1-3. a) Bua tshinyi mbitonde mupostolo Paulo bikole menemene? b) Kukonkonona tshilejilu tshia Paulo kudi mua kutulongesha tshinyi?

 MBITONDE Paulo bikole. Udi mu Atena, mu Grese, muaba munene uvua tulasa tuvua Socrate, Aristote, ne Platon balongeshe. Bantu ba mu Atena mbanange malu a Nzambi bikole. Muaba onso udi Paulo utangila, bu mudi mu ntempelo, miaba ya tshinsangansanga, ne mu njila, udi anu umona mpingu, bualu bena mu Atena badi batendelela nzambi ya bungi. Paulo mmumanye mudi Yehowa Nzambi mulelela umona ditendelela mpingu. (Ekes. 20:4, 5) Paulo, mupostolo wa lulamatu eu, udi umona malu anu bu Yehowa. Mmukine ditendelela mpingu!

² Tshidi Paulo umona padiye ufika muaba wa tshisalu tshidi kabidi tshimutonda bikole. Mpingu ya bungi menemene ivua ileja bitupa bia lulelu bia nzambi Hême ivua miteka mu mulongo luseke lua ditumba ku nord-ouest, pabuipi ne tshibuelelu tshinene. Muaba wa tshisalu uvua muwule tente ne miaba ya kutendelela. Mmunyi muikala mupostolo wa tshisumi eu mua kuyisha batendeledi banene ba mpingu abu? Neadikande, ukeba mua kupetangana ne bateleji bende mu muyuki anyi? Neakumbane bua kuambuluisha bamue ba kudibu bua bakebe Nzambi mulelela ne bamupete bushuwa anyi?

³ Mushindu uvua Paulo muyukile ne bamanyi ba mukanda ba mu Atena, udi mu Bienzedi 17:22-31, udi tshilejilu tshia mua kuakula bimpe ne bukalanga ne dijingulula dia malu. Tuetu bakonkonone tshilejilu tshiende, netumanye malu a bungi a mua kupetangana ne batudi tuyisha bua kubambuluisha bua bikale bela meji.

4, 5. Pavua Paulo mu Atena, wakayisha muaba kayi? Ndutatu kayi luvuaye mupete ne bantu bavuaye uyisha?

⁴ Paulo uvua muye ku Atena pavuaye mu luendu luende luibidi lua bumisionere, bu mu 50 P.Y. a Patshivuaye muindile Sila ne Timote bua  bafike ku Atena aku bafumina ku Beloya, “wakatuadija kueleshishangana meji ne bena Yuda,” bu muvua tshilele tshiende. Wakaya kabidi “muaba wa tshisalu” uvuaye mua kupeta bena Atena bavua kabayi bena Yuda. (Bien. 17:17) Agora wa mu Atena uvua muangate tshipapu tshia hektare bu 5. Uvua ku nord-est kua Acropole. Muaba wa tshisalu au kawuvua anu muaba wa kuula bintu ne kubipanyisha to; uvua kabidi muaba wa tshinsangansanga. Umue mukanda udi wamba ne: muaba au uvua wa “malu a bangenda mushinga, bena tshididi, ne bantu ba tshianana.” Bena Atena bavua ne tshilele tshia kulua kupetangana muaba au bua kuakula malu a bena mukanda.

⁵ Paulo wakapeta lutatu ne bantu bavuaye uyisha muaba wa tshisalu au. Munkatshi muabu muvua bena mu bisumbu bibidi bia malu a nkindi, tshia Epikuleo ne tshia Stoiko bivua kabiyi bipetangana. b Bena Epikuleo bavua bamba ne: bintu mbilue ne muoyo ku mpukampuka. Bamba kabidi ne: “Kutshina Nzambi kakuena ne mushinga to; bafue kabena bumvua bisama to; udi mua kupeta nsombelu muimpe; udi mua kunanukila mu ntatu.” Bena Stoiko bavua bobu bakula bua tshieledi tshia meji ne bujalame bua malu; kabavua bitaba ne: Nzambi mmuntu mulelela udiku to. Bisumbu bibidi abi kabivua bitaba dilongesha dia bayidi ba Kristo dia ne: bafue nebabishibue ku lufu to. Kakuyi mpata, malu a nkindi a bisumbu bibidi abi avua abengangana ne malongesha a bena Kristo balelela avua Paulo uyisha.

