1-4. Paulo udi uya ku Yelushalema bua tshinyi? Ntshinyi tshiamufikilaku?

 MBITONDE bantu bonso bua mudi Paulo ne Luka bumbuka ku Mileto. Mbikolele Paulo ne Luka bua kushiyangana ne bakulu ba mu Efeso bualu bavua babanange bikole! Bubidi buabu mbimane mu mazuwa. Mu bibuta biabu mudi bionso bidi bikengedibua bua luendu. Mudi kabidi mapa a kupesha bena Kristo ba mu Yudaya bavua bakengela bintu ne mbasue kuafikisha kudibu.

² Kapepe kadi katuta, kuwula mu bilamba bia mazuwa, mazuwa asa luendu. Paulo ne Luka, pamue ne benzejanganyi nabu ba mudimu bakuabu 7 badi batangila bana babu badi bashale babungame ku dilobo. (Bien. 20:4, 14, 15) Bana betu abu bakashala babakupa bianza bua kubalaya too ne pakabajimina mazuwa mu mêsu.

³ Paulo mmuenze mudimu bidimu bitue ku bisatu ne bakulu ba mu Efeso. Kadi nyuma muimpe udi umulombola mpindieu bua aye ku Yelushalema. Udi ne dimanya ndambu dia tshidi ne bua kumufikilaku. Ukavua muambile bakulu abu ne: “Ndi nya ku Yelushalema musuika kudi nyuma, nansha mundi tshiyi mumanye malu angenzekelaku, kadi ndi mumanye anu ne: nyuma muimpe udi utungunuka ne kunjadikila mu tshimenga ne mu tshimenga wamba ne: buloko ne makenga mbingindile.” (Bien. 20:22, 23) Nansha muvuaku njiwu, Paulo uvua mudimone “musuika kudi nyuma,” tuambe ne: uvua muenzejibue ne mudiakaje bua kulonda buludiki bua nyuma muimpe bua kuya ku Yelushalema. Nansha mudiye musue kuikala ne muoyo, kuenza disua dia Nzambi ke kudi ne mushinga wa bungi kudiye.

⁴ Ke muudi wenza pebe anyi? Patuvua badilambule kudi Yehowa, tuvua bamulaye ne muoyo mujima ne: kuenza disua diende ke kutuateka pa muaba wa kumpala. Nanku, kukonkonona tshilejilu tshia Paulo nekutuambuluishe.

5. Paulo ne bavuaye nabu mu luendu bakapitshila penyi bua kufika ku Tulo?

⁵ Mazuwa avua Paulo ne benzejanganyi nende ba mudimu babuele  ‘akaya buludiludi.’ Tuambe ne: matangile anu kumpala ne lupepele luvua luatutshila panyima, bobu kufika ku Kosa butuku dituku dimue dimue adi. (Bien. 21:1) Bidi bimueneka ne: mazuwa akalala ku Kosa aku butuku bujima, pashishe kuyawu ku Lodo ne ku Patala. Mu Patala, lua ku sud kua Asia mukese, ke muvua Paulo ne bavuaye nabu bangatshile mazuwa avua ambula mabuki, baye buludiludi ku Tulo, ku Foinike. Bakapita ‘tshidiila tshia Kupulio, kutshishiyabu ku dia bakaji’ dia dilobo. (Bien. 21:3) Bua tshinyi Luka, mufundi wa mukanda wa Bienzedi, uvua muambe ne: bavua bapite Kupulio?

6. a) Bua tshinyi kutangila Kupulio kuvua ne bua kuikala kukankamije Paulo? b) Wewe welangana meji a mudi Yehowa mukubeneshe ne mukuambuluishe, ntshinyi tshiwamba?

