1, 2. Mbualu kayi bua pa buabu budi butangila luendu lukavua Bânaba ne Shaula pakuenza? Mmunyi muikala mudimu wabu mua kukumbaja Bienzedi 1:8?

 EDI ndituku dia katshia ne katshia bua bena mu tshisumbu tshia Antiokia! Mu baprofete ne balongeshi bonso badi muaba au, nyuma muimpe mmusungule anu Bânaba ne Shaula bua kuya kuyisha lumu luimpe mu miaba ya kule. a (Bien. 13:1, 2) Bushuwa, kukavua balume bakuabu bakumbane bakavuabu batume mu mudimu eu. Kadi bavua baya miaba ikavua buena Kristo buele miji. (Bien. 8:14; 11:22) Musangu eu, nebatume Bânaba ne Shaula (ne Yone Mâko uvua muambuluishi) miaba ivua bantu ba bungi kabayi banji kumvua lumu luimpe.

² Bidimu bitue ku 14 kumpala, Yezu wakambila bayidi bende ne: “Nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8) Bu muvuabu bapeshe Bânaba ne Shaula mudimu wa bumisionere, bivua ne bua kuambuluisha bikole bua mêyi a Yezu aa kukumbana. b

3. Bua tshinyi dienza ngendu mu bidimu lukama bia kumpala kadivua dipepele to?

³ Lelu, tudi mua kuenza luendu lule mu dîba dimue anyi abidi ku diambuluisha dia bintu bidibu benze bu mudi tudiendelandela ne ndeka. Kadi kabivua nanku mu bidimu lukama bia kumpala to. Bavua batamba kuenza ngendu ku makasa, ne misangu ya bungi bayenzela mu njila mibi. Luendu lua dituku dijima nansha pavualu anu lua kilometre yetu 30 eyi, luvua lutshiokesha bikole! c Kadi nansha muvua Bânaba ne Shaula bindile ne muoyo kuulu kuulu bua kutuadija mudimu  wabu, bavua bulelela bamanye ne: bavua ne bua kudienzeja bikole ne kudipangisha amue malu bua kuwukumbaja.​—Mat. 16:24.

4. a) Ntshinyi tshivua tshienze bua basungule Bânaba ne Shaula? Ntshinyi tshiakenza bena Kristo nabu bua dibasungula adi? b) Mmunyi mutudi mua kutua bana betu badibu bapeshe midimu mu tshisumbu mpanda?

⁴ Kadi bua tshinyi nyuma muimpe uvua muenze bua bateke anu Bânaba ne Shaula ku luseke “bua mudimu”? (Bien. 13:2) Bible kena uleja bua tshinyi to. Tshitudi tuetu bamanye ntshia ne: nyuma muimpe uvua muenze bua basungule balume babidi aba. Kakuena tshintu nansha tshimue tshidi tshileja ne: baprofete ne balongeshi ba mu Antiokia bakatontolola bualu abu to. Kadi bakatua dipangadika adi mpanda ne muoyo mujima. Elabi meji muvua Bânaba ne Shaula mua kuikala bumvue bua muvua bena Kristo nabu kabayi babumvuile mukawu, kadi bajile biakudia ne basambile, pashishe ‘babatentekele bianza, babalekele, baye.’ (Bien. 13:3) Mbimpe tuetu petu tutue bantu badibu bapeshe midimu mu tshisumbu mpanda, nangananga bakulu. Pamutu pa kubumvuila mukawu, mbimpe “kubatua mushinga wa bungi menemene mu dinanga bua mudimu wabu.”​—1 Tes. 5:13.

5. Umvuija muvua mudimu wa diyisha wenzeka mu tshidiila tshia Kupulio.

⁵ Bânaba ne Shaula bamane kuenda lua makasa, bafike ku Seleukia (dilobo divua pabuipi ne Antiokia), bakangata mazuwa batangile ku tshidiila tshia Kupulio. Luvua luendu lua kilometre 200. d Bu muvua Bânaba wa ku Kupulio, pamuapa uvua ne dijinga dikole dia kuambila bantu ba kuabu aku lumu luimpe. Pakafikabu mu Salami, tshimenga tshivua ku est, ku muelelu wa tshidiila atshi, kabakajingakana to; diakamue “bakatuadija kumanyisha dîyi dia Nzambi mu nsunagoga ya bena Yuda.” e (Bien. 13:5) Bânaba ne Shaula bakatua eku ne eku kua tshimenga tshia Kupulio, pamuapa benda bayisha mu bimenga binene pavuabu mu luendu alu. Pamuapa bakenza kilometre 160 bua mushindu uvua njila uvuabu bayile.

