1-3. a) Stefano uvua mu nsombelu kayi mukole? Mmunyi muvuaye mumvue? b) Nnkonko kayi ituandamuna?

 STEFANO mmuimane kumpala kua banzuji. Mu nzubu munene uvua pamuapa pabuipi ne ntempelo mu Yelushalema, banzuji 71 mbasombe benze tshijengu tshinene. Banzuji abu mbasombe lelu bua kumulumbuluisha. Mbantu banene ne badi ne bukole bua bungi; ba bungi ba kudibu kabena banemeka muyidi wa Yezu au to. Muakuidi munene Kayifa ke udi mubikidishe banzuji abu, yeye ke uvua ulombola Tshilumbuluidi tshinene pavuatshi tshikosele Yezu Kristo tshibawu tshia lufu kukadi ngondo ndambu. Stefano udiku uzakala bua buôwa anyi?

² Mpala wende wakabambila bualu bua dikema dîba adi. Banzuji bakamutangila bimpe, kumonabu mpala wende “anu bu mpala wa muanjelu.” (Bien. 6:15) Banjelu badi bamanyisha mikenji ya Yehowa Nzambi kabavua ne bualu bua kutshinyina to, bakashala mu ditalala batukije. Bivua kabidi nanku bua Stefano; nansha balumbuluishi bavua bamukine bikole abu bakamona pabu bualu abu. Ntshinyi tshivua tshimuambuluishe bua kushala mutukije nanku?

³ Diandamuna dia lukonko elu didi mua kulongesha bena Kristo malu a bungi lelu. Tudi basue kumanya petu tshivua tshifikishe Stefano ku nsombelu mukole au. Mmunyi muvuaye muakuile ditabuja diende kumpala? Mmushindu kayi utudi mua kumuidikija?

4, 5. a) Bua tshinyi Stefano uvua ne mushinga wa bungi mu tshisumbu? b) Mmushindu kayi uvua Stefano “muwule tente ne dianyishibua dia Nzambi ne bukole”?

⁴ Tukadi bamone ne: Stefano uvua ne mushinga wa bungi mu tshisumbu tshipiatshipia tshia bena Kristo. Mu nshapita mushale wa mukanda eu, tuvua bamone ne: Stefano uvua mu bena budipuekeshi 7 bavua  bitabe bua kuambuluisha bapostolo pavuabu bababikile bua kuambuluisha. Budipuekeshi buende budi bumueneka kabidi patoke patudi tutangila bipedi bivuaye nabi. Tudi tubala mu Bienzedi 6:8 ne: uvua ne bukole bua kuenza “malu manene a kukema ne bimanyinu binene,” anu muvua bapostolo bakuabu benze. Tudi tubalamu kabidi ne: uvua “muwule tente ne dianyishibua dia Nzambi ne bukole.” Mbuena kuamba tshinyi?

⁵ Muaku wa mu tshiena Greke udibu bakudimune ne: “dianyishibua dia Nzambi” badi mua kuwukudimuna kabidi ne: “dianyisha.” Bushuwa Stefano uvua ne bulenga, uvua muena bupole, ne bantu bavua bamuanyisha bikole. Uvua wakula mu mushindu wa kuitabijija bantu ba bungi bavua bamuteleja, ubashindikila ne muoyo mujima bulelela buvuaye ubambila. Uvua muwule tente ne bukole bualu nyuma wa Yehowa uvua nende, ne uvua utumikila bulombodi bua nyuma au ne budipuekeshi. Pamutu pa kuditumbisha bua mamanya ne bipedi bivuaye nabi, wakapesha Yehowa butumbi buonso, ne uvua uditatshisha bikole bua bantu bavuaye uyukila nabu. Ke bualu kayi, bena lukuna bende bakamona ne: kavua muntu wa kulekela to.

6-8. a) Baluishi ba Stefano bakamufunda ne malu kayi abidi? Bua tshinyi? b) Bua tshinyi tshilejilu tshia Stefano tshidi ne mushinga kudi bena Kristo lelu?

⁶ Bantu ba bungi bakajuka bua kukokangana ne Stefano, kadi “kabavua mua kuimana kumpala kua meji ne nyuma bivuaye wakula nabi to.” a Bu muvuabu bedibue mâyi ku makasa, “bakitabujija bantu mu musokoko” bua kufunda muyidi wa Kristo uvua kayi ne bualu au. ‘Bakasonsola kabidi bantu,’ bakulu, ne bafundi bua kuyabu ne Stefano ku Tshilumbuluidi tshinene ku bukole. (Bien. 6:9-12) Baluishi bakamufunda ne malu abidi aa: uvua mupende Nzambi ne Mose. Mushindu kayi?