⁶ Paulo uvua mua kuikala mubaleje tshidiila atshi ne mubambile tshivua tshimufikilamu. Pavuaye mu luendu lua kumpala lua bumisionere bidimu bu 9 kumpala, yeye ne Bânaba ne Yone Mâko bakapetanganamu  ne muena mupongo mukuabu, diende Eluma, uvua muluishe mudimu wabu. (Bien. 13:4-12) Kutangila tshidiila atshi ne kuvuluka malu avua mabenzekelamu kuvua ne bua kuikala kukankamije Paulo ne kumukoleshe bua malu avua mamuindile ku Yelushalema. Ke tshidibi mua kutuenzela petu tuetu tuelangana meji a mudi Nzambi mutubeneshe ne mutuambuluishe bua kunanukila mu ntatu. Dîba adi, netuambe anu bu Davidi ne: “Ntatu ya muntu muakane nya bungi, kadi Yehowa udi umusungila kudiyi yonso.”​—Mis. 34:19.

7. Ntshinyi tshiakenza Paulo ne bavuaye nabu diakamue pakafikabu ku Tulo?

⁷ Paulo uvua wangata bena Kristo nende ne mushinga wa bungi ne uvua musue kusomba nabu. Diakamue pakafikabu mu Tulo, Luka wakafunda ne: “Tuakakeba bayidi, tuetu kubapeta.” (Bien. 21:4) Bu muvua Paulo ne bavuaye nabu bamanye ne: kuvua bena kuitabuja nabu mu Tulo, bakabakeba ne pamuapa kusombabu nabu. Dimue dibenesha dia kuikala batendeledi ba Yehowa didi ne: nansha tuetu mua kuya muaba kayi, netupete bena Kristo netu batuakidila kuabu. Bantu badi banange Nzambi ne bikale mu ntendelelu mulelela badi ne balunda pa buloba bujima.

8. Mêyi adi mu Bienzedi 21:4 adi umvuija tshinyi?

⁸ Luka udi umvuija bualu budi buanji kumueneka bu budi bupitshila mutu pavuaye umvuija malu avua menzeke mu matuku 7 avuabu bapitshishe mu Tulo. Udi wamba ne: “Ku butuangaji bua nyuma [bana betu ba mu Tulo] bavua bambile Paulo misangu ne misangu bua kadiatshi mu Yelushalema to.” (Bien. 21:4) Yehowa ukavua ujinga bua Paulo aye muaba mukuabu anyi? Uvua umulombola bua kayi kabidi ku Yelushalema anyi? Tòo. Nyuma ukavua muleje Paulo ne: bavua ne bua kumukengesha ku Yelushalema, kavua mumuambile bua kayiku to. Bidi bimueneka ne: bana betu ba mu Tulo bavua bajinguluilamu ku butuangaji bua nyuma ne: Paulo uvua ne bua kukenga ku Yelushalema. Ke bualu kayi, bu muvuabu bamunange, bakamusengelela bua kayiku to. Bivua biumvuika bua muvuabu ne dijinga dia kumukuba ku njiwu ivua mimuindilaku. Nansha nanku, bu muvuaye mudisuike bua kuenza disua dia Nzambi, wakaya ku Yelushalema.​—Bien. 21:12.

9, 10. a) Pakateleja Paulo mêyi avua bana betu ba mu Tulo bamuambile, uvua mua kuikala muvuluke bualu kayi bua muomumue? b) Ntshinyi tshidi bantu ba bungi lelu basue kuenza? Mmunyi muditshi tshibengangana ne mêyi a Yezu?

⁹ Pakateleja Paulo mêyi avua bana betu abu bamuambila, pamuapa wakavuluka bualu bua muomumue buvuabu bambile Yezu pavuaye mumvuije bayidi bende ne: uvua ne bua kuya ku Yelushalema,  kukengeshibua bikole, ne kushipibua. Meji a buntu akasaka Petelo bua kuambila Yezu ne: “Mukalenge, diumvuilaku luse; bualu ebu kabuakukufikila nansha kakese.” Kadi Yezu wakamuambila ne: “Pita panyima panyi, Satana! Wewe udi tshilenduishi kundi, bualu meji audi wela ki mmeji a Nzambi to, kadi nga bantu.” (Mat. 16:21-23) Yezu uvua mudisuike bua kuya ne malu muvua Yehowa musue. Ke tshivua Paulo pende musue kuenza. Kakuyi mpata, bana betu ba mu Tulo bavua ne meji mimpe anu bu Petelo; tshidibi, kabavua bajingulule tshivua disua dia Nzambi to.

