Mêyi a mbangilu
“Nulue bidikiji ba bantu badi bapiana milayi ku diambuluisha dia ditabuja ne lutulu.”—EBELU 6:12.
1, 2. Mmunyi muvua mutangidi wa tshijengu kampanda umona bantu ba lulamatu ba mu Bible? Bua tshinyi bantu abu bavua balue balunda bimpe?
PAVUA mamu mukuabu muena Kristo muteleje muyuki wa mutangidi wa tshijengu kampanda wa kale, wakamba ne: “Udi wakula bua bantu badi mu Bible bienze anu bu ne: mbalunda bende ba kale.” Bivua nanku, bualu bu muvua muanetu eu mulonge Bible bidimu bia bungi, biakenza bua ne: padiye wakula bua muntu kampanda wa mu Bible bivua bimueneka anu bu ne: uvua wakula bua mulunda wende wa kale.
2 Kuenaku mumone ne: mbimpe kuvuija bantu ba bungi ba mu Bible bu balunda betu anyi? Udi ubamona bu bantu balelela anyi? Fuanyikija muvuabi mua kuikala tuetu tuendakana anyi tuyukila nabu, tukeba dîba bua kumanya bantu balume anyi bakaji bu mudi: Noa, Abalahama, Luta, Eliya ne Esetê. Elabi meji bua muvuabu mua kukuambuluisha mu nsombelu webe, kukupesha mibelu mimpe ne kukukankamija!—Bala Nsumuinu 13:20.
3. a) Mmunyi mutudi mua kupeta malongesha kudi bantu balume ne bakaji ba ditabuja badi Bible utela? b) Netukonkonone nkonko kayi?
3 Bushuwa, mu tshikondo tshia “dibika dia ku lufu dia bantu bakane,” nekuikale mpunga bua kupeta dibenesha dimpe edi. (Bien. 24:15) Kadi, nansha mpindieu tudi mua kupeta malongesha kudi bantu balume ne bakaji ba lulamatu badibu batele mu Bible. Mushindu kayi? Mupostolo Paulo udi ufila diandamuna dimpe edi: “Nulue bidikiji ba bantu badi bapiana milayi ku diambuluisha dia ditabuja ne lutulu.” (Eb. 6:12) Bu mutudi tutuadija kulonga malu adi atangila bantu balume ne bantu bakaji ba ditabuja, tukonkononayi nkonko mikese idi ituluila mu lungenyi bua tshivua Paulo muambe. Bu mudi: Ditabuja ntshinyi? Bua tshinyi mbimpe kuikala nadi? Mmunyi mutudi mua kuidikija ditabuja dia bantu badibu batele mu Bible?
Ditabuja ntshinyi? Bua tshinyi tudi ne bua kuikala nadi?
4. Mmunyi mudi bantu bela meji bua ditabuja? Bua tshinyi kabiena nanku to?
4 Ditabuja nngikadilu muimpe uvua bantu balume ne bakaji bonso batualonga malu abu mu mukanda eu bangate ne mushinga. Bantu ba bungi lelu badi bapepeja ditabuja, bela meji ne: didi diumvuija kuitaba bualu budi kabuyi ne bijadiki to. Kadi kabiena nanku to. Ditabuja dilelela kadiena divuija muntu tshitaba mvinyingu anyi muena bitabataba to; ki mmushindu udi muntu udiumvua patupu to. Kuikala tshitaba mvinyingu kudi ne njiwu ya bungi. Mushindu udi muntu udiumvua utu ushintuluka, ne bua malu a Nzambi katuena mua kuitabuja tshianana tshianana to, bualu nansha “bademon badi bitabuja pabu, badi bazakala.”—Yak. 2:19.
5, 6. a) Ditabuja dietu ndimanyine pa malu abidi kayi atudi katuyi tumona? b) Tudi mua kuteka ditabuja dietu pa bishimikidi bia mushindu kayi? Fila tshilejilu.
