1, 2. Mbualu kayi buvuabu bashintulule mu Tshibumba tshia Nsentedi tshia Siona tshia ngondo wa 1 wa 1895? Ntshinyi tshivua bana betu benze?

 PAVUA muanetu John Bohnet, Mulongi wa Bible wa tshisumi mupete Tshibumba tshia Nsentedi tshia Siona tshia ngondo wa 1 wa 1895, wakasanka bikole bua tshivuaye mumone. Tshibejibeji etshi tshivua ne tshizubu tshipiatshipia tshivua ne tshimfuanyi tshia muendu uvua pa mâyi manene avua ne mavuala makole ne uvua utokesha muulu muvua mufiike. Munda mua tshibejibeji etshi muvua tshiena-bualu tshia ne: “Tshizubu tshietu tshipiatshipia.”

² Bu muvuabi bikemeshe muanetu Bohnet, wakafundila muanetu Russell mukanda wamba ne: “Ndi ne disanka bua kumona mudi Tshibumba tshia Nsentedi tshilue tshimpe kumona.” Mulongi wa Bible mukuabu wa lulamatu diende John Brown wakafunda bua tshizubu etshi wamba ne: “Tshidi tshikoka ntema bikole. Bushuwa, muendu eu udi ne tshishimikidi tshikole nansha mudi mavuala makole a mâyi akumaku.” Uvua musangu wa kumpala uvua bana betu bamone dishintuluka dia tshizubu, kadi kawuvua wa ndekelu to. Mu ngondo wa 11, bakumvua kabidi bua dishintuluka dinene divua mua kuenzeka. Bualu bua dikema, dishintuluka divua ditangila mâyi manene avua ne mavuala makole.

3, 4. Ndutatu kayi luvuabu baleje mu Tshibumba tshia Nsentedi tshia dia 15 ngondo wa 11 wa 1895? Ndishintuluka kayi dinene divuabu bamanyishe?

³ Tshibumba tshia Nsentedi tshia dia 15 ngondo wa 11 wa 1895 tshivua ne tshiena-bualu tshile tshivua tshileje patoke lutatu kampanda lunene luvua bu mavuala makole a mâyi luvua lunyange ditalala mu bulongolodi bua Balongi ba Bible. Bana betu bavua bakokangana bikole bua kumanya uvua ne bua kuikala mulombodi wa tshisumbu. Bua kuambuluisha bana betu bua kumanyabu tshivua tshikengela bua kumbushabu lungenyi lua ditembangana luvua lukebesha matapuluka alu, tshiena-bualu etshi tshiakafuanyikija bulongolodi ne mazuwa. Pashishe tshiakaleja buludiludi ne: bantu bavua balombola, bavua bapangile mua kulongolola bulongolodi buvua buenze bu mazuwa ku tshipepele tshikole. Ntshinyi tshivuabu ne bua kuenza?

⁴ Tshiena-bualu etshi tshiakaleja ne: muendeshi muimpe wa mazuwa utu udienzeja bua kumanya ne: bintu bia kusungila nabi bantu bidi mu mazuwa ne bena mudimu ba mu mazuwa mbadiakaje bua kusungila mioyo padi tshipepele tshikole tshilua. Bia muomumue, bantu bavua balombola bulongolodi  bavua ne bua kuikala bajadike ne: bisumbu bionso bivua bilongolola bua kupanduka ku nsombelu mikole ivua bu tshipepele tshikole. Bua kukumbaja bualu ebu, tshiena-bualu etshi tshiakamanyisha dishintuluka dinene divua ne bua kuenzeka. Tshiakaleja ne: Kutuadijila anu tshikondo atshi, “bavua ne bua kusungula bakulu mu tshisumbu tshionso” bua “‘kuikala batangidi’ ba tshisumbu tshia mikoko.”—Bien. 20:28.

5. a) Bua tshinyi bualu bua kumpala buvuabu bashintulule bua bidi bitangila bakulu buvua buenzeke mu tshikondo tshikumbanyine? b) Netuandamune nkonko kayi?

