1-3. Mmunyi muvua Yezu mumbuke kudi bapostolo bende? Nnkonko kayi idi ijuka?

 BAPOSTOLO ki mbasue bua bijike to. Mbingu ya ndekelu ivua mimpe be! Pakamonabu ne: Yezu uvua mubishibue ku lufu bakasanka bikole. Munkatshi mua matuku 40, wakamuenekela bayidi misangu ne misangu bua kubalongesha ne kubakankamija kabidi. Kadi mpindieu, udi ubamuenekela bua musangu wa ndekelu.

² Bapostolo bavua badisangishe pa Mukuna wa Olive bateleja ne ntema bionso bivua Yezu wamba. Katupa kakese pakajikijaye kuakula, bimueneka ne: wakela bianza muulu, kubabeneshaye. Pashishe kutuadijaye kubanda muulu! Bakamutangila muvuaye wenda ubanda. Ndekelu wa bionso, ditutu diakamubuikila ku mêsu abu. Mmuye, kadi bobu bashale batangile anu muulu.​—Luka 24:50; Bien. 1:9, 10.

³ Bualu abu buakashintulula nsombelu wa bapostolo bikole.  Ntshinyi tshienzabu mpindieu pakadi Mfumuabu Yezu Kristo mubande mu diulu? Tudi batuishibue ne: Mfumuabu mmubalongolole bua kutungunuja mudimu ukavuaye mutuadije. Mmunyi muvuaye mubalongolole bua mudimu wa mushinga eu? Ntshinyi tshiakenzabu? Mmunyi mudibi bitangila bena Kristo lelu? Nshapita wa kumpala wa Bienzedi udi ne mandamuna adi akankamija.

4. Luka wakatuadija mukanda wa Bienzedi mushindu kayi?

⁴ Luka wakatuadija mukanda wende wakula bua Teofilo, muntu umue umue uvuaye mufundile Evanjeliyo wende kumpala. a Bua kumuenekabi patoke ne: mukanda eu udi ulondela wa kumpala, Luka wakatuadija kuambulula mu tshikoso malu avuaye mujikije nawu Evanjeliyo wende, uatela mushindu mukuabu, ne usakidila tumalu tukuabu.

5, 6. a) Ntshinyi tshiambuluisha bayidi ba Yezu bua kulama ditabuja diabu dikole? b) Mmu ngumvuilu kayi mudi ditabuja dia bena Kristo lelu dishindamene pa ‘bijadiki bia bungi bidi bituishangana’?

⁵ Ntshinyi tshiakolesha ditabuja dia bayidi ba Yezu? Bienzedi 1:3 udi wamba bua Yezu ne: “Wakadileja ne muoyo kudibu ku diambuluisha dia bijadiki bia bungi bivua bibatuisha.” Mu Bible, anu Luka “munganga munangibue” ke uvua mutele muaku udibu bakudimune ne: ‘bijadiki bidi bituisha.’ (Kolos. 4:14) Bavua bawutela mu malu a luondapu mu ngumvuilu wa bijadiki bilelela bileja patoke, ne bia kueyemena. Yezu wakafila bijadiki bia nanku. Wakamuenekela bayidi bende misangu ya bungi, imue misangu umuenekela umue anyi babidi, mikuabu bapostolo bonso, ne musangu umue wakamuenekela bena kuitabuja bapite pa 500. (1 Kol. 15:3-6) Mbijadiki bidi bituishangana bushuwa!

⁶ Ditabuja dia bena Kristo balelela lelu ndishindamene padi pa ‘bijadiki bia bungi bidi bibatuisha.’ Kudiku bijadiki bidi bileja ne: Yezu uvua pa buloba, wakafua bua mpekatu yetu, ne wakabishibua ku lufu anyi? Eyowa! Malu a kueyemena adi bantu bavua bamone Yezu ne abu abidi balonde mu Dîyi dia Nzambi adi afila bijadiki bionso bidi bitutuisha. Dilonga malu au pamue ne masambila bidi mua kukolesha ditabuja dietu bikole. Vuluka ne: bijadiki bia kueyemena ke bidi bileja dishilangana pankatshi pa ditabuja dilelela ne ditabuja difofo. Ditabuja  dilelela didi ne mushinga bua kupeta muoyo wa tshiendelele.​—Yone 3:16.

