1-3. a) Bua tshinyi bakaya ne bapostolo ku Tshilumbuluidi tshinene? Mbualu kayi menemene buvuaku? b) Bua tshinyi mushindu uvua bapostolo benze malu udi ukoka ntema yetu bikole?

 BALUMBULUISHI ba ku Tshilumbuluidi tshinene mbumvue tshiji tshikole. Bapostolo ba Yezu badi balumbulula kumpala kuabu. Bua tshinyi? Jozefe Kayifa, muakuidi munene uvua mfumu wa Tshilumbuluidi atshi, wakabambila ne dîsu dikole ne: “Tuvua banukandike bikole bua kanutungunuki ne kulongesha mu dîna edi.” Mfumu uvua ne tshiji au kavua nansha musue kutela dîna dia Yezu to. Wakatungunuka ne: “Kadi . . . nudi buwuje Yelushalema ne malongesha enu, ne nudi badisuike bua kuteka mashi a muntu au pambidi petu.” (Bien. 5:28) Mukenji mmutoke: kanuyishi kabidi to, tshianana nebanunyoke.

² Bapostolo nebenze tshinyi? Yezu uvua Nzambi mupeshe bukokeshi ke uvua mubapeshe mudimu wa kuyisha. (Mat. 28:18-20) Bapostolo nebumvue buôwa bua bantu, bashala bapuwe anyi? Peshi nebapetaku dikima dia kushala bashindame bua kutungunuka ne kuyisha? Bualu menemene buvua ne: nebatumikile Nzambi anyi muntu? Mupostolo Petelo wakakula mu dîna dia bapostolo bonso kayi welakana. Wakaleja malu patoke ne dikima.

³ Mutudi bena Kristo balelela, mushindu uvua bapostolo benze malu pavua bena ku Tshilumbuluidi tshinene babafunyina udi ukoka ntema yetu bikole. Tuetu petu tudi ne mudimu wa kuyisha. Batu batuluisha patudi tukumbaja mudimu udi Nzambi mutupeshe eu. (Mat. 10:22) Baluishi badi mua kuteta bua kutupangisha bua kuenza mudimu eu anyi kuwukandika. Netuenze tshinyi? Kukonkonona mushindu uvua bapostolo benze malu ne nsombelu ivua mibafikishe ku dilumbulula ku Tshilumbuluidi tshinene kudi mua kutuambuluisha. a

4, 5. Bua tshinyi Kayifa ne Basadoke ‘bakuwula tente ne mukawu’?

⁴ Vuluka ne: pavuabu bakandike bapostolo diyisha bua musangu wa kumpala, Petelo ne Yone bakandamuna ne: “Katuena mua kulekela kuakula bua malu atudi bamone ne bumvue to.” (Bien. 4:20) Petelo, Yone, pamue ne bapostolo bakuabu bamane kutuilangana ne bena ku Tshilumbuluidi tshinene, bakatungunuka ne kuyisha mu ntempelo. Bakenza bimanyinu binene, bu mudi kuondopa babedi ne kuipata bademon. Bakenza nanku “mu Mbalanda wa Solomo,” lutanda lubuikila luvua lua ku est kua ntempelo, muvua bena Yuda ba bungi badisangishila. Bidi bimueneka ne: nansha mundidimbi wa Petelo wakondopa bantu. Ba bungi bavuabu bondope bakitaba bulelela bua mu Dîyi dia Nzambi. Ke bualu kayi, “bena kuitabuja mu Mukalenge bavua benda bakumbajibua, bantu ba bungi balume ne bakaji.”​—Bien. 5:12-15.

⁵ Kayifa ne Basadoke (kasumbu ka malu a ntendelelu kavuaye,) ‘bakuwula tente ne mukawu,’ kuelabu bapostolo mu buloko. (Bien. 5:17, 18) Bua tshinyi Basadoke bavua bumvue tshiji tshia bungi? Bavua babalongeshe ne: Yezu uvua mubishibue ku lufu, kadi Basadoke kabavua bitabuja dibishibua dia bantu ku lufu to. Bapostolo bavua bamba ne: muntu uvua mua kupandishibua anu yeye muitabuje Yezu, kadi Basadoke bavua batshina bua bena Lomo kababanyoki bantu bobu bitaba Yezu bu Mfumuabu. (Yone 11:48) Kabiena bikemesha muvuabu badisuike bua kupuwisha bapostolo to.

