Spiritu munsantu​—bukole buenzeji bua Nzambi

BILONDESHILE dilongesha dia Busatu Bunsanto, spiritu munsantu (peshi nyuma muimpe) udi muntu muisatu mu Bunzambi, muena mulongo umue ne Tatu ne Muana. Tudi tubala mu mukanda wa Our Orthodox Christian Faith ne: “Spiritu Munsantu udi Nzambi menemene.”

Mu Mifundu ya tshiena-Ebelu, muaku utubo bakudimuna misangu mivule ne: “spiritu” udi ruʹach, ne diumvuija dia “mupuya, lupepele, spiritu.” Mu Mifundu ya tshiena-Greke, muaku udi mukumbanangane, udi ne ngumvuilu wa muomumue, udi pneuʹma. Miaku eyi idi ileja ne: spiritu munsantu udi umue wa ku Busatu kampanda anyi?

Bukole buenzeji kampanda

DIANGATA dia muaku “spiritu munsantu” mu Bible didi dileja ne: mbukole kampanda budi ku bukokeshi bua Yehowa Nzambi, budiye ukuata nabu mudimu bua kukumbaja bipatshila biende bishileshilangane. Ku amue malu, mmufuanangane ne nzembu, bukole budibu mua kuakaja bua kuenza nabu midimu mishileshilangane.

Mu Genese 1:2 (NW), Bible udi wamba ne: “bukole buenzeji [“spiritu” (ruʹach, mu tshiena-Ebelu)] bua Nzambi buvua bunyunguluka pa mutu pa mâyi.” Apa, spiritu wa Nzambi mbukole buende bua mudimu, peshi buenzeji, buvua buenda buakaja buloba.

Nzambi utu utumika ne spiritu wende bua kutokeshila aba badi bamusadila njila. Davidi wakalomba Nzambi mu miaku eyi: “Undongeshe mua kuenza disua diebe, bualu wewe ke Nzambi wanyi. Spiritu [ruʹach] webe mmuimpe; andombole mu ditunga dia buakane!” (Musambu wa 143:10, NW) Pa bidi bitangila bantu 70 bakanyine bavua Mozese ne bua kusungula bua kumuambuluishabo, Nzambi wakambila musadidi wende ne: “Nengumushe tshitupa tshia spiritu [ruʹach] udi pa mutu pebe ne kumuteka pa mutu pabo.”​—Nomba 11:17, NW.

Milayi ya mu Bible yakafundibua kudi bantu ba Nzambi bavua “benzeja ku spiritu munsantu [pneuʹma mu tshiena-Greke].” (2 Petelo 1:20, 21, NW) Ke mushindu uvua Bible “mufundisha ku spiritu wa Nzambi,” mu tshiena-Greke The·oʹpneu·stos, mbuena kuamba ne: “muela mupuya [kudi] Nzambi.” (2 Timote 3:16) Ne spiritu munsantu wakambuluisha kabidi bantu bakuabo bua kupetabo bikena-kumona peshi bilota bia buprofete.​—2 Samuele 23:2; Yoele 2:28, 29; Luka 1:67; Bienzedi 1:16; 2:32, 33.

Spiritu munsantu ke wakasaka Yezu bua kuyaye mu tshipela kunyima kua batismo wende. (Mako 1:12)  Spiritu uvua bu kapia kampanda munda mua basadidi ba Nzambi, kavua kabafikisha ku dikala ne makanda ku diambuluisha dia bukole abu. Ne buakabambuluisha bua kuakulabo ne bukitu ne dikima dionso.​—Mika 3:8; Bienzedi 7:55-60; 18:25, NW; Lomo 12:11, NW; 1 Tesalonike 5:19.

Anu ku spiritu wende kabidi ke kudi Nzambi ukumbaja malumbuluisha ende kudi bantu ne kudi bukua-matunga. (Yeshaya 30:27, 28, NW; 59:18, 19, NW) Ne spiritu wa Nzambi udi mua kutua miaba yonso, ukuatshisha bantu anyi ubaluisha.​—Musambu wa 139:7-12.

“Bukole bupite bua pa tshibidilu”

SPIRITU wa Nzambi udi kabidi mua kupetesha basadidi bende “bukole bupite bua pa tshibidilu.” (2 Kolinto 4:7, NW) Budi bubafikisha ku ditantamena mateta a ditabuja diabo peshi ku dienza amue malu adibo kabayi mua kuenza patupu.

Tshilejilu, pa bidi bitangila Samson, mukanda wa Balumbuluishi 14:6 (Jé) udi utuambila ne: “Spiritu wa Yahvé wakamutulukila ne, nansha muvuaye kayi ne tshintu ku bianza, Samson wakapanda ntambue.” Tshiakatulukila Samson peshi kumubuela munda n’Nzambi uvua wenzeja mubidi wende bua enza anu bu muakenzaye anyi? Tòo, mu dîba adi, “bukole bua MUKALENGE [ke] buakabuela munda muende.”​—TEV.

