1, 2. a) Paulo ne bena diende mbatuilangane ne njiwu kayi mu Efeso? b) Ntshinyi tshituamona mu nshapita eu?

 MU NJILA ya mu Efeso mudi mitoyi, miadi, ne mikuma ya makasa a bantu ba bungi badi banyemakana. Tshisumbu tshia bantu ntshikunguile, ne tshituadije kunyangakaja bintu. Mbakuate babidi ba ku benzejanganyi ba mudimu ne Paulo benda babapulumuna. Mu bibeba bia bantu ba bungi bitu ne nzubu ya dipanyina bintu mudi muenda mushala munda mutupu ne lukasa padi tshisumbu tshia bantu atshi tshienda tshivula ne tshiya tshitangile mu tshipalu tshinene tshia manaya tshia mu Efeso tshia bantu 25 000 bakumbana. Bantu ba bungi kabena nansha bamanye tshidi tshikebeshe tshimvundu atshi to. Kadi bu mudibu bela meji ne: kudi bantu badi balue kuluisha ntempelo wabu ne Atemise nzambi mukaji udibu banange, badi batuadija kuela mbila bamba ne: “Atemise wa bena Efeso mmunene!”​—Bien. 19:34.

² Tudi tumona kabidi mudi Satana usaka tshisumbu tshia bantu bua kuimanyika dimuangalaja dia lumu luimpe lua Bukalenge bua Nzambi. Mbulelela ne: Satana katu anu ututshinyisha ne bienzedi bia tshikisu to. Mu nshapita eu, netumone mayele ndambu avuaye muenze nawu mudimu bua kunyanga buobumue bua bena Kristo ba mu bidimu lukama bia kumpala ne bua kuimanyika mudimu wabu. Tshia mushinga tshidi ne: netumone ne: mayele onso au avua mapangile, bualu “mu mushindu uvua uleja bukole, dîyi dia Yehowa diakatungunuka ne kuya kumpala ne kuikala ne bukole bua bungi.” (Bien. 19:20) Bua tshinyi bena Kristo abu bavua batshimune Satana? Mbua bualu bumue bumue budi buenza bua tumutshimune petu lelu. Mu kuamba kuimpe, Yehowa ke udi umutshimuna, ki ntuetu to. Nansha nanku, anu bu bena Kristo abu, tudi petu ne tshitudi ne bua kuenza. Yehowa yeye mututue tshianza, netupete ngikadilu idi mua kutuambuluisha bua kukumbaja mudimu wetu bimpe. Kadi tuanjayi kuakula bua Apolo.

3, 4. Mbualu kayi bua mushinga buvua Akila ne Pisikila bamone ne: Apolo kavua mumanye? Ntshinyi tshiakenzabu?

³ Pavua Paulo mu luendu luisatu lua bumisionere mutangile mu Efeso, muena Yuda mukuabu diende Apolo ukavuamu. Uvua wa mu tshimenga tshimanyike tshia Alesandelia mu Ejipitu. Apolo uvua ne imue ngikadilu ya pa buayi. Uvua muakudi wa dipoko “uvua mumanye Mifundu bikole.” Uvua kabidi “usaba ne nyuma.” Bu muvuaye ne tshisumi tshia bungi, uvua ulongesha bena Yuda mu nsunagoga ne dikima dionso.​—Bien. 18:24, 25.

⁴ Akila ne Pisikila bakumvua muvua Apolo wakula. Bakasanka pavuabu bamumvue “ulongesha malu a Yezu mu mushindu mujalame.” Malu a Yezu avuaye wamba avua malelela. Nansha nanku, Akila ne Pisikila bakajingulula diakamue bualu bua mushinga buvuaye kayi mumanye to. Uvua “mumanye anu dibatiza dia Yone.” Nansha muvua bena dibaka abu ne dimona dikese bua muvuabu benji ba ntenta, kabakatshina bua kumuambuluisha bua muvuaye mumanye kuakula ne bua tulasa tuvuaye mulonge to. “Bakaya nende, kumumvuijabu njila wa Nzambi mu mushindu mujalame menemene.” (Bien. 18:25, 26) Ntshinyi tshiakenza muakudi wa dipoko uvua kabidi mumanyi wa mukanda au? Wakaleja didipuekesha, umue wa ku ngikadilu idi bena Kristo ne bua kuikala nayi.