6. Mbanganyi batu batamba kukebela batendeledi ba Yehowa dikengeshibua lelu? Bua tshinyi kabiena mua kutukemesha?

⁶ Lelu eu kabidi, baluishi ba malu a ntendelelu ke batu batamba kukebela batendeledi ba Yehowa dikengeshibua. Misangu ya bungi batu bateta kusaka bamfumu ba mbulamatadi ne bena ku tudiomba bua kutupangisha bua kuenza mudimu wetu wa kuyisha. Bidi mua kutukemesha anyi? Tòo. Mukenji wetu udi wela bitendelelu bia dishima patoke. Padi bantu badi bakaje mioyo yabu bitaba bulelela bua mu Bible badi bapeta budikadidi ku malongesha ne bilele bidi kabiyi mu Bible. (Yone 8:32) Kadi bidiku mua kutukemesha mudi mukenji wetu utamba kujula bamfumu ba bitendelelu mukawu ne lukinu lua bungi anyi?

7, 8. Kakuyi mpata, dîyi dituma divua muanjelu mutumine bapostolo diakabambuluisha mushindu kayi? Ndukonko kayi lutudi mua kudiela?

⁷ Pavua bapostolo basombe mu buloko bindile bua babalumbuluishe, bakadiebeja pamuapa bikala bena lukuna babu bakavua pa kubakengesha bikole bua ditabuja diabu. (Mat. 24:9) Kadi butuku, bualu bua dikema ebu buakenzeka: “Muanjelu wa Yehowa wakunzulula  biibi bia buloko.” b (Bien. 5:19) Pashishe yeye kubapesha buludiki busunguluke ebu: “Nuimane mu ntempelo,” ne “nutungunuke ne kuambila bantu mêyi onso adi atangila muoyo eu.” (Bien. 5:20) Kakuyi mpata, dîyi dituma adi diakajadikila bapostolo ne: bavua benze tshivua tshiakane. Pamuapa mêyi a muanjelu au akabakolesha kabidi bua kushala bashindame nansha bualu kayi mua kubafikila. “Bakabuela mu ntempelo patshiatshia, kutuadijabu kulongesha” ne ditabuja dikole ne dikima dionso.​—Bien. 5:21.

⁸ Mbimpe yonso wa kutudi adikonke ne: ‘Nengikale ne ditabuja ne dikima bidi bikengedibua bua kuikala anu kuyisha nansha mu nsombelu ya muomumue anyi?’ Kumanya ne: banjelu badi batukuatshisha ne batulombola mu mudimu wa mushinga mukole wa “kufila bumanyishi buonso menemene pa bidi bitangila Bukalenge bua Nzambi” kudi mua kutukolesha.​—Bien. 28:23; Buak. 14:6, 7.

9-11. Ntshinyi tshivua bapostolo benze pavua bena ku Tshilumbuluidi tshinene babakandike bua kuyisha? Ntshilejilu kayi tshivuabu bashile bena Kristo balelela?

⁹ Kayifa ne balumbuluishi bakuabu ba ku Tshilumbuluidi tshinene bakavua mpindieu badiakaje bua kutangila tshilumbu tshia bapostolo. Bu muvuabu kabayi bamanye tshivua tshienzeke mu buloko, bakatuma balami bua kuya kukeba bena buloko abu. Anji elabi meji muvua balami abu bakeme pavuabu basangane mu buloko mutupu, nansha muvuabu ‘bukanga bimpe ne balami bimane ku biibi.’ (Bien. 5:23) Katantshi aka, mutangidi wa ntempelo kumvuaye ne: bapostolo bakavua bapingane ku ntempelo, bayisha bualu bua Yezu Kristo, tuambe ne: mudimu muine uvuabu babelele mu buloko. Mutangidi au ne  balami bende bakaya ku ntempelo ne lukasa bua kubakeba ne kuya nabu ku Tshilumbuluidi tshinene.

