BENA dilongesha dia Busatu Bunsantu batu bamba ne: kudi bantu basatu mu Nzambi umue: Tatu, Muana ne Nyuma Muimpe. Batu bamba kabidi ne: Nzambi isatu eyi idi diatshimue, idi ne bukole buonso ne kayena ne ntuadijilu. Nunku bilondeshile dilongesha edi, Tatu udi Nzambi, Muana udi Nzambi ne Nyuma Muimpe udi Nzambi, tshidibi kudi anu Nzambi umuepele.

 Bantu ba bungi batu bitabuja Busatu Bunsantu batu bamba ne: kabena mua kumvuija dilongesha edi to. Tshidibi, badi bamona ne: ndilongesha didi mu Bible. Tumanyayi ne: miaku “Busatu Bunsantu” kayitu mu Bible to. Kadi mu Bible kamuenaku nansha lungenyi lua Busatu Bunsantu anyi? Bua kuandamuna lukonko elu, tukonkonone mvese utu bantu badi bitabuja dilongesha edi batamba kufila.

Yone 1:1 udi wamba ne: ‘Ku tshibangidilu Dîyi diakadiku, Dîyi diakadi ne Nzambi, Dîyi diakadi Nzambi.’ Pashishe anu mu nshapita umue umu’eu, mupostolo Yone udi uleja patoke ne: ‘Dîyi’ n’Yezu. (Yone 1:14) Bu mudibu babikila Dîyi ne: Nzambi, bakuabu badi bamba ne: Muana ne Tatu badi ne bua kuikala mu Nzambi umue.

Kadi umanye ne: bavua bafunde mukanda wa Yone eu mu tshiena-Greke, pashishe kuluabu kuukudimuna mu miakulu mikuabu. Kadi Bakudimunyi ba Bible bavule kabakafunda ne: ‘Dîyi divua Nzambi’ to. Bua tshinyi? Bualu bilondeshile dimanya diabu dia tshiena-Greke tshia mu Bible, bakamona ne: bavua ne bua kukudimuna tshiambilu etshi mushindu mukuabu. Mmushindu kayi au? Tangila bimue bilejilu: “Dîyi divua bu Nzambi.” (A New Translation of the Bible) “Dîyi divua nzambi.” (The New Testament in an Improved Version) “Dîyi divua ne Nzambi ne divua bu yeye.” (The Translator’s New Testament) Bilondeshile Bible eyi, Dîyi ki n’Nzambi muine to. * Kadi bu mudi Dîyi ne muaba mubandile munkatshi mua bifukibua bia Yehowa, badi bamubikila ne: “nzambi” (ne “n” mukese). Apa muaku “nzambi” udi umvuija “wa bukole.”

Bantu ba bungi ki mbamanye tshiena-Greke tshia mu Bible to. Nunku mmunyi muudi mua kumanya tshivua mupostolo Yone musue kuamba? Tuangata tshilejilu: Mulongeshi udi ulongesha balongi bende bualu kampanda, kadi bonso kabena bumvua  mushindu umue to. Balongi badi mua kuenza tshinyi bua kupetanganabu? Badi mua kulomba mulongeshi bua abumvuije tshiakabidi. Kakuyi mpata, kulonga malu makuabu a pa mutu kudi mua kubambuluisha bua kumvua dilongesha edi bimpe. Bia muomumue, bua kumvua tshidi Yone 1:1 musue kuamba, udi mua kutangila mu Evanjeliyo wa Yone bua kupeta malu makuabu adi atangila muaba udi nawu Yezu. Kumanya malu a pa mutu pa bualu ebu nekukuambuluishe bua kubumvua bimpe.

Tshilejilu, tangila tshidi Yone ufunda mu nshapita wa 1, mvese wa 18: ‘Kakuena muntu utu muanji kutangila Nzambi [Wa-Bukole-Buonso].’ Pabi bantu bakamona Muanende Yezu, bualu Yone udi wamba ne: ‘Dîyi diakakudimuka muntu, diakalua munkatshi muetu tshitupa, divua diuule tente ne ngasa.’ (Yone 1:14) Mmunyi muvua Muana mua kuikala tshitupa tshia Nzambi Wa-Bukole-Buonso? Yone wakamba kabidi ne: Dîyi divua ‘ne Nzambi.’ Mmunyi mudi muntu mua kuikala ne muntu mukuabu eku muikale kabidi muntu au? Anu mudibu bafunde kabidi mu Yone 17:3, Yezu wakafila dishilangana dinene didi pankatshi pende ne Tatuende wa mu diulu. Udi ubikila Tatuende ne: ‘Nzambi umuepele mulelela.’ Ku ndekelu kua Evanjeliyo wende, Yone udi wamba malu mu tshikoso ne: ‘Malu aa adi mafundibue bua nuenu nuitabuje ne: Yezu udi Kristo, Muana wa Nzambi.’ (Yone 20:31) Yone udi ubikila Yezu ne: Muana wa Nzambi, kadi ki n’Nzambi to. Malu a pa mutu aa adi aleja mutudi ne bua kumvua Yone 1:1. Dîyi anyi Yezu udi “nzambi” mu ngumvuilu wa se: udi ne muaba mubandile, kadi kêna diatshimue ne Nzambi Wa-Bukole-Buonso nansha.

Vuluka kabidi tshilejilu tshietu tshia mulongeshi ne balongi bende. Elabi meji ne: balongi bakuabu batshidi amu ne dielakana nansha mudi mulongeshi mumane kubumvuija malu a pa mutu. Badi mua kuenza tshinyi? Badi mua kuya kudi mulongeshi mukuabu bua kumanya manga malu a pa mutu pa dilongesha dimue dimue adi. Mulongeshi muibidi yeye mushindike diumvuija dia wa kumpala, udi mua kujikija dielakana dia balongi ba bungi. Bia muomumue, wewe kuyi mumvue tshivua Yone musue kuamba pa malanda adi pankatshi pa Yezu ne Nzambi Wa-Bukole-Buonso,  udi mua kuya kudi mufundi mukuabu wa Bible bua kumanya malu a pa mutu. Tshilejilu, tangila tshivua Matayo mufunde. Wakambulula mêyi a Yezu bua nshikidilu wa tshikondo etshi wamba ne: ‘Bua dituku adi ne pa dîba adi kakuena muntu udi mumanye, banjelu mene ba mu diulu kabena bamanye, Muana kêna mumanye, anu Tatu udi mumanye.’ (Matayo 24:36) Mêyi aa adi ajadika ne: Yezu ki n’Nzambi Wa-Bukole-Buonso to.

Yezu udi wamba ne: Tatu mmumanye malu a bungi kupita Muana. Pabi bu Yezu muikale tshitupa tshia Busatu Bunsantu, uvua mua kuikala mumanye malu amue ne Tatuende, ki mmuomu anyi? Nunku, Muana ne Tatu kabena mua kuikala diatshimue to. Kadi bakuabu badi anu mua kuamba ne: ‘Yezu uvua ne ngikadilu ibidi. Apa udi wakula bu muntu.’ Kadi nansha biobi bikale nanku, netuambe tshinyi bua nyuma muimpe? Bu yeye muikale tshitupa tshia Nzambi umue ne Tatu, bua tshinyi Yezu kêna wamba ne: nyuma eu mmumanye malu adi Tatu mumanye?

Paudi utungunuka ne kulonga Bible, neumanye mvese ya bungi idi ileja bulelela pa bidi bitangila Tatu, Muana ne nyuma muimpe.​—Musambu 90:2; Bienzedi 7:55; Kolosai 1:15.