⁷ Bantu bavua babande Stefano ne malu a dishima abu bakamba ne: uvua mupende Nzambi bua muvuaye muakule bibi bua “muaba wa tshijila,” mmumue ne: ntempelo wa mu Yelushalema. (Bien. 6:13) Bakamubanda ne: uvua mupende Mose bua muvuaye muakule bibi bua mikenji ya Mose, mu mêyi makuabu uvua mushintulule bilele bikavua Mose muambile bantu. Dimubanda adi divua dibi menemene, bualu tshikondo atshi bena Yuda bavua bangata ntempelo, ne malu a mu mikenji ya Mose, ne bilele bia bungi bia malu mamba mukana bivuabu basakidile mu mikenji ayi ne mushinga wa bungi. Nunku dibanda Stefano adi divua dileja ne: uvua muntu mubi menemene uvua mukumbanyine lufu.

 ⁸ Bia dibungama, pa tshibidilu bantu batu batendelela batu benza mudimu ne mayele a nanku bua kukebela bantu ba Nzambi ntatu. Lelu eu kabidi, kutu misangu itu baluishi ba malu a ntendelelu basaka bamfumu ba panu apa bua kukengesha Bantemu ba Yehowa. Ntshinyi tshitudi ne bua kuenza padibu batubanda ne malu a dishima? Stefano udi mua kutulongesha malu a bungi.

9, 10. Bamue mbabipishe muyuki wa Stefano ku Tshilumbuluidi tshinene mushindu kayi? Ntshinyi tshitudi katuyi mua kupua muoyo?

⁹ Anu mutukadi bamone ku ntuadijilu, mpala wa Stefano uvua mutukije anu bu wa muanjelu, pavuaye uteleja malu avuabu bamubanda nawu. Ke Kayifa kumuebeja ne: “Ke mudibi nanku anyi?” (Bien. 7:1) Mpindieu Stefano ke uvua ne bua kuakula. Wakakula bushuwa.

¹⁰ Bamue mbabipishe muyuki wa Stefano bamba ne: nansha muvuaye muakule mutantshi mule kakaleja ne: bivuabu bamubanda nabi abi bivua bia dishima to. Mu bulelela Stefano wakatushila tshilejilu tshimpe menemene tshia mutudi mua “kumvuija” lumu luimpe. (1 Pet. 3:15; [Mukanda wa Mvidi Mukulu (Katolike)]) Katupu muoyo ne: bavua babande Stefano ne: uvua mupende Nzambi bualu uvua muakule bibi bua ntempelo ne uvua mupende Mose bualu uvua muakule bibi bua mikenji yende to. Diandamuna divua Stefano mufile ndiamba mu tshikoso mu bikondo bisatu bia malu a bena Isalele mudibu bashindike bimpe menemene ngenyi mikuabu. Tumonayi bikondo abi ku tshimue ku tshimue.

11, 12. a) Mmunyi muvua Stefano mufile bimpe tshilejilu tshia Abalahama? b) Bua tshinyi bivua ne mushinga bua Stefano akule bua Jozefe?

¹¹ Tshikondo tshia bankambua. (Bien. 7:1-16) Stefano wakatuadija kuakula bua Abalahama uvua bena Yuda banemeka bua ditabuja diende. Bu muvuaye mubange ne bualu bua mushinga buvuabu bitaba abu, wakajadika ne: Yehowa “Nzambi wa butumbi” wakamuenekela Abalahama ku kale mu Mezopotamia. (Bien. 7:2) Tshikondo atshi uvua musombe buenyi mu Buloba Bulaya. Kavua nansha ne ntempelo anyi mikenji ya Mose to. Bua tshinyi tudi tushindika ne: lulamatu kudi Nzambi luvua anu ne bua kuikala lusuikila ku malu au?

¹² Bantu bavua bateleja Stefano bavua banemeka kabidi Jozefe bikole bualu uvua kankanunuina ka Abalahama, kadi wakabavuluija ne: bana babu ne Jozefe, batatu ba bisa bia Isalele, bakakengesha muntu muakane au, kumupanabu mu bupika. Nansha nanku, Nzambi wakamuangata bua kupandisha Isalele ku tshiyole tshia nzala. Kakuyi mpata, Stefano wakajingulula malu avua apetangana bimpe pankatshi pa Jozefe ne Yezu Kristo; kadi kavua mualeje to, bua kulama bavua bamuteleja abu mutantshi mule.

