Bible udi ubulongesha patoke anyi?

BU BUSATU BUNSANTO buikale bulelela, buvua mua kuikala bumvuija patoke mu Bible. Bua tshinyi? Bualu, anu bu muvua bapostolo baleje, Bible mmukanda udi Nzambi mudimanyishe nawu kudi bukua-bantu. Kabidi, bu mutudi ne bua kumanya Nzambi bua kumutendelela mu mushindu muakanyine, Bible uvua kutuambila patoke tshidiye mene.

Bena kuitabuja ba mu siekele wa kumpala bavua bangata Mifundu bu masokolola malelela a kudi Nzambi. Ivua nshindamenu wa ditabuja diabo, bayangata ne bukenji butambe bunene. Tshilejilu, pavua mupostolo Paulo ulongesha bena Bereya, “bakitaba dîyi ne lukasa luonso, bakonkonona dituku dionso mu Mifundu bua kumona bionso ne bivua nanku.”​—Bienzedi 17:10, 11, NW.

Mu tshikondo atshi, ndilongesha kayi divua ne bukenji kudi bena Nzambi bamanyike? Bienzedi 17:2, 3, [NW] udi utuambuluisha bua kuandamuna ne: “Paulo kuya kudibo anu bu pa tshibidilu . . . welangana nabo meji bituadijile mu Mifundu, umvuija ne ushindika ku bijadiki [bia mu Mifundu].”

Yezu yeye muine wakafila tshilejilu, bualu dilongesha diende divua dishindamene pa Dîyi dia Nzambi. Misangu mivule uvua wamba ne: “Mbafunde ne.” Tudi kabidi tubala ne: mu tshikondo kampanda, “Kubumvuijaye mu Mifundu bionso bivua bimutangila.”​—Matayo 4:4, 7; Luka 24:27, NW.

Nenku, Yezu, Paulo ne bena nkristo ba mu siekele wa kumpala bavua bashindamije dilongesha diabo mu Mifundu. Bavua bamanye ne: “Mufundu wonso mmufunda ku spiritu wa Nzambi ne udi ne mushinga bua kulongesha, bua kubela, bua kupingajilula malu mu bulongame, bua kubela ne kunyoka mu buakane, bua muntu wa Nzambi ikale mukumbane tshishiki, mulongolola biakane bua mudimu wonso muimpe.”​—2 Timote 3:16, 17, NW; tangila kabidi 1 Kolinto 4:6; 1 Tesalonike 2:13; 2 Petelo 1:20, 21.

Bu mudi Bible mua “kupingajilula malu mu bulongame,” kabiyi mpata, udi ne bua kusokolola patoke bulelela pa tshilumbu tshia nshindamenu bu tshia Busatu Bunsanto bilondeshile ngakuilu wa badi badilongesha. Kadi, bena teoloji ne bena histware bine badi bamba ne: Bible udi ubulongesha patoke anyi?

“Busatu Bunsanto” budi mu Bible anyi?

MUKANDA kampanda wa bena mishonyi udi wamba ne: “Miaku Busatu Bunsanto kayena isanganyibua mu Bible nansha . . . Kayakapeta muaba mu teoloji wa ekleziya too ne mu siekele muinayi.” (The Illustrated Bible Dictionary) Ne mushikuluji kampanda muena Katolike udi wamba ne: Busatu Bunsanto “kabuena . . . mu buludiludi ne katataka Dîyi dia Nzambi to.”​—New Catholic Encyclopedia.

Tshibungu tshia The Catholic Encyclopedia tshidi patshi tshiumvuija ne: “Too ne mpindieu, ki mbanji kusangana mu Mifundu muaku wa pa buawo nansha umue udi usangisha ba Persona Basatu ba Bunzambi. Muaku τρίας [triʹas] (trinitas mu Latin) udi usanganyibua, bua musangu wa kumpala, mu mikanda ya Théophile wa ku Antiokiya bu ku 180 B.B. . . . Kunyima kua bikondo bikese, udi umueneka mu muakulu wa Latin, trinitas, mu mikanda ya Tertullien.”

