Bible udi wamba tshinyi pa bidi bitangila Nzambi ne Yezu?

BU BANTU mua kubala Bible mu kabujima, kakuyi mmuenenu mumana kusungula pa bidi bitangila Busatu kampanda, badi mua kudifikila nkayabo ku ditabuja dia mushindu’eu anyi? Nansha kakese.

Bualu tshialuila mubadi udi kayi ne mmuenenu mumana kusungula mu lungenyi ntshia se: anu Nzambi nkayende ke Wa-Bukole-Buonso, Mufuki, musunguluke ne mushilangane ne [nzambi] mukuabo yonso; ne Yezu, nansha kumpala mene kua kuikalaye ne muoyo bu muntu, udi pende musunguluke ne mushilangane, tshifukibua, tshidi ku bukokeshi bua Nzambi.

Nzambi udi Umue, ki mbasatu

DILONGESHA dia mu Bible dia se: Nzambi udi umue didi dibikidibua ne: monoteyisme. Ne L. L. Paine, profesere wa histware wa Ekleziya udi uleja ne: monoteyisme mu mushindu mukezuke menemene kawena mua kumvuangana ne Busatu kampanda: “Tshiovo tshia Kale tshidi anu ne monoteyisme. Nzambi udi muntu umue wa pa nkayende. Lungenyi lua se: busatu kampanda budi mua kusanganyibuamu . . . kaluena ne nshindamenu nansha mukese.”

Kuvuaku dishintuluka kampanda ku monoteyisme kunyima kua dilua dia Yezu pa buloba anyi? Paine udi wandamuna ne: “Pa muanda eu kakuena diabulukangana pankatshi pa Tshiovo tshia Kale ne Tshipiatshipia nansha. Tshilele tshia monoteyime tshidi anu tshitungunuka. Yezu uvua muena Yuda, mulongesha kudi baledi bena Yuda mu mifundu ya Tshiovo tshia Kale. Dilongesha diende divua menemene dia bena Yuda; evanjeliyo mupiamupia bushuwa, kadi ki nteoloji mupiamupia nansha. . . .  Ne wakangata bu ditabuja diende mene mêyi manene a monoteyisme wa bena Yuda adi amba ne: ‘Umvuaku, Izalele we, Mfumu Nzambi wetu udi Nzambi umue.’”

Tudi tusangana mêyi aa mu Dutelonome 6:4. Monayi mushindu udiwu mamba mu Bible de Jérusalem (Jé): “Teleja, Izalele, Yahvé Nzambi wetu udi anu Yahvé umue.” a Bilondeshile muakulu, muaku “umue” kawena mubambakaja ne muaku mukuabo nansha umue wa ku bungi udi mua kuukudimuna bua kuleja se: muaku’eu udi bua bantu bapite pa umue to.

Mupostolo muena nkristo Paulo, nansha yeye pende, kavua muleje dishintuluka nansha dimue dia bunzambi, kumpala nansha kunyima mene kua dilua dia Yezu pa buloba. Wakafunda ne: “Nzambi udi anu umue.”​—Galatia 3:20; tangila kabidi 1 Kolinto 8:4-6.

Misangu binunu ne binunu, Bible udi wakula bua Nzambi bu muntu kampanda umuepele. Dîba didi Nzambi wakula, bidi bu muntu umuepele udi kayi kuabulula. Bible kêna ushiya pà kuelela mpata pa bualu ebu to. Bu mudi Nzambi wamba ne: “Ndi Yehowa. Adi ke dîna dianyi; ne tshiena mpesha mukuabo butumbi buanyi.” (Yeshaya 42:8, NW) “Ndi Yahvé, Nzambi webe. . . . Kuena ne bua kuikala ne nzambi mikuabo pa kumusha meme.” (Miaku miladika nyetu.)​—Ekesode 20:2, 3, Jé.