6, 7. Ntshinyi tshivua bamue bamanyi ba mukanda bena Greke benzele Paulo bua malu avuaye ulongesha? Mmalu kayi a muomumue adi bantu batuenzela lelu?

⁶ Ntshinyi tshiakenza bamanyi ba mukanda bena Greke bua malongesha a Paulo? Bamue ba kudibu bakamuamba ne: “muena biakulakula,” anyi “muzokodi wa ntete.” Mumanyi mukuabu udi wamba bua muaku eu ne: “Bavua batela muaku eu bua kanyunyi kakese kavua kazokola ntete. Bakalua kuwutua bantu bavua baya bangula biakudia mu miaba ya tshisalu. Kuluabu kabidi kuwutela mu ngakuilu wa mu tshimfuanyi bua muntu yonso uvua wenda usangisha ngumu, ne nangananga bua muntu uvua ulua kuyiteka ilondangana bimpe.” Nanku, bamanyi ba mukanda abu bavua mu bulelela bamba ne: Paulo uvua mutshimbakane uvua wenda wambulula malu avuaye mumvue kudi bakuabu. Kadi anu mutuabimona, Paulo kakalukila tshianyima bua mêna a bipendu avuabu bamutue au to.

⁷ Ke mudibi lelu. Mbatutue tuetu Bantemu ba Yehowa mêna a bungi a bipendu bua malongesha a mu Bible atudi bitabuje. Tshilejilu, bamue balongeshi banene batu bamba ne: dilongesha dia bintu bidienze ndilelela, basumisha ne kusumisha ne: biwikala ne meji, udi ne bua kuditaba. Batu bamba bonso badi badibenga ne: kabena ne meji to. Tuetu badi  bamba malu adi mu Bible ne bafila bijadiki bidi mu bufuki, mbasue bua bantu batuambe ne: tudi ‘bazokodi ba ntete.’ Nansha nanku, katuena tualukila tshianyima to. Tudi tuakula ne dishindika dionso patudi tuimanyina dilongesha ditudi bitabe dia ne: Yehowa Nzambi wa meji a bungi ke udi muenze bintu bionso bidi ne muoyo pa buloba.​—Buak. 4:11.

8. a) Bamue bantu bavua bateleje diyisha dia Paulo bakenza tshinyi? b) Ntshinyi tshivua tshifuane kufikila Paulo pavuabu baye nende ku Aleopago? (Tangila dimanyisha dia kuinshi kua dibeji.)

⁸ Bantu bakuabu bavua bateleja Paulo bakamba bobu ne: “Mmuenze bu muyishi wa malu a nzambi ya ku babende.” (Bien. 17:18) Paulo uvua mu bulelela uyisha bena Atena malu a nzambi mipiamipia anyi? Abu kabuvua bualu bua bilele to, bualu bidimu nkama ya bungi kumpala, bakavua balumbuluishe Socrate bua bualu abu ne bamukosele tshibawu tshia lufu. Ke bualu kayi kabiena bikemesha bua muvuabu bakuate Paulo ne baye nende ku Aleopago, ne bamulombe bua abumvuije malongesha ende avua umvuika menyi ku matshi kua bena Atena. c Mmunyi muvua Paulo mua kuakuila mukenji wende kumpala kua bantu bavua kabayi bamanye Mifundu?

9-11. a) Mmunyi muvua Paulo mudienzeje bua kupetangana mu muyuki ne bavuaye uyisha? b) Mmunyi mutudi mua kumuidikija lelu mu buambi?

⁹ Tuvuluke ne: bivua bitonde Paulo menemene bua mpingu ivuaye mumone. Kakakula diakamue bua ntendelelu wabu wa mpingu to, wakanji kutukija. Kudienzejaye ne budimu buonso bua apetangane nabu mu muyuki. Wakatuadija ne: “Nuenu bena Atena, ndi mumone ne: mu malu onso nudi numueneka bu bantu badi batshina banzambi kupita bantu bakuabu.” (Bien. 17:22) Bivua anu bu ne: Paulo uvua ubambila ne: ‘Ndi mumone ne: nudi banange malu a Nzambi.’ Paulo uvua muena meji, wakabela kalumbandi bua muvuabu banange malu a Nzambi. Uvua mumanye ne: bamue ba kudibu bavua bafofomija mêsu ne malongesha a dishima, bavua mua kuitaba bulelela. Mu kuamba kuimpe, yeye muine si uvua mumanye ne: tshimue tshikondo uvua pende ‘muenze malu mu dipanga, kayi ne ditabuja.’​—1 Tim. 1:13.

