1, 2. Bua tshinyi dikengeshibua didi Paulo utuilangana nadi mu Yelushalema kadiena dimukemesha?

 PAULO udi udimona kabidi mu buloko, pende batshifuma ku dimusungila mu bianza bia musumba wa bantu uvua ne tshiji mu Yelushalema. Dikengesha mupostolo wa tshisumi eu mu Yelushalema kadiena dimukemesha to. Bakavua bamudimuije ne: “buloko ne makenga” bivua bimuindilamu. (Bien. 20:22, 23) Nansha mudi Paulo kayi mumanye menemene tshiamuenzelabu, mmumaye ne: neatungunuke ne kukenga bua dîna dia Yezu.​—Bien. 9:16.

² Too ne baprofete bena Kristo bakadimuija Paulo ne: bavua ne bua kumusuika ne kumufila “mu bianza bia bantu ba bisamba bikuabu.” (Bien. 21:4, 10, 11) Musumba wa bena Yuda uvua ukeba kumushipa, katupa aka, kumuenekabi bu ne: “bavua mua kulua kusunsulula Paulo” kudi bena ku Tshilumbuluidi tshinene bualu bavua batandangana bua bualu buende. Dîba adi Paulo uvua muena buloko uvuabu balame kudi basalayi bena Lomo. Kuvua malu a bungi avuabu bamulumbuluishila, eku benda bamufunda kabidi ne makuabu. (Bien. 21:31; 23:10) Bushuwa, Paulo uvua dijinga ne dikankamija!

3. Nkuepi kutudi tupetela dikankamija bua tutungunuke ne mudimu wetu wa kuyisha?

³ Tudi bamanye ne: mu matuku a ku nshikidilu aa, “bantu bonso badi basue kuikala balamate Nzambi mu buobumue ne Kristo Yezu nebakengeshibue pabu.” (2 Tim. 3:12) Ku musangu ne ku mukuabu, tudi dijinga ne dikankamija bua kutungunuka ne mudimu wetu wa kuyisha. Tudi ne disanka dia bungi bua mêyi atu atukankamija ne atusamba, afika pa dîba diawu. Tutu tuapetela mu mikanda ne mu bisangilu bietu bidi “mupika wa lulamatu udi mudimuke” ulongolola. (Mat. 24:45) Yehowa mmutulaye ne: muluishi wa lumu luimpe nansha umue kakutshimuna to. Kabakubutula bantu bende bonso anyi kuimanyika mudimu wa diyisha to. (Yesh. 54:17; Yel. 1:19) Kadi netuambe bishi bua mupostolo Paulo? Uvuaku mupete dikankamija bua atungunuke ne kufila bumanyishi buonso menemene nansha muvuaku buluishi  anyi? Biobi nanku, mmushindu kayi uvuabu bamukankamije? Tshiakenzaye ne dikankamija adi ntshinyi?

4, 5. Ndikankamija kayi diakapeta Paulo? Bua tshinyi divua difike pa dîba?

⁴ Mupostolo Paulo wakapeta dikankamija dia bungi divuaye nadi dijinga butuku bua muladilu wa dituku diakamulekelabu ku Tshilumbuluidi tshinene. Bible udi wamba ne: “Mukalenge wakimana ku luseke luende, kuambaye ne: ‘Ikala ne dikima! Bualu anu bu muudi mufile bumanyishi buonso menemene pa bidi bintangila mu Yelushalema, ke muudi kabidi ne bua kufila bumanyishi ku Lomo.’” (Bien. 23:11) Mêyi avua Yezu mukankamije nawu Paulo aa akamujadikila ne: bavua ne bua kumulekela. Uvua mumanye ne: uvua ne bua kushala ne muoyo bua aye ku Lomo ne kupeta diakalenga dia kumanyishaku bualu bua Yezu.