6, 7. a) Sêgio Paulo uvua nganyi? Bua tshinyi Bâ-Yezu wakakeba bua kupangisha Sêgio Paulo bua kumvua lumu luimpe? b) Mmushindu kayi uvua Shaula mupangishe Bâ-Yezu bua kuluisha Sêgio Paulo?

⁶ Mu bidimu lukama bia kumpala, ntendelelu wa dishima uvua muwule mu Kupulio tente. Ke tshiakamueneka nangananga pavua Bânaba ne Shaula bafike ku Pafo, mu dilobo dia tshidiila dia ku ouest. Bakatuilangana ne “muena Yuda mukuabu, dîna diende Bâ-Yezu uvua muena mupongo ne muprofete wa dishima. Uvua ne nguvena Sêgio  Paulo, muntu wa lungenyi.” f Mu bidimu lukama bia kumpala abi, bena Lomo ba bungi bavua bashidimuke too ne “muntu wa lungenyi” bu mudi Sêgio Paulo, bavua ne tshibidilu tshia kuya kudi muena mupongo anyi muena lubuku lua mitoto bua kulomba lungenyi pavuabu bakeba kuangata mapangadika a mushinga. Nansha nanku, bu muvua mukenji wa Bukalenge mutue Sêgio Paulo ku muoyo, uvua “ujinga bua kumvua dîyi dia Nzambi ne muoyo mujima.” Bualu abu kabuakasankisha Bâ-Yezu to. Bavua babikila kabidi Bâ-Yezu mu dîna dia mudimu uvuaye wenza, dia Eluma. Dîna edi didi diumvuija “muena mupongo.”​—Bien. 13:6-8.

⁷ Bâ-Yezu ke uvua uluisha mukenji wa Bukalenge. Mushindu umuepele uvuaye wenza bua kulama muanzu munene uvuaye nawu wa mufidi wa mibelu wa Sêgio Paulo uvua wa “kusesuisha nguvena au kule ne ditabuja.” (Bien. 13:8) Kadi Shaula kavua mua kulekela muena mupongo wa mu lubanza lua mukalenge usesuisha Sêgio Paulo to. Tshiakenzaye ntshinyi? Bible udi wamba ne: “Shaula, udibu babikila kabidi ne: Paulo, muwujibue tente ne nyuma muimpe, kumutangilaye [Bâ-Yezu] mumutuishile mêsu bikole, kuambaye ne: ‘Wewe muntu udi muwule tente ne diibila dia mishindu yonso ne buenzavi bua  mishindu yonso, wewe muana wa Diabolo, wewe muena lukuna wa malu onso makane, kuena ulekela kukonyangaja njila milulame ya Yehowa anyi? Tangila! Tshianza tshia Yehowa tshidi kuudi; bua tshikondo kampanda neushale mpofu kuyi umona bukenke bua dîba.’ Diakamue dibungi dikole ne mîdima biakamubuikila, ne ukavua wenda unyunguluka ukeba muntu bua amukuate ku tshianza bua kumulombola.” g Bualu bua tshishima ebu buakapatula tshipeta kayi? “Pakamona nguvena au tshivua tshienzeke, wakalua muena kuitabuja, bualu dilongesha dia Yehowa divua dimukemeshe bikole.”​—Bien. 13:9-12.