5, 6. Tshivua tshienze bua Yehowa akuate mudimu ne Apolo ntshinyi? Tshilejilu tshia Apolo tshidi tshitulongesha tshinyi?

⁵ Apolo wakalua muambi wa lumu luimpe wa dipoko bualu uvua muitabe diambuluisha dia Akila ne Pisikila. Wakaya ku Akaya, ‘kuambuluishaye bena kuitabuja bavuaku bikole.’ Wakafila kabidi bumanyishi buimpe kudi bena Yuda ba muaba au bavua bamba basumisha ne: Yezu kavua Masiya mulaya to. Luka udi wamba ne: “Uvua ujadikila bena Yuda bimpe menemene patoke ne bukole buonso muvuabu mu dipanga, ubaleja mu Mifundu ne: Yezu udi Kristo.” (Bien. 18:27, 28) Apolo wakambuluisha bisumbu be! Nunku tudi mua kuamba ne: mudimu wende wakenza pawu bua “dîyi dia Yehowa” ditungunuke ne kuikala ne bukole bua bungi. Tshilejilu tshia Apolo tshidi tshitulongesha tshinyi?

⁶ Didipuekesha nngikadilu udi bena Kristo bonso ne bua kuikala nende. Tuetu bonso tudi ne bipedi bia bungi, baledibue ne bimue ne bapetele bikuabu ku dimonamona dia malu anyi dimanya ditudi bapete. Kadi didipuekesha dietu didi ne bua kupita bipedi bietu. Tshianana, bipedi bitudi nabi bidi mua kutulelela lutatu. Bidi mua kutuvuija bena lutambishi. (1 Kol. 4:7; Yak. 4:6) Tuetu tudipuekesha ne muoyo mujima, netudienzeje bua kumona bakuabu batupite. (Filip. 2:3) Katuakufiikila  badi batupesha mibelu munda anyi kubenga bua batulongeshe to. Padibu batuleja ngumvuilu mupiamupia udi nyuma muimpe mufikishe bulongolodi buetu ku diumvua, katuakuimana kamungulu, tusumisha ne diambu dionso ne: tshietu tshitudi tuamba ke tshimpe to. Tuetu ne didipuekesha, Yehowa ne Muanende nebenze netu mudimu.​—Luka 1:51, 52.

7. Ntshilejilu kayi tshia didipuekesha tshidi Paulo ne Apolo batushile?

⁷ Didipuekesha didi dibengangana ne ditembangana. Ela meji a muvua Satana uzuka bua kubueja matapuluka munkatshi mua bena Kristo ba mu bidimu lukama bia kumpala! Fuanyikijabi muvuaye mua kusanka bu Apolo ne mupostolo Paulo, bana betu ba ngikadilu milenga abu, batuadije kutembangana, pamuapa yonso wa kudibu ujinga bua ikale wa kumpala mu bisumbu! Bivua bipepele bua bobu kuenza nanku. Tshilejilu, bamue bena Kristo ba mu Kolinto bakatuadija kuamba ne: “Meme ndi wa Paulo,” bakuabu ne: “Kadi meme ndi wa Apolo.” Paulo ne Apolo ke bavua babasake ku diamba nanku anyi? Tòo! Paulo wakadipuekesha kuitabaye ne: Apolo uvua pende muyishe mudimu kumpala, kumupeshaye ne midimu mikuabu. Apolo yeye wakalonda buludiki bua Paulo. (1 Kol. 1:10-12; 3:6, 9; Tito 3:12, 13) Mmutushile tshilejilu tshimpe tshia kueleshangana diboko ne didipuekesha dionso!