5 Ditabuja dilelela ndipite kuitabuja malu kakuyi bijadiki. Tuvuluke tshidi Bible wamba bua ditabuja. (Bala Ebelu 11:1.) Paulo wakaleja ne: ditabuja ndimanyine pa malu abidi atudi katuyi mua kumona to. Bualu bua kumpala, ndimanyine pa malu malelela a mpindieu atudi “katuyi tumona.” Mêsu etu kaena mua kumona malu malelela adi mu diulu to, bu mudi Yehowa Nzambi, Muanende anyi Bukalenge buende budi bukokesha mpindieu mu diulu. Bualu buibidi, ditabuja ndimanyine pa malu atudi “batekemene,” kadi adi kaayi manji kuenzeka to. Katuena mua kumona mpindieu bulongolodi bupiabupia budi Bukalenge bua Nzambi ne bua kututuadila mu katupa kîpi emu to. Bidiku bisua kumvuija ne: katuena ne bijadiki bia malu malelela aa ne bia bintu bitudi batekemene anyi?
6 Kabiena nanku to. Paulo wakaleja ne: ditabuja dilelela edi didi ne bishimikidi bikole. Pavuaye umvuija ditabuja bu: “dindila dishindame,” uvua muenze mudimu ne tshiambilu tshidibu kabidi mua kukudimuna ne: “mikanda idi ipesha muntu bukenji pa tshintu kampanda.” Fuanyikijabi ne: muntu kampanda udi ujinga kukupesha lupangu. Udi mua kukupesha mikanda ya lupangu alu wamba ne: “Kuata lupangu luebe.” Bulelela, kena usua kuamba ne: neusombe mu mabeji a mikanda ya lupangu idiye ukupesha ayi to, mmusue kuamba ne: mikanda ya lupangu idiye ukupesha ayi idi tshijadiki tshikole tshidi tshileja ne: lupangu lukadi luebe, nunku kuikala ne mikanda ayi kudi anu bu muntu udi mumane kupeta lupangu. Bia muomumue, bijadiki bidi bituitabijija mbilelela, mbikole, ke bua tshinyi tudi tubisuikakaja ku ditabuja dietu.
7. Ditabuja dilelela didi diumvuija tshinyi?
7 Nunku ditabuja dilelela didi dilomba kuikala ne bijadiki bidi bimanyine pa malu malelela ne dishindika didi kadiyi ditenkakana didi dimanyine anu pa Yehowa Nzambi. Ditabuja didi dituambuluisha bua kumumona bu Tatu wetu wa dinanga ne didi dituambuluisha bua kuitaba ne dishindika ne: milayi yende yonso neyikumbane bulelela. Kadi ditabuja dilelela didi diumvuija malu a bungi. Anu bu tshintu tshidi ne muoyo, tudi ne bua kudisha ditabuja dietu bua dikole. Didi ne bua kumuenekela mu bienzedi, tshianana didi difua.—Yak. 2:26.
8. Kuikala ne ditabuja kudi ne mushinga mukole bua tshinyi?
8 Bua tshinyi kuikala ne ditabuja kudi ne mushinga? Paulo udi ufila diandamuna dimpe. (Bala Ebelu 11:6.) Katuena mua kusemena kudi Yehowa anyi kumusankisha patudi katuyi ne ditabuja to. Nunku, ditabuja didi ne mushinga bituikala basue kuenza bualu bua mushinga mukole, mmumue ne: kusemena pabuipi ne Nzambi ne kutumbisha Yehowa Tatu wetu wa mu diulu.