¹⁰ Bantu ba bungi lelu batu basue kuenza tshidi tshipepele, nansha tshiotshi katshiyi tshimpe menemene to. Bantu mu kabujima mbasue kuikala mu tshitendelelu mudibu badiumvua bimpe ne benza malu mudibu basue. Au ki mmeji avua Yezu muambe bua tuikale nawu to. Wakambila bayidi bende ne: “Biasua muntu kundonda, adibenge, ambule mutshi wende wa makenga ne atungunuke ne kundonda.” (Mat. 16:24) Kulonda Yezu mbualu buimpe bua meji, kadi ki nkupepele to.

11. Ntshinyi tshidi tshileja ne: bayidi ba ku Tulo bavua banange Paulo ne bamutua mpanda mu mudimu wende?

¹¹ Dîba diakakumbana bua Paulo ne Luka ne bavuabu nabu kuasa luendu. Mushindu wakumbukabu udi ulenga ku muoyo. Udi uleja muvua bana betu ba mu Tulo banange Paulo bikole ne bamutua mpanda mu mudimu wende. Balume, bakaji, ne bana bakaya kubafila muaba wa kuangatshila mazuwa. Buonso buabu bakatua binu panshi, bobu kusambila, ne kulayangana. Pashishe Paulo ne Luka ne bavuabu nabu bakabanda mu mazuwa kuyabu ku Tolemai, kuakapetanganabu ne bana betu ne kusombabu nabu dituku dimue.​—Bien. 21:5-7.

12, 13. Leja muvua Filipo muenze mudimu wa bungi ne lulamatu luonso. b) Ntshilejilu kayi tshimpe tshidi Filipo mushile batatu bena Kristo lelu?

¹² Pashishe Luka udi uleja ne: Paulo ne bavuaye nabu mu luendu bakaya ku Kaisalia. Bobu “kubuela mu nzubu mua muambi  Filipo.” a (Bien. 21:8) Kumonangana ne Filipo kuvua ne bua kuikala kubakoleshe. Bidimu bu 20 kumpala, bapostolo bakamuteka mu Yelushalema bua kutangila diabanya dia biakudia mu tshisumbu tshia bena Kristo tshitshivuabu benzelaku. Filipo uvua muenze mudimu wa diyisha ne tshisumi munkatshi mua bidimu bia bungi. Vuluka ne: pavua bayidi batangalake bua dikengeshibua, Filipo wakaya ku Samalea, kutuadijaye kuyishaku. Wakalua kuyisha muntu mutungu muena Etshiopi ne kumubatizaye. (Bien. 6:2-6; 8:4-13, 26-38) Uvua muenze mudimu wa bungi ne lulamatu luonso!

¹³ Tshisumi tshia Filipo katshivua tshijike to. Bu mukavuaye mpindieu mu Kaisalia, uvua anu muditue mu diyisha, bualu Luka udi umubikila ne: “muambi.” Bu mudi Bible wamba ne: uvua ne bana ba bakaji banayi bavua bamba mêyi a buprofete, bidi bileja ne: bavua balonda dikasa diende. b (Bien. 21:9) Filipo uvua ne bua kuikala muenze mudimu mukole bua bena mu dîku diende bikale mu malanda makole ne Yehowa. Batatu bena Kristo badi benza bimpe lelu padibu bamuidikija, bikale bantunga mulongo mu mudimu wa buambi ne bambuluisha bana babu bua banange mudimu eu.