¹⁰ Anu mudibi bileja ku ntuadijilu kua nshapita eu, bamfumu ba bitendelelu bavua ne tshiji abu bakaleja patoke muvuabu bajinga bua bapostolo balekele kuyisha. Bapostolo bakenza tshinyi? Petelo wakandamuna mu dîna diabu ne dikima dionso ne: “Tudi ne bua kutumikila Nzambi bu mfumu pamutu pa kutumikila bantu.” (Bien. 5:29) Katshia anu pine apu, bapostolo bakashila bena Kristo balelela ba mu bipungu bionso tshilejilu tshia kulonda. Padi bamfumu basambuka mikalu ya bukenji budibu nabu bakandika malu adi Nzambi utulomba anyi batulomba adiye ukandika, katuena tubatumikila to. Ke bualu kayi matuku etu aa, padi “bakokeshi badi ku mutu” bakandika mudimu wetu wa kuyisha lumu luimpe, katuena mua kulekela kukumbaja mudimu udi Nzambi mutupeshe eu to. (Lomo 13:1) Kadi tudi tukeba mishindu mikuabu misokome ya mua kutungunuka ne kufila bumanyishi buonso menemene bua Bukalenge bua Nzambi.

¹¹ Bushuwa, mushindu uvua bapostolo bandamune ne dikima wakabandisha kabidi luonji lua balumbuluishi bakavua ne tshiji abu. Bavua badisuike ‘bua kushipa’ bapostolo. (Bien. 5:33) Mpindieu bivua bimueneke bushuwa ne: bavua bashipa bantemu ba dikima ne ba tshisumi abu bua ditabuja diabu. Kadi diambuluisha dia dikema dikavua pa kumueneka.

12, 13. a) Mmubelu kayi uvua Gamaliele mupeshe bena diende? Bakenza tshinyi? b) Mmunyi mudi Yehowa mua kuakuila bantu bende lelu? Tuikale batuishibue tshinyi yeye muanyishe bua ‘tukenge bua bualu bua buakane’?

¹² Gamaliele uvua “mulongeshi wa Mikenji uvua bantu bonso banemeka” wakangata dîyi. c Bavua ne bua kuikala banemeka mumanyi wa mikenji au bikole kudi bena diende, bualu wakakula ne dîyi dia bumfumu, ‘kutumaye too ne dîyi bua bapatule bapostolo bua tshitupa tshîpi.’ (Bien. 5:34) Wakaleja bena ku Tshilumbuluidi bilejilu bia bantu bakavua bajule buntomboji kadi bedibue mâyi ku makasa ne lukasa pavua balombodi babu bafue, kubambilaye bua bikale ne bapostolo lutulu, bavua Mfumuabu Yezu utshifuma ku difua. Wakabeleshisha meji bimpe ne: “Kanubuelakanyi mu malu a bantu aba to, kadi balekelayi. Bualu bikala bualu ebu anyi mudimu eu ufumina kudi bantu, nebawutonkole; kadi bikalawu ufumina kudi Nzambi, kanuakukokesha bua kubatonkola to. Tshianana, nudi mua kumueneka nukadi nuluisha Nzambi muine.” (Bien. 5:38, 39) Balumbuluishi bakateleja mubelu wende. Kadi bakelesha  bapostolo mfimbu, kubatuminabu dîyi bua “kabakudi kabidi mu dîna dia Yezu nansha.” ​—Bien. 5:40.

¹³ Lelu kabidi, Yehowa udi mua kujula bantu banene bu Gamaliele bua kuakuila bantu bende. (Nsu. 21:1) Yehowa udi mua kuenza malu ne nyuma wende bua kusaka bantu ba bukole bu mudi bakokeshi, banzuji, anyi bedi ba mikenji bua kuenza malu bilondeshile disua diende. (Neh. 2:4-8) Kadi yeye muanyishe bua ‘tukenge bua bualu bua buakane,’ tuikale batuishibue ne malu abidi. (1 Pet. 3:14) Bua kumpala, udi mua kutupesha bukole bua kutantamena ntatu. (1 Kol. 10:13) Buibidi, baluishi ‘kabakutshimuna’ mudimu wende to.​—Yesh. 54:17.

14, 15. a) Mmunyi muvua bapostolo bumvue pavuabu babele mfimbu? Bua tshinyi? b) Londa bualu budi buleja ne: bantu ba Yehowa badi bananukila ne disanka.

¹⁴ Mfimbu ivuabu bele bapostolo ivuaku mibatshiokeshe peshi mitekeshe dipangadika diabu anyi? Tòo. “Bakumbuka ku Tshilumbuluidi tshinene benda basanka.” (Bien. 5:41) Bua tshinyi ‘bakasanka’? Bushuwa ki mbua muvua mututu au ubasama to. Bakasanka bualu bavua bamanye ne: bavua bakengeshibua bua muvuabu bashale balamate Yehowa ne balonda mu makasa a Yezu Tshilejilu tshiabu.​—Mat. 5:11, 12.