9. Mmunyi mudi Yehowa uleja ne: mmumanye dijinga ditudi nadi dia kuikala ne ditabuja?
9 Yehowa mmumanye dijinga dikole ditudi nadi dia kuikala ne ditabuja, ke bua tshinyi udi utupesha bilejilu bua kutulongesha mushindu utudi mua kuibaka ditabuja dietu ne kudileja. Udi ubenesha tshisumbu tshia bena Kristo ne bilejilu bia bantu ba lulamatu badi batulombola. Dîyi diende didi diamba ne: “Nuidikije ditabuja diabu.” (Eb. 13:7) Mmutupeshe kabidi kupita apu. Paulo wakafunda bua ‘tshisumbu tshinene tshia bantemu,’ balume ne bakaji ba mu bikondo bia kale bavua bashiye tshilejilu tshimpe tshia ditabuja. (Eb. 12:1) Kudi batendeledi ba Yehowa ba lulamatu ba bungi, bapite badi Paulo mutele mu mukanda wa Ebelu nshapita wa 11. Bible mmuule tente ne miyuki milelela ya balume, bakaji, bana ne bakulumpe bavua ne nsombelu mishilashilangane, bavua bena ditabuja ne bavua ne malu a bungi a kutulongesha mu tshikondo etshi tshidi bantu kabayi ne ditabuja.
Mushindu utudi mua kuidikija ditabuja dia bakuabu
10. Mmunyi mudi didilongela dietu dituambuluisha bua kuidikija balume ne bakaji ba lulamatu badibu bakuile mu Bible?
10 Kuena mua kuidikija muntu paudi kuyi muanji kulonga tshidiye ne ntema yonso to. Paudi wenda ubala mukanda eu, neumone ne: makebulula a bungi menza bua kukuambuluisha bua kulonga tshidi nsombelu wa balume ne bakaji ba ditabuja aba. Bua tshinyi kuena pebe mua kuenza tshitudi benze pa kudienzela nkayebe makebulula bua bantu aba? Mu didilongela diebe, buela mu ndondo wa malu a mu Bible ne mikanda ya dikebulula iudi nayi. Paudi wenda wela meji pa malu audi ulonga, teta kufuanyikija muaba uvua malu a mu Bible au menzekele ne nsombelu uvua nende bantu badibu bakuila. Difuanyikija wenda umona muaba uvua malu menzeke, umvua mêyi a bantu ne umvua mipuya anu bu uvua muaba au. Bualu bukuabu bua mushinga, ditatshisha bua kujingulula muvua bantu badibu bakuilamu badiumvue. Paudi uditeka pa muaba wa bantu balume ne bakaji ba lulamatu abu, neubamone bantu balelela, baudi muibidilangane nabu; bamue nebalue kuudi bu balunda bebe ba kale baudi munange.
11, 12. a) Mmunyi muudi mua kudiumvua pabuipi ne Abalama ne Salai? b) Tshilejilu tshia Ana, Eliya ne Samuele tshidi mua kukuambuluisha ku tshinyi?
11 Wewe mubamanye bimpe, neujinge anu bua kubidikija. Tshilejilu, elabi meji udimona bakadi bakutume muaba mukuabu bua kuenza mudimu. Mu bulongolodi bua Yehowa, badi bakulomba bua uye kuenza mudimu wa kuyisha mu mushindu kampanda. Imue misangu badi bakulomba bua kuya mu teritware mudi dijinga dikole dia bamanyishi, anyi bakulomba bua kuya kuyisha mu mushindu kampanda uudi kuyi muibidilangane nawu peshi udi kawuyi ukukumbanyina. Paudi wenda wela meji bua muaba uudi ne bua kuya ne usambila bua bualu ebu, kabienaku mua kuikala bimpe wewe kuela meji bua tshivua Abalama muenze anyi? Yeye ne Salai bakitaba bua kushiya nsombelu muimpe uvuabu nende mu Ula ne Yehowa wakababenesha bikole bua tshivuabu benze. Paudi wenza pebe tshivuabu benze etshi, neudiumvue bushuwa ne: udi mubamanye mpindieu bimpe kupita ne kumpala.