⁵ Bualu bua kumpala buvuabu bashintulule bua bakulu ebu buvua bufike mu tshikondo tshikumbanyine bua bisumbu kuikalabi bishindame. Bualu ebu buakambuluisha bana betu bua kupita bimpe ne nsombelu mikole ivua mienze bu mavuala makole a mâyi ivua mikebesha kudi Mvita ya kumpala ya buloba bujima. Mu makumi a bidimu akalonda, malu makuabu avuabu bakaje mu bulongolodi buetu akambuluisha bantu ba Nzambi bua kuikalabu bakumbane bua kuenzela Yehowa mudimu. Mmulayi kayi wa mu Bible ukavua muleje bualu ebu? Mmalu kayi adi bulongolodi buetu bushintulule audi mudimuene ne ebe abidi? Mmunyi mudiwu makuambuluishe?

6, 7. a) Yeshaya 60:17 udi umvuija tshinyi? b) Miaku eyi: ‘bakokeshi’ ne ‘bamfumu’ idi ileja tshinyi?

⁶ Anu mutuvua bamone mu Nshapita wa 9, Yeshayi ukavua mulaye ne: Yehowa uvua ne bua kubenesha bantu bende bua bavule ne balue ba bungi. (Yesh. 60:22) Kadi Yehowa uvua mulaye bua kuenza malu a bungi kupita apu. Udi wamba mu mulayi umue au ne: ‘Nendue ne or muaba uvua tshiamu tshia mitaku, nendue ne argent muaba uvua tshiamu tshifike, nendue ne tshiamu tshia mitaku muaba uvua mabaya ne tshiamu tshifike muaba uvua mabue. Nemvuije ditalala bukokeshi buebe, nemvuije buakane mfumu webe.’ (Yesh. 60:17) Mulayi wa buprofete eu udi umvuija tshinyi? Mmunyi mudiwu utukumbanyina lelu?

⁷ Mulayi wa buprofete wa Yeshayi udi wamba ne: bavua ne bua kupingaja tshiamu muaba wa tshiamu tshikuabu. Kadi mona ne: badi bapingaja bintu bimpe menemene pa muaba wa bidi bimpe, kadi ki mbia bimpe pa muaba wa bia bibi to. Kupingaja or pa muaba wa tshiamu tshia mitaku ndiakaja malu ne ke mudibi bua biamu bikuabu bidibu batele. Nunku, bilondeshile difuanyikija edi, Yehowa ukavua mulaye muvua nsombelu wa bantu bende ne bua kuakana ku kakese ku kakese. Ndiakaja dia malu dia mushindu kayi didi mulayi eu wakuila? Pavua Yehowa mutele ‘bakokeshi’ ne ‘bamfumu,’ uvua muleje ne: malu avuabu mua kuakaja ku kakese ku kakese aa avua ne bua kuenzeka mu mushindu uvuabu ne bua kutabalela bantu bende ne kubalongolola.

8. a) Nnganyi udi wenzeja diakaja malu didibu batele mu mulayi wa buprofete wa Yeshayi? b) Mmunyi mudi malu adibu bakaje atuambuluisha? (Tangila kabidi kazubu ka ne: “ Wakitaba mibelu ne budipuekeshi.”)

⁸ Nnganyi udi wenza bua bulongolodi buye kumpala? Yehowa udi wamba ne: ‘Nendue ne or, nendue ne argent, ne nemvuije Ditalala.’ Bushuwa, Yehowa nkayende ke udi muenze bua bakaje mushindu udi malu ne bua kuenzeka mu tshisumbu, kadi ki mbienzeke ku bukole bua bantu to. Katshia bateka Yezu Mukalenge, Yehowa mmuakaje malu aa ku butuangaji bua Muanende. Mmunyi mudi malu adibu bashintulule aa  atuambuluisha? Mvese umue umue eu udi wamba ne: malu adibu bakaje aa neafikishe ku “ditalala” ne ku “buakane.” Patudi tuitaba buludiki bua Nzambi ne tushintulula mushindu wetu wa dienza malu, ditalala nedikale munkatshi muetu ne dinanga dia buakane neditusake bua kuenzela Yehowa udi Paulo wamba mudiye “Nzambi wa ditalala” mudimu.—Filip. 4:9.