8. Mmunyi mutudi mua kuleja dikima bu dia Paulo lelu eu?

⁸ Paulo kavua utshina Bâ-Yezu to. Tuetu petu katuena ne bua kutshina baluishi betu badi bakeba kutekesha ditabuja dia bantu badi basue kuteleja mukenji wa Bukalenge to. Tshibi mbimpe mêyi etu “ikale mashême misangu yonso, mela mukele.” (Kolos. 4:6) Kadi katuena basue bua ne: muntu udi musue kuteleja mukenji wa Bukalenge apange kudia malanda ne Nzambi anu bualu tudi tubenga bilumbu to. Katulekedi buôwa butupangisha bua kuela ntendelelu wa dishima patoke to. Bualu udi utungunuka ne “kukonyangaja njila milulame ya Yehowa” anu bu Bâ-Yezu. (Bien. 13:10) Anu bu Paulo, tuikalayi ne dikima dia kumanyisha bulelela ne tulengayi mioyo ya bantu ba muoyo muakane. Nansha mutudi katuyi mua kumona mudi Nzambi utuambuluisha lelu anu bu muvuaye wambuluisha Paulo, tudi  batuishibue ne: Yehowa neenze bua bantu badi bakumbane bitabe bulelela ku diambuluisha dia nyuma wende.​—Yone 6:44.

9. Ntshilejilu kayi tshimpe tshidi Paulo ne Bânaba bashile bana betu badi balombola tshisumbu lelu?

⁹ Pavua Paulo ne Bânaba ne Mâko bangate mazuwa, bumbuke ku Pafo, baye ku Pêge, ku dilobo dia mu Asia mukese mu mutantshi wa kilometre mitue ku 250, bidi bimueneka ne: malu akashintuluka. Mu Bienzedi 13:13 mudi tshiambilu tshia ne: “Paulo ne bena diende.” Tshiambilu etshi tshidi tshileja ne: Paulo ke uvua mpindieu ulombola mudimu uvuabu benza. Kakuena tshidi tshileja ne: Bânaba uvua umvuila Paulo mukawu to. Kadi bubidi buabu bakatungunuka ne kuenza mudimu pamue bua kukumbaja disua dia Nzambi. Mbashile bana betu badi balombola malu mu tshisumbu lelu tshilejilu tshimpe. Pamutu pa kukeba bua kuikala ku mutu kua bakuabu, badi bavuluka mêyi a Yezu aa: “Nuenu bonso nudi bana ba muntu.” Kuambaye kabidi ne: “Muntu yonso udi udibandisha, nebamupuekeshe, ne muntu yonso udi udipuekesha, nebamubandishe.”​—Mat. 23:8, 12.

10. Umvuija muvua luendu lua kumbuka mu Pêge, kuya ku Antiokia wa mu Pisidia.

¹⁰ Pakafikabu mu Pêge, Yone Mâko wakabashiya, kupinganaye ku Yelushalema. Tshivuaye mubashiyile nanku ki ntshimanyike to. Paulo ne Bânaba bakatungunuka ne luendu luabu kumbuka mu Pêge, kuyabu ku Antiokia wa mu Pisidia, tshimenga tshia provense wa Galatiya. Luvua luendu luvua lutshiokesha bualu Antiokia eu uvua pa mukuna mu mutantshi wa metre 1 100. Kupitshila pa mukuna au kuvua ne njiwu ya bungi bualu kuvua bangondavi ba bungi. Pa kumbusha njiwu ivua Paulo mufuane kupeta eyi, bidi bimueneka ne: uvua kabidi ne masama. h

11, 12. Mmunyi muvua Paulo mulenge mioyo ya bantu pavuaye muakule mu nsunagoga, mu Antiokia wa mu Pisidia?

 ¹¹ Pavua Paulo ne Bânaba mu Antiokia wa mu Pisidia bakabuela mu nsunagoga dituku dia Nsabatu. Bible udi wamba ne: “Bobu bamane kubala Mikenji ne mifundu ya Baprofete patoke, batangidi ba nsunagoga bakabatumina mukenji bamba ne: ‘Balumiana, bana betu, binuikala ne dîyi dia kukankamija nadi bantu, diambayi.’” (Bien. 13:15) Paulo wakimana kuulu, kutuadijaye kuakula.