⁵ Paulo uvua mupete dikankamija pa dîba. Dituku diakalonda, bena Yuda bapite pa 40 “bakela tshifufu, kudisuikabu ku mulawu bamba ne: kabavua mua kudia anyi kunua kantu too ne pavuabu bashipa Paulo.” “Tshifufu” atshi tshivua tshileje muvuabu badisuike bua kumushipa. Bavua badiambila ne: bobu kabayi batshikumbaje, bavua bapeta mulawu anyi diakabi. (Bien. 23:12-15) Tshifufu tshiabu tshivua bamfumu ba bakuidi ne bakulu banyishe tshivua tshia kupingaja Paulo ku Tshilumbuluidi tshinene bua bamulumbuluishe kabidi, bienze anu bu ne: bavua bakeba kukonkonona tshilumbu tshiende bimpe menemene. Kadi mu bulelela, bedi ba tshifufu atshi bavua ne bua kumualamina mu njila ne kumushipa.

6. Mmunyi muakapangila tshifufu tshivuabu belele Paulo? Ntshilejilu kayi tshidi bansonga mua kuidikija mu bualu ebu?

⁶ Kadi muana wa balume wa muanabu ne Paulo wa bakaji wakumvua bualu bua dimualamina adi, kuyaye kuambila Paulo. Paulo kumuambilaye bua aye kuambila Kulaudio Lusia uvua kamanda ka basalayi ka bena Lomo. (Bien. 23:16-22) Bushuwa, Yehowa mmunange bansonga badi batabalela bantu ba Nzambi ne dikima dionso kupita mudibu baditabalela bobu bine ne benza muabu muonso bua kutungunuja malu a Bukalenge bua Nzambi kumpala anu bu nsongalume au.

7, 8. Ntshinyi tshiakenza Kulaudio Lusia bua kukuba Paulo?

⁷ Diakamue pakambilabu Kulaudio Lusia uvua utangila basalayi 1 000 bualu bua tshifufu tshivuabu belele Paulo, wakatuma dîyi bua benze tshisumbu tshia bantu 470, tshikale ne basalayi, bedi ba mafuma, ne bendeshi ba tubalu. Tshiotshi etshi tshivua ne bua kumbuka  ne Paulo butuku abu ku Yelushalema, kuya nende tshimulame too ne ku Kaisalia. Pavua basalayi abu bafikaku, bavua ne bua kumufila mu bianza bia nguvena Felika. a Nansha muvua mu Kaisalia, tshimenga tshikulu tshia Yudaya, muikale bena Yuda ba bungi, bantu ba bisamba bikuabu ke bavua buwulamu tente. Bulongame buvuaku buvua bushilangane ne nsombelu uvua mutue ntanga tshibua mu Yelushalema, muvua bantu ba bungi benzela bantu ba bitendelelu bikuabu malu a kansungansunga ne tshiji tshikole. Mu Kaisalia ke muvua kabidi biro binene bia majinda a bena Lomo ba mu Yudaya.

⁸ Lusia wakatumikila mikenji ya Lomo, kufundilaye Felika mukanda umuleja muvua tshilumbu. Wakamba ne: pakamanyaye ne: Paulo uvua muena Lomo, wakamusungila mu bianza bia bena Yuda bua ‘kabamushipi’ to. Kuambaye kabidi ne: kavua mumupete ne bualu buvua “bukumbanyine lufu anyi shene ya buloko to,” kadi bua tshifufu tshivuabu bamuelele, uvua umufila kudiye bua ateleje mukana mua bavua bamufunda ne akose tshilumbu tshiende.​—Bien. 23:25-30.

9. a) Mmunyi muvuabu badiatakaje manême a Paulo a kuikala muena Lomo? b) Tshidi mua kutusaka bua kubuelela pa manême adibu batupesha kudi ditunga ditudi ntshinyi?

⁹ Lusia uvua muambe malu malelela anyi? Malu onso kaavua malelela to. Bidi bimueneka ne: uvua ujinga kudileja muntu muimpe kudi nguvena Felika. Mu bulelela, kavua musungile Paulo bualu uvua mumanye ne: uvua muena Lomo to. Bualu bukuabu, Lusia kavua mufunde mu mukanda au muvuaye ‘musuikishe Paulo shene ibidi’ ne mutume dîyi bua “bamuele nkonko benda bamuela mfimbu” to. (Bien. 21:30-34; 22:24-29) Malu avua Lusia muenzele Paulo avua madiatakaje manême ende a dikala muena Lomo. Lelu Satana udi wenza mudimu ne bena mu ntendelelu badi batuluisha bua batukengeshe bikole; kudi too ne misangu idibu badiatakaja manême etu. Kadi anu bu Paulo, misangu mikuabu bantu ba Nzambi badi mua kubuelela pa manême adibu babapesha kudi ditunga didibu ne kukeba bua mikenji ya mu ditunga adi ibakube.

