NSHAPITA WA 10
“Dîyi dia yehowa diakatungunuka ne kuya kumpala”
Bakapandisha Petelo, ne buluishi kabuakimanyika dimuangalaja dia lumu luimpe to
1-4. Nsombelu kayi mukole uvua mufikile Petelo? Bu wewe muikale Petelo uvua mua kumvua bishi?
BADI babuela ne Petelo mu lubanza lua buloko kudi basalayi babidi bena Lomo bamuele munkatshi, pashishe bakanga tshiibi tshinene tshia ku lubanza. Badi baya nende ku kende kazubu ka munda mua buloko. Muine amu bua ashalamu mêba a bungi pamuapa matuku a bungi, muindile bua kumanya tshiamufikila. Mu kazubu amu kamuena tshintu, anu bimanu ne milonda idi ku bimanu, shene idibu bamuele, ne basalayi abu.
2 Badi bakosela Petelo tshibawu tshinene. Mukalenge Helode Agipa I mmudisuike bua kumushipa. a Mbasue kuleja Petelo kudi bantu panyima pa Pasaka. Nunku lufu luende neluikale dîpa bua kusankisha misumba ya bantu. Katshivua dimufunyina dia bilele to, bualu bavua bafuma kudishipa mupostolo nende, Yakobo, anu kudi mukalenge umue umue eu.
3 Mbalongolole bua kushipa Petelo dituku didi dilonda. Ntshinyi tshidiye wela meji mu kazubu kadiye mudi muidima amu? Udi uvuluka muvua Yezu muambe bidimu bia bungi kumpala ne: dimue dituku, bavua ne bua kumusuika kuya nende ku bukole bua kumushipa anyi? (Yone 21:18, 19) Pamuapa Petelo udi udiebeja bikale tshikondo atshi tshifike.
4 Bu wewe muikale Petelo, uvua mua kumvua bishi? Bantu ba bungi badi mua kudiumvua bashikile, bela meji ne: kuabu kuajiki. Kadi bidiku mua kuikala nanku bua muyidi mulelela wa Yezu Kristo anyi? Tshivua Petelo ne bena Kristo nende benze pavuabu babakengesha tshidi tshitulongesha tshinyi? Tutshimonayi.
“Tshisumbu tshivua tshisambila Nzambi bikole” (Bienzedi 12:1-5)
5, 6. a) Mmushindu kayi uvua Mukalenge Helode Agipa I uluisha tshisumbu tshia bena Kristo? Bua tshinyi uvua utshiluisha? b) Bua tshinyi lufu lua Yakobo luvua diteta kudi tshisumbu tshijima?
5 Anu mutudi balonge mu nshapita mushale, dikudimuka dia Kônelio ne bena mu dîku diende diakasankisha bena mu tshisumbu tshia bena Kristo bikole. Kadi bena Yuda bavua kabayi bena kuitabuja bavua ne bua kuikala bumvue bibi pakumvuabu ne: bena Kristo bena Yuda bakavua batendelela ne bantu bavua kabayi bena Yuda kakuyi bualu.
6 Helode, muena tshididi uvua ne budimu, wakamona ne: tshivua mpunga wa bena Yuda kumunanga. Nunku wakatuadija kukengesha bena Kristo. Pamuapa wakamanya ne: mupostolo Yakobo ke uvua mulamate Yezu bikole. Ke yeye ‘kushipa Yakobo muanabu ne Yone ku muele wa mvita.’ (Bien. 12:2) Tshivua diteta dikole bua tshisumbu tshijima. Yakobo uvua umue wa ku bayidi basatu bavua bamone diandamuka dia Yezu ne bishima bikuabu bivua bapostolo bakuabu kabayi bamone. (Mat. 17:1, 2; Mâko 5:37-42) Yezu uvua mubikile Yakobo ne muanabu Yone ne: “Bana ba Dikubakuba” bua muoyo wabu mukole. (Mâko 3:17) Nunku tshisumbu tshiakajimija ntemu wa lulamatu wa muoyo mukole uvuabu banange.
7, 8. Ntshinyi tshivua bena mu tshisumbu benze pavuabu bele Petelo mu buloko?
