1-6. Londa bualu bua Bantemu batu bayisha mu nsombelu mikole mishilashilangane.

 REBECCA (Ntemu wa Yehowa utshidi nsonga mu ditunga dia Ghana) uvua umona tshilongelu tshiabu bu teritware wende wa kuyishila. Uvua anu ne mikanda yetu ya malu a mu Bible mu tshibuta tshiende. Mu mêba a dikisha, uvua ukeba mpunga ya kuyisha balongi nende. Uvua mutuadije kulonga Bible ne balongi babu ba bungi.

² Mu ditunga dia Madagascar, tshidiila tshinene tshia ku est kua Afrike, bampanda-njila babidi bavua benda pa tshibidilu kilometre mitue ku 25 lua makasa mu munya mukole bua kufika ku musoko wa kule. Kuoku aku bavua balonga Bible ne bantu bavule bavua bitaba bulelela.

³ Bua kupeta bantu badi basombele kumpenga kua musulu wa Paraguay ne wa Paraná, Bantemu ba mu ditunga dia Paraguay ne bena budisuile ba mu matunga makuabu 15 bavua benze buatu bua bubuela bantu 12, buikale ne bujitu bua tone 45. Buatu abu budi buambuluisha bamanyishi ba Bukalenge ba tshisumi abu bua kumanyisha lumu luimpe miaba ivuabi bikole bua kulufikisha.

⁴ Lua ku Nord menemene kua Alaska, Bantemu bavua bapete mpunga muimpe wa kuyisha tshikondo tshivua bantu balua kubandila bintu mu muvu wa luya. Pavua benyi ba mu matunga mashilangane balua mu mazuwa mu tshikondo tshia luya lukole, Bantemu bavua bimana ku dilobo ne kaditempu kimpe ka mikanda ya malu a mu Bible ya miakulu ya bungi menemene. Anu mu tshimenga atshi, ndeke utu wambuluisha bikole bua kufika ku misoko ya ku ntshiama; nunku bidi biambuluisha bena mu Aléoute, bena mu Athapascane, bena mu Tsimshian, ne bena mu Tlingit bua kumvua lumu luimpe.

⁵ Mu États-Unis (Téxas), Larry uvua ne teritware wa pa buende: mmu lupitadi muvuaye. Nansha muvuaye anu mu kakalu ka balema bua njiwu ivuaye mupete, uvua wenza anu mudimu. Uvua uyisha bakuabu mukenji wa Bukalenge, nangananga ditekemena diende dia  ne: neende kabidi dimue dituku patuadija Bukalenge kukokesha buloba.​—Yesh. 35:5, 6.

⁶ Mu Birmanie, Bantemu bavua babuele mu mazuwa mu Mandalay kuenzabu luendu lua matuku 3 lua ku nord bua kubuela mu mpuilu. Bu muvuabu ne dijinga dikole dia kuyisha lumu luimpe, bakaya ne mikanda yetu ya malu a mu Bible kuyipeshabu bena luendu nabu. Misangu yonso ivua mazuwa imana mu tshimenga kampanda anyi mu musoko kansanga, bamanyishi ba tshisumi abu bavua bapatuka baya ne lukasa mu tshimenga anyi mu musoko bua kupesha bantu mikanda yetu. Bena luendu bakuabu bavua bashala kubuela mu mazuwa, nanku pavua bamanyishi ba Bukalenge abu bapingana bavua basangana “teritware mupiamupia.”

7. Mmu mishindu kayi idi batendeledi ba Yehowa bafila bumanyishi pa bidi bitangila Bukalenge bua Nzambi? Ntshipatshila kayi tshidibu natshi?

⁷ Anu bu bana betu batudi batele mu bilejilu bikese ebi, batendeledi ba Yehowa ba tshisumi batu ‘bafila bumanyishi buonso menemene pa bidi bitangila Bukalenge bua Nzambi’ pa buloba bujima. (Bien. 28:23) Batu baya ku nzubu ne ku nzubu, bayisha bantu mu misesu, babafundila mikanda, anyi babayishila ku telefone. Nansha patubu mu mashinyi, bendakana muaba wa kuikishila, anyi bikisha ku mudimu, batu bakeba mpunga ne muoyo mujima bua kufila bumanyishi pa bidi bitangila Bukalenge bua Nzambi. Mishindu idi mua kushilangana, kadi tshipatshila tshidi anu tshimue: kuyisha lumu luimpe muaba wonso udi bantu.​—Mat. 10:11.

