1-3. a) Mmalu kayi avua menzeke butuku buakafua Eutuko? b) Ntshinyi tshiakenza Paulo? Tshienzedi tshia Paulo tshidi tshituleja ne: uvua muntu wa mushindu kayi?

 PAULO udi ne bena Kristo nende bapite bungi mu nzubu wa kuulu ku Toa. Udi ubambila malu a bungi bualu udi nabu bua musangu wa ndekelu. Tukadi mundankulu. Bu mudi miendu ndambu mitemesha mu nzubu amu, idi ivudija kabidi luya lukavuamu ne pamuapa muenza ndambu wa kamuishi. Nsongalume mukuabu, diende Eutuko, uvua musombe pa dididishi. Wakalala tulu tukole pavua Paulo wenda wakula, kukulukaye ku dididishi dia tshisasa tshisatu tshia nzubu kuvuaye aku.

² Pamuapa bu muvua Luka munganga, uvua mu bantu ba kumpala bakapueka lubilu bua kutangila nsongalume au. Bobu kufika pavuaye, “kumuambulabu mufue.” (Bien. 20:9) Kadi Paulo wakenza tshishima. Wakadiela pambidi pende, kuambilaye bantu ne: “Lekelayi mutoyi, bualu udi ne muoyo.” Paulo wakabisha Eutuko ku lufu!​—Bien. 20:10.

³ Bualu ebu budi buleja bukole budi nabu nyuma muimpe wa Nzambi. Kakuvua muntu uvua mua kuela Paulo tshilumbu pambidi bua lufu lua Eutuko to. Nansha nanku, kavua musue bua lufu luende lunyange tshikondo tshia mushinga atshi anyi lulenduishe muntu nansha umue to. Pavua Paulo mubishe Eutuko ku lufu, wakasamba bena mu tshisumbu atshi, kubakoleshaye kabidi bua batungunuke ne mudimu wabu. Mbimueneke patoke ne: Paulo uvua unemeka muoyo wa bakuabu. Uvua mene muambe ne: “Tshiena ne dibanza dia mashi a muntu nansha umue.” (Bien. 20:26) Tumonayi mudi tshilejilu tshiende mua kutuambuluisha.

4. Mbuluishi kayi buvua Paulo mutuilangane nabu?

⁴ Anu mudi nshapita mushale muleje, Paulo uvua mutuilangane ne  buluishi bua bungi. Mudimu wende mu Efeso uvua mukebeshe tshimvundu tshikole. Bansenda bavua badiila ku ntendelelu wa Atemise bavua pabu mu bena tshimvundu abu. Bienzedi 20:1 udi wamba ne: “Pavua tshimvundu tshijike, Paulo wakabikidisha bayidi; yeye mumane kubakankamija ne mulayangane nabu, wakatuadija luendu mutangile ku Makedonia.”

5, 6. a) Paulo uvua mua kuikala muenze matuku bungi kayi mu Makedonia? Ntshinyi tshivuaye muenzele bana betu bavuamu? b) Mmunyi muvua Paulo umona bena Kristo nende?

⁵ Pavua Paulo mu luendu mutangile ku Makedonia apu, wakanji kuimana ku dilobo mu Toa, yeye kupitshishaku ndambu wa matuku. Paulo uvua mutekemene ne: Tito, uvuabu batume ku Kolinto, uvua ne bua kumupetela mu Toa amu. (2 Kol. 2:12, 13) Kadi pakamuenekabi ne: Tito kavua ulua, Paulo wakaya ku Makedonia, pamuapa yeye kuenzaku tshidimu tshijima anyi kupita apu wenda ‘ukankamija bantu bavuamu ne mêyi a bungi.’ a (Bien. 20:2) Tito wakalua kupeta Paulo mu Makedonia, kumuambilaye lumu luimpe lua muvua bena mu tshisumbu tshia ku Kolinto bakidile mukanda wa kumpala uvuaye mubatumine bimpe. (2 Kol. 7:5-7) Bualu abu buakasaka Paulo ku dibafundila mukanda muibidi, utudi tubikila lelu ne 2 Kolinto.