Kadi, etshi ki ntshijadiki tshia se: Tertullien wakalongesha Busatu Bunsanto. Mukanda wa bena Katolike, Trinitas​—A Theological Encyclopedia of the Holy Trinity, udi uleja ne: imue ya ku miaku ya Tertullien yakangatshibua pashishe kudi bakuabo bua kumvuija nayi Busatu Bunsanto.  Kadi, mukanda eu udi udimuija ne: “Kabiena biakane bua kuenza nkomenu ya lukasa pa ditumika didibo batumike ne miaku eyi, bualu kavua muangate miaku eyi bua kumvuija nayi teoloji wa Busatu Bunsanto nansha.”

Dijadika dia Mifundu ya tshiena-Ebelu

BITUAPANGA kusangana miaku “Busatu Bunsanto” mu Bible, tudiku mua kuamba ne: badi mua kuikala bumvuijemu dilongesha dia Busatu Bunsanto anyi? Pa muanda eu, Mifundu ya tshiena-Ebelu (“Tshiovo tshia Kale”) idi itulongesha tshinyi?

Tshibungu tshia The Encyclopedia of Religion tshidi tshitaba ne: “Bena teoloji ba mu tshikondo tshietu badi bumvuangana ku dîyi bua kuamba ne: mu Bible wa tshiena-Ebelu kamuena musanganyibua dilongesha dia Busatu Bunsanto.” Ne New Catholic Encyclopedia udi wamba kabidi ne: “Dilongesha dia Busatu Bunsanto ki ndilongesha dia mu T[shiovo tshia] K[ale] nansha.”

Bia muomumue, Jezuite Edmund Fortman, mu mukanda wende The Triune God, udi witaba ne: “Tshiovo tshia Kale . . . katshiena tshituambila bualu nansha bumue, mu mipinganyi anyi patoke, bua Nzambi wa busatu udi mua kuikala Tatu, Muana ne Spiritu Munsantu to. . . . Kakuena tshijadiki tshia se: nansha umue wa ku bafundi ba mikanda minsantu uvua muele meji nansha kakese ku dikalaku dia [Busatu] kampanda mu Bunzambi. . . . Kupetamu miaku [mu “Tshiovo tshia Kale”], nansha ngenyi anyi ‘bimanyinu bisokome’ pa bidi bitangila busatu kampanda bua bantu, nkupitshisha pa miaku ne majinga a bafundi ba mikanda minsantu.”​—Miaku miladika nyetu.

Dikonkonona dia Mifundu ya tshiena-Ebelu didi dijadika mamanyisha aa. Nenku, Busatu kampanda kabuena bulongesha patoke nansha muaba umue mu mikanda 39 ya kumpala ya mu Bible idi yenza tshibungu tshia Mifundu ya tshiena-Ebelu mifundisha ku spiritu wa Nzambi.

Dijadika dia Mifundu ya tshiena-Greke

MIFUNDU ya tshiena-Greke ya bena nkristo (“Tshiovo Tshipiatshipia”), idi payi yakula patoke bua Busatu kampanda anyi?

Tshibungu tshia The Encyclopedia of Religions tshidi tshiamba ne: “Bena teoloji mbapunge dîyi dimue, bitaba ne: Tshiovo Tshipiatshipia katshiena patshi ne dilongesha nansha dimue dia patoke dia Busatu Bunsanto.”

Jezuite Fortman, udi wamba ne: “Bafundi ba Tshiovo Tshipiatshipia . . . ki mbaleje mu mushindu muanyishibue anyi wa patoke dilongesha dia Busatu Bunsanto ne kabena bafila dilongesha nansha dimue dia patoke dia se: mu Nzambi umuepele, mudi bantu kampanda basatu bikale bena mulongo umue. . . . Kakuena muaba nansha umue utudi tusangana dilongesha dia busatu bua bantu kampanda basatu basunguluke bikale ne muoyo wa bunzambi ne benza midimu ya bunzambi, basangile mu Bunzambi bumue.”

Tudi tubala mu The New Encyclopædia Britannica ne: “Miaku Busatu Bunsanto kayena mu Tshiovo Tshipiatshipia to. Dilongesha didiyo ileja kabatu banji kudilejamu patoke nansha.”

