1-3. Paulo mmuye mu Kolinto bua tshinyi? Nntatu kayi idiye upetamu?

 TUDI lua ku ndekelu kua 50 P.Y. Mupostolo Paulo udi mu Kolinto, tshimenga tshia bangenda mushinga babanji mudi bantu ba bungi bena Greke, bena Lomo, ne bena Yuda. a Paulo ki mmuluamu bua kusumba bintu anyi kubipana peshi kukeba mudimu to. Mmuluamu bua mudimu wa mushinga mukole wa kumanyisha Bukalenge bua Nzambi. Nansha nanku, udi dijinga ne muaba wa kusombela, kadi mmudisuike bua kalu bujitu kudi bena Kristo nende, bua bikale bamudiisha bua mudimu wende to. Tshidiye wenza ntshinyi?

² Paulo mmumanye mua kuenza ntenta. Mmudimu mukole, kadi udi uwenza bua kudidiisha. Neapetaku mudimu wa bianza mu tshimenga tshidi ne bantu ba bungi etshi anyi? Neapetaku muaba muimpe wa kusombela anyi? Nansha mudi Paulo ne ntatu eyi, kena ulengulula mudimu wende wa mushinga wa kuyisha to.

³ Anu mutuabimona, Paulo wakashala mu Kolinto amu matuku a bungi, mudimu wende kupatulawu bipeta bimpe. Mudimu uvua Paulo muenze mu Kolinto, udi utupetesha dilongesha kayi didi dituambuluisha bua kufila bumanyishi buonso menemene bua Bukalenge bua Nzambi mu teritware wetu?

4, 5. a) Pavua Paulo mu Kolinto, wakasombela kua nganyi? Mmudimu kayi wa bianza wakenzaye? b) Mmunyi muvua Paulo mua kuikala mumanye mudimu wa dienza ntenta?

⁴ Matuku ndambu Paulo mumane kufika mu Kolinto, wakapetangana ne muena Yuda mukuabu mulelela, diende Akila ne  mukajende Pisikila, anyi Pisika. Bavua bakididi ba benyi. Bavua baye kusombela mu Kolinto bualu mukalenge Kulaudio uvua mutumine “bena Yuda bonso dîyi bua bumbuke mu Lomo.” (Bien. 18:1, 2) Bakalomba Paulo bua alue kusombela kuabu ne enze nabu mudimu wa bianza. Bible udi wamba ne: “Bu [muvua Paulo] wenza mudimu wa muomumue nabu, wakasombela ku nzubu kuabu, kuenzaye nabu mudimu, bualu mudimu wabu uvua wa kuenza ntenta.” (Bien. 18:3) Paulo wakasombela kua bena dibaka bakididi ba benyi abu tshikondo tshionso tshivuaye uyisha mu Kolinto. Mu tshikondo tshivuaye musombe nabu atshi ke muvuaye pamuapa mufunde imue mikanda yakalua tshitupa tshia Bible. b

⁵ Mmunyi muvua Paulo, uvua mulongele “ku makasa a Gamaliele,” mua kuikala kabidi muenji wa ntenta? (Bien. 22:3) Bidi bimueneka ne: bena Yuda ba mu bidimu lukama bia kumpala kabavua bamone ne: bivua bikumbane bua kulongesha bana babu mudimu wa bianza, nansha muvua bana abu mua kulua kulonga tulasa tukuabu to. Bu muvua Paulo muledibue ku Tâso wa mu Kilikia, tshimenga tshiende lumu bua tshilamba tshia cilicium tshivuabu benza natshi ntenta, uvua pamuapa mulonge mudimu au katshia ku buana. Kuenza ntenta kuvua kulomba tshinyi? Kuvua mua kuikala kulomba kutela tshilamba tshia kuenza natshi  ntenta ne buanda, anyi kukosa tshilamba tshikole tshia bujitu ne kutshitela ku bianza bua kuenza ntenta. Mishindu yonso ibidi ya dienza ntenta eyi ivua mudimu mukole.

6, 7. a) Mmunyi muvua Paulo umona dienza ntenta? Ntshinyi tshidi tshileja ne: Akila ne Pisikila bavua pabu bamona dienza ntenta anu bu Paulo? b) Mmunyi mudi bena Kristo ba lelu bidikija Paulo ne Akila ne Pisikila?