8, 9. a) Bua tshinyi mudimu wa diyisha Bukalenge udi wenda anu uya kumpala udi bushuwa tshishima? b) Ndukonko kayi lua mushinga mukole ludi lujuka? Mbimpe tuenze tshinyi bua kuluandamuna?

⁸ Mubadi wetu munanga, udiku pebe mu musumba wa bamanyishi ba Bukalenge badi mpindieu mu matunga mapite pa 235 anyi? Biobi nanku, udi muditue pebe mu mudimu wa kuyisha Bukalenge udi wenda uya anu kumpala! Mudimu udi wenzeka pa buloba bujima eu udi bushuwa tshishima. Nansha mudiku bipumbishi ne ntatu mikole (too ne dikandika midimu yetu kudi mbulamatadi ne ditukengesha bikole) Bantemu ba Yehowa badi bafila bumanyishi buonso menemene pa bidi bitangila Bukalenge bua Nzambi kudi bantu ba mu bisamba bionso.

⁹ Lukonko lua mushinga mukole ludi ne: Bua tshinyi lutatu nansha lumue anyi mene buluishi bua kudi Satana ki mbikokeshe bua kuimanyika mudimu wa kuyisha Bukalenge? Bua kuandamuna lukonko elu, mbimpe tupingane mu bidimu lukama bia kumpala. Bushuwa, tuetu Bantemu ba Yehowa tudi tutungunuja anu mudimu ukavua mutuadije kuonso aku.

10. Nku tshinyi kuvua Yezu mudifile ne muoyo wende mujima? Ntshinyi tshivuaye mumanye bua mudimu au?

¹⁰ Yezu Kristo udi Mfumu wa tshisumbu tshia bena Kristo, wakadifila ne muoyo wende mujima bua kuyisha lumu luimpe lua Bukalenge bua Nzambi; wende nsombelu uvua anu wa kuyisha. Wakamba dituku dikuabu ne: “Ndi kabidi ne bua kumanyisha lumu luimpe lua Bukalenge bua Nzambi kudi bimenga bikuabu, bualu mvua mutumibue bua bualu ebu.” (Luka 4:43) Uvua mumanye ne: uvua mutuadije mudimu uvuaye kayi mua kujikija nkayende to. Katupa kîpi kumpala kua kufuaye, wakamba ne: mukenji wa Bukalenge newuyishibue “mu bisamba bionso.” (Mâko 13:10) Kadi uvua mua kuyishibua mushindu kayi? ne kudi banganyi?

11. Mmudimu kayi munene uvua Yezu mupeshe bayidi bende? Ndiambuluisha kayi divuabu ne bua kupeta bua kuwukumbaja?

¹¹ Yezu mumane kufua ne mubishibue ku lufu, wakamuenekela bayidi bende, yeye kubapesha mudimu munene eu: “Nunku, ndayi nuvuije bantu ba mu bisamba bionso bayidi, nubabatiza mu dîna dia Tatu, dia Muana, ne dia nyuma muimpe, nubalongesha mua kutumikila malu onso andi munuambile. Monayi! Ndi nenu matuku onso too ne ku nshikidilu kua ndongoluelu wa malu eu.” (Mat. 28:19, 20) Mêyi a ne: “Ndi nenu” adi aleja ne: uvua ne bua kuambuluisha bayidi bende mu mudimu wa kuyisha ne kuvuija bantu bayidi. Bavua dijinga ne diambuluisha adi, bualu ukavua mubambile ne: “bisamba bionso nebinukine.” (Mat. 24:9) Bavua ne bua kutekemena diambuluisha dikuabu kabidi. Anu kumpala kua kubandaye mu diulu, wakabambila ne: nebavuijibue bakole ku diambuluisha dia nyuma muimpe bua bikale bantemu bende “too ne ku miaba ya kule menemene ya pa buloba.”​—Bien. 1:8.

12. Nnkonko kayi ya mushinga idi ijuka? Bua tshinyi mbia mushinga bua tuetu kumanya mandamuna ayi?

¹² Mpindieu nkonko ya mushinga idi ijuka: Bapostolo ba Yezu ne bayidi bakuabu ba mu bidimu lukama bia kumpala bavua bangate mudimu wabu ne mushinga anyi? Bena Kristo bakese abu bakafila bumanyishi buonso menemene pa bidi bitangila Bukalenge bua Nzambi nansha pavuabu babakengesha bikole anyi? Bavua bapete bushuwa diambuluisha dia mu diulu ne dia nyuma muimpe wa Yehowa mu mudimu wabu wa kuvuija bantu bayidi anyi? Mbandamune nkonko eyi ne mikuabu ya buena eyi mu mukanda wa Bienzedi. Mbia mushinga bua tuetu kumanya mandamuna ayi. Bua tshinyi? Bualu Yezu wakalaya ne: mudimu uvuaye mufile au newutungunuke “too ne ku nshikidilu kua ndongoluelu wa malu eu.” Nunku mudimu eu udi  utangila bena Kristo balelela bonso, too ne tuetu badi mu matuku a ku nshikidilu aa. Tudi basue kumanya kabidi bimpe malu adibu balonde mu mukanda wa Bienzedi.