Pakangata Yezu batismo, Bible udi utuambila ne: spiritu munsantu wakamutulukila, ki mbu muntu, kadi uvua bu nyunyi wa nkutshi. (Mako 1:10) Bukole buenzeji bua Nzambi buakambuluisha Yezu pashishe bua kuondopa babedi ne kubiisha bantu ku lufu. Bu mudi Luka 5:17 (Jé) wamba: “Bukole bua Mukalenge [Nzambi] buvua mu nyima mua midimu yende [Yezu] ya luondapu.”

Spiritu wa Nzambi wakapetesha kabidi balongi ba Yezu bukenji bua kuenza nabu bishima. Bilondeshile Bienzedi 2:1-4 (NW), balongi bavua basangile bua tshibilu tshia Pentekoste pavua, “bu mpindieu, tshiona tshiakafuma mu diulu bu tshipepele tshikole tshituta, . . . ne buonso buabo bakuwula tente ne spiritu munsantu ne bakatuadija kuakula mu miakulu mikuabo, bilondeshile muvua spiritu ubasaka bua kuakula.”

Nenku, spiritu munsantu wakapetesha Yezu ne basadidi bakuabo ba Nzambi bukole bua kuenzabo bivua bantu kabayi mua kuenza pa tshibidilu.

Ki mmuntu nansha

KADI, imue mvese ya mu Bible kayitu ileja spiritu munsantu bu muntu anyi? Eyowa, kadi Edmund Fortman, muena teoloji wa bena Katolike wakamba pa muanda eu mu mukanda wa The Triune God ne: “Nansha mudibo baleja spiritu eu misangu mivule bu muntu, bidi bimueneka patoke ne: bafundi ba mikanda minsantu [ba Mifundu ya tshiena-Ebelu] kabatu banji kufuanyikija mu meji abo anyi baleje spiritu eu bu muntu musunguluke nansha.”

Mu Mifundu, bilejilu bidi bileja bintu bu bantu kabiena kubala. Badi bamba bua meji ne: adi ne bana. (Luka 7:35) Kabidi ne: mpekatu ne lufu biakakokesha. (Lomo 5:14, 21) Monayi mushindu udi The New English Bible ukudimuna tshitupa tshia Genese 4:7: “Mpekatu ndemon mualamine ku tshiibi,” uleja mpekatu bu spiritu mubi kampanda mualamine ku tshiibi tshia Kayina. Kadi, kakuyi mpata, mpekatu ki mmuntu wa mu spiritu nansha; anu bu mudi dileja spiritu munsantu bu muntu kadiyi dimuvuija muntu wa mu spiritu nansha.

 Bia muomumue, mu 1 Yone 5:6-8 (Osty), bìdì “bifila bumanyishi” ki ng’anu spiritu, apu kabidi “mâyi ne mashi.” Kadi, kabiyi mpata, mâyi ne mashi ki mbantu, nenku spiritu munsantu kêna pende muntu to.

Mu diumvuangana ne nkomenu eu, tudi tumona ne: pa tshibidilu, Bible udi wakula bua “spiritu munsantu,” kayi bu muntu, kadi umuteka mu mulongo umue ne mâyi ne kapia. (Matayo 3:11; Mako 1:8) Mifundu idi ikankamija bantu bua kudiuujabo ne spiritu munsantu kadi ki nne maluvu nansha. (Efeso 5:18) Idi yamba buabo ne: mbuwule tente ne spiritu munsantu, anu mudibu buwule tente ne ngikadilu milenga bu mudi meji, ditabuja, ne disanka. (Bienzedi 6:3; 11:24; 13:52) Mu 2 Kolinto 6:6, spiritu munsantu udi musuikakaja ku ngikadilu mikuabo. Bu spiritu munsantu muikale muntu mulelela, miaku ya mushindu’eu kayivua mua kutamba kumueneka mushindu eu nansha.

Ku luseke lukuabo, padi imue mvese ya mu Bible yamba ne: spiritu udi wakula, mikuabo payi idi ileja se: spiritu eu udi wakula ku butuangaji bua bantu anyi bua banjelu. (Matayo 10:19, 20; Bienzedi 4:24, 25; 28:25; Ebelu 2:2) Mu nsombelu eyi, buenzeji bua spiritu munsantu mbufuanyikija ne onde ya radio idi ituala mikenji ya muntu umue kudi mukuabu udi kule nende.

Mu Matayo 28:19, badi bakula bua “dîna . . . dia spiritu munsantu.” Kadi, nansha mu tshiena-Greke nansha mu Tshiluba, muaku “dîna” kawutu umvuija anu dîna dia muntu kampanda to. Patubo bamba ne: “mu dîna dia mikenji,” kabatu bela meji kudi muntu kampanda nansha. Batu basua kuakula bua tshidi mikenji ileja, bua bukokeshi buayi. Mukanda wa Word Pictures in the New Testament wa Robertson, udi wamba ne: “Diangata dîna (onoma) muaba eu, nangananga mu La Septante ne mu mivungu ya papyrus, didi dileja bukole peshi bukokeshi.” Pa nanku, batismo ‘mu dîna dia spiritu munsantu’ udi wanyisha bukokeshi bua spiritu, se: mmufume kudi Nzambi ne wenza mudimu bilondeshile disua dia Nzambi.