¹² Wakatuadija ne mêyi aa: “Balumiana, bena Isalele ne nuenu bantu bakuabu badi batshina Nzambi.” (Bien. 13:16) Mu bantu amu muvua bena Yuda ne bantu bavua bitabe buena Yuda. Bu muvua bantu abu kabayi bitaba mudimu uvua nawu Yezu mu malu avua Nzambi mulongolole, mmushindu kayi uvua Paulo mubapeteshe dijinga dia kuteleja? Tshia kumpala, wakabalondela malu avua mafikile tshisamba tshia Yuda. Wakumvuija muvua Yehowa ‘mubandishe tshisamba etshi pavuabu basombe bu bantu ba ku babende mu buloba bua Ejipitu’ ne “wakabaleja lutulu mu tshipela” mu bidimu 40. Paulo wakabalondela kabidi muvua bena Isalele ne mushindu wa kusomba mu Buloba bulaya ne muvua Yehowa ‘mubapeshe buloba bua [bisamba] bu bumpianyi.’ (Bien. 13:17-19) Tudi tuela meji ne: Paulo uvua mua kuikala wakula bua mvese ivuabu babala ne dîyi dikole ku ntuadijilu kua tshibilu tshia Nsabatu. Biobi bikale nanku, bidi bileja kabidi muvua Paulo mumanye mua ‘kulua malu onso kudi bantu ba mishindu yonso.’​—1 Kol. 9:22.

13. Ntshinyi tshitudi mua kuenza bua kulenga mioyo ya bantu badi batuteleja?

¹³ Mbimpe tudienzeje petu bikole bua ne: mukenji utudi tuyisha usankishe bantu. Tshilejilu, tuetu bamanye tshitendelelu tshidi muntu bidi mua kutuambuluisha bua kusungula biena-bualu  bidi mua kutamba kukoka ntema yende. Tudi kabidi mua kutela mêyi a mu Bible akadi muntu mumanye. Mbimpe muntu adibadilawu mu Bible wende. Keba mishindu ya kulenga mioyo ya bantu badi batuteleja.

14. a) Mmunyi muvua Paulo mutuadije kuyisha lumu luimpe luvua lutangila Yezu? Mmunyi muvuaye mudimuije bateleji bende? b) Ntshinyi tshiakenza bantu pakumvuabu muyuki au?

¹⁴ Paulo wakaleja kabidi muvua mulongolongo wa bakalenge ba mu Isalele mufikishe ku “mupandishi . . . mmumue ne: Yezu.” Yone mubatiji ke uvua mumudianjidile. Pashishe wakumvuija muvuabu bashipe Yezu ne bamubishe ku lufu. (Bien. 13:20-37) Paulo wakamba ne: Nunku nuenu, bana betu, numanye ne: ku butuangaji bua muntu eu tudi tunumanyisha bualu bua dibuikidibua dia mpekatu . . . Ku butuangaji bua muntu eu, muntu yonso udi witabuja udi ubingishibua.” Pashishe wakadimuija bateleji bende ne: “Dimukayi bua bualu ebu budibu bambe mu mifundu ya Baprofete kabunufikidi, bua ne: ‘Tangilayi, nuenu bena dipetu, nukeme ne nujimine, bualu ndi ngenza mudimu mu matuku enu, mudimu unuikala kanuyi mua kuitaba nansha kakese, nansha bikala muntu munulondele bualu buawu buonso.’” Bantu bavua bateleja Paulo bakenza bualu bua dikema. Bible udi wamba ne: “Bantu bakabasengelela bua babambile kabidi malu aa dituku dia Nsabatu uvua ulonda.” Bualu bukuabu, pakapatuka disangisha dia mu nsunagoga, “bena Yuda ba bungi ne bantu bavua bitabuje buena Yuda bavua batendelela Nzambi bakalonda Paulo ne Bânaba.”​—Bien. 13:38-43.

15. Tshiakenzeka dituku dia Nsabatu wakalonda ntshinyi?

¹⁵ Mu dituku dia Nsabatu wakalonda, “bena mu tshimenga atshi pabuipi ne bonso” bakadisangisha bua kuteleja Paulo. Bualu ebu kabuakasankisha bena Yuda bakuabu to, ‘bakatuadija kuakula bibi, batontolola malu avua Paulo wamba.’ Yeye ne Bânaba bakamba ne dikima dionso ne: “Bivua bikengela banji kunumanyisha nuenu dîyi dia Nzambi. Bu munudi nudibenga, nudimona kanuyi bakumbanyine muoyo wa tshiendelele, tangilayi, tudi tuya kudi bisamba bikuabu. Bualu Yehowa mmututumine dîyi edi ne: ‘Ndi mukuteke bu butoke bua bisamba bua wikale lupandu too ne ku ntengu ya buloba.’”​—Bien. 13:44-47; Yesh. 49:6.