⁶ Paulo kavua umona dienza ntenta bu mudimu wende munene to. Wakenza ntenta anu bua kudidiisha bua amone mua kuambila bantu lumu luimpe ‘kabayi bafuta tshintu.’ (2 Kol. 11:7) Mmunyi muvua Akila ne Pisikila bamona mudimu wabu wa bianza? Bu muvuabu bena Kristo, bavua bushuwa bawumona anu bu Paulo. Kadi pakumbuka Paulo mu Kolinto mu 52 P.Y., Akila ne Pisikila bakawulekela kuyabu nende ku Efeso. Mu nzubu muabu ke muvua tshimue tshisumbu tshia mu Efeso amu tshienzela bisangilu. (1 Kol. 16:19) Bakalua kupingana ku Lomo, kuluabu kabidi kualukila mu Efeso. Bena dibaka abu bavua bateka malu a Bukalenge kumpala ne bavua badifila ku budisuile bua kuambuluisha bakuabu, ke kuanyishibuabu kudi “bisumbu bionso bia mu bisamba bikuabu.”​—Lomo 16:3-5; 2 Tim. 4:19.

⁷ Bena Kristo ba lelu badi bidikija Paulo ne Akila ne Pisikila. Bamanyishi ba tshisumi badi badienzeja bikole bua ‘kabalu bujitu bunene kudi’ bakuabu. (1 Tes. 2:9) Bamanyishi ba bungi ba Bukalenge ba ku dîba ne ku dîba mba kuela kalumbandi bualu badi benza mudimu wa bianza mu mêba makese anyi bawenza mu mukungulu kampanda bua bamone mua kudidiisha mu mudimu wabu munene wa buena Kristo. Anu bu Akila ne Pisikila, batendeledi ba Yehowa ba bungi batu bafila nzubu yabu ne muoyo mujima bua batangidi bena ngendu basombelamu. Bana betu ‘badi ne tshibidilu tshia kuakidila benyi’ aba, mbamanye mudi kuenza nanku kubakolesha bobu bine ne kubakankamija.​—Lomo 12:13.

8, 9. Ntshinyi tshiakenza Paulo pakaluishabu mudimu wende mukole wa diyisha bena Yuda? Nkuepi kuakayaye bua kuyisha?

⁸ Biakamueneka patoke ne: Paulo uvua wenza mudimu wa bianza bua kudiambuluisha bua akumbaje mudimu wa buambi pakamutuadila Sila ne Timote mapa a ku Makedonia. (2 Kol. 11:9) Diakamue, Paulo “wakatuadija kudifila bikole mu mudimu wa dîyi [“wakafila diba diende dionso anu mu kuamba kua diyi,”  Muanda Mulenga Lelu].” (Bien. 18:5) Kadi nansha muvuaye mudifile mu diyisha bena Yuda nanku, bakamuluisha kabidi bikole. Paulo wakatutula bilamba biende bua kuleja ne: kavua ne dibanza dia mashi a bantu bavua babenga kuitaba mukenji wa Kristo uvua usungila muoyo to. Yeye kubambila ne: “Mashi enu ikale pa mitu yenu. Meme tshiena ne bualu to. Kutuadijila ku mpindieu, nenye kudi bantu ba bisamba bikuabu.”​—Bien. 18:6; Yeh. 3:18, 19.

⁹ Nkuepi kudi Paulo uya mpindieu bua kuyisha? Muntu mukuabu wakamuakidila kuende, ke Titio Yusto, uvua pamuapa muitabuje buena Yuda. Uvua ne nzubu mutue nsunagoga mutumba. Paulo wakumbuka ku nsunagoga kuyaye kusombela kuende. (Bien. 18:7) Paulo uvua anu utudila kua Akila ne Pisikila pavuaye uya ku Kolinto, kadi kua Yusto ke kuvuaye musombele pavuaye wenza mudimu wa buambi.