⁶ Mona ne: Luka mmufunde muaku “mukankamije” ne “ukankamija” bua kuleja tshivua bana betu ba mu Efeso ne mu Makedonia bumvue pavuaye muye kubatangila. Miaku ayi idi ileja ne: Paulo uvua nabu bimpe! Kavua bu Bafalese bavua bapetula bakuabu to, uvua yeye umona mikoko ya Nzambi bu benzejanganyi nende ba mudimu. (Yone 7:47-49; 1 Kol. 3:9) Paulo uvua anu ubamona nanku too ne pavuaye ubapesha mibelu mikole.​—2 Kol. 2:4.

7. Mmunyi mudi batangidi bena Kristo bidikija Paulo lelu?

⁷ Bakulu ne batangidi ba bijengu badi badienzeja bua kuidikija Paulo lelu. Nansha padibu bafila mibelu mikole, badi bayifila ne tshipatshila tshia kukolesha badi dijinga ne diambuluisha. Kabena ne meji a kubipisha bakuabu to, kadi badi bakeba kubakankamija. Mutangidi wa tshijengu mukuabu ukadi mumonemone malu udi wamba ne: “Ba bungi ba kutudi badi ne dijinga dia kuenza malu mimpe, kadi bidi bitamba kubatonda ne bibenza buôwa padibu bela meji ne: bobu nkayabu kabena ne bukole bua kudiambuluisha to.” Bena Kristo netu badi ne lutatu elu badi mua kupetela bukole kudi batangidi.​—Eb. 12:12, 13.

8, 9. a) Tshiakapangisha Paulo bua kuya ku Sulia ntshinyi? b) Bena Yuda bavua mua kuikala bakine Paulo bua tshinyi?

⁸ Paulo wakumbuka ku Makedonia, kuyaye ku Kolinto. b Yeye mumane kuenzaku ngondo isatu, uvua musue kuya ku Kanekelea kuvuaye mupangadije bua kuangatshila mazuwa a ku Sulia. Kumbukila ku Sulia aku, uvua mua kuya ku Yelushalema bipepele ne kufila mapa kudi bana betu bavua bakengela bintu. c (Bien. 24:17; Lomo 15:25, 26) Kadi kuakenzeka bualu buakashintulula luendu luende. Bienzedi 20:3 udi wamba ne: ‘Bena Yuda bakamuelela tshifufu’!

⁹ Kabiena bikemesha bua muvua bena Yuda bakine Paulo to, bualu bavua bamumona bu mutontolodi. Kumpala, mudimu wende uvua mufikishe Kulisipo, muntu muende lumu wa mu nsunagoga wa mu Kolinto, ku dilua muena Kristo. (Bien. 18:7, 8; 1 Kol. 1:14) Musangu mukuabu,  bena Yuda bakaya kufunda Paulo kudi Galio uvua nguvena mu Akaya. Kadi bu muvua Galio mubipate bua muvua bualu buvuabu babanda nabu Paulo kabuyi ne mutu, buonso buabu bakafiika munda. (Bien. 18:12-17) Pamuapa bena Yuda bavua ku Kolinto bavua bamanye ne: Paulo ukavua pa kuangata mazuwa bua kuya ku Kanekelea uvua pabuipi, ke bobu kulongolola bua kumualamina mu njila. Tshiakenza Paulo ntshinyi?

10. Paulo uvua muena buôwa pavuaye mubenge kuya ku Kanekelea anyi? Umvuija.

¹⁰ Bu muvua Paulo ujinga kudikuba yeye ne mapa a bende avuaye nawu, wakabenga bua kuya ku Kanekelea, yeye kupingana ku Makedonia. Bushuwa, ngendu ya mu njila ivua ne yayi njiwu. Bankoviongo bavua baalaminangana mu njila ku kale. Nansha nzubu ya tshilala benyi ivua ne njiwu. Nansha nanku, Paulo wakasungula bua kutuilangana ne njiwu ya mu njila pamutu pa ivua mimuindile ku Kanekelea. Diakalenga, kavua nkayende mu luendu alu to. Mu bantu bavuaye nabu mu tshitupa tshia luendu lua bumisionere etshi muvua Alistâko, Gayo, Sekundo, Sopato, Timote, Tukiko, ne Tofimo.​—Bien. 20:3, 4.

11. Mmunyi mudi bena Kristo ba lelu benza ne muabu muonso bua kudikuba? Ntshilejilu kayi tshidi Yezu mutushile mu bualu ebu?