9. Ntshinyi tshidi tshiambuluisha bua kuikale bulongame ne buobumue mu tshisumbu? Bua tshinyi?

⁹ Paulo wakamba kabidi bua Yehowa ne: “Nzambi ki Nzambi wa malu mabuelakane to, kadi udi Nzambi wa ditalala.” (1 Kol. 14:33) Mona ne: Paulo kena uleja mudi malu mabuelakane mashilangane ne bulongame to, kadi mudiwu mashilangane ne ditalala. Bua tshinyi? Bualu bulongame nkayabu kabuena misangu yonso mua kukebesha ditalala to. Tshilejilu, tshisumbu tshia basalayi tshidi mua kuenda mu bulongame tshitangile ku mvita, kadi diya diatshi kumpala mu bulongame didi difikisha ku diluangana mvita, kadi ki nku ditalala to. Kadi bu mutudi bena Kristo, tudi ne bua kulama bualu bua mushinga ebu mu mutu: Muaba wonso udibu benza malu mu bulongame kadi kawuyi ditalala bu tshishimikidi, nansha ku tototo, nansha ku ndandanda, newupuke. Kadi bishilangane, ditalala dia Nzambi didi difila bulongame budi bushala kashidi. Nunku, tudi ne dianyisha dia bungi bua mudi bulongolodi buetu bulombola ne bulengeja kudi “Nzambi udi ufila ditalala.” (Lomo 15:33) Ditalala didi Nzambi ufila didi dienza tshishimikidi tshia bulongame bua mushinga ne buobumue bulelela butudi nabu mu bisumbu bietu bia pa buloba bujima, bintu bitudi tuanyisha bikole.—Mus. 29:11.

10. a) Mmalu kayi avuabu bakaje mu bulongolodi buetu mu bidimu bia ku ntuadijilu? (Tangila kazubu ka ne: “ Mudibu bakaje mushindu wa diteka bakulu.”) b) Nnkonko kayi ituandamuna mpindieu?

¹⁰ Kazubu ka ne: “ Mudibu bakaje mushindu wa diteka bakulu” kadi kaleja mu ka bujima mashintuluka adi atangila bulongame avua menzeke mu bulongolodi buetu mu bidimu bia ntuadijilu. Kadi mmunyi mudi Yehowa mupingaje ‘or muaba uvua tshiamu tshia mitaku’ matuku mashale aa ku diambuluisha dia Mukalenge wetu? Mmunyi mudi malu adibu bakaje adi atangila mushindu wa kulombola tshisumbu makoleshe ditalala ne buobumue mu bisumbu bia pa buloba bujima? Mmunyi mudiwu akuambuluisha wewe bua kuenzela “Nzambi wa ditalala” mudimu?

11. a) Dilonga dia Mifundu diakambuluisha bua kuakaja ngumvuilu kayi wa malu? b) Bana betu ba mu kasumbu kaludiki bavua badisuike bua kuenza tshinyi?

¹¹ Kumbukila mu 1964 too ne mu 1971, bena mu kasumbu kaludiki bavua balombola mudimu munene wa dilonga dia Bible muvuabu bakonkonone biena-bualu bia bungi kusangisha ne mushindu uvua tshisumbu tshia bena Kristo ba kumpala tshilongolola. a Bakamona ne: mu bidimu lukama bia kumpala bavua balombola tshisumbu kudi kasumbu ka bakulu kadi ki nkudi mukulu anyi mutangidi umue to. (Bala Filipoyi 1:1; 1 Timote 4:14.) Pakumvuabu bualu ebu bimpe, bena mu kasumbu kaludiki bakamona ne: Mukalenge wabu Yezu udi ubalombola mu mudimu wa diakaja malu mu mushindu uvua malu malongolola mu bulongolodi bua bantu ba Nzambi. Bana betu ba mu kasumbu kaludiki bakadisuika bua kulonda buludiki bua Mukalenge. Bakakaja malu ne lukasa bua kulonda tshidi  Bible wamba bua mushindu wa diteka bakulu. Mmalu kayi avuabu bakaje ku ntuadijilu kua bidimu bia 1970?

12. a) Mbualu kayi buvuabu bashintulule mu kasumbu kaludiki? b) Umvuija mudi Kasumbu kaludiki kalongolola lelu. (Tangila kazubu ka ne: “ Mudi Kasumbu kaludiki katangila malu a Bukalenge” mu dibeji dia 130.)