¹⁰ Paulo wakapetangana nabu mu muyuki, yeye kubambila ne: uvua mumone tshijadiki tshinene tshivua tshileja ne: bena Atena bavua banange malu a Nzambi, ku tshioshelu tshivuabu balambule “kudi Nzambi udi kayi mumanyike.” Umue mukanda udi wamba ne: “Bena Greke  ne bantu bakuabu bavua ne tshilele tshia kulambula bioshelu biabu kudi ‘nzambi ivua kayiyi mimanyike,’ bualu bavua ne buôwa bua ne: bavua bafuane kupua nzambi mukuabu muoyo pavuabu batendelela, nzambi uvua mua kubakuatshila tshiji.” Bena Atena bavua bitaba kupitshila ku tshioshelu atshi dikalaku dia Nzambi uvuabu kabayi bamanye. Ke Paulo kubuelela muaba au bua kubambila lumu luimpe luvuaye uyisha. Wakabambila ne: “Yeye unudi nutendelela kanuyi bamumanye, yeye au ke undi nnumanyisha.” (Bien. 17:23) Bumanyishi buende buvua ne bukole nansha muvuabu bua muinshimuinshi. Kavua ubayisha nzambi mupiamupia anyi wa ku babende bu muvuabu bamubanda to. Uvua ubumvuija Nzambi uvuabu kabayi bamanye au, mmumue ne: Nzambi mulelela.

¹¹ Mmunyi mutudi mua kuidikija Paulo lelu mu buambi? Tuetu tutangila bimpe muntu anyi bintu bia muaba utudi, tudi mua kumona bijadiki bia ne: muntu utudi tuyisha mmunange malu a Nzambi, tudi nansha mua kumona bintu bia mu ntendelelu wabu bidiye muvuale anyi bidi ku nzubu peshi mu lupangu. Tudi mua kumuambila ne: ‘Ndi mumone ne: udi munange malu a Nzambi. Mvua nkeba kuyukila ne muntu  udi muanange.’ Tuetu tuanyisha mushindu udi muntu munange malu a Nzambi ne budimu buonso, netupetangane nende bimpe mu muyuki. Tuvuluke ne: katuena ne bua kumona bantu bimanyine pa malongesha a mu ntendelelu wabu adibu bitabuja to. Munkatshi muetu mudi bena Kristo netu bavua bitabuje malongesha a dishima au ne muoyo mujima.

12. Mmunyi muvua Paulo muenze bua diyisha diende dipetangane ne tshivua bateleji bende?

¹² Paulo wakapetangana ne bantu abu mu muyuki, kadi bavuaku mua kushala bapetangana nanku pavuaye ubayisha anyi? Bu muvuaye mumanye ne: bavua balonge nkindi ya bena Greke ne kabavua bamanye Mifundu, wakenza bua diyisha diende dipetangane ne tshivuabu mu mishindu ya bungi. Tshia kumpala, wakabalongesha malu a mu Bible kayi utela mêyi a mu Bible buludiludi to. Tshibidi, uvua mudienze umue wa kudibu, utela miaku “kutudi” anyi “tuetu.” Tshisatu, uvua uledila mikanda ya mu tshiena Greke bua kuleja ne: amue malu avuaye ulongesha avua mafunda mu mikanda yabu bobu bine. Tukonkononayi mpindieu muyuki wa tshikuma uvuaye muenze. Mmalu kayi malelela a mushinga avuaye mulongeshe avua atangila Nzambi uvua bena Atena kabayi bamanye?