¹¹ Anu bu Paulo, bena Kristo lelu badi benza ne muabu muonso bua kudikuba padibu mu buambi. Kudi imue miaba idibu baya mu tshisumbu, anyi ku babidi ku babidi, kadi kabayi baya muntu nkayende to. Kadi badiku badikuba ku dikengeshibua anyi? Mbamanye ne: kabena mua kudiepuka to. (Yone 15:20; 2 Tim. 3:12) Nansha nanku, kabena badikeba to. Tuakule bua Yezu. Dimue edi pavua baluishi bende mu Yelushalema bambule mabue bua kumuasa, “wakasokoma, kupatukaye mu ntempelo.” (Yone 8:59) Pakalua bena Yuda kumuelela tshifufu bua kumushipa, “kavua kabidi wendakana patoke munkatshi mua bena Yuda to, kadi wakumbuka muaba au, kuyaye mu buloba buvua pabuipi ne tshipela.” (Yone 11:54) Yezu wakenza ne muende muonso bua kudikuba pavua kuenza nanku kakuyi kubengangana ne tshivua Nzambi musue bua enze. Ke tshidi bena Kristo benza pabu lelu.​—Mat. 10:16.

12, 13. a) Mmunyi muvua bena mu tshisumbu bumvue pavua Eutuko mubishibue ku lufu? b) Nditekemena kayi dia mu Bible didi disamba badi bafuishe lelu?

¹² Paulo ne bavuaye nabu bakapitshila mu Makedonia, pashishe kuangatabu njila mishilangane. Bidi bimueneka ne: bakaya kutuilangana mu Toa. d Bible udi wamba ne: “Tuetu kuya kudibu ku Toa mu  matuku atanu.” e (Bien. 20:6) Mu Toa amu ke muvua Paulo mubishe Eutuko ku lufu, anu mutukadi bamone ku ntuadijilu kua nshapita eu. Ela meji bungi bua disanka divua bana betu bumvue pavuabu bamone mulunda wabu Eutuko ubishibua ku lufu! Anu mudi Bible uleja, bualu ebu “buakabakolesha bikole menemene.”​—Bien. 20:12.

¹³ Bushuwa, bishima bia nanku kabitshiena bienzeka lelu to. Nansha nanku, bantu badi bafuishe badi ‘bakoleshibua bikole menemene’ bua ditekemena dia dibishibua dia bantu ku lufu. (Yone 5:28, 29) Manya ne: Eutuko wakalua kabidi kufua bualu uvua mupange bupuangane. (Lomo 6:23) Kadi bantu babishibua ku lufu mu bulongolodi bupiabupia bua Nzambi nebikale ne ditekemena dia kushala ne muoyo kashidi! Bualu bukuabu budi ne: bantu badi babishibua ku lufu bua kukokesha ne Yezu mu diulu badi bapeta muoyo udi kawuyi mua kufua. (1 Kol. 15:51-53) Bena Kristo, nansha bobu bela manyi anyi ba mu “mikoko mikuabu,” badi ne malu mimpe a bungi adi ‘abakolesha bikole menemene.’​—Yone 10:16.

14. Ntshinyi tshivua Paulo muambile bakulu ba mu Efeso pakapetanganaye nabu mu Mileto?

¹⁴ Paulo ne bavuaye nabu mu luendu bakumbuka ku Toa kuyabu ku Aso, pashishe ku Mitulene, ku Kio, ku Samo, ne ku Mileto. Paulo uvua ujinga kufika ku Yelushalema kumpala kua dîba bua Tshibilu tshia Pentekoste. Dilubakana diende bua kufika ku Yelushalema mu dituku dia Pentekoste didi dileja bua tshinyi uvua muangate mazuwa avua kaayi mimane mu Efeso pavuaye upingana. Kadi bu muvuaye musue kuyukila ne bakulu ba mu Efeso, wakababikidisha ku Mileto. (Bien. 20:13-17) Pakafikabu kudiye, wakabambila ne: “Nudi bamanye bimpe mumvua ngenza malu munkatshi muenu misangu yonso katshia ku dituku dia kumpala dimvua mufike mu provense wa Asia, nkuatshila Mukalenge mudimu bu mupika ne budipuekeshi buonso ne binsonji ku mêsu ne mateta avua amfikila bua bifufu bia bena Yuda, pamvua eku tshiyi ndikanda bua kunuambila malu onso avua mua kunukuatshisha ne bua kunulongesha miaba ya bantu ba bungi ne ku nzubu ne ku nzubu. Kadi mvua mufile bumanyishi bua menemene kudi bena Yuda ne bena Greke bua dinyingalala bua mpekatu kumpala kua Nzambi ne bua ditabuja Mukalenge wetu Yezu.”​—Bien. 20:18-21.