7. Ntshilejilu kayi tshivua Yezu mushile bayidi bende mu dilongesha ne diyisha?

⁷ Yezu uvua kabidi “wakula bua Bukalenge bua Nzambi.” Tshilejilu, wakumvuija milayi ya buprofete ivua ileja ne: Masiya uvua ne bua kukenga ne kufua. (Luka 24:13-32, 46, 47) Pakatokeshaye mudimu wende wa bumasiya, wakela kashonyi pa tshiena-bualu tshia Bukalenge bua Nzambi, bualu uvua Mukalenge Musungula. Bukalenge ke buvua anu tshiena-bualu tshia diyisha dia Yezu, ne bayidi bende lelu badi pabu bayisha anu tshiena-bualu tshimue tshimue atshi.​—Mat. 24:14; Luka 4:43.

8, 9. a) Nngenyi kayi ibidi mibi ivua nayi bapostolo ba Yezu? b) Mmunyi muvua Yezu muakaje meji abu? Bidi bilongesha bena Kristo ba lelu tshinyi?

⁸ Pakadisangisha bapostolo pa Mukuna wa Olive, bakatuilangana ne Yezu bua musangu wa ndekelu pa buloba. Bakamuebeja ne muoyo mujima ne: “Mukalenge, udi upingajila Isalele bukalenge tshikondo etshi anyi?” (Bien. 1:6) Lukonko lumuepele alu luakaleja ne: bavua ne ngenyi mibi ibidi. Lua kumpala, bavua bela meji ne: Bukalenge bua Nzambi bavua ne bua kubupingajila Isalele wa ku mubidi. Luibidi, bavua batekemene bua Bukalenge bulaya abu butuadije kukokesha diakamue, “tshikondo etshi.” Mmunyi muvua Yezu mubambuluishe bua kuakaja meji abu?

⁹ Yezu uvua bushuwa mumanye ne: bavua ne bua kumbusha lungenyi lua kumpala alu ne lukasa. Mu bulelela, bayidi bende bakavua pa kumona diledibua dia tshisamba tshipiatshipia, Isalele wa mu nyuma, anu mu matuku 10 avua alonda. Malanda a pa buawu avua Nzambi mudie ne Isalele wa ku mubidi akavua ku tshibungubungu. Bua lungenyi luibidi, Yezu wakabavuluija ne bulenga buonso ne: “Ki mbualu buenu bua kumanya mêba anyi bikondo bidi Tatu muteke ku bulombodi buende to.” (Bien. 1:7) Yehowa mMunemeki Munene wa dîba. Kumpala kua Yezu kufuaye, wakamba ne: nansha Muana, kavua mumanye ‘dituku ne dîba’ dialua nshikidilu to, kadi “anu Tatu.” (Mat. 24:36) Lelu kabidi, bena Kristo bobu baditatshisha bikole bua dîba dia nshikidilu wa ndongoluelu wa malu eu, mu mushindu kampanda, badi basamisha mutu bua bualu budi kabuyi buabu to.

10. Mmeji kayi avua nawu bapostolo atudi ne bua kuikala nawu? Bua tshinyi?

¹⁰ Kadi mbimpe tudimuke bua katupepeji bapostolo ba Yezu to, bavua balume ba ditabuja dikole. Bakitaba dilongesha ne budipuekeshi buonso. Bualu bukuabu, nansha muvua lukonko luabu lufumina ku ngelelu wa meji mubi, luvua luleja kabidi ne: bavua ne meji mimpe.  Yezu wakambila bayidi bende misangu ne misangu ne: “Nushale batabale.” (Mat. 24:42; 25:13; 26:41) Bavua batabale mu nyuma, bakeba ne muoyo umue bijadiki bia ne: Yehowa ukavua pa kuangata malu mu bianza. Ke meji atudi ne bua kuikala nawu lelu. Eyowa, bidi bikengela tuikale nawu mutudi mu ‘matuku makole a ku nshikidilu aa.’—2 Tim. 3:1-5

11, 12. a) Mmudimu kayi uvua Yezu mupeshe bayidi bende? b) Bua tshinyi bivua bikumbane muvua Yezu mutele nyuma muimpe mu diumvuangana ne mudimu wa diyisha?

