1. Netupete tshinyi tuetu tutendelela Nzambi mu mushindu muimpe?

YEHOWA NZAMBI utu uditatshisha bikole bua bualu buetu ne mmusue kutukuatshisha ne dinanga. Tuetu tumutendelela mu mushindu muakane, netuikale ne disanka ne netuepuke bilumbu bia bungi. Yehowa neatuambuluishe ne neatuvudijile disanka kabidi. (Yeshaya 48:17) Kadi kudi bitendelelu bivule bidi bileja mudibi bilongesha bulelela pa bidi bitangila Nzambi, eku bikale bishilangane bikole mu malongesha adi amutangila ne bidiye utulomba bua kuenza.

2. Mmunyi mutudi mua kumanya mushindu muimpe wa kutendelela Yehowa? Fila tshilejilu.

² Kadi munyi muudi mua kumanya mushindu muimpe wa kutendelela Yehowa? Kulonga ne kufuanyikija malongesha a bitendelelu bionso ki mmushindu muimpe to. Tshia kuenza tshimpe nkulonga anu tshitu Bible ulongesha menemene bua ntendelelu mulelela. Tshilejilu: Mu matunga a bungi, mutu tshilumbu tshia makuta a dishima. Bobu bakupeshe mudimu wa kusunguluja makuta a dishima aa, neuamanye bishi? Neukuate mu mutu bimanyinu bia makuta a dishima onso anyi? Tòo. Bua kubenga kujimija dîba, mbimpe kulonga bimanyinu bia makuta a bushuwa. Kumanya bimanyinu ebi nekukuambuluishe bua kumanya makuta a dishima. Bia muomumue, patudi tulonga mua kumanya  tshitendelelu tshilelela, netumanye kabidi bitendelelu bia dishima.

3. Bilondeshile Yezu, tudi ne bua kuenza tshinyi tuetu basue ne: Nzambi atuanyishe?

³ Mbimpe kutendelela Yehowa mu mushindu udiye wanyisha. Bantu ba bungi batu bela meji ne: Nzambi utu wanyisha bitendelelu bionso, pabi Bible katu ulongesha nanku to. Kuamba patupu ne: tudi bena Kristo kakuena nansha kukumbana to, bualu Yezu wakamba ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue.’ Nunku bua Nzambi kutuanyishaye, tudi ne bua kulonga tshidiye utulomba ne kutshienza kabidi. Yezu wakabikila aba badi kabayi benza disua dia Nzambi ne: “benji ba malu mabi.” (Matayo 7:21-23) Anu bu makuta a dishima, tshitendelelu tshia dishima katshiena ne mushinga nansha mukese to. Mu bulelela, tshidi tshienzela bantu bibi.

4. Mêyi a Yezu adi atangila njila ibidi adi umvuija tshinyi? Njila yonso udi ufikisha penyi?

⁴ Yehowa udi upesha muntu yonso udi pa buloba mushindu wa kupeta muoyo wa tshiendelele. Kadi bua kupeta muoyo eu mu Mparadizu, tudi ne bua kutendelela Nzambi bimpe ne kuikala ne nsombelu udi umusankisha. Diakabi, bantu ba bungi badi babenga kuenza nunku. Ke bualu kayi Yezu wakamba ne: ‘Nubuele ku mushiku wa mbelu mubumbakane; bualu bua mushiku wa mbelu udi munene, ne njila wa kabutu udi munene, ne bantu ba bungi badi babuelamu. Mushiku wa mbelu udi mubumbakane ne njila wa ku muoyo udi mubumbakane, ne bantu banya-banya badi bamumona.’ (Matayo 7:13, 14) Tshitendelelu tshilelela tshidi tshifikisha ku muoyo wa tshiendelele ne tshia dishima tshifikisha ku kabutu. Yehowa ki mmusue muntu nansha umue abutuke to, ke bualu kayi udi upesha bantu ba miaba yonso mushindu wa kulonga malu ende. (2 Petelo 3:9) Nunku, mushindu utudi tutendelela Nzambi udi umvuija lufu anyi muoyo.

5. Mmunyi mutudi mua kumanya bantu badi mu tshitendelelu tshilelela?

⁵ Mmunyi mutudi mua kupeta ‘njila wa muoyo’? Yezu wakamba ne: tshitendelelu tshilelela tshivua ne bua kumuenekela ku nsombelu wa bantu badimu. Wakamba ne: ‘Nenubajingulule ku mamuma abu. Mitshi yonso idi mimpe itu yakuama mamuma mimpe.’ (Matayo 7:16, 17) Mbuena kuamba ne: bantu badi mu tshitendelelu tshilelela batu bamanyika ku malongesha ne bienzedi biabu. Nansha mudibu kabayi bapuangane ne mutubu benza bilema, batendeledi balelela mu tshibungi batu basue kuenza disua dia Nzambi. Tukonkononayi malu asambombo adi atuambuluisha bua kumanya bena mu tshitendelelu tshilelela.