Bua tshinyi bafundi ba Bible buonso benzeja ku spiritu wa Nzambi bavua mua kuakula bualu buende bu muntu umuepele bikalaye, bulelela, bantu basatu? Ngenzelu eu neikale ne tshipatshila kayi pikalabi kabiyi anu bua kupambula bantu? Bushuwa, bu Nzambi muenza kudi bantu kampanda basatu, uvua mua kuikala muenze bua bafundi bende ba Bible bajadike muanda eu patoke kakuyi dielakana bua kakushadi mpata nansha mikese. Ndekedi wa bionso, bafundi ba Mifundu ya tshiena-Greke ya buena-nkristo, bavua basombe ne Muana muine wa Nzambi bavua mua kuleja bualu ebu. Kadi kabakenza nanku.

Kabiyi nanku, tshivua bafundi ba Bible bajadike patoke ntshia se: Nzambi udi Muntu umue​—wa nkaya, kayi kuabuluja ne ukena ne muena mulongo nende: “Ndi Yehowa, ne kakuena mukuabo. Pa kungumusha meme, kakuena Nzambi mukuabo.” (Yeshaya 45:5, NW) “Wewe, muena dîna dia Yehowa, udi nkayebe Mutambe-Bunene pa buloba bujima.”​—Musambu wa 83:18, NW.

Kêna Nzambi muenza kudi ba-nzambi ba bungi

YEZU wakabikila Nzambi ne: “Nzambi umuepele mulelela.” (Yone 17:3) Katshia, katu muanji kuamba bua Nzambi bu nzambi kampanda muenza kudi bantu ba bungi to. Nenku, mu Bible, kakuena mukuabu amu Yehowa ke udibo babikila ne: Wa-Bukole-Buonso. Tshianana, mbikidilu “Bukole-Buonso” kavua mua kumvuika to. Nansha Yezu, nansha spiritu munsantu kabena babapeshe muanzu eu to, bualu Yehowa nkayende ke udi mfumu wa bionso. Mu Genese 17:1 udi wamba ne: “Ndi Nzambi wa Bukole Buonso.” Ne mu Ekesode 18:11 tudi tubala ne: “Yehowa udi utamba nzambi yonso bunene.”

Mu Mifundu ya tshiena-Ebelu, muaku ʼelohʹah (nzambi) udi ufundibua mishindu ibidi ku bungi: ʼelo·himʹ (ba-nzambi) ne ʼelo·hehʹ (nzambi ya). Miaku eyi yonso ya ku bungi itu ileja pa tshibidilu Yehowa patuyi mikudimuna ne: “Nzambi” ku bumue. Mishindu eyi idi yumvuija Busatu kampanda anyi? Tòo. William Smith udi wamba mu nkonga-miaku wa A Dictionary of the Bible ne: “Lungenyi lua se: [ʼelo·himʹ] udi mua kuikala uleja busatu bua bantu mu Bunzambi ludi lelu’eu ne baluitabi anu bakese munkatshi mua bashikuluji. Diangata dia muaku mushind’eu didi diumvuangana ne tshidi bashikuluji ba miaku babikila ne: ku-bungi kua kanemu peshi didi dileja dipuangana dia bukole bua Nzambi, bukole busanga budi Nzambi utumika nabu.”

The American Journal of Semitic Languages and Literatures udi wamba pa bidi bitangila ʼelo·himʹ ne: “Misangu yonso utu mubambakaja ne tshifidi tshiangatshila ku muaku wa pa muanda tshia ku bumue ne wangata mufidi muleji ngikadilu wa ku bumue.” Muyuki wa bufuki udi wambuluisha bua kumvuija mmuenenu eu: ʼelo·himʹ udi usanganyibuamu misangu 35 ne ku musangu wonso, muaku wa pa muanda udi uleja tshidi Nzambi wamba peshi tshidiye wenza, udi’anu ku bumue. (Genese 1:1 too ne 2:4) Nenku, mukanda eu udi ukoma ne: “[ʼElo·himʹ] udi’anu mua kuikala ku-bungi kua buneme kudi kumvuija bunene ne buneme.”