¹¹ Yezu wakavuluija bapostolo tshivuabu ne bua kusamishila mutu bikole. Wakamba ne: “Nenupete bukole panupuekela nyuma muimpe, ne nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8) Bivua bikengela kuanji kumanyisha lumu lua dibishibua dia Yezu ku lufu mu Yelushalema muvuabu bamushipe. Kumbukila muntu amu, mukenji uvua ne bua kuyishibua mu Yudaya mujima, pashishe mu Samalea, ne miaba ya kule kabidi.

¹² Mbikumbane muvua Yezu mutele mudimu wa diyisha, yeye mumane kubavuluija mulayi wende wa kubatumina nyuma muimpe bua kubambuluisha. Eu ngumue wa ku miaba mipite pa 40 idibu batele “nyuma muimpe” mu mukanda wa Bienzedi. Misangu ne misangu, mukanda mulenga eu udi uleja patoke ne: katuena mua kukumbaja disua dia Yehowa tuetu katuyi ne nyuma eu to. Nunku bidi ne mushinga wa bungi bua tuikale tusambila pa tshibidilu bua kupeta nyuma au! (Luka 11:13) Tudi nende dijinga mpindieu kupita kuonso eku.

13. Mudimu wa diyisha udibu bapeshe bantu ba Nzambi lelu udi wenzeka too ne penyi? Bua tshinyi tudi ne bua kuwitaba ne muoyo mujima?

¹³ Diumvuija dia “miaba ya kule menemene ya pa buloba” ndishintuluke katshia anu ku tshikondo atshi. Kadi anu mutuvua bamone mu nshapita wa kumpala, Bantemu ba Yehowa mbitabe ne muoyo mujima mudimu wa kuyisha, bamanye ne: Nzambi mmusue bua bantu ba mishindu yonso bumvue lumu luimpe lua Bukalenge buende. (1 Tim. 2:3, 4) Utu udifila ne muebe muonso mu mudimu udi usungila mioyo ya bantu eu anyi? Kuakupeta mudimu mutambe buimpe udi usankisha bu eu muaba mukuabu nansha umue to. Yehowa neakupeshe bukole budi bukengela bua kuwenza. Mukanda wa Bienzedi newukulongeshe malu a bungi adi atangila mishindu mimpe ya kuyisha, ne meji audi mua kuikala nawu bua kupatula bipeta bimpe.

14, 15. a) Ntshinyi tshivua banjelu bambe bua dipingana dia Kristo? Bavua basue kuamba tshinyi? (Tangila kabidi dimanyisha dia kuinshi kua dibeji.) b) Mmunyi muvua dipingana dia Kristo dienzeke “mu mushindu wa muomumue” ne diya diende?

¹⁴ Anu mutudi bamone ku ntuadijilu kua nshapita eu, Yezu wakabanda  muulu, kujiminaye ku mêsu a bapostolo bende. Kadi bapostolo 11 abu bakashala anu muaba au, batangile muulu. Ndekelu wa bionso, banjelu babidi bakabamuenekela, kubatandishabu ne bulenga ne: “Nuenu bena Galela, bua tshinyi nudi bimane batangile muulu? Yezu eu uvuabu bumbushe kunudi mubande mu diulu nealue mu mushindu wa muomumue eu anu munudi bamumone ubanda mu diulu.” (Bien. 1:11) Banjelu bavua basue kuamba ne: Yezu neapingane ne mubidi wa muomumue, anu mutu bitendelelu bikuabu bilongesha anyi? Tòo. Bua tshinyi tudi tuamba nanku?