8. Nnjila kayi uvua Paulo mupinganyine mu Efeso? Bua tshinyi?

⁸ Paulo wakapingana ku Efeso anu bu mukavuaye mulaye. a (Bien. 18:20, 21) Kadi mona muvuaye mupinganaku. Musangu wa ndekelu utuvua bakule bua bualu buende, uvua mu Antiokia wa mu Sulia. Bua kufika ku Efeso, uvua mua kuangata njila wa tshikoso kuya ku Seleukia, kuangatshilaku mazuwa, kuya ku Efeso diakamue. Kadi wakapitshila “mu bitupa bia buloba bia munda mua ditunga.” Bilondeshile Bienzedi 18:23 ne 19:1, badi batshinka ne: Paulo uvua muenze kilometre mitue ku 1 600! Uvua muenze luendu lule nanku bua tshinyi? Bualu uvua ne dijinga dia ‘kukolesha bayidi.’ (Bien. 18:23) Nansha muvua luendu luende luisatu lumulomba bia bungi anu bu luibidi, uvua mumone ne: bivua ne mushinga bua kuluenza. Batangidi ba bijengu ne bakaji babu batu pabu ne lungenyi lua muomumue lelu. Katutuku tubanyisha bua mudi dinanga dibasaka bua kudisunsula anyi?

9. Bua tshinyi bivua bikengela bayidi ba Yone babatijibue kabidi? Tshilejilu tshiabu tshidi tshitulongesha tshinyi?

⁹ Pakafika Paulo mu Efeso, wakapeta kasumbu ka bayidi ba Yone  Mubatiji bafike ku 12. Bavua bangate batismo wa Yone ukavua katshiyi ne mushinga to. Bidi bimueneka kabidi ne: bavua ne dimanya dikese dia nyuma muimpe anyi kabavua bamumanye to. Paulo wakabalongesha mushinga udi nawu kubatijibua mu dîna dia Yezu, ne anu bu Apolo, bavua ne didipuekesha ne basue kulonga. Pakabatijibuabu mu dîna dia Yezu, bakapeta nyuma muimpe ne bimue bipedi bia nyuma. Bualu ebu budi buleja ne: kuenda tshiapamue ne bulongolodi bua Yehowa budi buenda buya kumpala kudi kupetesha mabenesha.​—Bien. 19:1-7.

10. Bua tshinyi Paulo uvua mumbuke mu nsunagoga, mutuadije kuenzela miyuki mu tshilongelu kampanda? Mmunyi mutudi mua kumuidikija?

¹⁰ Kudi tshilejilu tshikuabu. Paulo wakalongesha ne dikima mu nsunagoga ngondo isatu. Nansha muvuaye “weleshisha bantu meji bua kubitabijija bualu bua Bukalenge bua Nzambi,” bamue bakapapisha mioyo yabu, kutuadijabu kumuluisha. Paulo kakapitshisha dîba diende ne bavua “bakula bibi bua Njila” to, kadi wakalongolola malu bua kutuadijaye kuenza miyuki dituku dionso mu tshilongelu kampanda. (Bien. 19:8, 9) Bantu bavua basue kumanya malu a Yehowa bavua ne bua kumbuka mu nsunagoga, kuya mu tshilongelu atshi. Anu bu Paulo, tudi mua kulekela kuyisha bamue bantu patudi tujingulula ne: ki mbasue kututeleja anyi mbasue anu kukokangana netu. Kutshidi bantu bungi tshianana badi bu mikoko; badi ne dijinga dia kuteleja mukenji wetu udi ukankamijangana!

11, 12. a) Ntshilejilu kayi tshidi Paulo mutushile bua mushindu wa kuenza mudimu mukole ne kuya ne malu bilondeshile nsombelu? b) Mmunyi mudi Bantemu ba Yehowa badienzeje bua kuenza mudimu mukole ne kuya ne malu bilondeshile nsombelu wa bantu mu buambi?