13, 14. a) Nnganyi wakafunda mukanda wa Bienzedi? Mmunyi muvuaye mupete malu avuaye mufunde? b) Mmalu kayi adi mu mukanda wa Bienzedi?

¹³ Nnganyi wakafunda mukanda wa Bienzedi? Mukanda nkayawu kawena uleja uvua muwufunde to, kadi mêyi a mbangilu adi aleja bimpe ne: mufundi wa mukanda wa Bienzedi ke uvua mufunde kabidi Evanjeliyo wa Luka. (Luka 1:1-4; Bien. 1:1, 2) Ke bualu kayi, katshia anu ku kale, badi bela meji ne: Luka “munganga munangibue” ne mumanyi wa malu a kale ke uvua mufunde mukanda wa Bienzedi. (Kolos. 4:14) Mukanda eu udi ulonda malu avua menzeke munkatshi mua bidimu bitue ku 28, kubangila mu tshidimu tshia 33 tshivua Yezu mubande mu diulu too ne bu mu 61 P.Y., tshidimu tshivuabu bele mupostolo Paulo mu buloko mu Lomo. Bu mudi Luka ulonda malu avua bakuabu benze pashishe ulua kudibueja pende mu bantu abu, bidi bileja ne: uvua mudimuenene malu a bungi. (Bien. 16:8-10; 20:5; 27:1) Bu muvua Luka mukebulule malu bimpe menemene, kakuyi mpata uvua muapetele nkayende kudi Paulo, Bânaba, Filipo, ne kudi bantu bakuabu badiye wakuila.

¹⁴ Mmalu kayi adi mu mukanda wa Bienzedi? Kumpala Luka uvua mufunde malu avua Yezu muambe ne muenze mu Evanjeliyo wende. Kadi mu mukanda wa Bienzedi wowu udi ulondamu malu avua bayidi ba Yezu bambe ne benze. Mukanda eu udi wakula bua bantu bavua benze mudimu wa dikema, nansha muvuabu bamona ba bungi ba kudibu ne: “kabavua balonge ne bavua bantu tshianana.” (Bien. 4:13) Mu tshikoso, mukanda mufundisha ku bukole bua nyuma eu udi utulondela muvua tshisumbu tshia bena Kristo tshituadije ne tshitante. Udi uleja muvua bena Kristo ba mu bidimu lukama bia kumpala bayisha, mishindu yabu ya kuyisha ne muvuabu bamona mudimu wabu. (Bien. 4:31; 5:42) Udi uleja patoke mudimu udi nawu nyuma muimpe mu dimuangalaja lumu luimpe. (Bien. 8:29, 39, 40; 13:1-3; 16:6; 18:24, 25) Udi wambulula tshiena-bualu tshia mu Bible, tshidi tshitangila dibingishibua dia dîna dia Nzambi ku diambuluisha dia Bukalenge buende budi Kristo ulombola, ne udi ulonda dimuangalaja dia butshimunyi dia mukenji wa Bukalenge nansha padiku buluishi bukole.​—Bien. 8:12; 19:8; 28:30, 31.

15. Dikonkonona mukanda wa Bienzedi nedituambuluishe mushindu kayi?

¹⁵ Bushuwa, dikonkonona mukanda wa Bienzedi neditusankishe  ne nedikoleshe ditabuja dietu. Tuetu belangane meji a tshilejilu tshia dikima ne tshisumi tshia bayidi ba Kristo ba kumpala nebilenge mioyo yetu. Nebitusake bua kuidikija ditabuja dia bena Kristo netu ba mu bidimu lukama bia kumpala. Nunku netuikale badilongolole bimpe menemene bua kukumbaja mudimu wetu wa ‘kuya kuvuija bantu bayidi.’ Mukanda uudi ubala eu mmuenza bua kukuambuluisha bua kulonga mukanda wa Bienzedi mu buondoke.

