1, 2. Ntshishima kayi tshivua Petelo ne Yone benze pabuipi ne tshiibi tshia ntempelo?

 MUSUMBA wa bantu uvua musombe pa munya mu mapingaja. Bena Yuda bavua banange malu a Nzambi ne bayidi ba Kristo bavua benda balua ku ntempelo. “Dîba dia disambila” dikavua pa kukumbana. a (Bien. 2:46; 3:1) Petelo ne Yone bavua benda badipengela njila mu musumba wa bantu bavua baya batangile ku tshiibi tshia ntempelo tshivuabu babikila ne: Tshilengele. Dîyi dia muntu mukuabu mukulumpe uvuabu balele mulema uvua ulomba ka pa luse divua diumvuika bikole kupita mitoyi ya bavua bayukila ne ya makasa a bantu bavua babanda bapueka.​—Bien. 3:2; 4:22.

² Pavua Petelo ne Yone benda basemena, mulombi wa ka pa luse au uvua anu wela mbila ulomba makuta. Bapostolo bakimana, kukokabi ntema yende, kupuwaye. Petelo kuamba ne: “Tshiena ne arjan ne or to, kadi tshindi natshi ke tshindi nkupesha. Mu dîna dia Yezu Kristo muena Nazaleta, enda!” Anji difuanyikijila muvua musumba wa bantu mukeme pavua Petelo mukuate muntu mulema au ku tshianza, kuimanaye kuulu bua musangu wa kumpala. (Bien. 3:6, 7) Elabi meji a muvua muntu au mushale mutangile mikolo yende ikavua miondopibue, uteta kuambula dikasa bua musangu wa kumpala. Kabiena bikemesha bua kumumona wenda utumpika, utumbisha Nzambi ne dîyi dikole.

3. Ntshintu kayi tshia mushinga wa bungi tshivua muntu uvua mulema kumpala ne musumba wa bantu mua kupeta?

³ Musumba wa bantu wakajula lubilu ne disanka dionso mutangile mu mbalanda wa Solomo muvua Petelo ne Yone. Petelo wakabumvuija menemene tshivua muanda uvua ufuma ku dienzeka au muaba muine uvua Yezu muimanyine ne mulongeshile musangu mukuabu. (Yone 10:23) Wakabapesha bobu ne muntu uvua kumpala mulema au tshintu  tshivua ne mushinga wa bungi kupita arjan ne or. Tshintu atshi tshivua ne mushinga wa bungi kupita kuondopibua. Tshivua mpunga wa bobu kunyingalala, kufuidibua luse bua mpekatu yabu, ne kulua bayidi ba Yezu Kristo uvua Yehowa muteke “Mulombodi Munene udi ufikisha ku muoyo.”​—Bien. 3:15.

4. a) Tshishima tshivua tshienzeke tshiakakebesha tshimvundu kayi? b) Nnkonko kayi ibidi ituandamuna?

⁴ Divua dituku dia dikema! Bakondopa muntu umue, kutuadijaye kuenda. Bantu bakuabu binunu ne binunu bakapeta diakalenga dia kuondopibua mu nyuma bua bamone mua kuenda mu mushindu udi muakanangane ne Nzambi. (Kolos. 1:9, 10) Bualu bukuabu, mianda ivua mienzeke dituku adi yakakebesha tshimvundu pankatshi pa bayidi ba Yezu ba lulamatu ne bakokeshi bavua bajinga kubapangisha bua kukumbaja dîyi divua Yezu mutume dia kumanyisha mukenji wa Bukalenge. (Bien. 1:8) Petelo ne Yone ‘bavua kabayi balonge ne bikale bantu tshianana’ bakafila bumanyishi kumpala kua musumba munene wa bantu. Mushindu uvuabu bafile bumanyishi au ne ngenzelu wabu wa malu bidi mua kutulongesha tshinyi? b (Bien. 4:13) Kabidi, mmunyi mutudi mua kubidikija bobu ne bayidi bakuabu pavuabu babaluishe?