¹² Bualu bua kumpala buvuabu bakaje buvua butangila kasumbu kaludiki koku kine. Too ne tshikondo atshi, kasumbu ka bana betu bela manyi aku kavua kenza ne bantu 7 bavua benza kasumbu kavua kalombola Watch Tower Bible and Tract Society of Pennsylvania. Kadi mu 1971, bena mu kasumbu kaludiku bakavula kuluabu 11 ne kuakalua dishilangana pankatshi pa kasumbu kaludiki ne kasumbu ka balombodi. Muntu yonso wa mu kasumbu kalukidi kavua udimona mupite bakuabu to, ne ku tshidimu ku tshidimu yonso wa kudibu uvua ulombola, ne bavua balondangana bilondeshile mudi mêna abu malondangane mu mfundilu wawu.

13. a) Malu avua enzeka mushindu kayi mu tshisumbu kubangila mu tshidimu tshia 1932 too ne mu tshia 1972? b) Kasumbu kaludiki kakenza tshinyi mu 1972?

¹³ Bualu bukuabu buvuabu bakaje buvua butangila tshisumbu tshionso. Mu mushindu kayi? Kumbukila mu 1932 too ne mu 1972, bavua balombola tshisumbu kudi mukulu umue. Too ne mu 1936, bavua babikila muanetu wa balume uvuabu basungule eu ne: mulombodi wa mudimu. Panyima bakashintulula mushindu wa kumubikila, kuluaye mutangidi wa tshisumbu, pashishe musadidi wa tshisumbu ne ndekelu wa bionso muludiki wa tshisumbu. Bana betu ba balume bavuabu bateke aba bavua bakumbaja mudimu wabu wa kulama mikoko bimpe mu nyuma ne tshisumi. Muludiki wa tshisumbu uvua wangata mapangadika bua tshisumbu kayi ukonka bakulu bakuabu to.  Kadi, mu 1972, Kasumbu kaludiki kakashintulula bualu kampanda bunene. Mbualu kayi abu?

14. a) Ntshinyi tshiakatuadija mu dia 1 ngondo wa 10 wa 1972? b) Mmunyi mudi mutangidi wa malu a kasumbu ka bakulu utumikila Filipoyi 2:3?

¹⁴ Pamutu pa kuikala anu ne muanetu wa balume umue udi ulombola tshisumbu tshionso, bakasungula bana betu ba balume bakuabu ku diambuluisha dia nyuma wa Nzambi bavua bakumbaje ngikadilu ya mu Mifundu bua kuenza mudimu bu bakulu bena Kristo. Bavua ne bua kuenza kasumbu ka bakulu kavua ne bua kutangila tshisumbu. Bakatuadija mushindu mupiamupia wa diteka bakulu eu mu dia 1 ngondo wa 10 wa 1972. Lelu, mutangidi wa malu a kasumbu ka bakulu kena udimona ne mushinga kupita bakulu bakuabu to, kadi udi udimona “bu mukese.” (Luka 9:48) Bana betu badi ne budipuekeshi aba badi dibenesha kudi bena Kristo ba pa buloba bujima.—Filip. 2:3.

15. a) Kulongolola bua bisumbu bikale ne kasumbu ka bakulu nkufile masanka kayi? b) Ntshinyi tshidi tshileja ne: Mukalenge uvua ne meji?

¹⁵ Mushindu udibu balongolole bua bena mu tusumbu tua bakulu babanyangane midimu udi bushuwa uleja mudibu bakaje malu bikole. Tumone masanka asatu adi bualu ebu bupetesha: Dia kumpala, budi buambuluisha bakulu bonso bua kuikala bajadike ne: Yezu udi Mutu wa tshisumbu nansha bobu ne mudimu kayi mu tshisumbu. (Ef. 5:23) Dibidi, anu mudi Nsumuinu 11:14 uleja: ‘Malu adi enda bimpe mu bungi bua bafidi ba ngenyi.’ (NWT) Padi bakulu bapeshangana ngenyi pa tshilumbu kampanda bua tshisumbu kuikalatshi bimpe mu nyuma, ne bangata ne mushinga lungenyi lua yonso wa kudibu, bidi bibambuluisha bua kuangata mapangadika adi apetangana ne  mêyi manene a mu Bible. (Nsu. 27:17) Yehowa udi ubenesha mapangadika a nunku ne adi apatula bipeta bimpe. Disatu, kuikala ne bana betu ba balume badi bakumbane bua kuenza mudimu bu bakulu, kudi kuenza bua bulongolodi butungunuke ne kukumbaja dijinga didi dienda divula dia batangidi ne balami mu bisumbu. (Yesh. 60:3-5) Ela meji bua mudi bisumbu bivule pa buloba bujima. Mu 1971, bivua bipite pa 27 000, kadi mu 2013 bivua bipite pa 113 000. Bidi bimueneka patoke ne: Mukalenge wetu mmupeshe bayidi bende ne meji balami badi bakengela mu tshikondo tshikumbanyine.—Mika 5:5.

