WEWE mubale tshikandakanda kayi tshionso, mutangile televizion anyi muteleje tshisanji, badi batamba kuakula bua malu a terorisme anyi tshinyangu, a mvita ne a tshikisu. Nansha wewe pebe udi mua kuikala utata bua disama kampanda anyi bualu udi mufuishe.

Diebeja ne:

• Ke malu avua Nzambi musue bua amfikile meme ne bena mu dîku dietu anyi?

• Nkuepi kundi mua kupeta diambuluisha bua kupita bimpe ne ntatu yanyi eyi?

• Ditalala dilelela nediluaku pa buloba apa anyi?

Bible udi wandamuna nkonko eyi bimpe.

• Bantu kabakumvua kabidi bintu bibasama, kabakukulakaja anyi kufua to.—Buakabuluibua 21:4

• “Mulema neatumpike bu ngulungu.”—Yeshaya 35:6

• “Mêsu a bampofu neatabale.”—Yeshaya 35:5

•  Bafue nebabishibue ku lufu.—Yone 5:28, 29

• Muntu nansha umue kakusama to.—Yeshaya 33:24

• Muntu yonso pa buloba neikale ne biakudia bipite bungi.—Misambu 72:16

Mbipepele bua wewe kuela meji ne: malu audi mubale mu mabeji a ntuadijilu a mukanda eu mbilota patupu. Kadi Nzambi mmulaye bua kuenza malu au pa buloba mu katupa kîpi emu, ne Bible udi umvuija muenzaye malu aa.

Mu Bible mudi kabidi malu makuabu a bungi. Udi utuambila malu atudi ne bua kumanya bua kuikala ne disanka dilelela ne nsombelu muimpe nansha mpindieu. Anji ela meji katupa bua malu adi akusamisha mutu. Mu malu aa mudi mua kuikala tshilumbu tshia makuta anyi ntatu ya mu dîku, masama, peshi difuisha muntu. Bible udi mua kukuambuluisha bua kupita bimpe ne ntatu eyi, ne udi mua kukukolesha padiye wandamuna nkonko bu mudi:

• Tutu tukenga bua tshinyi?

• Mmunyi mutudi mua kupita bimpe ne ntatu yetu?

• Dîku dietu didiku mua kuikala ne disanka anyi?

• Ntshinyi tshidi tshituenzekela patudi tufua?

• Netumonaku kabidi balela betu bakadi bafue anyi?

• Ntshinyi tshidi mua kutujadikila ne: Nzambi neakumbaje malu adiye mulaye?

 Bu muudi ubala mukanda eu, bidi bileja ne: udi musue kumanya tshidi Bible ulongesha. Mukanda eu newukuambuluishe. Bikoso bionso bidi ne nkonko yakuambuluisha bua kumvua Bible bimpe menemene. Bantu miliyo ya bungi batu banyisha bua kulonga Bible ne Bantemu ba Yehowa. Tudi batekemene ne: newanyishe pebe. Tudi tulomba Nzambi bua akubeneshe paudi wenda umanya malu adi Bible ukulongesha!