¹¹ Pamuapa Paulo uvua wenza miyuki dituku dionso mu tshilongelu atshi  kutuadijila mu 11:00 too ne mu 16:00. Nansha muvuaku luya lua bungi mêba au, kuvua kabidi ditalala dia bungi bualu ke mêba avua bantu banji kulekela mudimu bua kudia ne kuikisha. Bikalabi ne: Paulo uvua mulamate programe mukole wa dienza miyuki au munkatshi mua bidimu bibidi bijima, uvua ne bua kuikala muenze mêba mapite pa 3 000 wenda ulongesha. b Muaba eu padi bualu bukuabu buvua buenze bua dîyi dia Yehowa ditungunuke ne kuya kumpala ne kuikala ne bukole bua bungi. Paulo uvua muenji wa mudimu mukole ne uvua mumanye mua kuya ne malu bilondeshile nsombelu. Wakashintulula mêba a kuyisha bua amone mua kupeta bantu bavuaye mua kuambuluisha. Ntshipeta kayi tshiakamueneka? Bible udi wamba ne: ‘Bantu bonso bavua basombela mu provense wa Asia bakumvua dîyi dia Mukalenge, bena Yuda pamue ne bena Greke.’ (Bien. 19:10) Wakafila bumanyishi buonso menemene!

¹² Bantemu ba Yehowa lelu mbenze malu adi maleje ne: mbenji ba mudimu mukole ne mbamanye mua kuya ne malu bilondeshile nsombelu. Tudi tudienzeja bua kupeta bantu dîba dionso ne muaba kayi wonso utudi mua kubapetela. Tudi tuyisha mu njila, mu bisalu, ne miaba ya kuangatshila mashinyi. Tudi tuyisha bantu ne mikanda itudi tubafundila ne ku telefone. Patutu tuyisha kabidi ku nzubu ne ku nzubu, tutu tudienzeja bua kukeba bantu mêba atudi mua kubasangana ku nzubu yabu.

13, 14. a) Yehowa wakapesha Paulo bukole bua kuenza tshinyi? b) Ntshilema kayi tshivua bana ba Sekua benze? Ntshilema kayi tshia muomumue tshidi bena mu bukua ntendelelu benza lelu?

¹³ Luka udi utuambila ne: mudimu wa Paulo wakapatula bipeta bimpe bia katshia, nangananga bualu Yehowa wakamuambuluisha, yeye kuenza “midimu ya bukole ya kukema.” Pavuabu bangata bilamba bia Paulo ne tulamba tuende tua mudimu tuvua tulenge mubidi wende ne baya nabi kudi babedi, mabedi abu avua ajika, too ne nyuma mibi ipatuka. c  (Bien. 19:11, 12) Ditshimuna makole a Satana nanku diakakoka ntema ya bantu ba bungi, kadi ki mbonso bavua basanke to.

¹⁴ Bible udi wamba ne: “Bamue bena Yuda bavua benza ngendu benda bipata bademon” bakakeba pabu bua kuenza bishima bia buena bia Paulo. Kuvua bavua batete bua kuipata bademon mu dîna dia Yezu ne dia Paulo. Luka udi utela bana ba balume 7 ba Sekua wa mu dîku dia bakuidi bakateta bua kuenza nanku. Kadi demon wakabandamuna ne: “Ndi mumanye Yezu, ndi mumanye kabidi Paulo bimpe; kadi nuenu nudi banganyi?” Ke muntu uvua ne demon au kudielaye kudibu bu nyama wa luonji, kubatulaye bilamba, bobu kuya lubilu butaka, batapike mputa. (Bien. 19:13-16) Adi divua ditshimuna dia dikema dia “dîyi dia Yehowa,” bualu dishilangana pankatshi pa bukole buvua nabu Paulo ne makole a tshianana avua nawu bena mu ntendelelu ya dishima abu divua dimueneke bimpe patoke. Lelu, bantu bungi tshianana badi badishima bela meji ne: kubila patupu dîna dia Yezu peshi kubikidibua ne: “bena Kristo” nkukumbane. Kadi Yezu mmuleje ne: anu bantu badi benza disua dia Tatuende mu bulelela ke bapeta matuku atshilualua malenga.​—Mat. 7:21-23.