10. Ntshinyi tshidi tshileja ne: Paulo kavua mudisuike bua kuyisha anu bantu ba bisamba bikuabu to?

¹⁰ Bu muvua Paulo muambe ne: uvua ne bua kuya kudi bantu ba bisamba bikuabu, bidi bileja ne: uvua muele bena Yuda bonso ne bantu bavua bitabuje buena Yuda nyima, nansha bavua bitabe bulelela anyi? Tòo. Tshilejilu, “Kulisipo mutangidi wa nsunagoga wakalua muena kuitabuja mu Mukalenge, yeye pamue ne ba mu nzubu muende bonso.” Bidi bimueneka ne: bantu ba bungi ba mu nsunagoga au bakadisangisha ne Kulisipo, bualu Bible udi wamba ne: “Bena Kolinto ba bungi bavua bumvue lumu luimpe bakitabuja, kubabatizabu.” (Bien. 18:8) Nanku nzubu wa Titio Yusto wakalua muaba uvua tshisumbu tshipiatshipia tshia bena Kristo tshivua mu Kolinto tshienzela bisangilu. Bu mudibu bafunde malu adi mu mukanda wa Bienzedi alondangana muvuawu menzeke anu mutu Luka ufunda, nanku bena Yuda abu anyi bantu bavua bitabuje buena Yuda bakalua bena Kristo panyima pa Paulo mumane kututula bilamba biende. Bualu ebu budi buleja ne: Paulo uvua mudiakaje bua kuya ne malu mu mushindu mukuabu pavua nsombelu ushintuluka.

11. Mmunyi mudi Bantemu ba Yehowa bidikija Paulo lelu padibu bayisha bantu badi mu bukua ntendelelu?

¹¹ Lelu, bitendelelu bia bukua buena Kristo mbiele miji mu matunga a bungi ne bidi ne buenzeji bukole kudi badimu. Mu amue matunga, bamisionere ba mu bitendelelu abi mbabuejamu bantu ba bungi. Ba bungi badi badiamba mudibu bena  Kristo batu balonda bilele bia buena kuetu, anu bu bena Yuda ba mu bidimu lukama bia kumpala bavua mu Kolinto. Kadi anu bu Paulo, tuetu Bantemu ba Yehowa tudi tudienzeja ne tshisumi tshionso bua kupeta bantu ba nanku, tubambuluisha bua bavudije dimanya diabu dia Mifundu. Nansha bobu babenga kututeleja anyi bamfumu ba bitendelelu biabu batukengesha, katuakuteketa mu mikolo to. Munkatshi mua bantu ‘badi ne tshisumi bua Nzambi, kadi kabiyi bilondeshile dimanya dijalame,’  mudi mua kuikala bena bupuekele ba bungi batudi ne bua kukeba ne kupeta.​—Lomo 10:2.

12. Ndikankamija kayi diakapeta Paulo mu tshikena kumona?

¹² Bikalabi ne: Paulo uvua ne dielakana bua kutungunuka ne mudimu wa buambi mu Kolinto, dielakana diende adi diakajika pavua Mukalenge Yezu mumumuenekele mu tshikena kumona butuku ne mumuambile ne: “Kutshinyi to, kadi tungunuka anu ne kuakula, kupuwu to, bualu ndi nebe ne kakuena muntu wakuluisha bua kukuenzela bibi to; bualu ndi ne bantu ba bungi mu tshimenga etshi.” (Bien. 18:9, 10) Tshikena kumona atshi tshivua bushuwa tshimukankamije! Mukalenge nkayende wakamujadikila ne: uvua ne bua kumukuba bua kabamuenzedi bibi to, kumuambilaye kabidi ne: mu tshimenga atshi muvua bantu ba bungi bavua bakumbane bua kuteleja lumu luimpe. Paulo wakenza tshinyi? Bible udi wamba ne: “Wakashalamu tshidimu tshijima ne ngondo isambombo, ulongesha dîyi dia Nzambi munkatshi muabu.”​—Bien. 18:11.

13. Mbualu kayi buvua Paulo mua kuikala muvuluke pavuabu baya nende ku nkuasa wa tshilumbuluidi? Bua tshinyi uvua mumanye ne: malu avua ne bua kuenda bimpe?