13. Ntshinyi tshiakamba Paulo bua kuvua diulu ne buloba bifumine? Tshivuaye usua kuamba ntshinyi?

¹³ Nzambi wakafuka diulu ne buloba. Paulo wakamba ne: “Nzambi uvua muenze buloba ne bintu bionso bidipu, bu mudiye yeye Mukalenge wa diulu ne buloba, kena usombela mu ntempelo mienza ku bianza to.” d (Bien. 17:24) Diulu ne buloba ki mbidienze to. Nzambi mulelela ke Mufuki wa bionso. (Mis. 146:6) Mukalenge Mutambe Bunene wa diulu ne buloba udi kayi mua kukumbana mu ntempelo miasa ku bianza bia bantu mmushilangane ne Atena anyi nzambi mikuabu ivua ipetela butumbi ku ntempelo, bioshelu, ne miaba ya kutendelela. (1 Bak. 8:27) Tshivua Paulo usua kuamba tshia ne: Nzambi mulelela mmunene kupita mpingu idi bantu benza idi mu ntempelo mienza ku bianza bia bantu, tshivua tshiumvuike bimpe.​—Yesh. 40:18-26.

14. Mmunyi muvua Paulo muleje ne: Nzambi kena ne muoyo bua bantu?

¹⁴ Nzambi kena ne muoyo bua bantu to. Batendeledi ba mpingu bavua bavuadika mpingu yabu bilamba bitambe buimpe, bayituadila mapa a mushinga mukole, anyi biakudia ne bia kunua, bienze anu bu ne: ivua dijinga ne bintu abi! Kadi bamue bena nkindi bena Greke bavua  mu bantu bavua Paulo uyisha bavua mua kuikala bitabuja ne: nzambi kena dijinga ne diambuluisha dia muntu to. Biobi nanku, bavua bushuwa bitabe tshivua Paulo muambe bua Nzambi tshia ne: “Kakuena bianza bia bantu bidi bimukuatshila mudimu.” Bidi nanku bualu kakuena tshintu tshidi tshimueneka tshidi bantu mua kupesha Mufuki wa bionso to. Yeye ke utu upesha bantu bidibu bakengela, tuambe ne: “muoyo, ne mueyelu ne bintu bionso,” nansha dîba, mvula, ne buloba bua bufuke. (Bien. 17:25; Gen. 2:7) Nanku, Nzambi Mufidi wa bintu, kena ne muoyo bua bantu badiye ubipesha to.

15. Ntshinyi tshivua Paulo muambe bua muvua bena Atena badimona bapite bantu bavua kabayi bena Greke? Tshilejilu tshiende tshidi tshitupetesha dilongesha kayi dia mushinga?

¹⁵ Nzambi wakenza muntu. Bena Atena bavua badimona bapite bantu bavua kabayi bena Greke. Kadi Bible mmukandike lutambishi lua dikoba anyi lua ditunga. (Dut. 10:17) Paulo wakakula bua bualu bunene abu ne budimu ne busunguluji. Uvua bushuwa mubafikishe ku diela meji pakabambilaye ne: “[Nzambi] wakenza bisamba bionso bia bantu bifumine mu muntu umue.” (Bien. 17:26) Uvua wakula bua Adama udibu batele mu Genese, tatu wa bantu bonso. (Gen. 1:26-28) Bu mudi bantu bonso ne nkambua umue, kakuena ditunga anyi dikoba didi dipite dikuabu to. Bantu bavua Paulo uyisha bavua bumvue dilongesha. Tshilejilu tshiende tshidi tshitulongesha ne: nansha mutudi ne bua kuikala ne budimu ne meji mu mudimu wa buambi, katuena ne bua kupepeja bulelela bua mu Bible bua bakuabu babuitabe to.

16. Ntshinyi tshidi Mufuki mulongoluele bantu?

¹⁶ Nzambi uvua mulongolole bua bantu bikale pabuipi nende. Nansha muvua bena nkindi bavua mu bateleji ba Paulo bakokangane munkatshi mua bidimu bua tshidibu bafukile muntu, kabavua bumvuije malu mu mushindu uvua mua kusaka bakuabu ku ditaba bualu ebu to. Kadi Paulo wakaleja patoke tshivua Mufuki mulongoluele bantu, wamba ne: “Bua bobu bakebe Nzambi, nansha bobu mua kumukeba benda babubuta  ne bamupete bushuwa, nansha mudiye, mu bulelela, kayi kule ne yonso wa kutudi.” (Bien. 17:27) Mbipepele bua kumanya Nzambi uvua kayi mumanyike kudi bena Atena. Ku lukuabu luseke, kena kule ne bonso badi basue kumupeta ne kulonga malu ende ne muoyo mujima to. (Mis. 145:18) Mona ne: Paulo mmuambe ne: “kutudi,” udibueja yeye muine mu bantu badi ne dijinga dia ‘kukeba’ Nzambi ne ‘kububuta’ bua kumupeta.