15. Ntshinyi tshitudi ne bua kuenza ne malu a mîdima ne bintu biawu bionso bua kuidikija bena ku Efeso?

¹⁵ Difuishibua bundu dia bana ba Sekua diakafikisha bantu ba bungi ku ditshina Nzambi, ku dilekela malu a mîdima, ne kulua bena kuitabuja. Malu a mîdima avua mele miji mu Efeso. Bijimba ne bintu bia majimbu bivua miaba yonso, ne misangu ya bungi bivua mu mêyi mafunda. Bena ku Efeso ba bungi bakadimona basakibue bua kulua ne mikanda yabu ya malu a mîdima ne kuyosha ku mêsu kua bantu, nansha muvuayi ya binunu ne binunu bia ndola lelu eu. d Luka udi wamba ne: “Nunku mu mushindu uvua uleja bukole, dîyi dia Yehowa diakatungunuka ne kuya kumpala ne kuikala ne bukole bua bungi.” (Bien. 19:17-20) Eyowa, bulelela buakatshimuna dishima ne malu a bademon! Bantu ba lulamatu abu mbatushile tshilejilu tshimpe lelu. Tudi petu banyunguluka kudi bantu badi badîne ne kasuki mu malu a mîdima. Tuetu ne tshintu tshidi mu diumvuangana ne bademon, tutshiumbushe ne lukasa anu bu bena ku Efeso abu. Tuimanshe tshintu tshionso tshia muengu nansha tshiotshi tshia makuta bungi kayi.

16, 17. a) Umvuija muvua Demetelio mujudije tshimvundu mu Efeso. b) Mmunyi muvua bena mu Efeso badileje bena bitabataba?

¹⁶ Tuafiki mpindieu pa diyele dia Satana divua Luka muakuile pakafundaye ne: “Bimvundu bikole biakajuka bua Njila.” Kavua unekesha to. e (Bien. 19:23) Nsenda mukuabu wa biamu bia arjan, diende Demetelio, wakajudija bimvundu. Wakanji kukoka ntema ya bansenda nende bakuabu, ubavuluija ne: bubanji buabu buvua bufumina ku dipanyisha dia mpingu. Kubambilaye ne: malu avua Paulo uyisha avua ne bua kubajimijila makuta, bualu bena Kristo kabavua batendelela mpingu to. Pashishe yeye kusaka bena mu Efeso ku lutambishi lua bu muena muabu, ubasopuesha ne: bantu bavua bafuane kulua kuangata nzambi wabu mukaji Atemise ne ntempelo wende uvua mumanyike pa buloba bujima “bu tshintu tshia tshianana.”​—Bien. 19:24-27.

¹⁷ Mêyi a Demetelio akakumbaja tshivuaye ujinga. Bansenda bakatuadija kuamba ne: “Atemise wa bena Efeso mmunene!” Tshimenga tshijima kubuela mu kayumbayumba, kufikishabi ku malu avua musumba wa bantu utuvua bakuile ku ntuadijilu kua nshapita eu muenze. f Bu muvua Paulo kayi uteka majinga ende kumpala, wakajinga kuya mu tshipalu tshia manaya atshi bua kuakula ne musumba wa bantu abu, kadi bayidi bavuaye nabu bakasumisha bua kaditeki mu njiwu to. Muntu mukuabu diende Alesandelo wakimana kumpala kua bantu abu ujinga kuakula. Bu muvuaye muena Yuda, pamuapa uvua musue kubaleja dishilangana divua pankatshi pa bena Yuda ne bena Kristo. Kadi kuenza nanku kakuvua kubambila bualu to. Pakamanyabu ne: uvua muena Yuda, bakamupangisha bua kuakula, bobu kuela mbila munkatshi mua mêba matue ku abidi ne: “Atemise wa bena Efeso mmunene!” Katshia anu kuine aku, bitabataba bia bena mu ntendelelu ki mbishintuluke to. Bitshidi bibasaka ku dienza malu kabayi ne meji to.​—Bien. 19:28-34.