16. Mmalu kayi 3 adi enza tshipatshila tshia mukanda eu?

¹⁶ Mukanda eu udi ne tshipatshila kayi tshinene? Udi ne tshipatshila tshia malu 3 aa: 1) kukolesha dishindika dietu dia ne: Yehowa udi ukuatshisha mudimu wa diyisha Bukalenge ne divuija bantu bayidi ku diambuluisha dia nyuma wende muimpe, 2) kuvudija tshisumi tshietu bua mudimu wa kuyisha pa kukonkonona tshilejilu tshia bayidi ba Kristo ba mu bidimu lukama bia kumpala, ne 3) kunemeka bikole bulongolodi bua Yehowa ne badi batangila bisumbu ne balombola mudimu wa diyisha.

17, 18. Mukanda eu mmulongolola mushindu kayi? Mmalu kayi atuambuluisha mu didilongela dietu dia Bible?

¹⁷ Mukanda eu mmulongolola mushindu kayi? Mmukosolola mu bitupa 8, tshionso tshia kudibi tshidi ne tshitupa tshia mukanda wa Bienzedi. Tshipatshila tshia nshapita idi ilonda ki ntshia kumvuija mukanda wa Bienzedi mvese ku mvese to, kadi ntshia kupatula malongesha a malu adibu balondamu ne kuleja mudi yonso wa kutudi mua kutumikila malu au. Ku ntuadijilu kua nshapita yonso kudi lungenyi lunene ludi luleja bualu bunene budi mu nshapita au, ne mvese idi ileja tshitupa tshia Bienzedi tshiakuilabu.

 ¹⁸ Kudi malu makuabu a mukanda eu atuambuluisha mu didilongela dietu dia Bible. Bimfuanyi bilenga bidi bileja mianda mimpe ya mu mukanda wa Bienzedi nebikuambuluishe bua kumona mu lungenyi muvuayi yenzeka paudi welangana meji a malu a mu Bible. Mu nshapita ya bungi mudi tuzubu tudi ne malu makuabu a mushinga. Tumue tuzubu tudi tuakula bua bantu ba mu Bible bavua ne ditabuja ditudi mua kuidikija. Tukuabu tuotu tudi ne malu a bungi adi atangila miaba, mianda ivua mienzeke, bilele, anyi bantu bakuabu badibu batele mu Bienzedi.

19. Mmunyi mutudi mua kudikonkonona ku musangu ne ku musangu?

¹⁹ Mukanda eu udi mua kukuambuluisha bua wewe kudikonkonona bimpe. Nansha wewe uyisha Bukalenge kukadi bidimu bia bungi, mbimpe wikale wimana ku musangu ne ku musangu bua kukonkonona malu audi uteka pa muaba wa kumpala mu nsombelu webe ne mushindu uudi umona mudimu wa buena Kristo wa diyisha. (2 Kol. 13:5) Dikonka ne: ‘Ndi mulame lungenyi lua kuyisha ne mitalu mu mudimu wanyi anyi? (1 Kol. 7:29-31) Ndi nyisha lumu luimpe ne dishindika ne tshisumi anyi? (1 Tes. 1:5, 6) Ndi muditue mu mudimu wa diyisha ne divuija bantu bayidi mudibi bikengela anyi?’​—Kolos. 3:23.

20, 21. Bua tshinyi mudimu wetu ngua kuenza ne mitalu ya bungi? Mbimpe tudisuike bua kuenza tshinyi?

²⁰ Tuvulukayi misangu yonso ne: Kristo mmutupeshe mudimu wa mushinga wa kuyisha ne kuvuija bantu bayidi. Dituku dionso didi dipita edi, mudimu wetu ngua kuenza ne mitalu ya bungi. Nshikidilu wa ndongoluelu wa malu eu udi wenda usemena ne lukasa. Mioyo ya ba bungi idi mu njiwu kupita kuonso eku. Katuena bamanye bungi bua bantu badi bakaje mioyo yabu bimpe bateleja kabidi mukenji wetu to. (Bien. 13:48) Kadi tudi ne mudimu wa kubambuluisha patshidiku dîba apa.​—1 Tim. 4:16.

²¹ Nunku bidi ne mushinga wa bungi bua tuetu kuidikija tshilejilu tshia bamanyishi ba Bukalenge ba tshisumi ba mu bidimu lukama bia kumpala. Dilonga mukanda eu ne ntema dikusakaku bua kuyisha ne tshisumi tshia bungi ne dikima dia bungi kupita kuonso eku. Dikoleshaku didisuika diebe dia kutungunuka ne “kufila bumanyishi buonso menemene pa bidi bitangila Bukalenge bua Nzambi.”​—Bien. 28:23.