17, 18. Bua tshinyi bantu badi ne bua kudiumvua bakokibue kudi Nzambi? Mushindu uvua Paulo muyishe bena Atena udi utulongesha tshinyi?

¹⁷ Bantu badi ne bua kudiumvua bakokibue kudi Nzambi. Paulo wakamba ne: “Tudi ne muoyo, tudi tuenda, ne tudiku” bua Nzambi. Kudi bamanyi badi bamba ne: Paulo uvua wambulula mêyi a mufundi mukuabu wa tusala wa mu Crète wa mu bidimu bia 500 K.Y. ne uvua “muntu wa mushinga wa bungi mu bilele bia malu a nzambi bia bena Atena.” Paulo wakaleja bualu bukuabu buvua ne bua kusaka bantu ku didiumvua bakokibue kudi Nzambi, wamba ne: “Bafundi benu bakuabu ba tusala mbambe ne: ‘Bualu tudi petu bana bende.’” (Bien. 17:28) Bantu badi ne bua kudiumvua pabuipi ne Nzambi bualu wakafuka muntu umue wakalua kulela bantu bonso. Paulo wakatela buludiludi mêyi a mu mifundu ya bena Greke ivua bavuaye ulongesha banemeka, wenza nanku ne meji onso bua kukoka ntema yabu. e Mu diumvuangana ne  tshilejilu tshia Paulo, pamuapa tudi mua kukepesha bungi bua misangu itudi tuledila bintu bia mu malu a panu anyi mêyi a mu mikanda ne bikandakanda bidi bantu bitaba. Tshilejilu, kuledila mêyi makumbanyine mangatshila muaba udi bantu banemeka kudi mua kutuambuluisha bua kutuisha utudi tuyisha bua kudi mafesto anyi bilele kampanda bia mu ntendelelu ya dishima bifumine.

¹⁸ Too ne muaba eu, Paulo mmuleje malu malelela a mushinga adi atangila Nzambi, wenza muende muonso bua mêyi ende kaatapi bavuaye ulongesha to. Ntshinyi tshivuaye musue bua bena Atena benze ne malu a mushinga avuaye ubambila? Wakatungunuka ne muyuki, ubambila tshivuaye musue bua benze kayi ujingakana.

19, 20. a) Mmunyi muvua Paulo muele butatakane bua kutendelela mpingu idi bantu basonge patoke? b) Ntshinyi tshivua bateleji bende ne bua kuenza?

¹⁹ Paulo uvua pabuipi bua kusaka bateleji bende ku tshienzedi. Wakaledila kabidi Mifundu ya mu tshiena Greke, yeye kuamba ne: “Ke bualu kayi, bu mutudi bana ba Nzambi, katuena ne bua kuela meji ne: Nzambi udi bu or anyi arjan anyi bu dibue, bu tshintu tshisonga ne lungenyi ne meji a bantu to.” (Bien. 17:29) Bu mudi bantu bikale bana ba Nzambi, mmunyi mudi Nzambi mua kuikala lupingu ludibu basonge? Dibeleshisha meji dia Paulo ne budimu buonso diakela butatakane bua kutendelela mpingu idi bantu basonge patoke. (Mis. 115:4-8; Yesh. 44:9-20) Pavua Paulo muambe ne: “katuena ne bua,” uvua pamuapa muenze bua mubelu wende kawubatapi ku muoyo to.

²⁰ Paulo wakaleja patoke tshivuabu ne bua kuenza, wamba ne: “Bulelela, Nzambi uvua mulengulule bikondo bia dipanga dia nunku [dia kuela meji ne: bantu bavua batendelela mpingu bavua mua kusankisha Nzambi]; kadi mpindieu udi wambila bantu ba miaba yonso ne: badi ne bua kunyingalala bua mpekatu yabu.” (Bien. 17:30) Bivua mua kuikala bitonde bamue ba ku bateleji ba Paulo pavuaye mubalombe bua kunyingalala bua mpekatu yabu. Kadi mêyi ende a bujitu au avua mabaleje patoke ne: bavua ne muoyo bua Nzambi ne uvua ne bua kubalumbuluisha bua bienzedi biabu. Bavua ne bua kukeba Nzambi, kulonga bulelela budi bumutangila, ne kubutumikila mu nsombelu wabu mujima. Bualu abu buvua bulomba bena Atena bua kuitaba ne: bavua benza mpekatu wa ditendelela mpingu ne kulekela kuyitendelela.

