1, 2. Ntshinyi tshivua Shaula musue kuenza mu Damaseke?

 BENA luendu ba tshikisu badi pabuipi ne Damaseke, mudibu basue kukumbaja mayele abu mabi. Nebapulumune bayidi ba Yezu badibu bakine ku nzubu yabu, babasuika, babapuekesha milongo, ne baya nabu ku Yelushalema bua kubalumbuluisha kudi banzuji ba tshiji tshikole.

² Shaula mulombodi wa tshisumbu atshi, ukavua muele mashi panshi. a Matuku mashale aa, uvua mutangile ne muanyishe bua bena diende bashipe Stefano ne mabue. Stefano uvua muyidi wa Yezu uvua utshina Nzambi. (Bien. 7:57–8:1) Nansha mukavua Shaula mukengeshe bayidi ba Yezu bavua mu Yelushalema ne tshikisu, wakajinga anu bua kukengesha kabidi bayidi ba miaba mikuabu. Uvua musue kujimija kasumbu kabi ka malu a Nzambi kavuabu babikila ne: “Njila.”​—Bien. 9:1, 2; tangila kazubu ka “ Mudimu uvua Shaula ne bua kuenza mu Damaseke.”

3, 4. a) Ntshinyi tshiakafikila Shaula? b) Nnkonko kayi ituandamuna?

³ Diakamue, bukenke bukole buakakenkesha muaba uvua Shaula. Balunda bende bavuaye nabu mu luendu bakamona bukenke abu, kadi bakashala kabayi mua kuakula to. Shaula wakalua mpofu, kufuaye tshipuka. Bu muvuaye kayi mua kumona, wakumvua dîyi difuma mu diulu dimuambila ne: “Shaula, Shaula, bua tshinyi udi unkengesha?” Bu muvuabi bimupitshile, wakebeja ne: “Wewe udi nganyi, Mukalenge?” Bushuwa, diandamuna divuaye mupete diakamulenga ku muoyo bikole: “Meme ndi Yezu uudi ukengesha.”​—Bien. 9:3-5; 22:9.

⁴ Mêyi a kumpala avua Yezu muambile Shaula au adi mua kutulongesha tshinyi? Dikonkonona mianda ivua mifikishe Shaula ku dilua muena Kristo didi mua kutuambuluisha mushindu kayi? Mmalongesha kayi atudi mua kupetela ku mushindu uvua tshisumbu  tshienze malu mu tshikondo tshia ditalala tshivua tshimueneke pakavua Shaula mulue muena Kristo?

5, 6. Mêyi avua Yezu muambile Shaula adi mua kutulongesha tshinyi?

⁵ Pavua Yezu muimanyike Shaula mu njila wa ku Damaseke, kavua mumuebeje ne: “Bua tshinyi udi ukengesha bayidi banyi?” Anu mutukadi bamone kuulu eku, wakamba ne: “Bua tshinyi udi unkengesha?” (Bien. 9:4) Bushuwa, Yezu utu umona ntatu itu bayidi bende batuilangana nayi.​—Mat. 25:34-40, 45.

⁶ Bobu bakukengesha bua muudi muitabuje Kristo, ikala mutuishibue ne: Yehowa ne Yezu mbamanye lutatu luebe. (Mat. 10:22, 28-31) Pamuapa kabakukumbushilalu mpindieu to. Vuluka ne: Yezu uvua mumone muvua Shaula mubuelakane mu lufu lua Stefano ne muvuaye upulumuna bayidi bende ba lulamatu ku nzubu yabu uya nabu ku Yelushalema. (Bien. 8:3) Kadi kakela dîyi tshikondo atshi to. Nansha nanku ku butuangaji buende, Yehowa wakapesha Stefano ne bayidi bakuabu bukole buvua bukengela bua bashale anu bamulamate.

7. Ntshinyi tshiudi ne bua kuenza bua wewe kutantamena buluishi?

⁷ Wewe pebe udi mua kutantamena buluishi wewe muenze malu adi alonda aa: 1) Mudisuike bua kushala ne lulamatu nansha bia kumona lufu. 2) Mulombe Yehowa diambuluisha. (Filip. 4:6, 7) 3) Mushile Yehowa didisombuela mu bianza. (Lomo 12:17-21) 4) Mutuishibue ne: Yehowa neakupeshe bukole bua kunanukila too ne padiye umona ne: mbikumbane bua kukumbushila lutatu.​—Filip. 4:12, 13.

