Tudi ne bua kubuitabuja anyi?

UTU witabuja Busatu Bunsanto anyi? Tshitupa tshinene tshia bena bukua-buena-nkristo badi babuitaba. Dine edi, ndilongesha dia nshindamenu mu ekleziya mivule kukadi nkama ne nkama ya bidimu.

Tudi mua kuela meji se: dilongesha edi ndijadika bulelela. Kadi, ki mmuomu nansha kakese; matuku aa, bamue ba ku badilongeshi mbajule kabidi milandu pa tshilumbu etshi.

Bua tshinyi tshiena-bualu bu etshi ntshiakanyine bua tuetu kushindamenapu? Bualu, Yezu, Muana wa Nzambi wakamba ne: “Muoyo wa tshiendelele, mbua bakumanye wewe, Nzambi umuepele mulelela, ne Yezu Kristo, eu uudi mutume.” Nanku, matuku etu wonso atshilualua mmasuikakaja ku dimanya dilelela dia bunzambi, abi bidi biumvuija kukonkonuenamu tshilumbu tshia Busatu Bunsanto. Pa nanku, bua tshinyi kuena mua kudifila ku dikonkonona edi?​—Yone 17:3, Bible de Jérusalem (Jé), nkudimuinu wa bena Katolike.

Ngumvuilu mishilangane ya Busatu Bunsanto idiku. Kadi, ngongeshilu wa Busatu Bunsanto utu wa se: mu Bunzambi mudi bantu basatu: Tatu, Muana ne Spiritu Munsanto (ta Nyuma Muimpe); kadi pabi buonso bikale amu Nzambi umue. Dilongesha edi didi diamba ne: basatu aba mbena mulongo umue, ba-bukole-buonso, ne kabayi bafukibue buonso, badiku tshiendelele mu Bunzambi.

Kadi, bakuabo badi bamba ne: dilongesha dia Busatu Bunsanto ndia dishima, ne: Nzambi Wa-Bukole-Buonso udi anu umue, bu muntu musunguluke, wa kashidi, ne wa ngulu yonso. Badi bamba ne: Yezu, kayi muanji kuledibua bu muntu, uvua, bu banjelo, muntu wa mu nyuma musunguluke mufuka kudi Nzambi, nenku uvua bua kuikala ne mbangilu. Badi balongesha ne: Yezu katu muena mulongo ne Nzambi Wa-Bukole-Buonso mu ngumvuilu kayi yonso; utu ne utshidi ku bukokeshi bua Nzambi. Badi bela kabidi meji se: nyuma muimpe ki mmuntu to kadi nspiritu wa Nzambi, bukole buende buenzeji.

Bitabuji ba Busatu Bunsanto badi bamba se: mbuashila ki nganu pa bilele bia malu a Nzambi, kadi kabidi ne pa Bible. Bakomononyi ba dilongesha edi badi bamba ne: ki ndilongesha dia mu Bible nansha, mukanda umue wa histware ufika too ne ku diamba ne: “Ntuadijilu wa [Busatu Bunsanto] udi yonso wa bumpangano.”​—The Paganism in Our Christianity.

Bikala Busatu Bunsanto bulelela, nkupepeja Yezu pa kuamba ne: katu muena mulongo ne Nzambi bu umue wa mu Bunzambi kampanda. Kadi, bikalabu bua dishima, nkupepeja Nzambi Wa-Bukole-Buonso pa kubikila muntu kampanda ne: mmuena mulongo nende, ne bipite bubi kabidi, pa kubikila Mariya ne: “Mamuende wa Nzambi.” Pikala Busatu Bunsanto bua dishima, nkufuisha Nzambi bundu pa kuamba bu mukanda eu wa Catholicism ne: “Amu pikala [bantu] balame Ditabuja edi dijima ne dikezuke, tshianana nebabutuke bua kashidi. Ne Ditabuja dia bena Katolike ndiedi: tudi tutendelela Nzambi umue mu Busatu Bunsanto.”

Pa nanku, kudi tubingila tulelela, bua wewe kujinga kumanya bulelela pa Busatu Bunsanto. Kadi, kumpala kua kukonkonona ntuadijilu wabu anyi bulelela buabu, mbimpe kudiumvuija mu bule ne mu butshiama. Busatu Bunsanto mene ntshinyi? Mmunyi mudibo babumvuija kudi babuakuidi?

 [Bimfuanyi mu dibeji 2]

Ku dia bakaji: lupingu lua bena Ejipitu lua mu bidimu binunu bibidi (K.B.B.) Busatu bua Amon-Râ, Ramsès II, ne Mut. Ku dia balume: lupingu lua Busatu Bunsanto siekele wa 14 (B.B.) ludi luleja Yezu Kristo, Tatu ne spiritu munsantu. Tangilayi, ludi ne bantu basatu, kadi, ne mikolo amu inayi.