“Muambuluishi”

YEZU udi ubikila spiritu munsantu ne: “muambuluishi,” ne udi ushindika ne: muine eu nealongeshe, nealombole ne neakule. (Yone 14:16, 26; 16:13) Muaku wa tshiena-Greke udi mukudimuna ne: muambuluishi (pa·raʹkle·tos) mmuaku utu ku balume. Padi Yezu umanyisha tshivua muambuluishi eu ne bua kukumbaja, udi wangata mipinganyi ya ku balume. (Yone 16:7, 8) Ku lukuabo luseke, muaku wa tshiena-Greke udibo bakudimuna ne: spiritu (pneuʹma) udi mulubidile, nenku, udi ne bua kusuikakajibua ne mupinganyi mulubidile.

Bakudimunyi bavule bena Busatu Bunsanto mbasokoke bualu ebu, bu mudi nkudimuinu wa bena Katolike New American Bible udi wamba pa bidi bitangila Yone 14:17 ne: “Muaku wa tshiena-Greke mukudimuna ne: ‘spiritu’ kawena mulubidile, ne patudi tuangata mipinganyi (‘he,’ ‘his,’ ‘him’) mu Anglais, mifundu mivule ya tshiena-Greke idi yangata ‘it’.”

Nunku, padi Bible wangata mipinganyi ya ku balume mu diumvuangana ne pa·raʹkle·tos mu Yone 16:7, kêna ulongesha bualu bukuabo to, kadi, udi ukumbaja patupu mikenji ya muakulu.

Kêna umue wa mu Busatu kampanda

MIKANDA mishilangane idi itabuja ne: dilongesha dia se: spiritu munsantu udi muntu muisatu wa mu Busatu kampanda kadiena dia mu Bible to. Tshilejilu:

The Catholic Encyclopedia: “Kakuena muaba nansha umue mu Tshiovo tshia Kale udibo baleje patoke muntu muisatu.”

Muena teoloji wa bena Katolike Fortman: “Katshia, bena Yuda kabatu banji kuangata spiritu bu muntu, kabidi, kakuena tshijadiki tshishindame nansha tshimue tshidi tshileja se: mufundi nansha umue wa Tshiovo tshia Kale uvua ne lungenyi elu. . . . Spiritu Munsantu udi ulejibua pa tshibidilu mu [Evanjeliyo] inayi ne mu Bienzedi bu bukole anyi makanda a Nzambi.”

The New Catholic Encyclopedia: “Mbimueneke patoke ne: T[shiovo tshia] K[ale] katshiena tshiangate spiritu wa Nzambi bu muntu to. . . . Spiritu wa Nzambi udi anu bukole buende patupu. Bikalabo bamuleje imue misangu bu musunguluke ne Nzambi, mbua se: mupuya wa Yahvé udi ukuata mudimu pambelu pende.” Mukanda eu udi usakidila ne: “Mvese mivule ya mu T[shiovo] T[shipiatshipia] idi yakula bua spiritu wa Nzambi bu tshintu, kadi ki mbu muntu to; ke tshidibo baleja nangananga ku difuanangana didi pankatshi pa spiritu ne bukole bua Nzambi.”​—Miaku miladika nyetu.

A Catholic Dictionary: “Mu kabujima katshi, Tshiovo Tshipiatshipia, amu bu mudi tshia Kale, tshidi tshileja spiritu bu makanda peshi bukole bua kudi Nzambi.”

 Pa nanku, nansha bena Yuda nansha bena nkristo ba kumpala kabavua bitabuja ne: spiritu munsantu uvua umue wa mu Busatu kampanda to. Dilongesha edi diakapatuka siekele mivule pashishe. Tudi tubala mu A Catholic Dictionary ne: “Muntu muisatu bakamumanyisha ku Tshisangilu tshia Bepiskopo tshia ku Alexandrie mu 362 . . . ne ndekelu wa bionso kudi Tshisangilu tshia ku Constantinople tshia mu 381”​—siekele isatu ne tshitupa kunyima kua spiritu munsantu mumane kuuja balongi ku Pentekoste!

Nansha kakese, spiritu munsantu kêna muntu ne kêna umue wa mu Busatu kampanda to. Spiritu munsantu mbukole buenzeji bua Nzambi budiye utumika nabu bua kukumbaja disua diende. Kabuena buena mulongo umue ne Nzambi to; udi nabu misangu yonso ne budi ku bukokeshi buende.

[Lungenyi lunene lua mu dibeji 22]

“Mu kabujima katshi, Tshiovo Tshipiatshipia, amu bu mudi tshia Kale, tshidi tshileja spiritu bu makanda peshi bukole bua kudi Nzambi.”​—A Catholic Dictionary

[Bimfuanyi mu dibeji 21]

Mu tshikondo kampanda, spiritu munsantu wakamueneka bu nyunyi wa nkutshi. Musangu mukuabo, wakamueneka bu ndimi ya kapia, kadi, ki mbu muntu to