10. Mmalu kayi manene avuabu bafunde nawu Paulo?

¹⁰ ‘Bakalama Paulo mu dibalasa dia Helode’ mu Kaisalia patshivuabu bindile bua bavua bamubanda bafike bumbukila ku Yelushalema. (Bien. 23:35) Bakafika panyima pa matuku atanu, ke bobu aba: muakuidi munene Anania, Têtulo mulumbuluidianganyi wa patoke, ne tshisumbu tshia bakulu. Têtulo wakanji kutumbisha Felika bua bivuaye wenzela bena Yuda, umutumbisha nanku bua kumulabidila ne  kuenza bua amuanyishe. b Pashishe, wakatuadija kuakula bua bualu buvua mu tshialu, wamba Paulo ne: “Ntshipupu tshidi tshisaka bena Yuda bonso ba pa buloba bujima budi bantu basombe bua kutombokela mbulamatadi, ne udi ntunga mulongo wa kasumbu ka bena Nazaleta. Uvua kabidi ukeba kunyanga ntempelo, ke tuetu kumukuata.” Bena Yuda bakuabu “bakaditua pabu mu dimufunda, bajadika muvua malu aa malelela.” (Bien. 24:5, 6, 9) Muntu uvuabu babanda ne: uvua usaka bantu ku ditombokela mbulamatadi, uvua ntunga mulongo wa kasumbu kakebeshi ka njiwu ne uvua unyanga ntempelo, bavua mua kumukosela tshibawu tshia lufu.

11, 12. Mmunyi muvua Paulo mubenge bivuabu bamubanda nabi?

¹¹ Pakanyishilabu Paulo bua kudiakuila, wakatuadija, wamba ne: “Ndi pabuipi bua kudilumbuluila.” Wakabenga bionso bivuabu bamubanda nabi. Mupostolo Paulo kavua munyange ntempelo anyi mutete bua kusaka bantu ku ditombokela mbulamatadi to. Wakaleja ne: uvua muenze “bidimu bia bungi” kayi mu Yelushalema ne uvua muluamu ne “bintu bia luse,” tuambe ne: mapa avuabu basangishile bena Kristo bavua babuele mu bupele pamuapa bua tshiyole tshia nzala ne dikengeshibua. Paulo wakamba musuminyine ne: ukavua “mumane kudilengeja” kumpala kua kubuelaye mu ntempelo, ne ukavua mudisuike bua “kulama kondo ka muoyo katoke kumpala kua Nzambi ne kua bantu.”​—Bien. 24:10-13, 16-18.

¹² Paulo wakitaba ne: uvua wenzela Nzambi wa batatuende mudimu wa tshijila “bilondeshile njila udibu babikila ne: kasumbu ka malu a ntendelelu.” Kadi wakamba ne disuminyina ne: uvua witabuja “malu onso adibu bumvuije mu Mikenji ne bafunde mu mifundu ya Baprofete.” Uvua ne ditekemena dia “dibishibua dia bantu ku lufu, dia bakane ne dia badi kabayi bakane,” anu bu muvua bavua bamufunde abu bitabuja pabu. Pashishe wakalomba bua bavua bamufunda bafile bijadiki bia malu avuabu bamubanda nawu, wamba ne: “Bantu badi muaba eu bakuambile bobu nkayabu tshilema tshidibu bampete natshi pamvua muimane kumpala kua Tshilumbuluidi tshinene, pa kumbusha dîyi dimue tshianana dimvua muele pamvua muimane munkatshi muabu dia ne: ‘Badi bandumbuluisha kumpala kuenu lelu eu bua dibishibua dia bafue!’”​—Bien. 24:14, 15, 20, 21.

13-15. Ntshilejilu kayi tshia kufila bumanyishi ne dikima kumpala kua bakokeshi ba mbulamatadi tshidi Paulo mutushile?