Mu mukanda wa A Short History of Christian Doctrine, Bernhard Lohse udi wamba ne: “Pa bidi bitangila Tshiovo Tshipiatshipia, katuena tusanganamu dilongesha dilelela dia Busatu Bunsanto nansha dimue.”

Bia muomumue, The New International Dictionary of New Testament Theology udi wamba ne: “T[shiovo] T[shipiatshipia] katshiena ne dilongesha diumvuike dia Busatu Bunsanto. ‘Mu Bible kamuena muaba udibo bamba patoke ne: Tatu, Muana ne Spiritu Munsanto badi buonso buabo ne bunzambi bua muomumue’ [ke miaku ya muena teoloji wa bena mishonyi Karl Barth].”

E. Washburn Hopkins, profesere wa mu Université wa Yale wakajadika pende ne: “Bidi bimueneka ne: dilongesha dia busatu kadivua dimanyike kudi Yezu ne Paulo; . . . kabena nansha bakule pa muanda eu to.”​—Origin and Evolution of Religion.

Muena histware Arthur Weigall mmuleje ne: “Yezu Kristo katshia ki mmuakule musangu nansha umue pa bualu bua mushindu’eu, ne miaku ‘Busatu Bunsanto’ kayena isanganyibua muaba nansha umue mu Tshiovo Tshipiatshipia. Lungenyi elu bakaluitaba kudi Ekleziya anu bidimu nkama isatu kunyima kua lufu lua Mfumu wetu.”​—The Paganism in Our Christianity.

Nenku, nansha mu mikanda 39 ya Mifundu ya tshiena-Ebelu nansha mu tshibungu tshia mikanda 27 mifundisha ku spiritu wa Nzambi ya mu Mifundu ya tshiena-Greke ya bena-nkristo, kamuena dilongesha dia Busatu Bunsanto nansha.

Bakabulongesha kudi bena nkristo ba kumpala anyi?

BENA NKRISTO ba kumpala bakalongesha Busatu Bunsanto anyi? Tutangilayi tshidibo bamba kudi bena histware ne bena teoloji:

“Buena-nkristo bua ku ntuadijilu kabuvua ne dilongesha dia patoke dia Busatu Bunsanto bu mudi edi divuabo ne bua kumvuija mu mitabuja akalonda pashishe nansha.”​—The New International Dictionary of New Testament Theology.

“Kadi, bena nkristo ba kumpala kabakela meji diambedi bua kulamika dilongesha edi [dia Busatu Bunsanto] mu ntendelelu wabu. Bavua batendelela Nzambi Tatu ne Yezu Kristo, Muana wa Nzambi, kabidi bavua bamanye . . . Spiritu Munsantu; kadi kakuvua lungenyi lua basatu aba kuikalabo Busatu kampanda, buonso bena mulongo ne badisangishe mu Umue.”​—The Paganism in Our Christianity.

“Ku mbangilu, ditabuja dia bena nkristo kadivua dishindamene pa Busatu Bunsanto nansha. . . .  Tòo, anu bu mudibi bileja mu T[shiovo] T[shipiatshipia] ne mu mifundu mikuabo ya bena nkristo ba kumpala, kabivua nanku mu tshikondo tshia bapostolo anyi mu etshi tshivua ne bua kulonda.”​—Encyclopædia of Religion and Ethic.

“Diumvuija dia ‘ba Persona basatu mu Nzambi umue’ kadivua dishindame menemene to, peshi kabayi badibuejilamu kabiyi mpata mu nsombelu wa bena nkristo ne mu dijikula dia ditabuja diabo, kumpala kua ndekelu wa siekele muinayi . . . Nansha kudi Batatu ba Ekleziya, kakuena kusanganyibua tshintu nansha tshimue tshivua mua kuvuluija nansha kakese mmuenenu eu.”​—New Catholic Encyclopedia.

Tshiakalongesha Batatu ba kumpala kua Nicée

BATATU ba kumpala kua Nicée mbamanyike bu bamfumu ba Ekleziya bavua ne buenzeji bukole butambe munkatshi mua siekele ya kumpala yakalonda diledibua dia Kristo. Nenku, dilongesha diabo kadiena dia kulengulula nansha.

