Yezu Kristo nnganyi?
Dilongesha 3
Yezu Kristo nnganyi?
Bua tshinyi Yezu udi ubikidibua ne: “Muanabute” wa Nzambi? (1)
Bua tshinyi udi ubikidibua ne: ‘Dîyi’? (1)
Bua tshinyi Yezu wakalua pa buloba bu muntu? (2-4)
Bua tshinyi wakenza bishima? (5)
Ntshinyi tshienza Yezu mu matuku makese atshilualua emu? (6)
1. Yezu uvua mu diulu bu muntu wa mu nyuma kumpala kua kuluaye pa buloba. Uvua tshifukibua tshia kumpala tshia Nzambi, ke bualu kayi udi ubikidibua ne: “Muanabute” wa Nzambi. (Bena Kolose 1:15, MMM; * Buakabuluibua 3:14) Yezu ke Muana umuepele wakadifukila Nzambi yeye nkayende. Yehowa wakatumika ne Yezu kumpala kua kuluaye muntu pa buloba bu “muenji wa mudimu wa nzanzu” wende mu difuka bikuabu bintu bionso bidi mu diulu ne pa buloba. (Nsumuinu 8:22-31, NW; Kolosai 1:16, 17) Nzambi wakatumika kabidi nende bu mutuadi wa dîyi Wende munene. Ke bua tshinyi Yezu udi ubikidibua ne: ‘Dîyi.’—Yone 1:1-3; Buakabuluibua 19:13.
2. Nzambi wakatuma Muanende pa buloba pa kusambuluja muoyo wende mu lukùtù lua Mariya. Nanku Yezu kavua ne tatu wa pa buloba nansha. Ke bua tshinyi kavua mupiane mpekatu nansha umue anyi dipanga bupuangane. Nzambi wakatuma Yezu pa buloba bua tubingila tusatu: (1) Bua kutulongesha bulelela pa bidi bitangila Nzambi (Yone 18:37), (2) bua kulama muoyo mutoke mupuangane, ufila tshitembelu bua tuetu kulonda (1 Petelo 2:21), ne (3) bua kulambula muoyo wende bua kutusungila ku mpekatu ne ku lufu. Bua tshinyi bualu ebu buvua bukengedibua?—Matayo 20:28.
3. Pa kubenga kutumikila dîyi-dituma dia Nzambi, muntu wa kumpala, Adama, wakenza tshidi Bible ubikila ne: “mpekatu.” Nunku Nzambi wakamufundila tshibawu tshia lufu. (Genese 3:17-19) Kavua kabidi ukumbaja mêyi-makulu a Nzambi, nanku katshivua kabidi mupuangane to. Ku kakese ku kakese wakakulakaja ne wakafua. Adama wakasambulujila bana bende bonso mpekatu. Ke bua tshinyi tudi petu tukulakaja, tusama, ne tufua. Mmunyi muvua bukua-bantu mua kupandishibua?—Lomo 3:23; 5:12.
4. Yezu uvua muntu mupuangane anu bu Adama. Kadi, bishilangane ne Adama, Yezu uvua utumikila Nzambi mu mushindu mupuangane nansha mu diteta ditambe bunene. Nunku uvua mua kulambula muoyo wende mupuangane wa bu-muntu bua kufuta mpekatu wa Adama. Ke tshidi Bible ufunkuna bu “tshia-bupikudi.” Bana ba Adama bavua mua kusuludibua nunku ku tshibawu tshia lufu. Aba bonso bàdì bitabuja Yezu badi mua kubabuikidila mpekatu yabu ne kupeta muoyo wa kashidi.—1 Timote 2:5, 6; Yone 3:16; Lomo 5:18, 19.
5. Pavuaye pa buloba Yezu wakondapa babedi, kudiisha bavua ne nzala, ne kubatamija bipepele. Wakajula too ne bafue. Bua tshinyi wakenza bishima? (1) Uvua umvuila bantu bavua bakenga luse, ne uvua musue kubambuluisha. (2) Bishima biende bivua bileja ne: uvua Muana wa Nzambi. (3) Bivua bileja tshienzelaye bukua-bantu butumikidi pakokeshaye bu Mukalenge pa buloba.—Matayo 14:14; Mâko 2:10-12; Yone 5:28, 29.
6. Yezu wakafua ne wakabiishibua kudi Nzambi bu tshifukibua tshia mu nyuma, ne wakapingana mu diulu. (1 Petelo 3:18) Katshia ku tshikondo atshi, Nzambi wakamuteka Mukalenge. Mu tshitupa tshîpi emu Yezu neumbushe bubi buonso ne makenga onso pa buloba apa.—Musambu wa 37:9-11; Nsumuinu 2:21, 22.
[Mêyi adi kuinshi]
^ Padi MMM ulonda mvese mutela bidi bileja ne: mmuangata mu nkudimuinu wa Mukanda wa Mvidi Mukulu.
[Bimfuanyi mu dibeji 7]
Mudimu wa Yezu uvua ukongoloja dilongesha, dienza bishima, ne dilambula mene dia muoyo wende buetu tuetu