 ¹³ Paulo udi tshilejilu tshimpe tshia tuetu kulonda bobu baye netu kudi bakokeshi ba mbulamatadi bua ntendelelu wetu ne batushiminyine malu bu mudi a ne: tudi bajudiji ba bimvundu, tudi tusaka bantu ku ditombokela mbulamatadi, anyi ne: tudi tuenza “kasumbu kabi.” Paulo kavua mukebe bua nguvena amuanyishe, umulabidila bu Têtulo to. Paulo uvua mutukije, muikale kabidi ne kanemu. Wakafila bumanyishi bulelela wakula malu umvuika bimpe ne bukalanga buonso. Paulo wakaleja ne: “bena Yuda bakuabu ba mu provense wa Asia” bavua bamufunda bamba ne: uvua unyanga ntempelo. Bena Yuda abu kabavuaku to, ne bilondeshile mikenji uvua pabuipi bua kutuilangana nabu ne kudiumvuila malu avuabu bamubanda nawu.​—Bien. 24:18, 19.

¹⁴ Bualu bua dikema, Paulo kakadikanda bua kufila bumanyisha bua malu avuaye witabuja to! Wakakula ne dikima dionso bua dibishibua dia bantu ku lufu divuaye witabuja. Bualu abu buvua bujule ndululu pavuaye ku Tshilumbuluidi tshinene. (Bien. 23:6-10) Pavua Paulo udilumbuluila, wakapita kuakula bua dibishibua dia bantu ku lufu. Bua tshinyi? Bualu Paulo uvua wamba malu a Yezu ne a dibishibua diende ku lufu. Baluishi bende kabavua bitaba bualu abu to. (Bien. 26:6-8, 22, 23) Eyowa, ndululu ayi ivua mijuke bua dibishibua dia bantu  ku lufu, nangananga bua ditabuja Yezu ne bua dibishibua diende ku lufu.

¹⁵ Anu bu Paulo, tudi petu mua kufila bumanyishi ne kupetela bukole ku mêyi avua Yezu muambile bapostolo aa: “Nebanukine kudi bantu bonso bua dîna dianyi. Kadi muntu udi munanukile too ne ku nshikidilu neapandishibue.” Tudi ne bua kuditatshisha bua tshia kuamba anyi? Tòo, bualu Yezu mmutujadikile ne: “Padibu baya nenu bua kunufila, kanudianjidi kuditatshisha bua tshia kuamba; kadi tshidibu banupesha pa dîba adi, nutshiambe, bualu ki nnuenu badi bakula, kadi nnyuma muimpe.”​—Mâko 13:9-13.

16, 17. a) Ntshinyi tshivua Felika muambe ne muenze pavuaye ulumbuluisha Paulo? b) Ntshinyi tshivua mua kuikala tshienze Felika buôwa? Nansha nanku wakatunguka ne kubikidisha Paulo bua bualu kayi?

¹⁶ Kabivua musangu wa kumpala wa nguvena Felika kuteleja malongesha a bena Kristo to. Bible udi wamba ne: “Bu muvua Felika mumanye bimpe malu a Njila eu [muvuabu babikila bayidi ba Yezu kumpala kua kubabikila ne: bena Kristo], wakatuadija kupingaja bantu wamba ne: ‘Nenkose tshilumbu tshienu etshi dîba dionso diapueka Lusia, kamanda ka basalayi, kuneku.’ Pashishe wakatumina mfumu wa basalayi dîyi bua ashale mukuate muntu eu kadi amushile ndambu wa budikadidi, ne banyishile bana babu bua bikale bamuambuluisha ku majinga ende.”​—Bien. 24:22, 23.

¹⁷ Matuku makese pashishe, Felika ne mukajende Dusila uvua muena Yuda bakabikidisha Paulo, bobu ‘kumuteleja wakula bua ditabuja mu Kristo Yezu.’ (Bien. 24:24) Kadi pakakula Paulo bua “buakane, bua didikanda ne bua dilumbuluisha didi ne bua kulua, Felika wakumvua buôwa,” pamuapa bualu malu au avua amulubakaja bua malu mabi avuaye muenze mu nsombelu wende. Ke yeye kupingaja Paulo, wamba ne: “Bua mpindieu anji ndaku, kadi nenkubikidishe kabidi pangapeta mpunga.” Felika wakalua kubikidisha Paulo misangu ya bungi pashishe, kabiyi bua kumanya muvua bualu menemene to, kadi bualu uvua ukeba bua Paulo amukose mishiku.​—Bien. 24:25, 26.