13. Mmunyi muvua mêyi avua Stefano muambe bua Mose maleje ne: uvua mubenge malu avuabu bamubanda nawu? Ndungenyi lunene kayi luvuaye muleje ne muoyo mujima?

 ¹³ Tshikondo tshia Mose. (Bien. 7:17-43) Stefano wakakula bikole bua Mose; bivua bimpe akule nanku, bualu ba bungi ba ku bena ku Tshilumbuluidi tshinene bavua Basodoke bavua babenga mikanda mikuabu yonso ya mu Bible pa kumbusha anu ivua Mose mufunde. Tuvuluke kabidi ne: bakamubanda muvuaye mupende Mose. Mêyi ende akaleja muvuaye mubenge buludiludi bivuabu bamubanda nabi abi, bualu wakajadika ne: uvua unemeka Mose ne mikenji yende bikole. (Bien. 7:38) Wakaleja ne: bavua babenge Mose pende kudi bantu bavuaye udienzeja bua kupandisha. Bakamubenga pavuaye ne bidimu 40. Bidimu bipite pa 40 pashishe, bakabenga bukokeshi buende misangu ya bungi. b Nunku Stefano wakaleja lungenyi lunene elu ne muoyo mujima: bantu ba Nzambi bakabenga bavuaye muteke bua kubalombola misangu ne misangu.

14. Nngenyi kayi ivua Stefano mupatuile mu tshilejilu tshia Mose?

¹⁴ Mose ukavua mumanyishe ne: muprofete bu yeye uvua ne bua kujukila mu Isalele, Stefano wakavuluija bavua bamuteleja bualu abu. Nnganyi uvua ne bua kuikala muprofete au? Bavua ne bua kumuakidila mushindu kayi? Stefano wakalama mandamuna bua kuafila ku ndekelu. Wakaleja bualu bukuabu ebu: Mose wakalonga ne: buloba buonso budi mua kulua bua tshijila anu bu bua muaba uvua kamutshi kalakuka mudilu, uvua Yehowa muakule nende. Nunku bua tuetu kutendelela Yehowa anu tuetu bikale ne nzubu umue, bu mudi ntempelo wa mu Yelushalema anyi? Tumonayi.

15, 16. a) Bua tshinyi bivua ne mushinga bua Stefano akule bua ntenta wa tshitendelelu mu muyuki wende? b) Mmunyi muvua Stefano muakule bua ntempelo wa Solomo mu muyuki wende?

¹⁵ Ntenta wa tshitendelelu ne ntempelo.  (Bien. 7:44-50) Stefano wakavuluija banzuji ne: kumpala kua kuasabu ntempelo mu Yelushalema, Nzambi uvua muambile Mose bua kuenza ntenta wa tshitendelelu uvuabu benda nende bua kutendelela. Nnganyi uvua mua kuamba ne: ntenta wa tshitendelelu au uvua mushadile ku ntempelo, pende Mose nkayende mutendelelamu?

¹⁶ Pashishe pavua Solomo muibake ntempelo mu Yelushalema, Nzambi wakamusaka bua kupatula dilongesha dia mushinga mu disambila divuaye muenze. Stefano wakenza yeye disambila adi ne: “Mutambe Bunene kena usomba mu nzubu mienza ku bianza to.” (Bien. 7:48; 2 Kul. 6:18) Yehowa uvua mua kuenza mudimu ne ntempelo bua kukumbaja malu adiye mulongolole, kadi katu usombamu to. Nanku bua tshinyi ki mbimpe batendeledi bende bele meji ne: ntendelelu mukezuke udi ne bua kuenzekela anu mu nzubu muibaka ku bianza bia bantu? Stefano wakajikija muyuki wende ne mêyi a bukole a mu mukanda wa Yeshaya aa: “Diulu didi nkuasa wanyi wa bukalenge, ne buloba budi tshitekelu tshianyi tshia makasa. Nenungibakile nzubu wa mushindu kayi? Ke mudi Yehowa wamba. Peshi muaba wanyi wa kuikishila udi penyi? Ki ntshianza tshianyi tshivua tshienze bintu bionso ebi anyi?”​—Bien. 7:49, 50; Yesh. 66:1, 2.