6, 7. Mmunyi mudi basadidi ba Nzambi bangata Bible? Ntshilejilu kayi tshivua Yezu mushiye mu muanda eu?

⁶ Basadidi ba Nzambi batu bangatshila malongesha abu anu mu Bible. Bible udi wamba ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’ (2 Timote 3:16, 17) Mupostolo Paulo wakafundila bena Kristo nende ne: ‘Panuakangata dîyi dinuakumvua kutudi, dia Nzambi mene, nuakaditabuja, ki mbu dîyi dia bantu, kadi bu mudidi bushuwa, dîyi dia Nzambi mene.’ (1 Tesalonike 2:13) Nunku, malongesha ne bienzedi bia bena mu tshitendelelu tshilelela ki mbishindamene pa lungenyi anyi bilele bia bantu to. Mbishindamene pa Bible.

⁷ Yezu Kristo uvua wangatshila malongesha ende anu mu Dîyi dia Nzambi. Wakambila Tatuende mu disambila ne: ‘Dîyi diebe mbulelela.’ (Yone 17:17) Yezu uvua witaba Dîyi dia Nzambi, ne malu onso avuaye ulongesha avua umvuangana nadi. Yezu uvua ne tshibidilu tshia kuamba ne: “Bakafunda ne.” (Matayo 4:4, 7, 10) Pashishe uvua utela  mvese. Bia muomumue, basadidi ba Nzambi kabena balongesha malu abu nkayabu to. Badi bitaba ne: Bible n’Dîyi dia Nzambi, ne ke mudibu bangatshila malongesha abu onso.

8. Kutendelela Yehowa kudi kulomba tshinyi?

⁸ Bena mu tshitendelelu tshilelela badi batendelela anu Yehowa ne badi bamanyisha dîna diende. Yezu wakamba ne: ‘Kukuila Yehowa Nzambi webe, umuenzele yeye nkayende mudimu.’ (Matayo 4:10) Nunku, basadidi ba Nzambi badi batendelela anu Yehowa nkayende. Ntendelelu eu udi ulomba kumanyisha bantu dîna dia Nzambi mulelela ne mushindu udiye. Musambu wa 83:18 udi wamba ne: ‘Wewe udi muidike dîna dia Yehowa, udi Mutambe Bunene wa pa mutu pa buloba bujima.’ Yezu wakashiya tshilejilu mu diambuluisha bakuabu bua kumanya Nzambi, anu bu muakambaye mu disambila ne: ‘Ba mu ba pa buloba bawakumpa ngakubaleja dîna diebe.’ (Yone 17:6) Bia muomumue, batendeledi balelela batu balongesha bakuabu dîna dia Nzambi, malu adiye mulongolole bua kuenza ne ngikadilu yende.

9, 10. Mmu mushindu kayi mudi bena Kristo balelela banangangane?

⁹ Bantu ba Nzambi badi ne dinanga dilelela munkatshi muabu. Yezu wakamba ne: ‘Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:35) Bena Kristo ba kumpala bavua banangangane nunku. Dinanga didi Nzambi utulomba kadiena ditangila dikoba, nsombelu ne ditunga dia muntu; didi disangisha bantu pamue mu tshisuikidi tshikole tshia buena-muntu bulelela. (Kolosai 3:14) Bena mu bitendelelu bia dishima kabatu ne dinanga dia nunku to. Bua tshinyi tudi tuamba nunku? Bualu batu bashipangana ne aba badi mu matunga ne bisamba bikuabu. Bena Kristo balelela kabatu bangata bingoma bua kushipa bena Kristo nabu anyi bantu bakuabu to. Bible udi wamba ne: ‘Mu muanda eu bana ba Nzambi ne bana ba Diabolo badi bajinguluka; muntu yonso udi kayi wenza malu makane kêna wa Nzambi; ne yeye udi kayi unanga muanabu kabidi. Tudi ne bua kunangangana; ki mbua kuikala bu Kayine, wakadi wa mubi, wakashipa muanabu.’​—1 Yone 3:10-12; 4:20, 21.

 ¹⁰ Bushuwa, dinanga dilelela kadiena diumvuija anu kubenga kushipangana to. Bena Kristo balelela badi bakuata mudimu ne dîba diabu, bukole buabu ne bintu biabu bua kuambuluishangana ne kukankamijangana. (Ebelu 10:24, 25) Badi bambuluishangana mu ntatu ne benzela bakuabu malu mimpe. Bushuwa, badi batumikila mubelu wa mu Bible udi ubalomba bua ‘kuenzela bantu bonso bimpe.’​—Galatia 6:10.