18, 19. a) Mmunyi muvua munene wa mbulamatadi wa mu Efeso mutukijije bantu? b) Mmunyi mudi banene ba mbulamatadi bakube Bantemu ba Yehowa? Ntshinyi tshitudi mua kuenza bua bikale batukuba nanku?

¹⁸ Ndekelu wa bionso, bantu bavua ne dîyi bakateleja musumba wa  bantu au. Munene wa mbulamatadi mukuabu wa meji mimpe wakajadikila musumba au ne: bena Kristo abu kabavua baluisha ntempelo wabu ne nzambi wabu mukaji to, kubambilaye ne: Paulo ne bavuaye nabu kabavua benzele ntempelo wa Atemise bibi to, kubavuluijaye kabidi mushindu muimpe wa kujikija bilumbu bia nanku. Pamuapa bualu buakabakoka ntema buvuaye mubambile buvua ne: tshienzedi tshiabu tshibi tshia kunguila mushindu au tshivua tshishipa mikenji ya Kaisa ne bavua bafuane kupeta bibawu. Yeye mumane kubambila malu aa, wakabapingaja ku mabu. Anu muvua tshimvundu atshi tshijuke ne lukasa, ke muakajikatshi kabidi ne lukasa pavuabu bateleje mêyi masunguluke a meji au.​—Bien. 19:35-41.

¹⁹ Kabivua musangu wa kumpala wa munene wa mbulamatadi uvua utukija ne uditeka pa muaba wa bakuabu muenze tshienzedi bua kukuba bayidi ba Yezu to, ne kabivua musangu wa ndekelu to. Mu bulelela, mupostolo Yone ukavua mumone mu tshikena kumona ne: mu matuku a ku nshikidilu aa, bitupa bishindame bia malongolodi a bana ba bantu, bidi bu buloba bua mu tshimfuanyi, bivua ne bua kumina dikengeshibua dia bayidi ba Yezu didi dienze anu bu musulu udi upatuka mukana mua Satana. (Buak. 12:15, 16) Ke tshidi tshienzeke. Kudi misangu ya bungi idi bena mbulamatadi ba meji mimpe bakube manême a Bantemu ba Yehowa a kutendelela ne kuambila bakuabu lumu luimpe. Nansha nanku, bikadilu bietu bimpe ke bitu pabi bienza bua bikale batukuba. Bikadilu bilenga bia Paulo biakenza bua banene ba mbulamatadi ba mu Efeso bamunemeke, nunku kabavua basue bua bualu bubi bumuenzekele to. (Bien. 19:31) Bikadilu bietu bilenga bienzaku bua bantu batudi tutuilangana nabu bikale netu bimpe. Katuena bamanye bipeta biamueneka to.

20. Ntshinyi tshiudi umvua bua muvua dîyi dia Yehowa diye kumpala ne dikale ne bukole bua bungi mu matuku a bapostolo ne lelu? b) Udi mudisuike bua kuenza tshinyi bua mudi Yehowa ututshimuina bilumbu matuku etu aa?

²⁰ Kabienaku bisankisha bua kumona muvua ‘dîyi dia Yehowa ditungunuke ne kuya kumpala ne kuikala ne bukole bua bungi’ mu matuku a bapostolo anyi? Bidi kabidi bituenza disanka bua kumona mudi Yehowa ututshimuina bilumbu lelu. Udiku pebe musue kuenza tshiebe tshitupa, nansha tshiotshi tshikese, bua ditshimuna edi dienzeke anyi? Biobi nanku, bilejilu bitudi bakonkonone ebi bikulongeshe. Ikala anu ne didipuekesha wenda pamue ne bulongolodi bua Yehowa budi buenda buya kumpala. Ikala udienzeja bikole, benga malu a mîdima, ne ikala ufila bumanyishi buimpe ku bienzedi biebe bia bululame ne bia bunême.