21, 22. Paulo wakajikija ne mêyi kayi a bujitu? Nku tshinyi kudi mêyi ende au atutangila petu lelu?

²¹ Paulo wakajikija ne mêyi a bujitu aa: “[Nzambi] mmusungule dituku didiye mupangadije bua kulumbuluisha mu buakane buloba budi bantu basombe ku butuangaji bua muntu udiye musungule, ne mmupeshe  bantu bonso tshijadiki pa kumubisha ku lufu.” (Bien. 17:31) Dituku dia dilumbuluisha didi dilua! Ebu si mbualu budi ne bua kutusaka ku dikeba Nzambi mulelela ne kumupeta. Paulo ki mmutele dîna dia Mulumbuluishi au to, kadi mmuambe bualu bua dikema budi bumutangila. Mmuambe ne: uvua ne muoyo, kufuaye, ne Nzambi kumubisha ku lufu!

²² Mêyi ende a ndekelu a bujitu aa adi atutangila petu lelu. Tudi bamanye ne: Mulumbuluishi udi Nzambi muteke n’Yezu Kristo udi mubishibue ku lufu. (Yone 5:22) Tudi kabidi bamanye ne: Dituku dia dilumbuluisha nedienze bidimu tshinunu ne didi dilua ne lukasa. (Buak. 20:4, 6) Katuena tutshina Dituku dia dilumbuluisha to, bualu tudi bamanye ne: nedituadile bena lulamatu masanka a bungi. Tudi batuishibue ne: malu mimpe atudi batekemene kumpala eku neakumbane anu bua tshishima tshidi tshipite bishima bionso tshivua tshienzeke etshi: dibishibua dia Yezu Kristo ku lufu!

23. Mmishindu kayi mishilashilangane ivua bantu bakidile mukenji wa Paulo?

²³ Bantu bakakidila mukenji wa Paulo mu mishindu mishilashilangane. “Bamue bakatuadija kumuseka” pavuaye muakule bua dibishibua dia bantu ku lufu. Bakuabu bavua ne bukalanga, kadi kabakanyingalala bua mpekatu yabu ne kulua bena kuitabuja to. Bakamba ne: “Netukuteleje bua bualu ebu musangu mukuabu.” (Bien. 17:32) Bantu bakese patupu ke bakitaba mukenji wende. Bible udi wamba ne: “Bamue bantu bakadisangisha kudiye, kuluabu bena kuitabuja. Munkatshi muabu muvua Dionusio uvua mulumbuluishi wa ku kabadi ka ku Aleopago, ne muntu mukaji mukuabu diende Damali, ne bantu bakuabu kabidi.” (Bien. 17:34) Ke tshitu tshituenzela mu buambi. Bamue batu batuseka, bakuabu babenga ne bukalanga. Kadi tutu tusanka padi banga bitaba mukenji wa Bukalenge ne balua bena kuitabuja.

24. Muyuki uvua Paulo muenze mu Aleopago udi utulongesha tshinyi?

²⁴ Tuetu bakonkonone muyuki wa Paulo eu, netumanye mua kuamba malu malondangane bimpe, mu mushindu udi utuishisha bantu, ne kuenza bua apetangane ne tshidi bateleji. Netumanye kabidi mushinga udi nawu kuikala lutulu ne bantu badi bafofomija mêsu ne malongesha a mu bitendelelu bia dishima, ne wa kubalongesha ne busunguluji. Kudi kabidi dilongesha dia mushinga edi: katuena ne bua kupepeja bulelela bua mu Bible anu bua kusankisha bateleji to. Eyowa, tuetu tuidikija mupostolo Paulo, netulue balongeshi bimpe ba Dîyi dia Nzambi mu buambi. Too ne batangidi nebalue pabu balongeshi bakumbane mu tshisumbu. Dîba adi, netuikale ne bionso bidi bikengela bua kuambuluisha bakuabu bua “bakebe Nzambi, . . . ne bamupete bushuwa.”​—Bien. 17:27.