¹³ Paulo mumane kuenza bu tshidimu tshijima mu Kolinto, bualu bukuabu buakamuenzekela buvua bumujadikile ne: Mukalenge uvua umukuba. Bible udi wamba ne: “Bena Yuda bakaluisha Paulo bamane kumvuangana, kuyabu nende ku nkuasa wa tshilumbuluidi,” uvuabu babikila ne: bêma. (Bien. 18:12) Bantu ba bungi badi bamba ne: bêma uvua tshiakuidi tshibaka ne mabue matoke ne a blé muwule tente ne bilengejilu, tshivua pabuipi ne munkatshinkatshi mua muaba wa tshisalu tshia mu Kolinto. Muaba mutupu uvua kumpala kua bêma uvua mualabale bikole bua bantu ba bungi kudisangishilapu. Bintu bidi bakebuludi bapete bidi bileja ne: nkuasa wa tshilumbuluidi uvua pabuipi ne nsunagoga, tuambe ne: pabuipi ne kua Yusto. Pavuabu benda basemena ne Paulo ku bêma, uvua pamuapa muvuluke muvuabu base Stefano mabue, utubu babikila misangu mikuabu ne: muena Kristo wa kumpala wakashipabu bua ditabuja. Paulo, uvua mumanyike musangu au mu dîna dia Shaula, uvua “muanyishe lufu luende.” (Bien. 8:1) Bualu bua muomumue abu buvua ne bua kufikila Paulo anyi? Tòo, bualu bavua bamulaye ne: ‘Kakuena muntu wakuenzela bibi to.’​—Bien. 18:10.

14, 15. a) Bena Yuda bavua bafunde Paulo ne bualu kayi? Galio wakabipata bua tshinyi? b) Tshiakafikila Sosetene ntshinyi? Tshiakamufikisha pamuapa ku dilua nganyi?

 ¹⁴ Ntshinyi tshiakenzeka pakafika Paulo ku nkuasa wa tshilumbuluidi? Nzuji mulumbuluishi uvua Galio wa mu Akaya. Uvua tutuende wa Sénèque muena malu a nkindi muena Lomo. Bena Yuda bakafunda Paulo kudiye ne: “Muntu eu udi witabijija bantu bua kutendelela Nzambi mu mushindu udi kawuyi upetangana ne mikenji.” (Bien. 18:13) Bena Yuda abu bavua basua kuamba ne: Paulo uvua witabijija bantu bua kutendelela Nzambi mu mushindu uvua ushipa mikenji. Kadi Galio wakamona ne: Paulo kavua muenze “tshilema anyi bualu bubi bunene” to. (Bien. 18:14) Galio kavua musue kubuelakana mu dikokangana dia bena Yuda to. Ke bualu kayi wakabipata, Paulo kayi nansha muakule to! Bobu kufiika munda. Bakajikijila Sosetene tshiji, uvua pamuapa mupingane pa muaba wa Kulisipo mutangidi wa nsunagoga. Bakakuata Sosetene, “kutuadijabu kumututa kumpala kua nkuasa wa tshilumbuluidi.”​—Bien. 18:17.

¹⁵ Bua tshinyi Galio kakabapangisha bua kututa Sosetene? Mbualu uvua pamuapa wela meji ne: Sosetene ke uvua mulue ne bantu bavua bakuate Paulo abu ne uvua mpindieu upeta tshivua tshimukumbanyine. Kadi nansha biobi nanku anyi kabiyi nanku, mututu uvuaye mudie wakapatula bipeta bimpe. Mu mukanda wa kumpala uvua Paulo mufundile tshisumbu tshia mu Kolinto panyima pa bidimu bia bungi, wakabikilamu muntu mukuabu diende Sosetene ne: muanetu. (1 Kol. 1:1, 2) Uvuaku mua kuikala Sosetene uvuabu batute bikole mu Kolinto au anyi? Biobi nanku,  mututu uvuabu bamupele ke uvua mumuambuluishe bua kulua muena Kristo.

16. Ntshinyi tshidi mêyi a Mukalenge a ne: “Kutshinyi to, kadi tungunuka anu ne kuakula, kupuwu to, bualu ndi nebe,” atuenzela bua mudimu wa buambi?

¹⁶ Vuluka ne: bena Yuda bamane kubenga mukenji wa Paulo, Mukalenge Yezu wakalua kumuambila ne: “Kutshinyi to, kadi tungunuka anu ne kuakula, kupuwu to, bualu ndi nebe.” (Bien. 18:9, 10) Tuikalayiku petu tuvuluka mêyi ende aa, nangananga padi bantu babenga mukenji wetu lelu. Katupu muoyo ne: Yehowa ke udi umona mu muoyo wa muntu, ne udi ukoka badi bakaje muoyo wabu kudiye. (1 Sam. 16:7; Yone 6:44) Bualu ebu butusakaku bua kudifila anu mu mudimu wa buambi. Bantu batue ku 300 000 batu babatijibua tshidimu tshionso etshi, tuambe ne: bantu batue ku 800 butshiatshia builila ebu. Yezu udi ujadikila bonso badi batumikila dîyi diende dituma dia ‘kuvuija bantu ba mu bisamba bionso bayidi’ ne: “Ndi nenu matuku onso too ne ku nshikidilu kua ndongoluelu wa malu eu.”​—Mat. 28:19, 20.