ʼElo·himʹ kêna umvuija “bantu” to, kadi “banzambi.” Pa nanku, bantu badi bashindika ne: muaku eu ʼelo·himʹ udi umvuija Busatu kampanda badi badienza batendeledi ba nzambi ya bungi. Bua tshinyi? Bualu bidi mua kulua kumvuija ne: kudi nzambi isatu mu Busatu Bunsanto. Eku paku bitabi ba Busatu Bunsanto, pabuipi ne buonso, mbabenge dilongesha dia se: kudi nzambi isatu misunguluke mu Busatu Bunsanto.

Bible udi kabidi wangata miaku eyi ʼelo·himʹ ne ʼelo·hehʹ bua kuleja banzambi ba dishima peshi mpingu. (Ekesode 12:12; 20:23) Kadi, misangu mikuabo, miaku eyi idi mua kuangatshibua bua nzambi umue wa dishima bu muvuabi bua nzambi wa bena Filisti uvuabo babikila ne: “Dagona, nzambi wabo [ʼelo·hehʹ].” (Balumbuluishi 16:23, 24) Baala badi bamubikila pende ne: “nzambi [ʼelo·himʹ].” (1 Bakelenge 18:27) Muaku’eu udi wangatshibua kabidi bua bantu. (Musambu wa 82:1, 6) Mozese bakamuambila ne: neikale bu “Nzambi” [ʼelo·himʹ] ku mesu kua Alona ne kua Faraone.​—Ekesode 4:16; 7:1.

 Kabiyi mpata, diangatshibua dia mianzu eyi ʼelo·himʹ ne ʼelo·hehʹ bua banzambi ba dishima, ne nansha bua bantu, kadivua diumvuija ne: nzambi yonso uvua muenza ne bungi kampanda bua nzambi to. Bia muomumue, bikala mianzu ʼelo·himʹ ne ʼelo·hehʹ miangatshibue bua Yehowa, katuena mua kukoma ne: bu mudibi nanku, kudi bantu kampanda bapite pa umue munda mua Nzambi nansha, nangananga patudi tuangata ne mushinga bumanyishi bukuabo bufila kudi Bible pa muanda eu.

Yezu ntshifukibua tshisunguluke

PA BULOBA, Yezu uvua muntu​—nansha muvuaye muntu mupuangane, bualu Nzambi ke uvua musambuluje bukole bua muoyo wa Muanende mu difu dia Mariya. (Matayo 1:18-25) Kadi, ki mmushindu wakabangaye nansha. Yeye muine wakamba ne: uvua “mutuluke mu diulu.” (Yone 3:13) Nanku, bivu’anu biumvuike pakambilaye balongi bende pashishe ne: “Apu binuamona Muan’a muntu [Yezu] ubanda kuaka kuvuaye diambedi?”​—Yone 6:62, Jé.

Pa nanku, kumpala kua kuluaye pa buloba, Yezu ukavua ne muoyo mu diulu. Uvua umue wa ku bantu basatu badi benza Bunzambi busatu, buena bukole-buonso ne bua kashidi anyi? Tòo, bualu Bible udi wamba patoke ne: kumpala kua kuluaye muntu, Yezu uvua tshifukibua tshia mu nyuma, mufuka kudi Nzambi, amu bu banjelu. Nansha banjelu nansha Yezu kabavuaku kumpala kua difukibua diabo.

Kumpala kua kuluaye muntu, Yezu uvua “Muanabute wa bifukibua bionso.” (Kolosai 1:15) Uvua “tshibangidilu tshia bionso bidi Mvidi Mukulu mufuke.” (Buakabuluibua 3:14, Muanda mulenga) Katuena mua kumvuija “tshibangidilu” [ar·kheʹ, mu tshiena-Greke] biakane bua kuamba ne: Yezu ke uvua ‘mubangishi’ wa bufuki bua Nzambi to. Mu mifundu yende mu Bible, Yone udi utela muaku ar·kheʹ misangu mipite pa 20, ne misangu yonso, muaku eu udi umvuija “tshibangidilu” bu pa tshibidilu. Eyowa, Yezu uvua mufukibue kudi Nzambi bu tshibangidilu tshia bifukibua biende bikena bimueneka.