7 Pakashipabu Yakobo, bena Yuda bakasanka, anu muvua Agipa musue. Biakamupesha muoyo mukole, kukebaye bua kujikijangana ne Petelo. Anu mutudi bambe ku ntuadijilu, wakakuatshisha Petelo. Kadi Agipa uvua mumanye ne: bapostolo bavua bapatuka mu maloko mu tshishima, anu mudi nshapita 5 wa mukanda eu uleja. Helode wakatuma dîyi bua bele Petelo shene pankatshi pa basalayi babidi. Kutekeshaye balami ba buloko 16 bua bikale bakombolangana munya ne butuku bua mupostolo eu kanyemi to. Bu yeye mua kunyema, balami ba buloko abu bavua bapia tshibawu tshivuabu bakosele Petelo atshi. Mu nsombelu mukole uvua mumufikile eu, ntshinyi tshivua bena Kristo nende mua kuenza?
8 Bena mu tshisumbu bavua bamanye bimpe tshia kuenza. Bienzedi 12:5 udi wamba ne: “Nunku bavua balame Petelo mu buloko, kadi tshisumbu tshivua tshisambila Nzambi bikole bua bualu buende.” Bushuwa, bakasambila ne muoyo mujima bua muena Kristo nabu uvuabu banange. Kabakadiumvua bashikile bua lufu lua Yakobo to. Lufu luende kaluakabafikisha kudimona disambila bu kadiyi ne mushinga to. Masambila atu ne mushinga wa bungi kudi Yehowa. Tuetu tuenza bilondeshile disua diende, udi uandamuna. (Eb. 13:18, 19; Yak. 5:16) Edi ndilongesha dinene didi bena Kristo ne bua kukuata lelu.
9. Bena mu tshisumbu tshivua Petelo mbatushile tshilejilu kayi bua disambila?
9 Udiku mumanye bena Kristo nebe badi ne ntatu anyi? Kudi badibu mua kuikala bakengesha, badi muaba udi mbulamatadi mukandike mudimu wetu, anyi badi bipupu bikuate. Katuenaku mua kusambila ne muoyo mujima bua bualu buabu anyi? Pamuapa udi kabidi mumanye bamue bana betu badi ne ntatu idi kayiyi imanyika bipepele bu mudi ntatu ya mu dîku, ditekeshibua mu mikolo, anyi bikale ne ditabuja ditekete. Wewe muelagane meji kumpala kua kusambila, udi mua kuvuluka bantu ba bungi baudi mua kutela mêna abu paudi uyukila ne Yehowa, “Muteleji wa disambila.” (Mis. 65:2) Mu bulelela, wewe pebe utu musue bua bena Kristo nebe basambile bua bualu buebe paudi ne ntatu.
Tutu tusambila bua bena Kristo netu badibu bele mu maloko bua ditabuja diabu
“Undonde” (Bienzedi 12:6-11)
10, 11. Umvuija mushindu uvua muanjelu wa Yehowa mupatule Petelo mu buloko.
10 Petelo uvua mupampakane bikole bua njiwu ivuaye mupete anyi? Katuena bamanye to, kadi butuku bua ndekelu buvuaye mu buloko abu, uvua mulale bimpe pankatshi pa basalayi babidi bavua ku kazubu ka buloko kavuaye aku. Bu muvuaye muntu wa ditabuja, uvua mumanye bimpe ne: nansha bualu kayi mua kumufikila pavuabu butshia, Yehowa uvua ne bua kumukuba. (Lomo 14:7, 8) Pamuapa Petelo kavua muele meji a malu a dikema avua ne bua kuenzeka to. Diakamue butoke buakuwula mu kazubu ka buloko kavuaye aku. Muanjelu uvua muimane muaba au, pamuapa balami ba buloko kabayi bamumone, yeye kujula Petelo ne lukasa. Shene ivuabu bamuele ku maboko ivua imueneka bu ne: kayivua mua kukoseka ayi, yakakoseka.