16. a) Bakulu badi ne mudimu kayi? b) Mmunyi muvua Balongi ba Bible batumikile didimuija dia Yezu dia ‘kulama mikoko’?

¹⁶ Mu matuku a ntuadijilu a Balongi ba Bible, bakulu bakavua bamanye ne: bavua ne bujitu bua kuambuluisha bena Kristo nabu bua kutungunukabu ne kuenzela Nzambi mudimu. (Bala Galatiya 6:10.) Mu 1908, tshiena-bualu kampanda tshia mu Tshibumba tshia Nsentedi tshiakakula bua didimuija dia Yezu dia ne: “Ulame mikoko yanyi mikese.” (Yone 21:15-17) Bakambila bakulu mu tshiena-bualu etshi ne: “Bidi ne mushinga wa bungi bua mudimu wa Mfumu udi utangila tshisumbu tshia mikoko kuikalawu pa muaba wa kumpala mu mioyo yetu, tudi ne bua kumona mudimu wa kudisha ne kukuba bayidi ba Mukalenge bu diakalenga dinene.” Mu 1925, Tshibumba tshia Nsentedi tshiakaleja kabidi mushinga wa kuenza mudimu wa bulami pavuatshi tshivuluije bakulu ne: ‘Tshitendelelu tshia Nzambi ntshiende yeye, ne muntu yonso neamubadile malu bilondeshile mudimu udiye wenzela bana babu bena Kristo.’

17. Mmunyi muvuabu bambuluishe bakulu bua kuikala balami ba mikoko bimpe?

¹⁷ Mmunyi mudi bulongolodi bua Yehowa buambuluishe bakulu mu mudimu wabu wa bulami bua kupingajabu ‘argent muaba uvua tshiamu tshifike’? Nku diambuluisha dia tulasa. Mu 1959, bakenza Kalasa ka mudimu wa Bukalenge ka kumpala. Tshimue tshitupa tshia kalasa aka tshivua ne tshiena-bualu tshia ne: “Tuikale tutabalela bantu.” Bakakankamija bakulu abu bua “kuenza programe bua kuikala kuya kutangila bamanyishi  ku nzubu yabu.” Bakaleja mu tshitupa etshi mishindu mishilashilangane idi balami mua kuenza makumbula adi ibaka. Mu 1966, bakakaja amue malu mu Kalasa ka mudimu wa Bukalenge. Bakakulamu bua tshiena-bualu tshia ne: “Mushinga wa mudimu wa bulami.” Mbualu kayi bunene buvuabu bakule mu tshitupa atshi? Bakalejamu ne: bantu bavua balombola “bavua ne bua kutabalela mikoko ya Nzambi, eku kabayi bapangila bua kukumbaja majinga a ba mu nzubu yabu ne mudimu wa kuyisha.” Mu bidimu bishale ebi, bavua benze tulasa tukuabu tua bakulu. Mbipeta kayi bivua bipatuke mu tulasa tudi bulongolodi bua Yehowa butungunuke ne kuenza? Lelu, tshisumbu tshia bena Kristo tshidi ne bana betu ba balume bakumbane binunu bia bungi badi benza mudimu bu balami ba mikoko ba mu nyuma.

18. a) Mmudimu kayi munene udibu bapeshe bakulu? b) Bua tshinyi Yehowa ne Yezu mbanange bakulu badi benza mudimu mukole?