Tudi mua kumona diumvuangana dikole didi pankatshi pa miaku eyi idi ileja mbangilu wa Yezu ne mikuabo idi miangatshibue kudi “Meji” wa mu tshimfuanyi mu mukanda wa Nsumuinu: “Yahvé wakamfuka, mamuma a diambedi a mudimu wende, kumpala kua bintu biende bionso biakenzaye ku kale. Kumpala kua mikuna mitumbuke kayiyi mianji kujadikibua ne kumpala kua tukunakuna, mvua muledibue; kumpala kua kuenzaye buloba ne madimi abu ne lupuishi lua ntuadijilu lua buloba.” (Nsumuinu 8:12, 22, 25, 26, Jé.) Padi muaku “Meji” muangata bua kumuenesha eu wakafukibua kudi Nzambi, bavule ba ku bashikuluji badi bajadika ne: bidi’anu bushuwa ngakuilu wa mu tshimfuanyi bua kuleja Yezu patshivuaye tshifukibua tshia mu nyuma kumpala kua kuluaye pa buloba.

Pavuaye muakule bu “Meji,” kumpala kua dikalaku diende bu muntu, Yezu wakatungunuka e kuamba ne: uvua “ku luseke luende [lua Nzambi] bu muena mudimu wa kalanda-musenga.” (Nsumuinu 8:30, Jé) Mu diumvuangana ne tshidi muena mudimu wa kalanda-musenga ne bua kuenza, Kolosai 1:16 udi wamba bua Yezu ne: “Ku diambuluisha diende, ke kudi Nzambi mufuke bintu bionso bidi mu diulu ne bidi pa buloba.”​—Français courant.

Nenku, bivua ku butuangaji bua muena mudimu eu wa kalanda-musenga​—muenzejanganyi nende mupuekele—​ke kuvua Nzambi Wa-Bukole-Buonso mufuke bintu bikuabu bionso. Bible udi wamba mu tshikoso pa muanda eu ne: “Buetu tuetu, kudi’anu Nzambi umuepele, Tatu, bintu bionso mbifume kudiye . . . ne Mfumu umuepele, Yezu Kristo, bintu bionso bidiku ku butuangaji buende.” (Miaku miladika nyetu).​—1 Kolinto 8:6, RS, nkudimuinu wa bena Katolike.

Kakuena mpata nansha mikese bua se: muena mudimu wa kalanda-musenga eu ke uvua Nzambi muambile ne: “Tuenze muntu ne tshifuanyikiji tshietu.” (Genese 1:26, NW) Bamue badi bamba ne: miaku “Tuenze” ne “tshietu” idi yakuila Busatu kampanda. Kadi, biwamba wewe muine ne: ‘tuenze tshintu kampanda,’ muntu nansha umue kêna mua kukoma ne: nudi bantu ba bungi mu muntu umue to. Kadi tshionso tshiudi musue kuamba ntshia ne: bantu babidi peshi ba bungi nebenze mudimu pamue. Bia muomumue, pavua Nzambi muangate miaku “tuenze” ne “tshietu,” uvua anu wakula ne muntu mukuabo, tshifukibua tshiende tshia kumpala tshia mu nyuma, muena mudimu wa kalanda-musenga peshi Yezu diambedi kayi muanji kulua muntu.

Nzambi udi mua kutetshibua anyi?

MATAYO 4:1 (NW) udi wakula bua Yezu bu “mutetshibue kudi Diabolo.” Kunyima kua yeye mumane kuleja Yezu “makelenge onso a ha buloba ne butumbi buawu,” Satana wakamba ne: “Nenkuhe bintu ebi bionso, biwatua binu biebe hanshi, biwankukuila.” (Matayo 4:8, 9) Satana uvua uteta kusaka Yezu bua kupangaye lulamatu kudi Nzambi.