‘Bakafika ku tshiibi tshia tshiamu tshivua tshifikisha mu tshimenga, tshiotshi kudiunzulukila nkayatshi.’—Bienzedi 12:10
11 Muanjelu wakamutumina mêyi mashilashilangane mu tshikoso wamba ne: “Juka lukasa lukasa! . . . Vuala bilamba ne ela sandala yebe. . . . Ela tshilamba tshiebe tshia pa mutu.” Petelo wakatumikila musangu umue. Muanjelu kumuambila ne: ‘Ndonda.’ Petelo kumulonda. Bakapatuka mu kazubu ka buloko aku, kupitshilabu muaba uvua balami ba buloko bimanyine, kuyabu benda bitekete bitekete, batangile ku tshiibi tshinene tshia lubanza lua buloko. Mmunyi muvuabu mua kupatuka? Biobi ne: Petelo uvua mudiele lukonko elu, kavua mua kutungunuka ne kudielalu to. Pakasemenabu ku tshiibi tshinene, ‘tshiakadiunzulukila nkayatshi,’ bobu kupatuka, kumatabu mu njila. Pashishe muanjelu kujimina. Malu onso aa akenzeka mu mupodi wa dîsu. Petelo wakadishadila muaba au, diakamue kujingululaye ne: malu onso aa avua menzeke bulelela, kavua mumone tshikena kumona to. Uvua mupatuke mu buloko bushuwa!—Bien. 12:7-11.
12. Bua tshinyi bidi bitukolesha patudi tuelangana meji a muvua Yehowa mupandishe Petelo?
12 Kabienaku bitukolesha patudi tumona mudi Yehowa ne bukole bua bungi menemene bua kupandisha batendeledi bende anyi? Mukalenge kampanda uvuabu batue mpanda kudi bukokeshi bunene bua katshia bua pa buloba bujima ke uvua muele Petelo mu buloko. Nansha nanku, Petelo wakapatukamu anu. Bushuwa, Yehowa katu wenzela batendeledi bende bonso bishima bia buena abi to. Kavua mubienzele Yakobo to, ne pavua mêyi avua Yezu muambe bua Petelo malue kukumbana, Yehowa kakamuenzela tshishima to. Nansha lelu bena Kristo kabena bindila ne: Yehowa abapandishe mu tshishima to. Kadi tumanyayi ne: Yehowa ki mmushintuluke to. (Mal. 3:6) Ukadi pa kutuma muanende bua kupatula bantu miliyo ya bungi menemene mu buloko mudi muntu kayi mua kupatuka lelu, tuambe ne: lufu. (Yone 5:28, 29) Milayi ya mushindu eu idi mua kutupesha dikima dia bungi patudi tutuilangana ne ntatu lelu.
“Bakamumona, kukemabu bikole” (Bienzedi 12:12-17)
13-15. a) Ntshinyi tshiakenza bena mu tshisumbu bavua badisangishe kua mariya pakafika Petelo? b) Mukanda wa Bienzedi udi utamba kuakula bua tshinyi mpindieu? Ntshinyi tshivua Petelo utungunuka ne kuenzela bena Kristo nende?
13 Petelo uvua muimane mu njila kuîsu kumane kufiika, udiebeja kuvuaye mua kuya. Pashishe yeye kumanya kuvuaye mua kuya. Kuvua muntu mukaji muena Kristo uvua musombele mu tshijengu atshi, diende Mariya. Bidi bimueneka ne: uvua mukaji mukamba uvua koku ne kantu ku bianza. Uvua ne nzubu munene uvua ukumbana bua kuakidila tshisumbu tshijima tshia bena Kristo. Uvua mamuende wa Yone Mâko. Mu muyuki udibu balonde mu mukanda wa Bienzedi eu ke mudibu batele Yone Mâko bua musangu wa kumpala, ne yeye ke wakalua bu muana wa Petelo. (1 Pet. 5:13) Butuku abu, bena mu tshisumbu atshi ba bungi bavua mu nzubu wa Mariya amu basambila ne muoyo mujima nansha mukavua dîba diye. Pamuapa bavua basambila bua Petelo apatuke mu buloko. Kadi kabavua bamanye ne: Yehowa neabandamune to!