14. Ntshinyi tshivua disomba dia Paulo ne bena Kristo nende dibenzele bobu bonso? Mmpunga kayi utudi petu nende lelu?

¹⁴ Paulo wakakeba bena Kristo ba muaba ne muaba, kubapetaye, yeye kusomba nabu. Bena Kristo abu bavua bushuwa bakidile misionere au ne benzejanganyi nende ba mudimu bimpe. Kakuyi mpata, disomba nabu adi diakenza bua ‘bakankamijangane’ bonso. (Lomo 1:11, 12)  Tudi petu ne mpunga ya kuenza nanku lelu. Wewe wakidila mutangidi wa tshijengu ne mukajende kuebe, nansha wewe ne nzubu wa mushindu kayi, neupete mabenesha a bungi.​—Lomo 12:13.

15, 16. Agabo wakalua ne mukenji kayi? Ntshinyi tshiakenza bonso bavua bawuteleje?

¹⁵ Patshivua Paulo kua Filipo, muntu mukuabu wa kunemeka, diende Agabo, wakalua. Bantu bavua kua Filipo bavua bamanye ne: Agabo uvua muprofete; uvua mumanyishe tshiyole tshikole tshia nzala mu bukokeshi bua Kulaudio. (Bien. 11:27, 28) Bavua pamuapa badiebeje ne: ‘Agabo mmulue bua tshinyi? Udi ne mukenji kayi?’ Pavuabu bashale bamutangile, wakangata mukaba mule wa Paulo wa mu tshimono uvua muenze bu wa tshilamba, kuvuaye usuikila makuta ne bintu bikuabu. Agabo wakadisuikawu ku makasa ne ku bianza. Pashishe kufilaye mukenji uvua kawuyi wa bilele eu: “Nyuma muimpe udi wamba nunku: ‘Bena Yuda nebasuike muena mukaba eu mushindu eu ku Yelushalema, ne nebamufile mu bianza bia bantu ba bisamba bikuabu.’”​—Bien. 21:11.

¹⁶ Mêyi a buprofete au akajadika ne: Paulo uvua ne bua kuya ku Yelushalema. Avua aleja kabidi ne: bu mukavua Paulo mumanyangane ne bena Yuda, bivua mua kuenza bua bamufile mu “bianza bia bantu ba bisamba bikuabu.” Mona mudi Luka umvuija tshiakenza bonso bavua bateleje mêyi a buprofete au: “Mpindieu patuakumvua bualu ebu, tuetu ne bantu bavua muaba au, tuakatuadija kumusengelela bua kabandi ku Yelushalema to. Kadi Paulo wakandamuna ne: ‘Bua tshinyi nudi nudila ne nujinga kutekesha dipangadika dianyi? Numanye bimpe ne: ndi mudiakaje ki nganu bua kusuikibua to, kadi kabidi bua kufua ku Yelushalema bua dîna dia Mukalenge Yezu.’”​—Bien. 21:12, 13.

17, 18. Mmunyi muvua Paulo muleje ne: uvua mudisuike bua kuenza disua dia Nzambi? Ntshinyi tshienza bana betu?

¹⁷ Anji umvua pebe, bana betu bonso, too ne Luka muine, badi basengelela Paulo bua kayi ku Yelushalema to. Kudi badi benda badila. Padi Paulo umvua mêyi adibu bamuambila aa, udi ubandamuna ne dîyi dimpe ne: badi ‘bajinga kutekesha dipangadika diende,’ peshi anu mudi bamue bakudimunyi ba tshiena Greke bambe, badi ‘bamutekesha ku muoyo.’ Nansha nanku, Paulo udi anu mudisuike bua kuya; ne anu muvuaye muenze ne bana betu ku Tulo, kena ulekela misengelelu yabu anyi miadi yabu imutekesha to. Kadi udi ubumvuija bua tshinyi udi ne bua kuyaku. Mmuleje muvuaye ne dikima ne muikale mudisuike! Anu bu Yezu, Paulo uvua pende mudisuike bua kuya ku  Yelushalema. (Eb. 12:2) Paulo kavua ukeba bua bamushipe bua ditabuja diende to, kadi nansha biobi bikengela ne: afue, uvua umona kushipibua bua Kristo Yezu bu diakalenga dinene.