Mmunyi muvua lulamatu lua Yezu mua kutetshibua bu yeye muikale Nzambi?  Nzambi uvua mua kuditombokela yeye nkayende anyi? Nansha kakese, kadi banjelu ne bantu bavua mua kutombokela Nzambi, ne ke tshiakenzabo kudi bakuabo. Ditetshibua dia Yezu didi mua kumvuika anu bu yeye muikale, ki nNzambi, kadi muntu kampanda musunguluke uvua ne bua kuikala ne buende budisunguidi, uvua mua kubenga kushala ne lulamatu bu yeye musue, bu mudi muanjelu anyi muntu kampanda mua kuenza.

Ku luseke lukuabo, katuena mua kuela meji se: Nzambi udi mua kuenza mpekatu peshi kuditombokela. “Bienzedi biende bidi bipuangane . . . Nzambi wa lulamatu, . . . udi muakane ne mujalame.” (Dutelonome 32:4, NW) Pa nanku, bu Yezu muikale Nzambi, kavua mua kutetshibua nansha.​—Yakobo 1:13.

Bu muvuaye kayi Nzambi, Yezu uvua mua kupanga lulamatu. Kadi wakashala ne lulamatu e kuamba ne: “Umuka, Satana, bualu mbafunde ne: ‘Yehowa Nzambi webe ke uwudi ne bua kutendelela, amu yeye nkayende ke uwudi ne bua kusadila ne mudimu munsantu.’”​—Matayo 4:10, NW.

Tshia-bupikudi tshivua tshia mushinga kayi?

KAMUE ka ku tubingila tuvua Yezu muluile pa buloba kadi katangila Busatu Bunsanto. Tudi tubala mu Bible ne: “Kudi Nzambi umuepele, ne mutuangaji umue pankatshi pa Nzambi ne bantu, muntu: Kristo Yezu, wakafila yeye nkayende tshia-bupikudi tshikumbanangane bua bantu buonso.”​—1 Timote 2:5, 6, NW.

Yezu, muntu mupuangane, kayi mupuekele anyi mupitshidile, wakavua tshia-bupikudi tshikumbanangane menemene ne tshivua Adama mujimije: bukenji bua kuikala ne muoyo mupuangane pa buloba. Nenku, Yezu uvua mua kubikidibua mu buakane “Adama wa ndekelu” kudi mupostolo Paulo, eu wakamba mushindu umue ne: “Anu bu mudi bantu buonso bafua mu Adama, bia muomumue kabidi, buonso nebavuijibue ne muoyo mu Kristo.” (1 Kolinto 15:22, 45, NW) Muoyo wa muntu mupuangane wa Yezu uvua menemene “tshia-bupikudi tshikumbanangane” bilondeshile mikenji ya Nzambi​—anu pa tshiotshi. Nansha bitualonda mikenji ya bantu, kudi dîyi-diludiki ditu diamba ne: mushinga wa tshibawu udi ne bua kuakanangana ne tshilema tshidibo benze.

Ku lukuabo luseke, bu Yezu muikale umue wa mu Bunzambi, tshia-bupikudi tshivuaye mufute tshivua mua kuikala tshipite kule kutambe mushinga wa tshibawu tshilomba bilondeshile Mikenji ya Nzambi muine. (Ekesode 21:23-25; Lewitiki 24:19-21) Adama, wenjile mpekatu mu Edene, uvua anu muntu mupuangane, kavua Nzambi to. Nunku, bua kuikalatshi bulelela mu diumvuangana ne mikenji ya Nzambi, tshia-bupikudi tshivua ne bua kuakanangana menemene​—muntu mupuangane, “Adama wa ndekelu.” Pa nanku, pavua Nzambi mumutume pa buloba bu tshia-bupikudi, wakenza Yezu bua kuikalaye tshivua ne bua kukumbaja mikenji yende, nenku, ki nNzambi mu mubidi wa muntu, anyi nzambi-muntu, kadi muntu mupuangane, “kuinshi kua banjelu.” (Ebelu 2:9; fuanyikija ne Musambu wa 8:5, 6.) Mmunyi muvua tshitupa tshimue tshia mu Bunzambi bua bukole-buonso​—Tatu, Muana peshi Spiritu munsantu—​kuluatshi kuinshi kua banjelu?