14 Petelo wakakokola ku tshiibi tshinene tshia lubanza tshivua tshifikisha ku nzubu wa Mariya. Muena mudimu wa bakaji diende, Loda (dîna dinene dia mu tshiena Greke didi diumvuja “tshilongo tshia Roze”) wakaya ku tshiibi. Pakumvuaye dîyi dia Petelo, biakamupitshila! Pamutu pa kumunzuluila tshiibi, wakanji kumushiya muimane mu njila, kupinganaye lubilu mu nzubu, kuya kuambila tshisumbu tshijima ne dishindika dionso ne: Petelo udi pambelu apa. Bakamba muvuaye ujimija lungenyi, kadi yeye uvua nsogakaji uvua kayi uteketa to. Wakatungunuka anu ne kusumisha bualu uvua mumanye ne: uvua wamba bulelela. Nunku, bamue bakela meji ne: pamuapa mmuanjelu wa Petelo. (Bien. 12:12-15) Petelo eku uvua anu wenda ukokola; ndekelu wa bionso, bakalua kumunzuluila.
15 Pakunzululabu tshiibi, “bakamumona, kukemabu bikole!” (Bien. 12:16) Petelo wakenza bua kabanji kusanka bikole to, bua anji abalondele tshivua tshimuenzekele, pashishe baye kudimuija muyidi Yakobo ne bena Kristo bakuabu ne bua umbuke pende muaba au bua basalayi ba Helode kabalu kumupetapu. Petelo wakatungunuka ne mudimu wende wa lulamatu muaba mukuabu uvuaye mu bukubi. Pa kumbusha diambuluishia divuaye mufile mu tshilumbu tshia ditengudibua bilondeshile Bienzedi nshapita wa 15, ki mbamutele kabidi mu mukanda wa Bienzedi to. Mukanda wa bienzedi udi utamba kuakula mpindieu bua mudimu ne ngendu bivua mupostolo Paulo muenze. Kadi tudi batuishibue ne: Petelo uvua ukolesha ditabuja dia bena Kristo nende ba miaba yonso ivuaye uya. Pakashiyanganaye ne bena Kristo bavua mu nzubu wa Mariya, bakashala ne disanka dia bungi.
16. Bua tshinyi tudi batuishibue ne: netupete malu a bungi a kusankila kumpala eku?
16 Imue misangu, Yehowa utu upesha batendeledi bende bintu kupita bivuabu belele meji, bashala ne disanka dipite bungi, bibapitshila. Ke tshivua tshienzekele bena Kristo bavua ne Petelo butuku abu. Nansha tuetu petu tudi mua kumvua mushindu au patudi tumona mudi Yehowa utubenesha bikole lelu eu. (Nsu. 10:22) Kumpala eku, netumone muakumbana milayi yonso ya Yehowa pa buloba bujima. Malu a butumbi enzeka neapite kule ne kule bionso bitudi mua kudifuanyikijila lelu. Nunku tuetu bashale ne lulamatu, netupete masanka a bungi adi matuindile kumpala eku.
“Muanjelu wa Yehowa wakamukuma” (Bienzedi 12:18-25)
17, 18. Ntshinyi tshiakafikisha bantu ku diafunya Helode?
17 Pakapatuka Petelo mu buloko, Helode wakakema bikole, tshibi kayi musanke to. Nunku wakatuma dîyi lukasa bua bamukebe muaba wonso uvuaye. Pashishe wakatuma dîyi bua bele basalayi bavua balama Petelo nkonko. ‘Bakabanyoka,’ bimueneka ne: bakabashipa. (Bien. 12:19) Helode Agipa kavua ne luse nansha lukese to, uvua muena tshikisu. Wakashala kabayi bamunyoke anyi?
18 Pamuapa Agipa wakashala ne bundu mêsu tente bua muvuaye mupangile bua kushipa Petelo, kadi wakatuadija kabidi kuditambisha mu matuku makese. Nsombelu kampanda wakenza bua ne: bena lukuna bende baye kudiye bua kukeba ditalala. Kakuyi mpata, wakajinga bua kuenza muyuki kumpala kua bantu ba bungi. Luka wakaleja ne: pavua Helode udilongolola, “wakavuala bilamba bia bukalenge.” Josèphe, mumanyi wa malu a kale muena Yuda wakafunda ne: tshilamba tshivua Helode muvuale tshivua tshienza ne arjan, nunku pavua butoke bumutua, uvua bu uvua ubalakana ne butumbi. Pashishe wakenza muyuki wa budiambi. Musumba wa bantu uvua umuteleja wakela lubila bua kumuafunya, wamba ne: “Edi dîyi ndia nzambi, ki ndîyi dia muntu to!”—Bien. 12:20-22.