8, 9. Mmunyi muvua Anania ne bua kuikala mumvue bua mudimu uvuabu bamupeshe?

⁸ Yezu mumane kuandamuna lukonko lua Shaula lua ne: “Wewe udi nganyi, Mukalenge?” wakamuambila ne: “Juka, ndaku mu tshimenga, ne nebakuambile tshiudi ne bua kuenza.” (Bien. 9:6) Bu muvua Shaula kayi umona, bakaya nende ku nzubu uvuaye usombela ku Damaseke, kuvuaye mujile biakudia ne musambile matuku 3. Anu dîba adi, Yezu wakambila muyidi mukuabu uvua mu tshimenga atshi uvuabu babikila ne: Anania bualu bua Shaula. “Bena Yuda bonso bavua basombele [mu Damaseke bavua] bakula bimpe bua bualu” bua Anania.​—Bien. 22:12.

⁹ Difuanyikijilabi buôwa buvua Anania ne bua kuikala mumvue! Yezu Kristo, Mfumu wa tshisumbu ukavua mubishibue ku lufu, wakayukila  nende kumupeshaye mudimu wa pa buawu wa kuenza. Anania uvua mupete diakalenga dinene, kadi tshivua mudimu mukole. Pavua Yezu mumuambile ne: uvua ne bua kuyukila ne Shaula, wakamuandamuna ne: “Mukalenge, ndi mumvue malu a muntu eu kudi bantu ba bungi, ne malu mabi onso avuaye muenzele bansantu bebe mu Yelushalema. Munemu kabidi udi ne bukokeshi bua kudi bamfumu ba bakuidi bua kukuata bantu bonso badi babila dîna diebe.”​—Bien. 9:13, 14.

10. Mushindu uvua Yezu muenzele Anania malu udi utulongesha tshinyi?

¹⁰ Yezu kavua mutandishe Anania bua muvuaye muleje buôwa buvuaye nabu to. Kadi wakamuleja malu a kulonda patoke. Wakamutua mushinga, kumuambilaye bua tshinyi uvua musue bua enze mudimu wa pa buawu au. Yezu wakamba bua Shaula ne: “Muntu au udi tshivuadi tshindi musungule bua kuya ne dîna dianyi kudi bisamba bikuabu, kabidi ne kudi bakalenge ne bana ba Isalele. Bualu nemmuleje patoke bungi bua malu adiye ne bua kukenga bua dîna dianyi.” (Bien. 9:15, 16) Anania wakatumikila Yezu diakamue. Wakakeba Shaula mukengeshanganyi au, kumuambilaye ne: “Shaula, muanetu, Mukalenge Yezu uvua mukumuenekele mu njila muuvua ulua mmuntume bua upetulule lumonu ne uwujibue tente ne nyuma muimpe.”​—Bien. 9:17.

11, 12. Mianda idi itangila Yezu, Anania, ne Shaula idi itulongesha tshinyi?

¹¹ Malu malelela a bungi adi amueneka patoke mu bualu ebu budi butangila Yezu, Anania, ne Shaula. Tshilejilu, Yezu udi ulombola mudimu wa diyisha, anu muvuaye mulaye. (Mat. 28:20) Nansha mudiye kayi uyukila ne yonso wa kutudi buludiludi, udi ulombola mudimu wa diyisha eu ku butuangaji bua mupika wa lulamatu udiye muteke ku mutu kua bena mudimu bende. (Mat. 24:45-47) Ku  bulombodi bua Kasumbu kaludiki, badi batuma bamanyishi ne bampanda-njila bua kukeba bantu badi basue kumanya malu a Kristo a bungi. Anu mutuvua bamone mu nshapita mushale, ba bungi ba kudibu mbasambile bakeba diambuluisha, pashishe Bantemu ba Yehowa baye kumonangana nabu.​—Bien. 9:11.