16. Ntshinyi tshiakenza bena Yuda bua mêyi a bujitu avua bamisionere abu bambe? Ntshinyi tshivua Paulo ne Bânaba benze kumpala kua buluishi?

¹⁶ Pakumvua bantu ba bisamba bikuabu bualu ebu, bakasanka, ne “bantu bonso bavua bakaje muoyo wabu bimpe bua kupeta muoyo wa  tshiendelele bakalua bena kuitabuja.” (Bien. 13:48) Dîyi dia Yehowa diakamuangalaka ne lukasa mu ditunga dijima. Bena Yuda bakenza bobu malu mushindu mukuabu. Bamisionere abu bavua bu bavua babambila ne: nansha muvuabu banji kubambila bobu dîyi dia Nzambi, bakabenga Masiya, nunku Nzambi uvua ne bua kubalumbuluisha. Bena Yuda bakasonsola bakaji bende lumu ne bantu banene ba mu tshimenga, “kukebelabu Paulo ne Bânaba dikengeshibua ne kubipatabu mu buloba buabu.” Ntshinyi tshiakenza Paulo ne Bânaba? ‘Bakabatutuila lupuishi lua muinshi mua makasa abu, kuyabu ku Ikonio.’ Abi bidi bileja ne: buena Kristo buakimana mu Antiokia wa mu Pisidia anyi? Tòo! Bayidi bavua bashalamu, “bakatungunuka ne kuwujibua ne disanka ne nyuma muimpe.”​—Bien. 13:50-52.

17-19. Mmishindu kayi itudi mua kuidikija tshilejilu tshimpe tshia Paulo ne Bânaba? Mmushindu kayi udi kubidikija nanku kutupetesha disanka?

¹⁷ Mushindu uvua bena Kristo ba lulamatu abu benze malu pavuabu babaluisha udi utulongesha bualu bua mushinga. Nansha bantu ba mianzu minene ba pa buloba apa batupangisha bua kumanyisha mukenji wetu, katulekedi kuyisha nansha. Mona kabidi ne: pavua bena mu Antiokia babenge mukenji uvua Paulo ne Bânaba babayisha, ‘bakatutula lupuishi lua muinshi mua makasa abu.’ Ditutula adi kadivua dileja ne: bavua babafiikile munda to, kadi divua dileja ne: bavua babuôwe bianza. Bamisionere abu bakajingulula ne: kabavua mua kuenzeja bantu bua kubateleja to. Tshivuabu bobu mua kukokesha bua kuenza ntshia kutungunuka ne kuyisha anyi kulekela kuyisha. Kadi bobu bakatungunuka anu ne kuyisha pakayabu ku Ikonio.

¹⁸ Netuambe tshinyi bua bayidi bavua bashale mu Antiokia? Bulelela, bavua mu teritware muvua buluishi bua bungi. Kadi disanka diabu kadivua difumina anu ku mushindu uvua bantu bitaba lumu luimpe to. Yezu wakamba ne: “Bantu badi bateleja dîyi dia Nzambi ne badilama ke ba diakalenga!” (Luka 11:28) Ke tshivua bayidi bavua mu Antiokia wa mu Pisidia badisuike bua kuenza.

¹⁹ Anu bu Paulo ne Bânaba, tuikalayi anu bavuluka ne: mudimu wetu ngua kuyisha lumu luimpe. Bantu batudi tuyisha ke badi ne dipangadika dia kuitaba mukenji wetu anyi kuwubenga. Bantu bobu babenga kututeleja patudi tuyisha, tshilejilu tshia bayidi ba mu bidimu lukama bia kumpala tshitulongeshe. Tuetu banange bulelela ne tulekela nyuma muimpe utulombola, tudi petu mua kuikala ne disanka nansha bobu batuluisha.​—Gal. 5:18, 22.