¹⁸ Yehowa ke udi muteke bakulu bena Kristo ku diambuluisha dia Yezu Mukalenge wetu bua kukumbajabu mudimu wabu munene. Mmudimu kayi au? Ngua kulombola mikoko ya Nzambi mu tshikondo etshi tshikole. (Ef. 4:11, 12; 2 Tim. 3:1) Yehowa ne Yezu mbanange bikole bakulu badi benza mudimu mukole bualu, bana betu aba badi batumikila didimuija dia mu Bible edi: ‘Nulame tshisumbu tshia mikoko ya Nzambi tshidi mu bianza bienu ku budisuile; ne muoyo wa disanka; nulue tshilejilu kudi mikoko.’ (1 Pet. 5:2, 3) Tukonkononayi mishindu ibidi ya ku mishindu ya bungi idi bakulu bena Kristo mua kuikala tshilejilu kudi mikoko ne kuenza bua tshisumbu tshikale mu ditalala ne tshikale ne disanka.

19. Utu udiumvua bishi paudi uyisha ne mukulu?

¹⁹ Tshia kumpala, bakulu badi benza mudimu ne bena mu tshisumbu. Luka wakafunda bua Yezu wamba ne: “Wakatuadija kuenza luendu uya mu tshimenga ne mu tshimenga, mu musoko ne mu musoko uyisha, wamba lumu luimpe lua Bukalenge bua Nzambi. Bapostolo dikumi ne babidi bavua  nende.” (Luka 8:1) Anu bu muvua Yezu muyishe ne bapostolo bende, lelu bakulu ba tshitembu badi bayisha pamue ne bena Kristo nabu. Badi bamona ne: padibu benza nunku, badi bambuluisha bikole bua tshisumbu tshikale ne lungenyi luimpe. Bena mu tshisumbu badi bumvua bishi bua bakulu ba nunku? Muanetu wa bakaji ukadi ne bidimu bipatshila ku 90 diende Jeannine udi wamba ne: “Kuyisha ne mukulu kutu kumpetesha mpunga wa kuyukila nende ne kumumanya bimpe.” Muanetu wa balume udi ne bidimu 30 ne pa mutu diende Steven udi wamba ne: “Pantu nyisha ne mukulu ku nzubu ne ku nzubu ntu mmona ne: mmusue kungambuluisha. Kupeta diambuluisha dia nunku kutu kumpetesha disanka dia bungi.”

20, 21. Mmunyi mudi bakulu mua kuidikija mulami wa mikoko wa mu lusumuinu lua Yezu? Fila tshilejilu. (Tangila kabidi kazubu ka ne: “ Makumbula adi apatula bipeta bimpe.”)

²⁰ Tshibidi, bulongolodi bua Yehowa mbulongeshe bakulu bua kuditatshisha bua bantu bakadi balekele tshisumbu. (Eb. 12:12) Bua tshinyi bakulu badi ne bua kuambuluisha aba badi batekete mu nyuma? Mmunyi mudibu ne bua kuenza nanku? Tudi tupetela diandamuna mu lusumuinu lua Yezu lua mulami wa mikoko ne mukoko mujimine. (Bala Luka 15:4-7.) Padi mulami wa mikoko wa mu lusumuinu elu umona ne: mukoko umue mmujimine, udi uwukeba bienze bu ne: uvua anu ne umue au. Mmunyi mudi bakulu bena Kristo lelu bidikija tshilejilu tshia mulami wa mikoko eu? Anu mudi mukoko mujimine ne mushinga wa bungi kudi mulami wa mikoko, ke mudi aba badi balekele kudisangisha ne bantu ba Nzambi bikale ne mushinga kudi bakulu. Badi bamona muntu udi mutekete mu nyuma bu mukoko mujimine kadi kabena bamona kumuambuluisha bu kujimija kua dîba to. Kabidi, anu mudi mulami wa mikoko wangata dipangadika dia ‘kuya kukeba udi mujimine too ne padiye uwupeta,’ ke mudi bakulu balongolola malu bua kuya kukeba ne kupeta bantu badi batekete bua kubambuluisha.