¹² Anania wakitaba mudimu au, kumubeneshabu. Utuku utumikila dîyi dituma dia kufila bumanyishi buonso menemene, nansha mudimu eu wowu ukukuatshisha kabuôwa anyi? Bamue badi mua kumvua bibi bua kuyisha ku nzubu ne ku nzubu anyi kuyukila ne bantu badibu kabayi bamanye. Bidi mua kukolela bakuabu bua kuyisha bantu miaba idibu benzela midimu, mu misesu, anyi kubayishila  ku telefone peshi kubafundila mikanda. Anania wakadiata buôwa, kupetaye diakalenga dia kuambuluisha Shaula bua kupeta nyuma muimpe. b Wakapatula bipeta bimpe bualu wakeyemena Yezu ne wakamona Shaula bu muena Kristo nende. Anu bu Anania, tuetu petu tudi mua kudiata buôwa tuetu bikale ne dishindika dia ne: Yezu udi ulombola mudimu wa diyisha, tuetu tuditeka pa muaba wa bantu, ne tumona badi batutshinyisha bikole bu bantu balua bena Kristo netu.​—Mat. 9:36.

13, 14. Tshilejilu tshia Shaula tshidi mua kukulongesha tshinyi biwikala ulonga Bible, kadi kuyi muanji kubatijibua?

¹³ Shaula wakatumikila malu avuaye mulonge ne lukasa. Bobu bamane kumuondopa, wakangata batismo, kutuadijaye kudisangisha ne bayidi ku Damaseke. Kadi ki nkujike to. “Wakatuadija diakamue kuyisha bualu bua Yezu mu nsunagoga ne: yeye eu mmuana wa Nzambi.”​—Bien. 9:20.

¹⁴ Biwikala ulonga Bible kadi kuyi muanji kubatijibua, newangataku pebe dipangadika ne lukasa bua kutumikila malu audi ulonga anu bu Shaula anyi? Bushuwa, Shaula wakadimuenena ne ende abidi tshishima tshivua Kristo muenze, kakuyi mpata tshiakamusaka ku tshienzedi. Kadi bantu bakuabu bakamona pabu bishima bivua Yezu muenze. Tshilejilu, Bafalese bakamona Yezu wondopa muntu uvua ne tshianza tshiuminyine, bena Yuda ba bungi bavua bamanye ne: uvua mubishe Lazalo ku lufu. Kadi ba bungi ba kudibu kabakamuteleja to, bavua mene bamukine. (Mâko 3:1-6; Yone 12:9, 10) Shaula yeye wakashintuluka. Bua tshinyi yeye wakatumikila, kadi bakuabu kabayi batumikile? Bualu uvua utshina Nzambi pamutu pa kutshina bantu, ne uvua ne dianyisha dia bungi bua luse luvua Kristo mumuleje. (Filip. 3:8) Wewe muenze bia muomumue, kuakulekela tshintu tshikupangisha bua kuditua mu mudimu wa diyisha ne kuya too ne ku batismo to.

15, 16. Ntshinyi tshivua Shaula muenze mu nsunagoga? Ntshinyi tshivua bena Yuda bavua mu Damaseke benze?

¹⁵ Difuanyikijilabi muvua bantu mua kuikala bakeme, bibapitshile, ne bumvue tshiji pavuabu bamone Shaula utuadija kuyisha bualu  bua Yezu mu nsunagoga. Bakebeja ne: “Muntu eu ki nguvua ukengesha bantu bavua babila dîna edi mu Yelushalema muikale ne tshikisu anyi?” (Bien. 9:21) Pavua Shaula mumvuije muvuaye mushintuluke bua bualu bua Yezu, “[wakajadika] malu malondangane bimpe ne: eu udi Kristo.” (Bien. 9:22) Kadi bakuabu kabatu bitaba nansha bobu babajadikile malu malondangane bimpe to. Muntu udi mulamate ku bilele bia bankambua bikole ne muena lutambishi udi mua kubenga pende kuitaba nansha bobu bamujadikile malu malondangane bimpe. Nansha nanku, Shaula kakalekela to.

¹⁶ Bidimu bisatu pashishe, bena Yuda ba mu Damaseke batshivua anu bakokangana ne Shaula. Ndekelu wa bionso, bakakeba bua kumushipa. (Bien. 9:23; 2 Kol. 11:32, 33; Gal. 1:13-18) Pakamanya Shaula tshifufu tshivuabu bele atshi, wakumbuka mu tshimenga atshi mu mayele, kumupuekeshilabu mu tshitunga pa disoso dia tshimanu tshia tshimenga. Luka wakabikila bavua bamuambuluishe bua kupanduka butuku abu ne: “bayidi [ba Shaula].” (Bien. 9:25) Bidi bimueneka ne: mêyi aa adi aleja ne: bamue bavua bateleje diyisha dia Shaula mu Damaseke bakaditaba ne bakalua bayidi ba Kristo.

