeso 5:1, 2.

5. Tudi ne bua kuinamina peshi kusambila bimfuanyi, bindidimbi, peshi bifuanyikijilu mu ditendelela dietu anyi? Tòo! (Ekesode 20:4, 5) Yehowa udi wamba se: tudi ne bua kumutendelela anu yeye nkayende. Kakuabanyangana butumbi buende ne munga muntu anyi ne tshintu tshikuabu nansha. Bimfuanyi kabiena ne bukole bua kutuambuluisha to.​—Musambu wa 115:4-8; Yeshaya 42:8.

6. Mmunyi mutudi mua kufika ku dimanya Nzambi bilenga? Mushindu umue nkubandila bintu bidiye mufuke ne kuela meji bikole pa tshidibi bitusokoluela. Bufuki bua Nzambi budi butuleja se: udi ne bukole ne meji bia bungi. Tudi tumona dinanga diende mu bionso bidiye muenze. (Musambu wa 19:1-6; Lomo 1:20) Mukuabu mushindu utudi mua kulonga pa bidi bitangila Nzambi mpa kulonga Bible. Udi utuambila mu Bible malu a bungi matambe pa mushindu udiye. Udi kabidi utuambila bua dilongolola diende ne tshidiye musue bua tuetu kuenza.​—Amosa 3:7; 2 Timote 3:16, 17.

[Bimfuanyi mu dibeji 5]

Tudi tulonga pa bidi bitangila Nzambi ku diambuluisha dia bufuki ne ku diambuluisha dia Bible