17. Mmunyi muvua muyuki wa Stefano a) muele meji mabi a bantu bavua bamuteleja patoke? b) mubenge malu avuabu bamubanda nawu?

¹⁷ Too ne muaba eu, wewe mulondeshe bimpe muyuki wa Stefano ku Tshilumbuluidi tshinene, kuenaku umona ne: wakaleja bimpe menemene meji mabi avua nawu bantu bavua bamubanda anyi? Wakaleja kabidi ne: malu adi Nzambi mulongolole adi enzeka anu ku kakese ku kakese, ki mmajame anyi mmimanyine pa bilele bia bantu to. Bantu bavua banemeka ntempelo mulenga wa mu Yelushalema au bikole pamue ne bibidilu ne bilele bivua bifumina ku mikenji ya Mose bavua bapue muoyo tshipatshila tshinene tshivua Nzambi muelele Mikenji ayi ne muibakishe ntempelo. Muyuki wa Stefano wakajula lukonko lua mushinga elu kabiyi buludiludi to: Kanuenaku nunemeka mikenji ya Mose bikole pamue ne ntempelo panudi nutumikila Yehowa anyi? Bushuwa mêyi a Stefano au akaleja muvuaye wakuila bimpe menemene bienzedi biende, bualu uvua utumikila Yehowa muvuabi bikengela.

18. Mmu mishindu kayi mutudi ne bua kudienzeja bua kuidikija Stefano?

¹⁸ Muyuki wa Stefano udi mua kutulongesha tshinyi? Uvua mumanye Mifundu bimpe menemene. Bia muomumue, mbimpe tuikale petu balongi ba Dîyi dia Nzambi ba tshisumi bua tumone mua kulongesha “dîyi dia bulelela bimpe menemene.” (2 Tim. 2:15) Mushindu uvua Stefano wakula ne bulenga ne bukalanga udi mua kutulongesha pawu. Bantu bavua bamuteleja bavua bumvue luonji lua bungi. Nansha nanku wakashala nabu mutantshi mule, kupetanganaye nabu pa kubambila malu  avuabu bangata ne mushinga wa bungi. Wakayukila kabidi nabu ne kanemu, ubikila bantu bakulumpe ne: “batatu.” (Bien. 7:2) Tuetu petu tudi ne bua kuyisha bulelela bua mu Dîyi dia Nzambi ne “bupole ne kanemu kakole.”​—1 Pet. 3:15.

19. Mmunyi muvua Stefano mumanyishe mukenji wa Yehowa wa dilumbuluisha ku Tshilumbuluidi tshinene ne dikima?

¹⁹ Kadi katuena tualukila tshianyima bua kuamba bulelela bua mu Dîyi dia Nzambi tutshina bantu badi batukebela ntatu, anyi katuena tukonyangaja mukenji wa Yehowa wa dilumbuluisha to. Stefano ntshilejilu tshimpe mu bualu ebu. Kakuyi mpata, wakamona ne: bijadiki bionso bivuaye mufile ku Tshilumbuluidi tshinene kabivua ne diambuluisha kudi banzuji ba mioyo mipape abu to. Nyuma muimpe wakamusaka kabidi bua kujikija muyuki wende, ubaleja ne dikima ne: bavua anu bu bankambua babu bavua babenge Jozefe, Mose, ne baprofete bonso. (Bien. 7:51-53) Bushuwa, banzuji abu bavua bashipe Masiya, uvua Mose ne baprofete bonso bamanyishe dilua diende. Mu bulelela, bakashipa mikenji ya Mose bibi bitambe!

20, 21. Ntshinyi tshivua banzuji benze pakumvuabu mêyi a Stefano? Yehowa wakamukankamija mushindu kayi?

²⁰ Malu malelela avua Stefano muambile banzuji abu akabajula luonji lua bungi. Bu muvuabu bajimije bunême buabu buonso, bakatuadija kudila Stefano dînu. Muena lulamatu au uvua ne bua kuikala mumone ne: kabakumumvuila luse to, anu muvuabu kabayi balumvuile Mfumuende Yezu.