17. a) Mmunyi mutu bantu bakidila bulelela bua mu Bible? b) Ntshinyi tshitudi ne bua kutungunuka ne kuenza? Bua tshinyi?

¹⁷ Pauvua mutuadije kuambila bena mu dîku dienu, balunda bebe, anyi bantu bakuabu malu mimpe auvua wenda ulonga, pamuapa uvua wela meji ne: muntu yonso neitabe bulelela bua mu Bible budi bumueneka patoke. Pamuapa bamue bavua bitabe, kadi ba bungi kubengabu. Bena mu dîku dienu badi mua kuikala bakuenzele malu bu muena lukuna wabu. (Mat. 10:32-38) Kadi wewe mutungunuke ne kulengeja mushindu webe wa kueleshishangana meji ne malu a mu Mifundu ne wewe mulame bikadilu biebe bia buena Kristo, nansha bantu badi kabayi bitaba badi ndekelu wa bionso mua kushintulula muoyo wabu.​—Bien. 17:2; 1 Pet. 2:12; 3:1, 2, 7.

18, 19. a) Tshiakenzeka ntshinyi pavua Bânaba mulondele bapostolo malu a Shaula? b) Mmunyi mutudi mua kuidikija Bânaba ne Shaula?

¹⁸ Pakafika Shaula ku Yelushalema, bayidi kabakitaba pavuaye muambe ne: ukavua muyidi to. Kadi pavua Bânaba mulondele bapostolo malu a Shaula, bakamuitaba, ne wakashala nabu tshikondo kampanda. (Bien. 9:26-28) Shaula uvua mutalame, kadi kakumvua bundu bua lumu luimpe to. (Lomo 1:16) Wakayisha ne dikima mu Yelushalema, muaba muine uvuaye mukengeshile bayidi ba Yezu Kristo ne tshikisu tshionso. Pakamanya bena Yuda bavua mu Yelushalema ne: tshilobo tshiabu tshivua tshishintuluke, bakumvua tshiji tshikole, kukebabu bua kumushipa. Bible udi wamba ne: “Pakumvua bana betu bualu ebu, bakapueka [ne Shaula] ku Kaisalia, kumutumabu ku  Tâso.” (Bien. 9:30) Shaula wakitaba buludiki bua Yezu buvuaye mufile kupitshila mu tshisumbu. Biakamuambuluisha yeye ne tshisumbu.

¹⁹ Mona ne: Bânaba wakambuluisha Shaula diakamue. Kakuyi mpata, tshienzedi atshi tshiakambuluisha batendeledi ba Yehowa ba tshisumi abu bua kuluabu balunda banene. Anu bu Bânaba, udiku wambuluisha bapiabapia mu tshisumbu ne muoyo mujima, uyisha nabu, ne ubambuluisha bua bakole mu nyuma anyi? Wewe muenze nanku, neupete difutu dinene. Anu bu Shaula, wewe muikale mumanyishi mupiamupia wa lumu luimpe, utuku witaba padibu bakuambuluisha anyi? Paudi uyisha ne bamanyishi bapiluke, neulengeje nyishilu webe, neuvudije disanka diebe, ne neudie bulunda budi mua kushala kashidi.

20, 21. Mmushindu kayi uvua Bantu ba Nzambi ba kale ne ba lelu benze malu mu ‘bikondo bia ditalala’?

²⁰ Shaula mumane kulua muena Kristo ne muye mu bukubi, “tshisumbu tshiakabuela mu tshikondo tshia ditalala mu Yudaya mujima, mu Galela, ne mu Samalea.” (Bien. 9:31) Mmunyi muvua bayidi benze malu tshikondo tshimpe atshi? (2 Tim. 4:2) Bible udi wamba ne: bavua ‘benda bakoleshibua.’ Bapostolo ne bana betu ba balume bakuabu bavua batangila tshisumbu bakakolesha ditabuja dia bayidi ne bakalombola tshisumbu bu muvuatshi “tshienda mu ditshina dia Yehowa ne mu busambi bua nyuma muimpe.” Tshilejilu, tshikondo atshi Petelo wakakolesha bayidi bavua mu tshimenga tshia Luda mu Mpata wa Shalona. Didienzeja diende diakasaka ba bungi bavua basombele mu tshimenga atshi bua kuitabuja “Mukalenge.” (Bien. 9:32-35) Bayidi bakadienzeja bikole bua kuikala kutabalelangana ne kuyisha lumu luimpe, kadi kabakalekela bipatshila bikuabu bibapangisha bua kuenza nanku to. Ke bualu kayi, tshisumbu “tshivua tshienda anu tshivulangana.”