15. Buambi bua ku nzubu ne ku nzubu mbuimpe ku tshinyi?

 ¹⁵ Kudi mishindu ya bungi ya kupeta bantu ba kuyisha lumu luimpe lelu. Anu bu Paulo, tudi tudienzeja bua kuya muaba utudi mua kubapeta, bu mudi miaba ya kuangatshila mashinyi, mu njila idi ne bantu ba bungi, anyi mu bisalu. Kadi mushindu wetu munene wa kuyisha bantu ngua ku nzubu ne ku nzubu. Bua tshinyi? Bumue bualu budi ne: buambi bua ku nzubu ne ku nzubu budi bupetesha bantu bonso mpunga wa kuteleja mukenji wa Bukalenge pa tshibidilu, bileja mudi Yehowa kayi ne kansungansunga. Buambi bua ku nzubu ne ku nzubu budi kabidi buenza bua bantu badi bakaje muoyo wabu bimpe bapete diambuluisha didi dikengedibua. Kupita apu, budi bukolesha ditabuja dia badi babuenza ne dinanukila diabu. Eyowa, tshimanyinu tshia bena Kristo balelela lelu ntshisumi tshiabu mu diyisha lumu luimpe “miaba ya bantu ba bungi ne ku nzubu ne ku nzubu.”

16, 17. Mmunyi muvua Paulo muenze malu kayi ne buôwa? Mmunyi mudi bena Kristo bamuidikija lelu?

¹⁶ Paulo wakaleja bakulu ba mu Efeso abu ne: kavua mumanye njiwu ivua mimuindile pavuaye upingana ku Yelushalema to.  Wakabambila ne: “Nansha nanku, tshiena ngangata muoyo wanyi meme bu udi ne mushinga kundi nansha, tshikole njikije lubilu luanyi ne mudimu umvua mupete kudi Mukalenge Yezu wa kufila bumanyishi buonso menemene bua lumu luimpe lua ngasa wa Nzambi.” (Bien. 20:24) Bu muvua Paulo kayi ne buôwa, kakalekela tshintu nansha tshimue, ni mmasama peshi buluishi, bimupangisha bua kujikija mudimu wende to.

¹⁷ Lelu bena Kristo badi pabu batuilangana ne ntatu ya bungi. Kudi badibu bakengesha mu matunga mudi mbulamatadi mikandike midimu yetu. Bakuabu badi ne masama a mubidi anyi a mu lungenyi adi mabatekeshe bikole. Badi bakengesha bansonga betu mu tulasa kudi balongi nabu badi babasaka ku malu mabi. Kadi anu bu Paulo, Bantemu ba Yehowa kabena balukila tshianyima nansha bobu mu nsombelu kayi. Mbadisuike bua “kufila bumanyishi buonso menemene bua lumu luimpe.”

18. Ntshinyi tshivua Paulo muenze bua kuepuka dibanza dia mashi? Mmunyi muvua bakulu ba mu Efeso mua kudikuba pabu anu bu yeye?

¹⁸ Pashishe Paulo wakapesha bakulu ba mu Efeso abu mubelu kayi udia tshibanga, ubapesha tshilejilu tshiende yeye. Wakanji kubambila ne: bivua mua kuikala musangu wa ndekelu uvuabu bamonangana nende. Kuluaye kubambila ne: “Tshiena ne dibanza dia mashi a muntu nansha umue, bualu tshiena mudikande bua kunuambila malu onso adi Nzambi mupangadije.” Mmunyi muvuabu mua kumuidikija bua kuepuka dibanza dia mashi? Wakabambila ne: “Nudilame nuenu bine ne tshisumbu tshionso tshia mikoko tshidi nyuma muimpe munuteke batangidi munda muatshi, bua kulama tshisumbu tshia Nzambi tshivuaye musumbe ku mashi a Muanende yeye.” (Bien. 20:26-28) Paulo wakabadimuija ne: “mbua ya ditu” ivua ne bua kudifinya mu tshisumbu tshia mikoko ne “kuakula malu makonyangale bua kukoka bayidi mu nyima muabu.” Nanku tshivua bakulu ne bua kuenza ntshinyi? Paulo wakabambila ne: “Nushale batabale, nuvuluke ne: munkatshi mua bidimu bisatu, butuku ne munya, tshivua mulekele musangu nansha umue bua kubela yonso wa kunudi ne binsonji ku mêsu.”​—Bien. 20:29-31.