11. Bua tshinyi mbimpe kuitaba Yezu Kristo bu muntu udi Yehowa muteke bua kutupandisha?

¹¹ Bena Kristo balelela badi bitaba Yezu bu muntu udi Nzambi muteke bua kutupandisha. Bible udi wamba ne: ‘Mu munga muntu yonso kamuena lupandu, bualu bua kakuena dinga dîna muinshi mua diulu, dipa bantu, didi dimanye mua kutusungila.’ (Bienzedi 4:12) Anu mutuvua balonge mu Nshapita 5, Yezu wakafila muoyo wende bu tshia-bupikudi bua bantu badi batumikila Nzambi. (Matayo 20:28) Yezu udi kabidi Mukalenge udi Yehowa muteke mu Bukalenge bua mu diulu bua kukokesha buloba bujima. Nzambi udi utulomba bua tutumikile Yezu ne tulonde malongesha ende bua tuetu kupeta muoyo wa tshiendelele. Ke bua tshinyi Bible udi wamba ne: ‘Udi witabuja Muana udi ne muoyo wa tshiendelele; kadi udi upidia Muana kêna umona muoyo.’​—Yone 3:36.

12. Kubenga kuikala ba pa buloba kudi kumvuija tshinyi?

¹² Batendeledi balelela kabena ba pa buloba ebu. Pavuabu bamulumbuluisha kudi Pilato (mukokeshi muena Lomo), Yezu wakamba ne: ‘Bukalenge buanyi kabuena bua pa buloba ebu.’ (Yone 18:36) Nansha bayidi balelela ba Yezu bikale ba mu ditunga kayi, badi bakokela Bukalenge buende bua mu diulu ne nunku kabena babuelakana nansha kakese mu malu a tshididi a pa buloba ebu to. Kabena ne luseke ludibu padi bimvundu bijuka. Nansha nanku, kabatu bakandika bakuabu bua kuikala mu bisumbu bia tshididi, bua kufila mpala ne kupeta muanzu mu malu a tshididi anyi bua kuelela muntu tukanda. Kadi batu batumikila mikenji ya mbulamatadi. Bua tshinyi? Bualu Bible udi ubalomba bua “kutumikila bamfumu badi balombola ditunga.” (Lomo 13:1, MMV) Tshidibi,  padi mikenji ya mbulamatadi ibengangana ne mikenji ya Nzambi, batendeledi balelela batu balonda tshilejilu tshia bapostolo, bakamba ne: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:29; Mâko 12:17.

13. Mmunyi mudi bayidi balelela ba Yezu bamona Bukalenge bua Nzambi? Ke bualu kayi badi benza tshinyi?

¹³ Bayidi balelela ba Yezu badi balongesha ne: Bukalenge bua  Nzambi ke ditekemena dilelela bua bantu. Yezu wakamanyisha ne: ‘Nebambile bantu bonso ba pa buloba lumu luimpe elu lua bukalenge, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Pamutu pa kusaka bantu bua kueyemena bakokeshi ba pa buloba bua kujikija ntatu yabu, bayidi balelela ba Yezu Kristo badi bamanyisha Bukalenge bua Nzambi bua mu diulu bu ditekemena dimuepele bua bantu. (Musambu 146:3) Yezu wakatulongesha bua kusambila bua mbulamatadi mulenga au pakambaye ne: ‘Bukalenge buebe bulue. Benze pa buloba muudi musue bu mudibu benza mu diulu.’ (Matayo 6:10) Bible wakamanyisha ne: Bukalenge bua mu diulu ‘nebutshibule makalenge [adiku lelu] aa onso bitupa bitupa, nebuabutule ne buobu nebujalame tshiendelele.’​—Danyele 2:44.

14. Ntshitendelelu kayi tshiudi mumone ne: tshidi tshikumbaja malu malomba a tshitendelelu tshilelela?

¹⁴ Paudi utangila malu onso atudi bamone aa, udiebeje ne: ‘Ntshitendelelu kayi tshidi tshiangatshila malongesha atshi onso mu Bible ne tshidi tshimanyisha dîna dia Yehowa? Ntshitendelelu kayi tshidi ne dinanga dilelela, tshidi tshitabuja Yezu, tshidi katshiyi tshibuelakana mu malu a pa buloba ne tshimanyisha ne: Bukalenge bua Nzambi ke ditekemena dilelela bua bantu? Mu bitendelelu bionso bidi pa buloba, ntshiepi tshidi tshikumbaja malu aa onso?’ Mbimueneke patoke ne: ntshia Bantemu ba Yehowa.​—Yeshaya 43:10-12.