²¹ Ntshinyi tshidi mulami wa mikoko wa mu lusumuinu wenza padiye upeta mukoko? Udi uwambula ne bulenga, “uwuteka pa makaya ende” ne upingana nawu mu tshisumbu tshia mikoko. Bia muomumue, mukulu yeye muditatshishe ne muoyo mujima bua muntu udi mutekete mu nyuma, udi mua kumuambula ne bulenga ne kumuambuluisha bua kupingana mu tshisumbu. Ke tshivua tshifikile Victor, muanetu wa balume wa mu Afrike uvua mulekele kubuela mu bisangilu bia tshisumbu. Udi wamba ne: “Mu bidimu muanda mukulu bimvua tshiyi kabidi ndisangisha ne tshisumbu, bakulu bavua anu badienzeja bua kungambuluisha.” Mbualu kayi buvua butambe kumulenga? Udi wamba ne: “Dimue dituku mukulu kampanda utuvua babuele nende mu Kalasa ka bampanda-njila diende John wakalua kuntangila ne kundeja imue foto ituvua badikuatshishe mu kalasa aku. Biakamvuluija malu a bungi mimpe amvua njinga kuenza bua disanka dimvua nadi pamvua ngenzela Yehowa mudimu.” Katupa kakese panyima pa dikumbula dia John, Victor wakapingana mu tshisumbu. Lelu udi kabidi mpanda-njila. Bushuwa, bakulu bena Kristo badi batabalelangana badi batuambuluisha bikole bua tuikale ne disanka.—2 Kol. 1:24. b

22. Mmunyi mudi buakane ne ditalala bikolesha buobumue mu tshisumbu tshia bena Kristo? (Tangila kabidi kazubu ka ne: “ Bivua bitukemeshe bikole.”)

²² Anu mutukavua bamone, Yehowa ukavua muambe ne: buakane ne ditalala bivua ne bua kuvula ku kakese ku kakese munkatshi mua bantu ba Nzambi. (Yesh. 60:17) Ngikadilu ibidi eyi idi ikolesha buobumue bua bisumbu. Mu mushindu kayi? Bua bidi bitangila buakane, ‘Nzambi udi biende Yehowa umue.’ (Dut. 6:4) Mikenji yende miakane kayena ishilangana bilondeshile bisumbu bia mu ditunga kampanda ne bia mu ditunga kansanga to. kadi mikenji yende ya tshidi tshimpe ne tshibi idi mumue, ne mmifuanangane mu “bisumbu bionso bia bansantu.” (1 Kol. 14:33) Nunku, tshisumbu netshidiunde anu padibu batumikila mikenji ya Nzambi. Bua bidi bitangila ditalala, Mukalenge wetu mmusue bua tuikale ne ditalala mu tshisumbu ne tuikale kabidi “bakebi ba ditalala.” (Mat. 5:9) Nunku, “tuipatshilayi malu adi afila ditalala.” Tuikale ba kumpala mu dijikija bilumbu bidi mua kujuka munkatshi muetu. (Lomo 14:19) Mu mushindu eu, tudi tuenza bua tshisumbu tshietu tshikale mu ditalala ne mu buobumue.—Yesh. 60:18.

23. Bu mutudi batendeledi ba Yehowa, mmalu kayi mimpe atudi nawu lelu?

²³ Pavua Tshibumba tshia Nsentedi tshia ngondo wa 11 wa 1895 tshimanyishe bua musangu wa kumpala bua mushindu uvuabu balongolole malu bua bakulu, bana betu ba balume bavua balombola midimu bakaleja kabidi dijinga dikole divuabu nadi. Ndijinga kayi adi? Bavua bajinga bua ne: bualu bupiabupia buvuabu balongolole ebu buambuluishe bantu ba Nzambi bua “bikale mu buobumue mu ditabuja,” bakasambila bua bualu ebu. Patudi tutangila malu adi menzeke mu makumi a bidimu mashale aa, tudi ne dianyisha bua kumona ne: malu adi Yehowa muakaje ku kakese ku kakese ku diambuluisha dia Mukalenge wetu bua bidi bitangila mudimu wa ditangila mmakoleshe buobumue buetu bua ntendelelu. (Mus. 99:4) Nunku, lelu bantu ba Yehowa ba pa buloba bujima badi basanka bua mutudi tuenda “mu lungenyi lua muomumue,” tulonda “mu makasa amue amue” ne tuenzela “Nzambi wa ditalala” mudimu ‘diapa dionso muinshi mua bujitu.’—2 Kol. 12:18; bala Sefanya 3:9.