19, 20. a) Yehowa wakanyoka Helode bua tshinyi? b) Muyuki wa lufu luende luvuaye mufue mu tshimpitshimpi alu udi utukolesha mushindu kayi?
19 Butumbi bua mushindu eu buvua bua kupesha Nzambi. Pavuabu batumbisha Helode nanku Nzambi uvua mumone! Uvua ne mushindu wa kuepuka njiwu. Uvua mua kukanyina bantu abu anyi nansha kubenga mêyi avuabu bamuambile au. Kadi yeye wakalua muntu udi lusumuinu elu lukumbanyine: “Lutambishi ludi lulua kumpala kua dibutuka.” (Nsu. 16:18) ‘Diakamue muanjelu wa Yehowa wakakuma’ muntu wa lutambishi eu, yeye kufua lufu lubi. “Bakamudia kudi bikusu, kufuaye.” (Bien. 12:23) Nansha Josèphe wakaleja ne: bakakuma Agipa diakamue, kulejaye kabidi ne: yeye muine wakajingulula ne: uvua ufua bua muvuaye muitabe dimuafunya dia musumba wa bantu. Josèphe wakafunda ne: Agipa wakashala ukenga ne muoyo matuku 5 kumpala kua yeye kufua. b
20 Imue misangu, bidi mua kumueneka ne: kabena banyoka bantu badi kabayi batendelela Nzambi bua malu abu mabi. Kabiena ne bua kutukemesha to, bualu “ba pa buloba bonso badi ku bukokeshi bua mubi.” (1 Yone 5:19) Kadi padi batendeledi ba Nzambi ba lulamatu bamona bu ne: kabena banyoka bantu badi benza malu mabi, bitu bibatonda. Ke bualu kayi muyuki wa Helode udi utukolesha. Mbienze anu bu ne: tudi tumona Yehowa udiangatshila malu mu bianza, uvuluija batendeledi bende bonso ne: mmunange buakane. (Mis. 33:5) Ku tototo nansha ku ndandanda, buakane buende nebuwule pa buloba bujima.
21. Ndilongesha kayi dinene didi mu Bienzedi nshapita wa 12? Bua tshinyi didi ditukolesha lelu?
21 Muyuki eu udi ujika ne dilongesha didi ditukankamija bikole edi: “Dîyi dia Yehowa diakatungunuka ne kuya kumpala ne kutangalaka.” (Bien. 12:24) Luapolo lua muvua mudimu wa diyisha muye kumpala elu, ludi mua kutuvuluija mushindu udi Yehowa mubeneshe mudimu wa muomumue matuku etu aa. Mbiumvuike bimpe ne: Bienzedi nshapita wa 12 kena wakula nangananga bua muvua mupostolo umue mufue ne mukuabu mupanduke to. Kadi udi wakula bua muvua Yehowa mupangishe bionso bivua Satana wenza bua kubutula tshisumbu tshia bena Kristo ne kuimanyika mudimu wa diyisha uvua wenzeka ne tshisumi. Bionso bivuaye wenza abi biakaya mu mâyi. Ke mudibi kabidi bua bikuabu bionso bidiye wenza lelu. (Yesh. 54:17) Kadi bantu badi benza mudimu ku luseke lua Yehowa ne Yezu Kristo, kabakupangila nansha kakese. Bualu ebu kabuena butukankamija anyi? Bushuwa tudi ne diakalenga dinene dia kumuangalaja “dîyi dia Yehowa” lelu eu!
a Tangila kazubu ka “ Mukalenge Helode Agipa I.”
b Munganga kampanda mupandianganyi wakafunda ne: bimanyinu bia disama bivuabu baleje kudi Josèphe ne Luka bivua nabi Helode bivua mua kuikala bikebesha kudi bikusu bia mu buloba bivua bijibakaje mu mala bibi menemene. Pamuapa bikusu bia mushindu eu batu babiluka anyi bitu bipatuka mu mubidi wa mubedi padiye ufua. Mukanda mukuabu udi wamba ne: “Bujalame bua tshidi Luka, munganga mupiluke, muambe budi buleja muvua Helode mufue lufu luvua lukuatshisha buôwa.”