²¹ Lua ku ndekelu kua bidimu bia 1900, Bantemu ba Yehowa ba mu matunga a bungi bakabuela mu tshikondo tshia muomumue tshia “ditalala.” Makalenge avua makengeshishe bantu ba Nzambi munkatshi mua makumi a bidimu akatua ku ndekelu diakamue, ne bakatekesha imue mikenji ivua ikandika mudimu wa diyisha anyi bakayumbusha. Bantemu binunu ne binunu bakababidila mpunga au bua kuyisha patoke, ne bakapatula bipeta bia dikema.

22. Mmunyi muudi mua kuenza malu bimpe ne budikadidi buudi nabu?

²² Udiku wenza malu bimpe ne budikadidi buudi nabu anyi? Wewe musombele mu ditunga didi ne budikadidi mu malu a ntendelelu,  Satana neajinge anu bua wipatshile bintu bia ku mubidi, pamutu pa wewe kuipatshila malu a Bukalenge. (Mat. 13:22) Kubuedi mu ditanaji to. Enza malu bimpe mu tshikondo tshionso tshiudi ne ndambu wa ditalala mpindieu. Mona tshikondo atshi bu mpunga wa kufila bumanyishi buonso menemene ne kukolesha tshisumbu. Kupu muoyo ne: nsombelu webe udi mua kushintuluka diakamue to.

23, 24. a) Bualu bua Tabita budi butulongesha tshinyi? b) Ntshinyi tshitudi ne bua kudisuika bua kuenza?

²³ Mona tshivua tshifikile muyidi mukuabu dîna diende Tabita, anyi Dôka. Uvua musombele mu tshimenga tshia Yopa tshivua pabuipi ne tshia Luda. Muanetu wa bakaji wa lulamatu au, uvua wenza malu ne meji ne dîba diende ne bintu bivuaye nabi; “uvua wenza malu mimpe a bungi ne uvua upeshangana bintu bia luse.” Kadi diakamue wakasama, yeye kufua. c Lufu luende luakanyingalaja bayidi ba mu Yopa bikole, nangananga bakaji bakamba bavuaye wenzela malu ne bulenga. Pakafika Petelo mu nzubu muvuabu balongolola mubidi wa Dôka bua kuwujiika, wakenza tshishima tshivua katshia bapostolo ba Yezu Kristo kabayi banji kuenza to. Petelo wakasambila, kubishaye Tabita ku lufu. Anji difuanyikijilabi bungi bua disanka divua bakaji bakamba abu ne bayidi bakuabu bumvue pavua Petelo mubabikile kabidi mu nzubu mubaleje Tabita muikale ne muoyo! Bushuwa malu au avua ne bua kuikala mabakoleshe bua ntatu ivua mibindile kumpala! Bidi biumvuika bua tshinyi tshishima atshi tshiakamanyika “mu Yopa mujima, ne bantu ba bungi bakalua bena kuitabuja mu Mukalenge.”​—Bien. 9:36-42.

²⁴ Bualu bua Tabita budi bulenga ku muoyo ebu budi butulongesha malu manene abidi. 1) Muoyo ngua tshitupa tshîpi. Nanku mbia mushinga bua tuetu kudikebela dîna dimpe ku mêsu kua Nzambi patutshidi ne muoyo apa. (Muam. 7:1) 2) Ditekemena dia dibishibua dia bantu ku lufu mbualu bulelela. Yehowa wakamona malu a bungi avua Tabita wenza ne bulenga, ne wakamufuta. Neavuluke mudimu wetu mukole ne neatubishe ku lufu tuetu bafue kumpala  kua Armagedone. (Eb. 6:10) Nunku nansha tuetu mu “bikondo bikole” mpindieu anyi mu “tshikondo tshia ditalala,” tutungunukayiku ne kufila bumanyishi buonso menemene bua bualu bua Kristo.​—2 Tim. 4:2.