12 Bia muomumue, udi mua kuenza tshinyi bikala muntu kampanda uudi muibidilangane nende mukuenzele bualu bubi ne udiumvua mutekete mu maboko, imue misangu umvua mua kupumbisha too ne bisangilu? Wewe mulonde tshilejilu tshia Ana ne mushindu uvuaye kayi mushile Penina muaba bua kumupangisha bua kutendelela Yehowa nebikuambuluishe bua kuangata dipangadika dimpe, neumone Ana bu mulunda webe wa pa muoyo. Bia muomumue, bobu bakuenzele bualu budi bukutekeshe mu maboko, udiumvua kuyi ne mushinga, udi mua kudiumvua anu bu Eliya paudi ulonga lutatu luvuaye nalu ne muvua Yehowa mumuambuluishe. Bansonga badibu batatshisha bikole kudi balongi nabu badi kabayi ne bikadilu bimpe badi mua kudiumvua pabu bu Samuele padibu balonga tshivuaye muenze pavua bana ba Eliya bamusake bua kuenza malu mabi ku ntempelo.
13. Kuidikija ditabuja dia bantu bakuabu kudiku kuleja ne ditabuja diudi nadi kadiena ne mushinga anyi? Umvuija.
13 Kuidikija ditabuja dia bantu badibu bakuila mu Bible kudiku kuleja ne: ditabuja diebe kadiena ne mushinga kumpala kua Yehowa anyi? Tòo. Vuluka ne: Dîyi dia Yehowa didi ditukankamija bua kuidikija bantu badi ne ditabuja. (1 Kol. 4:16; 11:1; 2 Tes. 3:7, 9) Bidi kabidi ne mushinga bua kumanya ne: bamue bantu batuikala ne bua kulonga mu mukanda eu bavua pabu bidikije bantu ba ditabuja bavua kumpala kuabu. Tshilejilu, tudi tumona mu Nshapita 17 wa mukanda eu ne: mêyi avua Mariya mutele avua mua kuikala a Ana, bimueneka ne: uvua umumona bu tshilejilu tshimpe. Bualu ebu budiku busua kuleja ne: Mariya kavua ne ditabuja dikole anyi? Tòo. Kadi ditabuja dia Ana divua diambuluishe Mariya bua yeye kukolesha diende ditabuja ne kulua muntu wa mushinga ku mêsu kua Yehowa.
14, 15. Mmalu kayi makuabu a pa buawu adi mu mukanda eu? Mmunyi mutudi mua kuenza mudimu bimpe ne mukanda eu?
14 Mukanda eu mmuenza bua kukuambuluisha bua wewe kukolesha ditabuja diebe. Nshapita idi ilonda eyi mbiena-bualu bia ne: “Widikije ditabuja diabu” bivua bipatuke mu Tshibumba tshia Nsentedi kutuadija ku 2008 too ne 2013 bidibu basambakaje. Kadi mbakumbaje amue malu mapiamapia. Tshiena-bualu tshionso tshidi ne nkonko idi ituambuluisha bua kuyukidilangana ne kupatula malongesha. Mbalengeje mukanda eu bikole, mbakumbaje bimfuanyi bikuabu, mbakaje bikavuaku ne mbabidiundishe. Mudi kabidi malu makuabu bu mudi dilondangana dia bidimu kumbukila ku Adama, ne karte. Mukanda wa Nuidikije ditabuja diabu mmuenza bua kutuambuluisha bua kulonga pa nkayetu, kulonga mu dîku ne mu tshisumbu. Mêku a bungi neasanke bua kubala pamue ne dîyi dikole miyuki idimu.
15 Mukanda eu ukuambuluishe bua kuidikija ditabuja dia batendeledi ba Yehowa ba kale bavua bamulamate. Ukuambuluishe kabidi bua kudiundisha ditabuja diebe paudi wenda usemena kudi Yehowa Tatu webe wa mu diulu.