5. Mushindu uvua Petelo muakule kumpala kua musumba wa bantu udi utulongesha tshinyi?

⁵ Petelo ne Yone bavua bimane kumpala kua musumba wa bantu, bavua bamanye ne: bamue ba kudibu bavua bela mbila matuku adi panshi aa balomba bua bapopele Yezu ku mutshi. (Mâko 15:8-15; Bien. 3:13-15) Elabi meji muvuabi bilombe Petelo dikima bua kuleja patoke ne: muntu uvua mulema au uvua muondopibue mu dîna dia Yezu. Petelo kakakonyangaja bulelela to. Wakapisha musumba wa bantu kayi udia tshibanga ne: uvua pawu mukebeshe lufu lua Kristo. Kadi Petelo kakenzela bantu abu malu ne lukuna to, bualu bavua “benze malu mu dipanga.” (Bien. 3:17) Wakababikila ne: bana betu, ne wakimanyina pa malu mimpe a mukenji wa Bukalenge. Bobu banyingalale ne bitabuje Kristo, bavua ne bua kupeta “bikondo bia dikoleshibua” bifumina kudi Yehowa. (Bien. 3:19) Tuetu petu tudi ne bua kumanyisha bantu mukenji wa Nzambi wa dilumbuluisha didi dilua ne dikima dionso katuyi tudia tshibanga to. Kabidi, katukoleshi malu anyi katubamonyi bibi nansha. Kadi mbimpe tumone batudi tuyisha bu bantu balua bena Kristo netu, ne anu bu Petelo tuimanyine nangananga pa malu mimpe a mukenji wa Bukalenge.

6. Mmunyi muvua Petelo ne Yone baleje budipuekeshi ne bupuekele?

 ⁶ Bapostolo bavua ne bupuekele bua bungi. Kabakaditumbisha bua bishima bivuabu benze to. Petelo wakambila bantu abu ne: “Bua tshinyi nudi nututangila bienze anu bu ne: tudi bamuendeshe ku bukole buetu tuetu anyi bua dilamata dietu dia Nzambi?” (Bien. 3:12) Petelo ne bapostolo bakuabu bavua bamanye ne: ki nku bukole buabu kuvuabu benze malu mimpe onso au mu mudimu wabu to, kadi nku bukole bua Nzambi. Ke bualu kayi, bakatumbisha Yehowa ne Yezu ne bupuekele buonso bua malu avuabu benze au.

7, 8. a) Ntshintu kayi tshitudi mua kupesha bantu? b) Mmunyi mudi mulayi wa “dijadikulula tshiakabidi bintu bionso” ukumbana lelu eu?

⁷ Mbimpe tuikale petu ne bupuekele bua muomumue patudi tuyisha Bukalenge. Bushuwa, nyuma wa Nzambi kena upesha bena Kristo ba lelu bukole bua kuondopangana mu bishima to. Nansha nanku, tudi mua kuambuluisha bantu ba bungi bua kuitabuja Nzambi ne Kristo ne bua kupetabu tshintu tshia buena tshivua Petelo mufile, mmumue ne: mpunga wa kufuidibua luse bua mpekatu yabu ne kukoleshibua kudi Yehowa. Tshidimu tshionso etshi, bantu binunu nkama ne nkama badi bitaba tshintu atshi ne babatijibua balua bayidi ba Kristo.

⁸ Tudi bushuwa mu tshikondo tshia “dijadikulula tshiakabidi bintu bionso” tshivua Petelo muakuile. Bakajadika Bukalenge mu diulu mu 1914 bua kukumbaja dîyi divua “Nzambi mumanyishe mukana mua baprofete bende ba tshijila ba kale.” (Bien. 3:21; Mis. 110:1-3; Dan. 4:16, 17) Katupa kakese pashishe, Kristo wakatuadija kutangila mudimu wa dijadikulula ntendelelu mulelela pa buloba. Nunku bantu miliyo ya bungi bakabuela mu Mparadizu wa mu nyuma, kuluabu bena dia Bukalenge bua Nzambi. Mbavule bumuntu bua kale budi bunyanguke, ne ‘mbavuale bumuntu bupiabupia buvua bufukibue bilondeshile disua dia Nzambi.’ (Ef. 4:22-24) Anu muvuabi bua muntu mulema uvua muondopibue au, mudimu wa dikema eu mmukumbane ku bukole bua nyuma wa Nzambi kadi ki nku bukole bua bantu to. Anu bu Petelo, tulongeshayi petu bakuabu Dîyi dia Nzambi bimpe ne dikima dionso. Dîba dionso ditudi tuambuluisha bantu balua bayidi ba Kristo bidi bienzeka ku bukole bua Nzambi kadi ki nku bukole buetu to.