15. Pa kumusha kuitaba ne: Nzambi udiku, ntshinyi tshikuabu tshidiye utulomba?

¹⁵ Kuitabuja patupu Nzambi ki nkukumbane bua kumusankisha to. Bible udi wamba ne: nansha bademon badi bitabuja ne: Nzambi udiku. (Yakobo 2:19) Kadi kabena benza disua diende ne Nzambi kêna ubanyisha to. Nunku, bua Nzambi kutuanyishaye, katuena anu ne bua kuitaba ne: udiku to, kadi tudi kabidi ne bua kuenza disua diende. Pashishe, tudi ne bua kumuka mu tshitendelelu tshia dishima ne kubuela mu tshilelela.

16. Netuenze tshinyi bua kubenga kubuelakana ne bitendelelu bia dishima?

 ¹⁶ Mupostolo Paulo wakaleja ne: katuena ne bua kubuelakana ne tshitendelelu tshia dishima to. Wakafunda ne: ‘Umukayi munkatshi muabu, nuikale batapuluke, bu mudi Mukalenge wamba. Kanulengi tshintu tshibipa, ne meme nennuitabuje.’ (2 Kolinto 6:17; Yeshaya 52:11) Nunku bena Kristo balelela badi bepuka tshintu tshionso tshidi mu diumvuangana ne bitendelelu bia dishima.

17, 18. “Babulona Munene” ntshinyi? Bua tshinyi mbimpe ‘kupatuka munkatshi muende’ ne lukasa luonso?

¹⁷ Bible udi uleja ne: bitendelelu bia dishima bia mishindu yonso bidi mu “Babulona Munene.” * (Buakabuluibua 17:5) Dîna edi didi dituvuluija tshimenga tshia kale tshia Babulona, muvua tshitendelelu tshia dishima tshituadije kunyima kua Mvula wa kabutu wa mu matuku a Noa. Malongesha ne bilele bia bungi bidi mu bitendelelu bia dishima biakatuadija kale mu Babulona. Tshilejilu, bena Babulona bavua batendelela nzambi ya bungi isatu ku isatu. Dilongesha dinene dia bitendelelu bia bungi lelu’eu ditu dilongesha dia Busatu Bunsantu. Kadi Bible utu ulongesha ne: kudi anu Nzambi umuepele mulelela Yehowa, ne kabidi ne: Yezu Kristo udi Muanende. (Yone 17:3) Bena Babulona bavua balongesha ne: bantu badi ne tshitupa kampanda mu mubidi tshitu katshiyi tshifua, tshidi mua kukenga muaba kampanda. Bitendelelu bia bungi lelu’eu bidi pabi bilongesha malu a nunku.

¹⁸ Bu mudi ntendelelu wa kale wa mu Babulona mutampakane pa buloba, mbikumbane bua kuamba ne: Babulona Munene wa lelu udi nsangilu wa bitendelelu bionso bia dishima. Nzambi wakamanyisha ne: nsangilu wa bitendelelu bia dishima eu neabutuke mu mupodi wa dîsu. (Buakabuluibua 18:8) Mpindieu, udi mumone bua tshinyi udi ne bua kupatuka mu tshitendelelu kayi tshionso tshia mu Babulona  Munene anyi? Yehowa Nzambi mmusue bua ‘upatuke munkatshi muende’ ne lukasa luonso patshidi dîba kuoku apa.​—Buakabuluibua 18:4.

19. Neupete tshinyi mu dikuatshila Yehowa mudimu?

¹⁹ Paudi wangata dipangadika dia kupatuka mu tshitendelelu tshia dishima, bamue bantu badi mua kukosa malanda nebe. Kadi paudi ukuatshila Yehowa mudimu ku luseke lua basadidi bende, neupete bia bungi kupita ne biudi mua kujimija. Anu bu bayidi ba kumpala ba Yezu bavua bashiye bintu bivuabu nabi bua kumulonda, neupete bana benu ba mu nyuma ba bungi. Neubuele mu dîku dia pa buloba bujima didi dienza ne bena Kristo balelela badi ne dinanga dilelela. Neupete kabidi muoyo wa tshiendelele mu ‘tshikondo tshilualua.’ (Mâko 10:28-30) Pamuapa, aba bavua bakubenge bua tshitendelelu tshiebe nebajinge kumanya tshidi Bible ulongesha ne kuluabu pabu batendeledi ba Yehowa.

20. Bantu badi mu tshitendelelu tshilelela mbindile tshinyi mu matuku atshilualua?

²⁰ Bible udi ulongesha ne: Nzambi neabutule bulongolodi bubi budiku lelu ne neapingaje pa muaba wabu bulongolodi buakane bulombola kudi Bukalenge buende. (2 Petelo 3:9, 13) Bulongolodi abu nebuikale buimpe be! Mu bulongolodi buakane abu nemuikale anu tshitendelelu tshilelela nkayatshi. Kuena mumoneku ne: mbimpe kuenza malu adi akengedibua bua kulua muena mu tshitendelelu tshilelela mpindieu anyi?