Mmunyi mudiye “Muana mulela umuepele”?

BIBLE udi ubikila Yezu ne: “Muana mulela umuepele” wa Nzambi. (Yone 1:14, NW; 3:16, 18; 1 Yone 4:9) Bena Busatu Bunsanto badi bamba ne: bu mudi Nzambi muikale wa kashidi, nanku, Muana wa Nzambi pende udi wa kashidi. Kadi, mmunyi mudi muntu mua kuikala muana ne pinapo kuikala kabidi muena mulongo ne tatuende?

Bena Busatu Bunsanto badi bamba ne: pa bidi bitangila Yezu, “mulela umuepele” ki mmuomumue ne diumvuija dia mu nkonga-miaku dia “kulela,” dia se: “kupesha muoyo bu tatu.” (Webster’s Ninth New Collegiate Dictionary) Badi bamba ne: bua Yezu, muaku eu udi umvuija “mushindu wa bulela budi kabuyi mbangilu,” mu ngumvuilu wa se: kùdi Muana umuepele kadi kakuyi diledibua. (Vine’s Expository Dictionary of Old and New Testament Words) Buebe wewe, abi bidi bileja ngelelu wa meji mulongame anyi? Muntu udi mua kulua tatu wa muana kayi mumulela anyi?

Ku lukuabo luseke, bua tshinyi Bible udi wangata muine muaku umue eu wa tshiena-Greke udi mukudimuna ne: “mulela umuepele” (anu bu mudi Vine ubitonda nansha mudiye kayi ubiumvuija) bua kuleja bulela budi pankatshi pa Izaka ne Abrahama?  Mu Ebelu 11:17, Izaka mmubikidibue ne: “muana mulela umuepele” wa Abrahama. Pa bidi bitangila Izaka, kakuena mpata nansha mikese bua se: uvua muana mulela-nkaya bilondeshile ngumvuilu wa muaku eu pa tshibidilu, kadi kavua muena mulongo peshi wa muanzu umue ne tatuende.

Muaku wa tshiena-Greke mukudimuna “mulela umuepele” udibo batumike nawu bua Yezu ne Izaka udi: mo·no·ge·nesʹ, ufumina ku moʹnos: “nkaya” ne giʹno·mai: muaku wa pa muanda udi umvuija: “kulela,” “kulua (ne muoyo),” mutudi mua kubala mu Exhaustive Concordance wa Strong. Nanku, mo·no·ge·nesʹ udi umvuija “mulela umue, mulela nkaya, mbuena kuamba ne: muana umuepele.”​—A Greek and English Lexicon of the New Testament, kudi E. Robinson.

Pa bualu ebu, Theological Dictionary of the New Testament, mufunda kudi Gerhard Kittel, udi wamba ne: “[Mo·no·ge·nesʹ] udi umvuija ‘wa ku dilela dimuepele,’ mbuena kuamba ne: kayi bana babo ba balume ne ba bakaji.” Muine mukanda eu udi uleja kabidi ne: mu Yone 1:18; 3:16, 18; ne mu 1 Yone 4:9, “bulela bua Yezu kabuena anu bufuanyikija ne butu nabu muana mulela-nkaya ne wende tatu. Mbuine bulela ebu menemene budi pankatshi pa [Muana] mulela umuepele ne Tatu.”

Pa nanku, Yezu, Muana mulela umuepele, uvua ne mbangilu. Ne Nzambi Wa-Bukole-Buonso, udi mua kubikidibua biakane ne: Mumuledi, anyi Tatu, mu ngumvuilu wa mudi tatu wa pa buloba, bu mudi Abrahama, mulele muanende. (Ebelu 11:17) Nenku, padi Bible wamba ne: Nzambi udi “Tatuende” wa Yezu, udi umvuija tshidiye wamba​—ne: badi bantu babidi basunguluke. Nzambi ke udi mupite. Yezu mmupuekele kudiye—​ku bidimu, ku muanzu, ku bukole peshi ku dimanya.