9-11. a) Mmunyi muvua bamfumu bena Yuda benze malu pavuabu bateleje mukenji wa Petelo ne Yone? b) Bapostolo bavua badisuike bua kuenza tshinyi?

⁹ Muyuki wa Petelo, ditumpika, ne mbila ya muntu uvua kumpala mulema au biakayumbakaja bantu bikole. Ke mutangidi wa ku ntempelo (muntu uvuabu bateke bua kulama lubanza lua ntempelo) ne bamfumu ba bakuidi kuyabu lubilu bua kumona tshivua tshienzeka.  Pamuapa bantu abu bavua Basadoke (kasumbu ka bantu bavua ne bubanji ne bukole bua bungi mu malu a tshididi) bavua benza bua ditalala dikale pankatshi pabu ne bena Lomo, babenga mikenji ya mukana ivua Bafalese banange bobu bikole, ne baseka dilongesha dia dibishibua dia bantu ku lufu. c Biakabapesha tshiji pakamonabu Petelo ne Yone mu ntempelo, balongesha ne dikima dionso ne: Yezu ukavua mubishibue ku lufu.

¹⁰ Baluishi ba Petelo ne Yone bavua ne tshiji abu bakabela mu buloko, ne pakatshiabu bakaya nabu kumpala kua kabadi kanene ka bena Yuda. Ku mêsu kua bamfumu bavua badimone bapite bakuabu kule ne kule, Petelo ne Yone “kabavua balonge ne bavua bantu tshianana” bavua kabayi ne bukenji bua kulongesha mu ntempelo to. Kabavua balonge mu tshilongelu nansha tshimue tshivua tshimanyike to. Kadi bena ku kabadi bakakema bikole bua muvuabu bamba malu patoke ne dishindika dionso. Ntshinyi tshivua tshibambuluishe menemene nanku? Bumue bualu buvua ne: “bavua ne Yezu.” (Bien. 4:13) Mfumuabu uvua mubalongeshe ne bukokeshi bulelela, kadi ki mbu bafundi to.​—Mat. 7:28, 29.

¹¹ Kabadi kakatumina bapostolo dîyi bua balekele kuyisha. Tshikondo atshi, pavua kabadi katuma dîyi muntu nansha umue kavua mua kuela diapa muulu to. Mbingu ndambu kumpala, pavua Yezu mumueneke kumpala kua kabadi kamue kamue aku, benaku bakamba ne: “Mmukumbanyine lufu.” (Mat. 26:59-66) Nansha nanku Petelo ne Yone kabakatshina to. Bakimana kumpala kua babanji, bantu banene, ne bantu bavua balonge bikole abu, kuakulabu kabayi batshina, kadi ne kanemu konso bamba ne: “Bikalabi bimpe ku mêsu kua Nzambi bua kunuteleja nuenu pamutu pa kuteleja Nzambi, abu mbualu buenu. Kadi buetu tuetu, katuena mua kulekela kuakula bua malu atudi bamone ne bumvue to.”​—Bien. 4:19, 20.