18. Bua tshinyi Paulo uvua muakule ne Felika ne mukajende bua “buakane, bua didikanda ne bua dilumbuluisha didi ne bua kulua”?

¹⁸ Bua tshinyi Paulo uvua muakule ne Felika ne mukajende bua “buakane, bua didikanda ne bua dilumbuluisha didi ne bua kulua”? Vuluka ne: bavua basue kumanya tshidi “ditabuja mu Kristo Yezu” dilomba. Paulo uvua mumanye ne: bavua benzavi, bena tshikisu, ne benzedianganyi ba malu mabi; ke bualu kayi uvua ubaleja patoke tshidi kuikala muyidi wa Yezu kulomba. Malu avua Paulo muambe akaleja dishilangana  dinene didi pankatshi pa mikenji ya Nzambi ya buakane ne bikadilu bivua nabi Felika ne mukajende. Malu au avua ne bua kuikala mabambuluishe bua kumona ne: Nzambi nealumbuluishe bantu bonso bua ngakuilu wabu, bienzedi biabu, ne ngelelu wabu wa meji, ne kumona kabidi ne: tshivua ne mushinga ki mmushindu uvua Felika ne bua kulumbuluisha Paulo to, kadi ndilumbuluisha divua dibindile kumpala kua Nzambi. Ke bualu kayi Felika “wakumvua buôwa”!

19, 20. a) Mmalu kayi atudi ne bua kuenzela bantu badi bamueneka bu ne: mbasue Dîyi dia Nzambi pabi mu bulelela kabayi basue kushintulula nsombelu wabu bua umvuangane nadi? b) Ntshinyi tshidi tshileja ne: Felika kavua mulunda mulelela wa Paulo?

¹⁹ Tudi mua kupeta bantu badi bu Felika mu buambi. Badi mua kuanji kumueneka bu ne: mbasue dîyi dia Nzambi, pabi mu bulelela kabayi basue kushintulula nsombelu wabu bua umvuangane nadi to. Tuikale ne budimu patudi tusua kubambuluisha. Nansha nanku, anu bu Paulo, tubaleje mikenji miakane ya Nzambi ne bukalanga. Bulelela budi mua kubatua ku muoyo. Kadi tuetu bamone ne: kabena pabuipi bua kulekela nsombelu wabu wa dienza mpekatu, tubalekele, tuye kukeba bantu badi banange bulelela ne muoyo mujima.

²⁰ Meji a Felika akamuenekela ku tshidi mvese eu wamba: “Pakapita bidimu bibidi, Pokio Festo wakapingana Felika mu nkuasa; bu muvua Felika ujinga bua bena Yuda bamuanyishe, wakashiya Paulo mu buloko.” (Bien. 24:27) Felika kavua mulunda mulelela wa Paulo to. Uvua mumanye ne: balondi ba “Njila” kabavua basaka bantu bua kutombokela mbulamatadi anyi bakeba kushintulula malu to. (Bien. 19:23) Uvua kabidi mumanye ne: Paulo kavua mushipe mukenji wa bena Lomo nansha umue to. Nansha nanku, Felika wakalama mupostolo eu mu buloko bua “bena Yuda bamuanyishe.”

21. Ntshinyi tshiakafikila Paulo pakalua Pokio Festo nguvena? Ntshinyi tshivua tshitungunuka ne kupesha Paulo bukole?

²¹ Anu mudi mvese wa ndekelu wa Bienzedi nshapita wa 24 uleja, Paulo utshivua anu mu buloko pavua Pokio Festo mulue nguvena pa muaba wa Felika. Ke kutuadijabu kuteleja Paulo njila ne njila. Bakaya ne mupostolo wa dikima eu kumpala kua banene bashilashilangane. Bushuwa ‘bakaya nende kumpala kua bakalenge ne banguvena.’ (Luka 21:12) Anu mutuabimona, wakalua kufila bumanyishi kumpala kua mukalenge uvua ne bukole bua bungi tshikondo atshi. Mu malu onso avua Paulo mupitshile, kakalekela ditabuja diende ditenkakana to. Tudi batuishibue ne: uvua utungunuka ne kupetela bukole ku mêyi a Yezu a ne: “Ikala ne dikima!”