¹⁸ Ntshinyi tshiakenza bana betu? Bakanemeka dipangadika diende. Bible udi wamba ne: “Bu muvuaye mubenge tshituvua tumuambila, tuakalekela kukokangana nende, tuetu kuamba ne: ‘Disua dia Yehowa dienzeke.’” (Bien. 21:14) Kabakateta kabidi bua kukanda Paulo bua kayi ku Yelushalema to. Bakamuteleja ne kuitababu tshivuaye wamba. Bakajingulula tshivua disua dia Yehowa ne kuditababu nansha muvuabi bibatonde. Paulo ukavua mubuele mu njila uvua ne bua kulua kumufikisha ku lufu. Bivua mua kuikala bipepele bua Paulo kutantamena nsombelu au bu bena diende kabayi bamuambile mêyi au to.

19. Tshivua tshifikile Paulo tshidi tshitulongesha bualu kayi buimpe?

¹⁹ Bualu buvua bufikile Paulo ebu budi butupetesha dilongesha dimpe dia ne: katuena ne bua kutekesha bakuabu bua kababuedi mu mudimu wa Nzambi udi ubalomba didipangisha amue malu to. Tudi mua kutumikila dilongesha edi mu nsombelu mikuabu, kabiyi  anu idi itangila muoyo anyi lufu to. Tshilejilu, nansha mutubi bitonda baledi bena Kristo ba bungi padi bana babu bumbuka kumbelu baya kuenzela Yehowa mudimu kule nabu, mbadisuike bua kubenga kubatekesha mu mikolo. Phyllis, muanetu wa bakaji wa mu Angleterre, udi uvuluka muvuaye mumvue pavua muanende umuepele wa bakaji muye kuenza mudimu wa bumisionere mu Afrike, wamba ne: “Mvua anu ndila. Bivua binkolela bua kuitaba ne: tuvua mua kushiyangana nende yeye kuya kule nanku. Mvua ngumvua kanyinganyinga ne disanka musangu umue. Ngakasambila bikole. Yeye ke uvua muangate dipangadika adi, tshivua mua kumusaka bua adishintulule to. Mu kuamba kuimpe, mvua anu mmulongesha bua kuteka malu a Bukalenge pa muaba wa kumpala! Ukadi muenzele Yehowa mudimu ku babende bidimu 30, ne ntu ngela Yehowa tuasakidila dituku dionso bua lulamatu luende.” Eyowa, kukankamija bena Kristo netu badi badipangisha amue malu nkuimpe be!

20, 21. Ntshinyi tshidi tshileja ne: Paulo uvua musue kusomba ne bena Kristo nende? Uvua musue kusomba nabu bua tshinyi?

²⁰ Pakakumbana dîba, Paulo wakasa luendu, bamushindikija kudi bana betu bavua baleje ne: bavua bamutua mpanda mu mudimu wende ne muoyo mujima. Mu luendu luabu lujima too ne ku Yelushalema, Paulo ne bavua bamufila bavua anu bakeba kuikala pamue ne bena Kristo nabu bakuabu. Pavuabu mu Tulo, bakapeta bayidi, kusombabu nabu lumingu lujima. Bakela bana babu ba mu Tolemai mioyo, bobu kusomba nabu dituku dijima. Mu Kaisalia, bakasombela kua Filipo matuku ndambu. Bamue bayidi ba mu Kaisalia bakabafila too ne ku Yelushalema, kuakayabu kutudila kua Nasona, muyidi wa ku ntuadijilu. Ndekelu wa bionso, diakamue pakafikabu ku Yelushalema, Luka udi wamba ne: “Bana betu bakatuakidila ne disanka.”​—Bien. 21:17.

²¹ Mbimueneke patoke ne: Paulo uvua musue kusomba ne bena Kristo nende. Bavua bamukankamija anu bu mudi bana betu batukankamija lelu. Kakuyi mpata, dikankamija adi diakakolesha Paulo bua akungamangane ne baluishi bende ba tshiji bavua basua kumushipa abu.