¹⁵ Banjelu bakamba ne: Yezu neapingane, ki nne mubidi umue umue au to, kadi “mu mushindu wa muomumue eu.” b Wakabanda muulu mushindu kayi? Katshivua umueneka dîba divua banjelu bakula to. Anu bantu balume ndambu abu, mmumue ne: bapostolo ke bavua bajingulule ne: Yezu ukavua mumbuke pa buloba, mubande kudi Tatuende mu diulu. Kristo neapingane mu mushindu wa muomumue. Bikadi bienzeke nanku. Lelu, anu badi ne dijingulula dia malu a mu nyuma ke badi bamanye ne: Yezu ukadiku mu bukokeshi bua bukalenge. (Luka 17:20) Tudi ne bua kujingulula bijadiki bia dikalaku diende ne kubimanyisha bakuabu bua bamone pabu mutudi mu tshikondo tshia kuenza malu ne mitalu.

16-18. a) Bienzedi 1:13, 14 udi utulongesha tshinyi bua didisangisha dia bena Kristo bua kutendelela? b) Tshilejilu tshia Mariya, mamuende wa Yezu tshidi tshitulongesha tshinyi? c) Bua tshinyi bisangilu bia bena Kristo bidi ne mushinga wa bungi lelu?

¹⁶ Bidi biumvuika bua tshinyi bapostolo ‘bakapingana mu Yelushalema ne disanka divule.’ (Luka 24:52) Kadi mmunyi muvuabu mua kuitaba buludiki bua Kristo ne dilongesha diende? Mu Bienzedi 1:13, 14, tudi tubamona badisangishe mu “nzubu wa kuulu,” ne tudi tulonga malu mimpe adi atangila bisangilu bia nanku. Tshikondo atshi mu Palestine, nzubu ya bungi ivua ne nzubu wa kuulu, uvuabu mua kubuelela ku tshibandilu tshia pambelu. “Nzubu wa kuulu” au ke uvua pamuapa pa mutu pa nzubu wa mamuende wa Mâko, udibu batele mu Bienzedi 12:12 anyi? Nansha biobi nanku anyi kabiyi nanku, pamuapa uvua muaba mupepele uvua bantu babuela, ne uvua bayidi ba Kristo badisangishila. Kadi mbanganyi bakalua mu tshisangilu atshi? Bavua benzamu tshinyi?

¹⁷ Tudi tumona ne: tshisangilu atshi katshivua tshitangila anu bapostolo anyi bantu balume to. Kuvua “bantu bakaji bakuabu,” ne Mariya mamuende wa Yezu. Eu ke musangu wa ndekelu udibu  bamutela buludiludi mu Bible. Mbimpe kumona Mariya mu lungenyi muaba au, kayi ukeba lumu, kadi ulua kutendelela pamue ne bena Kristo nende ne budipuekeshi buonso. Uvua pamuapa mukoleshibue bua kuikala ne bana bende ba balume bakuabu banayi ku luseke luende, bavua kabayi balue bena kuitabuja patshivua Yezu ne muoyo. (Mat. 13:55; Yone 7:5) Bakashintuluka katshia ku lufu ne dibishibua dia muanabu wa mamuabu.​—1 Kol. 15:7.

¹⁸ Tudi tumona kabidi bua tshinyi bayidi abu bakadisangisha: “Buonso buabu, bikale ne tshipatshila tshimue, bavua batungunuka ne kusambila.” (Bien. 1:14) Kudisangisha pamue kutu ne mushinga misangu yonso mu ntendelelu wa bena Kristo. Tudi tudisangisha bua kukankamijangana, bua kupeta dilongesha ne mibelu, nangananga bua kutendelela Yehowa Tatuetu wa mu diulu pamue. Masambila etu ne misambu yetu ya kumutumbisha nayi bikondo bia nanku itu imusankisha bikole ne itu ne mushinga wa bungi kutudi. Katulekedi bisangilu bia tshijila ebi bidi bitukolesha nansha!​—Eb. 10:24, 25.

19-21. a) Mudimu munene uvua Petelo muenze mu tshisumbu udi utulongesha tshinyi? b) Bua tshinyi bivua bikengela basungule muntu mukuabu pa muaba wa Yudasa? Mushindu uvuabu bakose tshilumbu atshi udi utulongesha tshinyi?