¹⁵ Anu bu bana betu ba mu bidimu lukama bia kumpala abu, tudi tunanukila ne disanka patudi tukenga bua lumu luimpe. (1 Pet. 4:12-14) Katutu basue padibu batuzakeja, batukengesha, anyi batuela mu buloko to. Kadi tudi tumvua disanka dia bungi patudi tulama muoyo wetu mutoke. Tuangate tshilejilu tshia Henryk Dornik uvua munanukile mu ntatu mikole mu makalenge a batshikokesha nkaya munkatshi mua bidimu bia bungi. Udi uvuluka ne: mu ngondo wa 8 wa 1944, bakokeshi bakapangadija bua kumutuma yeye ne muanabu mu kamponyi ka dienzejangana mudimu mukole. Baluishi abu bakabambila ne: “Kakuena mushindu wa kubenzeja bualu nansha bumue ku bukole to. Kufuila ditabuja diabu kudi kubapetesha disanka.” Muanetu Dornik udi umvuija ne: “Nansha mumvua tshiyi ne dijinga dia kufuila ditabuja dianyi, kukenga ne dikima ne bunême bua lulamatu luanyi kudi Yehowa kuakansankisha.”​—Yak. 1:2-4.

16. Mmunyi muvua bapostolo baleje ne: bavua badisuike bua kuyisha bikole? Mmunyi mutudi tulonda mushindu uvuabu bayisha au?

 ¹⁶ Bapostolo bakatuadija kuyisha kabidi kabayi bajingakana to. Bakatungunuka ne mudimu wa ‘kuamba lumu luimpe lua Kristo dituku dionso mu ntempelo ne ku nzubu ne ku nzubu,’ kabayi batshina nansha. d (Bien. 5:42) Bamanyishi ba tshisumi abu bakadisuika bua kuyisha bikole. Mona ne: bakayisha bantu ku nzubu yabu, anu muvua Yezu Kristo mubambile. (Mat. 10:7, 11-14) Kakuyi mpata, ke mushindu uvuabu buwuje Yelushalema tente ne malongesha abu. Lelu, Bantemu ba Yehowa mbamanyike mudibu balonda mushindu uvua bapostolo bayisha au. Patudi tuyisha ku nzubu ne ku nzubu mu teritware yetu, tudi tuleja petu patoke ne: tudi basue kuyisha bikole bua kupesha muntu yonso mpunga wa kumvua lumu luimpe. Yehowa mmubeneshaku mudimu wetu wa ku nzubu ne ku nzubu anyi? Eyowa. Bantu miliyo ne miliyo mbitabe mukenji wa Bukalenge mu matuku a ku nshikidilu aa, ne ba bungi mbumvue lumu luimpe bua musangu wa kumpala padi Ntemu mukokole ku tshiibi tshiabu.

17-19. Ndutatu lukole kayi luvua lujuke? Mbuludiki kayi buvua bapostolo bafile bua kulujikija?

¹⁷ Tshisumbu tshivua tshifuma ku dienjibua atshi tshiakapeta njiwu ya muinshi muinshi ivua mijuke munda muatshi. Nnjiwu kayi ayi? Bayidi  ba bungi bavua babatijibue bavua benyi mu Yelushalema ne bavua basue kulonga malu a bungi kumpala kua kupingana kuabu. Bayidi ba mu Yelushalema bakafila makuta abu ku budisuile bua kubapetesha biakudia ne bintu bikuabu. (Bien. 2:44-46; 4:34-37) Dîba adi, lutatu lukole kujukalu. ‘Bavua balengulule’ bakaji bakamba bavua bakula tshiena Greke pavuabu “babanya biakudia dituku dionso.” (Bien. 6:1) Kadi kabavua balengulule bakaji bakamba bavua bakula tshiena Ebelu to. Bidi bimueneka ne: kuvua kansungansunga mu tshilumbu atshi. Kansungansunga kadi mua kutapulula bantu bipepele.