²¹ Stefano uvua dijinga ne dikima bua kutua malu avua mamuindile kumpala tshiadi. Kakuyi mpata, tshikena kumona tshivua Yehowa mumumueneshe ne bulenga tshiakamukankamija bikole. Wakamona butumbi bua Nzambi, kumonaye kabidi Yezu muimane ku tshianza tshia balume tshia Yehowa. Pakumvuijaye tshikena kumona atshi, banzuji bende bakajika bianza biabu ku matshi. Bua tshinyi? Kumpala, Yezu ukavua muambile banzuji bamue bamue abu ne: uvua Masiya ne mu matuku makese uvua ne bua kusomba ku tshianza tshia balume tshia Tatu wende. (Mâko 14:62) Tshikena kumona tshia Stefano tshiakajadika ne: Yezu uvua muambe bulelela. Ndekelu wa bionso, banzuji bakavua batungile Masiya ne bamushipe abu, bakadisuika tshimuku, kuyabu lubilu kudi Stefano, kumushipabu ne mabue. c

22, 23. Mmushindu kayi uvua lufu lua Stefano lufuanangane ne lua Mfumuende? Mmunyi mudi bena Kristo lelu mua kuikala ne muoyo mukole anu bu Stefano?

 ²² Stefano wakafua mu mushindu wa muomumue menemene ne Mfumuende, ne ditalala mu muoyo, mueyemene anu Yehowa, kufuilaye bavua bamushipe luse. Wakamba ne: “Mukalenge Yezu, angata muoyo wanyi,” pamuapa bualu utshivua umona Muana wa muntu ne Yehowa mu tshikena kumona. Kakuyi mpata, Stefano uvua mumanye mêyi a Yezu adi akolesha aa: “Meme ndi dibishibua ku lufu ne muoyo.” (Yone 11:25) Ndekelu wa bionso, wakalomba Nzambi buludiludi ne dîyi dikole ne: “Yehowa, kubabadidi mpekatu eu to.” Yeye mumane kuamba nanku, wakalala tulu mu lufu.​—Bien. 7:59, 60.

²³ Nunku wakalua muntu wa kumpala uvuabu bashipe bua ditabuja diende munkatshi mua bayidi ba Kristo. (Tangila kazubu ka “ Wakafuila ditabuja diende mu ngumvuilu kayi?”) Bia dibungama, kavua wa ndekelu to. Too ne matuku etu aa, mbashipe bamue batendeledi ba Yehowa ba lulamatu kudi bena mu bitendelelu, bena tshididi, ne kudi baluishi bakuabu ba tshikisu. Kadi kudi malu adi atusaka bua kuikala anu ne muoyo mukole bu Stefano. Yezu ukadi ukokesha bu Mukalenge, ne udi wenza malu ne bukokeshi bua dikema budi Tatu wende mumupeshe. Kakuena tshintu tshiamupangisha bua kujula bayidi bende ba lulamatu ku lufu to.​—Yone 5:28, 29.

24. Mmunyi muvua Shaula muambuluishe bua bashipe Stefano? Panyima pa bidimu wakalua kumvua munyi bua lufu lua muntu muakane au?

²⁴ Nsongalume mukuabu diende Shaula uvua mumone malu onso au. Wakitaba bua bashipe Stefano, kulaminaye too ne bavua bamuasa mabue bilamba. Katupa kakese pashishe, wakajula buluishi bukole menemene. Kadi lufu lua Stefano luvua ne bua kuambuluishangana bikole. Tshilejilu tshiende tshivua ne bua kukolesha bushuwa bena Kristo bakuabu bua kushala ne lulamatu ne kutshimuna anu bu yeye. Bualu bukuabu, Shaula (wakaluabu kubikila ne: Paulo panyima pa bidimu) wakalua kunyingalala bikole bua muvuaye muanyishe lufu lua Stefano. (Bien. 22:20) Wakambuluisha bua bashipe Stefano, kadi wakalua kujingulula ne: uvua “mupendi wa Nzambi, mukengeshanganyi ne mupange bukalanga.” (1 Tim. 1:13) Bidi bimueneka patoke ne: Paulo kavua mupue Stefano muoyo to, nansha muyuki wa tshikuma uvuaye muenze dituku adi. Bushuwa, mu imue miyuki ya Paulo ne mikanda ivuaye mufunde mudi mêyi avua Stefano muambe. (Bien. 7:48; 17:24; Eb. 9:24) Mu kupita kua matuku, Paulo wakalonga mua kulonda bimpe tshilejilu tshia ditabuja ne dikima tshivua Stefano mushiye. Stefano uvua “muwule tente ne dianyishibua dia Nzambi ne bukole.” Netuenze petu nanku anyi?