¹⁹ Mpindieu bivua bikengela bayidi ba Kristo abu badilongolole bimpe, ne mupostolo Petelo wakangata malu mu bianza bua kutangila bualu abu. (Mvese wa 15-26) Kabienaku bitukolesha bua kumona mukavua Petelo mulubuluke munkatshi mua mbingu katshia wavila Mukalenge wende misangu isatu anyi? (Mâko 14:72) Tuetu bonso tudi bena mpekatu, ne tudi dijinga ne divuluija dia ne: Yehowa ‘mmuimpe ne mmudiakaje bua kubuikidila’ badi banyingalala ne muoyo mujima.​—Mis. 86:5.

²⁰ Petelo wakamona ne: bivua bikengela kusungula muntu mukuabu pa muaba wa Yudasa, mupostolo uvua mutungile Yezu. Kadi kudi nganyi? Mupostolo mupiamupia au uvua ne bua kuikala muntu uvua mulonde Yezu mu mudimu wende wonso wa kuyisha ne mudimuenene dibishibua diende ku lufu. (Bien. 1:21, 22) Bivua mu diumvuangana ne mulayi wa Yezu eu: “Nuenu badi bandonde nenusombe mu nkuasa ya bukalenge 12, nulumbuluisha bisa 12 bia Isalele.” (Mat. 19:28) Bidi bimueneka ne: Yehowa uvua musue bua bapostolo 12 bavua balonde Yezu mu mudimu wende wa kuyisha pa buloba benze “mabue 12 a bishimikidi” bia Yelushalema Mupiamupia kumpala eku. (Buak. 21:2, 14) Ke bualu kayi, Nzambi wakanyishila Petelo bua kumvua ne: mulayi wa buprofete wa “muntu mukuabu angate mudimu wende wa butangidi,” ukumbanyine Yudasa.​—Mis. 109:8.

²¹ Mmunyi muvuabu basungule mupostolo mupiamupia au? Bakela nshobo, tshilele tshivua tshienzeka bikole mu bikondo bia kale.  (Nsu. 16:33) Nansha nanku, eu ke musangu wa ndekelu udi Bible utela diela nshobo dia mushindu au. Bidi bimueneka ne: ditshikija dia nyuma muimpe diakalua kuenzeka pashishe diakavuija tshilele atshi katshiyi kabidi ne mushinga to. Kadi mona bua tshinyi bapostolo bakela nshobo. Bakasambila ne: “Yehowa wetu, wewe udi mumanye mioyo ya bantu bonso, leja uudi musungule ku bantu babidi aba.” (Bien. 1:23, 24) Bavua basue bua Yehowa asungule. Bakasungula Matiase, uvua pamuapa umue wa ku bayidi 70 bavua Yezu mutume bua kuyisha. Ke muvua Matiase mulue umue wa ku bapostolo “12.” c​—Bien. 6:2.

22, 23. Bua tshinyi tudi ne bua kukokela badi balombola tshisumbu lelu ne kubatumikila?

²² Malu onso aa adi atuvuluija mudibi ne mushinga bua bantu ba Nzambi bikale balongolola. Lelu eu kabidi, badi basungula bantu balume ba kueyemena bua benze mudimu bu batangidi mu tshisumbu. Bakulu batu bakonkonona bimpe bimpe malu malomba a mu Bible adi atangila batangidi, ne batu basambila bua nyuma muimpe abalombole. Nunku tshisumbu tshidi tshimona bantu balume badibu bateke batangidi bu bateka ku nyuma muimpe. Mbimpe tukokele bulombodi buabu ne tubatumikile, tueleshangane nabu diboko ne muoyo umue mu tshisumbu.​—Eb. 13:17.

²³ Dimueneka dia Yezu misangu ya bungi, dibishibua diende ku lufu, ne dilongolola dia malu mu tshisumbu biakakolesha bayidi abu, kudipayabu mpindieu bua muanda uvua mubindile kumpala. Nshapita udi ulonda neatuleje muanda wa dikema au.