19. Mbutontolodi kayi buakabuela mu tshisumbu mu matuku a ndekelu a mupostolo Yone? Butontolodi abu buakalela tshinyi bidimu bia bungi pashishe?

¹⁹ “Mbua ya ditu” ayi yakatuadija kumueneka mu tshisumbu mu matuku a ndekelu avua mupostolo Yone ne muoyo pa buloba. Bu mu 98 P.Y., mupostolo Yone wakafunda ne: “Nansha mpindieu  baluishi ba Kristo ba bungi bakadi bamueneke . . . Bavua bumbuke kutudi, kadi kabavua ba mushindu umue netu to; bualu bu bobu ba mushindu umue netu, bavua mua kuikala bashale netu.” (1 Yone 2:18, 19) Mu bidimu bia nkama ibidi pashishe, butontolodi bukavua mu tshisumbu buakalela kasumbu ka balombodi ba bitendelelu bivua bidiamba muvuabi bia buena Kristo, ne mu bidimu bia nkama isatu, Amperere Constantine wakanyisha dikalaku dia buena Kristo bua dishima ebu. Bu muvua balombodi ba bitendelelu bitabe bilele bia bampangano ne benze bua bimueneke bu bia bena Kristo, bavua bushuwa ‘bakula malu makonyangale.’ Lelu butontolodi buabu butshidi bumuenekela ku malongesha ne bilele bidi mu ntendelelu ya bukua buena Kristo.

20, 21. Mmunyi muvua Paulo uteka majinga a bakuabu kumpala kua ende? Mmunyi mudi bakulu bena Kristo mua kumuidikija lelu?

²⁰ Paulo uvua mushilangane ne bantu bakalua kudia bintu bia mikoko ya Nzambi. Uvua wenza mudimu wa bianza bua kikadi bujitu kudi tshisumbu. Kavua udifila bua bana babu ne meji a kulua mubanji to. Wakalomba bakulu ba mu Efeso bua bikale badipangisha bintu, wamba ne: “Nudi ne bua kuambuluisha badi batekete ne kuvuluka mêyi a Mukalenge Yezu pavuaye yeye nkayende muambe ne: ‘Disanka dia kufila ndipite dia kuangata.’”​—Bien. 20:35.

²¹ Anu bu Paulo, lelu bakulu badi bateka majinga a bakuabu kumpala kua abu. Bishilangane ne balombodi ba bitendelelu bia mu bukua buena Kristo badi badia benamu bintu, bakulu badi ne bua “kulama tshisumbu tshia Nzambi,” benza mudimu wabu kabiyi bua kupeta makuta to. Lutambishi ne lukuka kabiena ne bua kuikala mu tshisumbu tshia bena Kristo to, bualu badi ‘badikebela butumbi’ nebatue panshi ndekelu wa bionso. (Nsu. 25:27) Kudibandisha kudi kufikisha anu ku difuishibua bundu.​—Nsu. 11:2.

22. Bakulu ba mu Efeso bavua banange Paulo bua tshinyi?

²² Bena Kristo bakananga Paulo bikole bualu uvua mubanange bikole. Ke bualu kayi pakakumbana dîba dia yeye kumbuka kudibu, “bonso bakadila bikole, kuelabu Paulo mu tshitupa, kumutuabu mishiku ne dinanga dionso.” (Bien. 20:37, 38) Bena Kristo badi bushuwa banyisha bantu badi badifila ne muoyo mujima bua mikoko anu bu Paulo, ne mbabanange. Bu mutudi bakonkonone tshilejilu tshilenga tshia Paulo etshi, kuenaku umona ne: kavua unekesha anyi udibandisha pavuaye muambe ne: “Tshiena ne dibanza dia mashi a muntu nansha umue” anyi?​—Bien. 20:26.