Patudi tuangata Yezu se: kavua nkayende muana wa Nzambi, mufukibue spiritu mu diulu, tudi tujingulula bua tshinyi dîna dia “Muana mulela umuepele” ndimuinyika. Bifukibua bikuabo bia mu nyuma bungi kabuyi kubala anyi banjelu, mbabikidibue pabo ne: “bana ba Nzambi,” anu bu Adama, bualu bukole bua muoyo wabo budi bufumina kudi Yehowa Nzambi, Mushìmì anyi Mpokolo wa muoyo. (Yobo 38:7; Musambu wa 36:9; Luka 3:38) Kadi, bionso ebi mbifukibue ku butuangaji bua “Muana mulela umuepele,” eu uvua mulela kudi Nzambi muine buludiludi.​—Kolosai 1:15-17.

Yezu wakangatshibua bu Nzambi anyi?

YEZU udi ubikidibua misangu mivule mu Bible ne: Muana wa Nzambi, pabi muntu nansha umue mu siekele wa kumpala kakela meji se: uvua Nzambi Muana to. Nansha ba-demon, badi ‘bitabuja se: Nzambi udiku anu umue,’ bavua bamanye, bilondeshile dimonamona diabo dia malu a mu diulu, se: Yezu kavua Nzambi to. Pa nanku, ne kabingila, bavua bayukidilangana nende bu muntu musunguluke, “Muana wa Nzambi.” (Yakobo 2:19; Matayo 8:29) Kabidi, pakafua Yezu, basalayi bampangano ba bena Roma bavuaku, bavua bamanye bikumbane, bua buobo kuamba ne: malu akumvuabo mukana mua balongi bende avua a bushuwa: Yezu kavua Nzambi to, kadi, “bushuwa, eu uvua Muana wa Nzambi.”​—Matayo 27:54, NW.

Nenku, miaku “Muana wa Nzambi” idi ileja Yezu bu tshifukibua tshisunguluke, ki mbu umue wa ku Busatu kampanda to. Bu muvuaye Muana wa Nzambi, kavua mua kuikala Nzambi yeye muine to, bualu Yone 1:18 udi wamba ne: “Kakuena muntu nansha umue wakamona Nzambi.”​—Osty, nkudimuinu wa bena Katolike.

Balongi bakamona Yezu bu “mutuangaji umuepele pankatshi pa Nzambi ne bantu,” ki mbu Nzambi yeye muine. (1 Timote 2:5, NW) Bu mudi mutuangaji muikale musunguluke ne aba badi bakengela butuangaji buende, kabiena biumvuika bua Yezu kudibuejakajaye ne umue wa ku aba badiye ukeba kutuangaja. Bu biobi nanku, uvua kudimuenesha pa muaba uvua kauyi wende.

Bible udi utokesha mu ka-bujima kende malanda adi pankatshi pa Nzambi ne Yezu. Anu Yehowa Nzambi nkayende ke udi Wa-Bukole-Buonso. Wakafuka Yezu buludiludi, kumpala kua kuluaye muntu. Nenku, Yezu uvua ne ntuadijilu, ne kavua mua kuikala muena mulongo ne Nzambi, ku bukole anyi ku dikalaku kashidi nansha.

[Mêyi adi kuinshi]

[Lungenyi lunene lua mu dibeji 14]

Bu muvuaye mufukibue kudi Nzambi, Yezu udi muibidi ku bidimu, ku bukole ne ku dimanya

[Tshimfuanyi mu dibeji 15]

Yezu wakamba ne: uvuaku kumpala kua kuluaye muntu, bualu uvua mufukibue kudi Nzambi, bu mbangilu wa bifukibua bia Nzambi bidi kabiyi bimueneka