17, 18. Paulo uvua mua kuikala muvuluke malu kayi pavuaye mu mazuwa uya mu Efeso?

¹⁷ Katuena bamanye bikala tshivua Galio muenzele bafundi ba Paulo ni tshivua tshifile ndambu wa ditalala kudi bena mu tshisumbu tshipiatshipia tshia bena Kristo tshivua mu Kolinto. Kadi Paulo wakashalamu kabidi “matuku makuabu” kumpala kua kulayanganaye nabu. Mu muvu wa luya wa mu 52 P.Y., wakadilongolola bua kuangatshila mazuwa ku dilobo dia mu Kanekelea uvua muaba wa kilometre bu 11 lua ku est kua Kolinto, kuyaye ku Sulia. Kadi kumpala kua Paulo kumbuka mu Kanekelea, “uvua mukoseshe nsuki yende . . . , bualu uvua muenze mutshipu.” c (Bien. 18:18) Pashishe wakangata Akila ne Pisikila, kusabukabu Mbuu wa Égée batangile ku Efeso mu Asia Mukese.

¹⁸ Pavua Paulo mu mazuwa umbuka mu Kanekelea, uvua pamuapa uvuluka malu avua menzeke mu Kolinto. Uvua uvuluka malu mimpe a bungi avua amuenza disanka. Mudimu wa buambi uvuaye muenzamu mu ngondo 18 uvua mupatule bipeta bimpe. Tshisumbu tshia kumpala tshiakenzeka mu Kolinto, tshivua tshienzela bisangilu kua Yusto. Mu bantu bakalua bena  kuitabuja muvua Yusto, Kulisipo ne ba mu nzubu muende, ne bantu bakuabu ba bungi. Paulo uvua munange bena kuitabuja bapiabapia abu, bualu uvua mubambuluishe bua balue bena Kristo. Wakalua kubafundila mukanda wamba ne: bavua bu mukanda wa kudianyisha nawu mufunda mu muoyo wende. Tuetu petu tudi banange bantu batudi bambuluishe bua kubuela mu ntendelelu mulelela. Bidi bituenza disanka patudi tubamona bobu bikale ‘mikanda ya muoyo ya kudianyisha nayi.’​—2 Kol. 3:1-3.

19, 20. Ntshinyi tshiakenza Paulo diakamue pakafikaye mu Efeso? Didienzeja diende bua kukumbaja malu avuaye mudifundile mu mudimu wa Yehowa didi ditulongesha tshinyi?

¹⁹ Pakafika Paulo mu Efeso, wakaditua diakamue mu mudimu wa buambi. “Wakabuela mu nsunagoga, kubangaye kueleshisha bena Yuda meji.” (Bien. 18:19) Musangu au, Paulo wakenza matuku makese mu Efeso. Nansha muvuabu bamulomba bua kushalamu matuku a bungi, “kakitaba to.” Wakalayangana ne bena Efeso, kubambilaye ne: “Biasua Yehowa, nempingane kabidi kunudi.” (Bien. 18:20, 21) Kakuyi mpata, Paulo uvua mumanye ne: bivua bikengela kuenza mudimu wa bungi wa buambi mu Efeso. Uvua ne meji a kupinganamu, kadi wakalekeela Yehowa malu onso mu bianza. Atshi si ntshilejilu tshimpe tshia tuetu kulonda! Mbimpe tuele tshidia tshia kumpala mu malu atudi badifundile bua kukumbaja mu mudimu wa Yehowa. Nansha nanku, tudi ne bua kueyemena bulombodi bua Yehowa ne kukeba bua kuya ne malu mudiye musue.​—Yak. 4:15.

²⁰ Paulo wakashiya Akila ne Pisikila, kusabukaye mbuu ne kupueka mu Kaisalia. Bidi bimueneka ne: ‘wakabanda’ ku Yelushalema bua kuela bena mu tshisumbu tshivuaku muoyo. Pashishe Paulo wakaya kuende, mu Antiokia wa mu Sulia. Luendu luende luibidi lua bumisionere ndujike mu mushindu muimpe. Ntshinyi tshiamuenzekela mu luendu lua ndekelu lua bumisionere?