Justin Martyr, ufuile bu mu 165 B.B., wakabikila Yezu uvua kayi muanji kulua muntu, muanjelo mufuka, udi “mushilangane ne Nzambi muenji wa bionso.” Wakamba ne: Yezu uvua mupuekele kudi Nzambi ne “katu muanji kuenza tshintu nansha tshimue anu bivua Mufuki . . . musue bua yeye kuenza anyi kuamba.”

Irénée, ufuile bu mu 200 B.B., wakamba ne: kumpala kua kuikalaye muntu, Yezu uvua ne muoyo mushilangane ne wa Nzambi ne mupuekele kudiye. Wakaleja ne: Yezu ne “Nzambi umuepele ne mulelela” kabena bena mulongo umue nansha, Nzambi udi “ku mutu kua buonso, ne kakuena muntu mukuabo pabuipi nende.”

Clément muena Alexandrie, ufuile bu mu 215 B.B., wakakula bua Yezu kumpala kua kuluaye muntu bu “tshifukibua” eku Nzambi yeye muikale “Nzambi umuepele mulelela, kayi mufuka ne ukena-ufua.” Wakamba ne: Muana “udi ulua kunyima kua Tatu, yeye nkayende muena bukole buonso,” kadi kêna muena mulongo nende.

Tertullien, ufuile bu mu 230 B.B., wakalongesha dikala dia Nzambi ku mutu kua bionso. Wakamba ne: “Tatu mmushilangane ne Muana (munga muntu) bu mudiye mutambe bunene; bu mudi muledi mushilangane ne muana; mutumianganyi mushilangane ne mutumibue.” Wakamba kabidi ne: “Kuvua tshikondo tshivua Muana kayiku. . . . Kumpala kua bionso, Nzambi uvuaku nkayende.”

Hippolyte, ufuile bu mu 235 B.B., wakamba ne: Nzambi udi “Nzambi umue, wa kumpala ne Umuepele, Muenji ne Mukalenge wa bionso,” eu “uvua kayi muena mulongo ne tshintu nansha tshimue. . . . Kadi uvua Umue ne yeye nkayende; bua disua diende, wakafuka bivua kabiyiku bangabanga,” bu mudi Yezu wakafukibua kumpala kua kuluaye muntu.

Origène, ufuile bu mu 250 B.B., wakamba ne: “Tatu ne Muana badi mibidi ibidi . . . bintu bibidi pa bidi bitangila bunzambi buabo,” kabidi ne: “yeye mufuanyikija ne Tatu, [Muana] udi bukenke bukese butambe.”

Pa kusanga bijadiki bionso bia malu a kale, Alvan Lamson udi wamba mu The Church of the First Three Centuries ne: “Dilongesha dia buena lelu ne ditangalake dia Busatu Bunsanto . . . kadiena difumina ku mêyi a Justin [Martyr] to: bualu ebu tudi mua kubuambulula kabidi bua Batatu ba kumpala kua Nicée; mbuena kuamba ne: bena nkristo buonso bafundi ba mikanda ba mu siekele isatu yakalonda diledibua dia Kristo. Bushuwa badi bakula bua Tatu, bua Muana ne bua . . . Spiritu munsantu, kadi ki mbu bikale buonso bena mulongo umue, nansha bu badi bena bunzambi bumue, pa kuakula bua bungi, ki mbu bikale Basatu mu Umue mu ngumvuilu yonso itubo banyisha kudi bitabi ba Busatu Bunsanto nansha. Kadi tshidi tshibengangane menemene ne muanda eu ke tshidi tshilelela.”

Nenku, dijadika dia Bible ne dia histware didi dileja patoke se: Busatu Bunsanto kabuvua bumanyike patshivuabo bafunda Bible to, kabidi buakashala kabuyi bumanyike nenku munkatshi mua siekele mivule.

[Lungenyi lunene lua mu dibeji 7]

“Kakuena tshijadiki tshia se: nansha umue wa ku bafundi ba mikanda minsantu uvua muele meji nansha kakese ku dikalaku dia [Busatu] kampanda mu Bunzambi.”​—The Triune God.