¹⁸ Bapostolo bavua benza kasumbu kaludiki ka tshisumbu tshivua tshienda tshitanta atshi bakajingulula ne: kabivua bimpe ‘balekele dîyi dia Nzambi bua kuabanya biakudia to.’ (Bien. 6:2) Bua kujikija tshilumbu atshi, bakambila bayidi bua bakebe bantu balume 7 “buwule tente ne nyuma ne meji” bua babateke ku mutu kua “mudimu wa mushinga” au. (Bien. 6:3) Bavua bakeba bantu balume bakumbane bualu mudimu au kawuvua pamuapa anu wa kuabanya biakudia to, kadi uvua wa kutangila kabidi makuta, kusumba bintu, ne kufunda malu onso bimpe menemene. Bantu balume bavuabu basungule bavua ne mêna a tshiena Greke avua menze pamuapa bua bakaji bakamba bavua banyingalale abu babanyishe. Bapostolo bakateka bantu balume 7 bua kutangila “mudimu wa mushinga” au pakavuabu batate malu bimpe ne basambile. e

¹⁹ Kutangila mudimu wa kuabanya biakudia kuvuaku kuleja ne: bantu balume 7 bavuabu bateke abu kabavua bobu mua kuyisha lumu luimpe anyi? Kabiena nanku to. Mu balume abu muvua Stefano, uvua muleje muvuaye mumanyishi wa dikima ne wa dilambu. (Bien. 6:8-10) Filipo uvua pende umue wa ku bantu balume 7 abu, bavua bamubikila ne: “muambi.” (Bien. 21:8) Bidi bimueneka patoke ne: bantu balume 7 abu bakatungunuka ne kuikala bamanyishi ba Bukalenge ba tshisumi.

20. Lelu, mmunyi mudi bantu ba Nzambi balonda tshilejilu tshia bapostolo?

 ²⁰ Lelu bantu ba Yehowa badi balonda tshilejilu tshia bapostolo. Bana betu ba balume badibu bateka bua kuenza midimu mu tshisumbu badi ne bua kuleja patoke mudibu ne meji a Nzambi ne mudi nyuma muimpe ubalombola. Ku bulombodi bua Kasumbu kaludiki, bana betu ba balume badi bakumbaja ngikadilu milomba ya mu Bible batu babateka bakulu anyi basadidi ba mudimu mu bisumbu. f (1 Tim. 3:1-9, 12, 13) Tudi mua kuamba ne: bana betu aba mbateka ku nyuma muimpe. Bana betu badi benza mudimu mukole aba batu benza ‘midimu ya bungi ya mushinga.’ Tshilejilu, bakulu batu batabalela diambuluisha dimpe didibu bapetesha bana betu ba lulamatu bakadi bakulakaje badi badikengela menemene. (Yak. 1:27) Bamue batu badifila bikole mu kuibaka kua Nzubu ya Bukalenge, kulongolola mpungilu, anyi kuenza mudimu ne bana betu ba mu Komite ya diumvuangana ne mpitadi wa muaba udibu. Basadidi ba mudimu batu benza midimu ya bungi itu kayiyi itangila mudimu wa bulami anyi dilongesha buludiludi to. Bana betu bonso aba badi ne bua kuikala ne nkatshinkatshi pa bidi bitangila midimu idibu nayi mu tshisumbu ne mu bulongolodi, kabayi balengulula mudimu wa kuyisha lumu luimpe lua Bukalenge udi Nzambi mubapeshe.​—1 Kol. 9:16.

21, 22. Ntshinyi tshidi tshileja ne: Yehowa wakabenesha tshisumbu tshipiatshipia?

²¹ Yehowa wakambuluisha tshisumbu tshipiatshipia atshi bua kupanduka ku buluishi buvua bufumina pambelu ne ku lutatu lua ditapuluka luvua lufumina munda. Dibenesha dia Yehowa diakamueneka patoke, bualu tudi tubala ne: “Dîyi dia Nzambi diakatungunuka ne kumuangalaka, ne bungi bua bayidi buvua anu buenda buvulangana bikole mu Yelushalema; ne musumba munene wa bakuidi wakabanga kuitabuja.” (Bien. 6:7) Elu ludi anu lumue lua ku luapolo ya bungi idi mu mukanda wa Bienzedi. (Bien. 9:31; 12:24; 16:5; 19:20; 28:31) Lelu bituku bitukankamija patutu tumvua luapolo ya mudi mudimu wa kuyisha Bukalenge uya kumpala mu bitupa bikuabu bia buloba anyi?

²² Katshia ku bidimu lukama bia kumpala panyima pa Yezu, bamfumu ba bitendelelu bavua ne tshiji tshikole kabakalekela kuluisha bayidi to. Buluishi bukole bukavua pa kutuadija. Anu mutuabimona mu nshapita udi ulonda, bakaluisha Stefano bikole menemene.