12. Ntshinyi tshidi mua kutuambuluisha bua kuikala ne dikima ne dishindika?

¹² Wewe pebe udi mua kuleja dikima dia muomumue anyi? Mmunyi muutu umvua pautu upeta mpunga wa kuyisha babanji, bantu badi balonge bikole, ne bantu banene muaba uudi? Kadi bobu bakuseke kudi bena mu dîku dienu anyi balongi benu anyi bena mudimu nebe bua ditabuja diebe, newenze tshinyi? Utu utshina anyi? Biobi nanku, udi mua kutshimuna buôwa abu. Patshivua Yezu pa buloba, wakalongesha bapostolo mua kuakuila ditabuja diabu ne kanemu ne dishindika dionso. (Mat. 10:11-18) Yeye mumane kubishibua ku lufu, wakalaya bayidi bende ne: uvua ne bua kutungunuka ne kuikala nabu “matuku onso too ne ku nshikidilu kua ndongoluelu wa malu eu.” (Mat. 28:20) Ku bulombodi bua Yezu, “mupika wa lulamatu udi  mudimuke” udi utulongesha mua kuakuila ditabuja dietu. (Mat. 24:45-47; 1 Pet. 3:15) Udi utulongesha ku diambuluisha dia bisangilu bia tshisumbu, bu Tshisangilu tshia Nsombelu ne mudimu wetu wa buena Kristo, ne mikanda ya malu a mu Bible bu mudi biena-bualu bia “Mandamuna a nkonko ya malu a mu Bible” bidi mu site wa jw.org. Utuku ulonda bisangilu bimpe ne ubala bimpe mikanda ayi anyi? Wewe wenza nanku, dikima diebe ne dishindika diebe nebivule. Anu bu bapostolo, kuakulekela tshintu nansha tshimue tshikupangisha bua kuakuila malu malenga audi mumone ne mumvue to.

13, 14. Ntshinyi tshitudi ne bua kuenza tuetu tutuilangana ne buluishi? Bua tshinyi?

¹³ Diakamue bobu bamane kupatula Petelo ne Yone mu buloko, bakaya kutuilangana ne bena mu tshisumbu bakuabu. “Bakabandisha mêyi abu kudi Nzambi” tshiapamue, kumulombabu dikima bua batungunuke ne kuyisha. (Bien. 4:24) Petelo uvua mumanye bimpe ne: kueyemena bukole buetu patudi tujinga kuenza disua dia Nzambi nkupangila lungenyi. Mbingu ndambu kumpala, wakambila Yezu udituta mu tshiadi ne: “Nansha bakuabu bonso balenduke bua bualu buebe, meme tshiakulenduka nansha kakese!” Kadi bua ditshina dia bantu, Petelo wakavila Yezu mulunda wende ne mulongeshi wende, anu mukavua Yezu mumuambile. Tshilema tshiende tshiakamulongesha.​—Mat. 26:33, 34, 69-75.

¹⁴ Kudisuika nkayaku kakuakukuambuluisha bua kukumbaja mudimu webe wa kuikala ntemu wa Kristo nansha. Idikija tshilejilu tshia Petelo ne Yone padi baluishi bajinga kunyanga ditabuja diebe anyi basua kukukandika bua kuyisha. Lomba Yehowa bukole. Keba diambuluisha kudi bena mu tshisumbu. Ambila bakulu ne bena Kristo bakuabu bashindame ntatu iudi utuilangana nayi. Masambila a bakuabu adi mua kukupetesha bukole.​—Ef. 6:18; Yak. 5:16.

15. Bua tshinyi bantu bavua balekele kuyisha bua tshikondo kampanda kabena ne bua kuteketa mu maboko?

 ¹⁵ Biobi ne: bantu bakadi bakutatshishe bua kulekela kuyisha bua tshikondo kampanda, kuteketshi mu maboko to. Vuluka ne: panyima pa lufu lua Yezu, bapostolo bonso bakalekela kuyisha bua tshikondo kampanda, kadi bakalua kutuadijilula kabidi mudimu au. (Mat. 26:56; 28:10, 16-20) Pamutu pa kulekela bilema biuvua muenze bikutshibuila panshi, udi mua kukolesha bakuabu ne malongesha avua bilema abi bikupeteshe.

16, 17. Disambila divua bayidi ba Kristo benze mu Yelushalema didi mua kutulongesha tshinyi?

¹⁶ Ntshinyi tshitudi ne bua kulomba Yehowa padi bakokeshi batukengesha? Mona ne: bayidi ba Kristo kabavua balombe bua babepule ku ntatu to. Bakavuluka bimpe mêyi a Yezu aa: “Bikalabu bankengeshe, nebanukengeshe penu.” (Yone 15:20) Nunku bayidi ba lulamatu abu bakalomba Yehowa bua ‘atangile’ mifunu ya baluishi babu. (Bien. 4:29) Bu muvuabu bamone bimpe nsombelu au mu bibadi bionso, bakajingulula ne: dikengeshibua diabu divua dikumbaja milayi ya buprofete. Bavua bamanye ne: anu bu mukavua Yezu mubalongeshe bua kusambila, disua dia Nzambi divua ne bua ‘kuenzeka pa buloba’ nansha bakokeshi betu ba patupu aba mua kuamba tshinyi.​—Mat. 6:9, 10.

¹⁷ Bayidi bavua basue kuenza disua dia Yehowa, nunku bakamulomba bua ‘ambuluishe bapika bende bua batungunuke ne kuamba dîyi diende ne dikima dionso.’ Yehowa wakabandamuna diakamue. “Muaba uvuabu badisangishe wakakanka, yonso wa kudibu kuwujibuaye tente ne nyuma muimpe ne bavua bamba dîyi dia Nzambi ne dikima.” (Bien. 4:29-31) Kakuena tshintu nansha tshimue tshidi mua kupangisha disua dia Nzambi bua kuenzekadi to. (Yesh. 55:11) Nansha biobi bimueneka bikole, nansha baluishi betu bobu ne bukole bua mushindu kayi, tuetu bele Nzambi lubila tuikale batuishibue ne: neatupeshe bukole bua kutungunuka ne kuamba dîyi diende ne dikima dionso.

18. Ntshinyi tshivua bena Kristo ba mu tshisumbu tshia mu Yelushalema benzelangana?

¹⁸ Tshisumbu tshivua tshifuma ku dienjibua mu Yelushalema tshiakatanta bikole mu matuku makese ne bantu ba bukole bapite pa 5 000. d Nansha muvuabu ba miaba mishilashilangane, bavua ne “lungenyi lumue ne anyima umue.” Bavua tshintu tshimue mu meji amue ne mu lungenyi lumue. (Bien. 4:32; 1 Kol. 1:10) Pa kumbusha dilomba Yehowa bua abeneshe didienzeja diabu, bayidi bakenza kabidi malu makuabu. Bakakoleshangana mu nyuma ne pavuabi bikengela bavua bambuluishangana ne bintu. (1 Yone 3:16-18) Tshilejilu, Jozefe muyidi uvua bapostolo babikila ne: Bânaba wakapana tshitupa tshiende tshia buloba, kufilaye makuta onso ne muoyo mujima bua kuambuluisha bena kuitabuja bavua bafume ntanta bashale mu Yelushalema bua kulonga malu a bungi avua atangila ditabuja diabu dipiadipia.

19. Bua tshinyi Yehowa wakashipa Anania ne Sapila?

¹⁹ Anania ne mukajende Sapila bakapana pabu tshitupa tshia buloba, kufilabu dipa. Bakashima ne: bavua bafile makuta onso, kadi pabu ‘basokoke tshitupa tshia makuta.’ (Bien. 5:2) Yehowa wakabashipa, ki mbualu kabavua bafile makuta makumbane to, kadi mbualu bavua baafile ne meji mabi ne bavua bashime. ‘Kabakashima bantu to, kadi bakashima Nzambi.’ (Bien. 5:4) Anu bu bena lubombo bavua Yezu mupishe, Anania ne Sapila bakakeba nangananga bua bantu babatumbishe pa mutu pa kukebabu bua Nzambi abanyishe.​—Mat. 6:1-3.

20. Mmalongesha kayi atudi tupetela ku mushindu utudi tupesha Yehowa mapa?

²⁰ Lelu eu, anu bu bayidi ba lulamatu ba mu bidimu lukama bia kumpala mu Yelushalema bavua ne muoyo wa kufila, Bantemu miliyo ne miliyo badi bafila mapa ku budisuile bua kukuatshisha mudimu wa buloba bujima wa diyisha. Kabatu benzeja muntu bua kufila dîba diende anyi makuta ende bua kukuatshisha mudimu eu to. Bushuwa Yehowa ki mmusue tumuenzele mudimu ne muoyo mukuatshidile anyi bu benzeja ku bukole to. (2 Kol. 9:7) Patudi tufila, tshidi tshimusankisha ki mbungi to, kadi mmeji adi atusaka bua kufila. (Mâko 12:41-44) Katuidikiji Anania ne Sapila, tumuenzela mudimu bua kudisankisha tuetu anyi tukeba butumbi nansha. Kadi anu bu Petelo, Yone, ne Bânaba, dinanga dilelela ditudi banange Nzambi ne muntu netu dikale ditusaka misangu yonso bua kumuenzela mudimu.​—Mat. 22:37-40.