1, 2. Bua tshinyi Paulo udi uya ku Yelushalema? Nntatu kayi idi mimuindilaku?

 PAULO udi wendela kabidi mu tujila tua mu Yelushalema mudi bantu babanda bapueka. Yehowa mmuenzele bantu bende ba mu tshimenga etshi malu mimpe a dikema avuaye kayi muenzele bena mu tshimenga tshikuabu nansha. Benamu ba bungi badi badisua bua malu au. Paulo mmumanye ne: bena Kristo ba bungi ba muomu badi badifila bikole ku malu au, bapangila mua kuya kumpala bua kuenda tshiapamue ne malu avua Yehowa mulongolole avua enda akumbana. Patshivua Paulo ku Efeso, wakamona ne: bena Kristo abu bavua dijinga ne diambuluisha dia mu nyuma ne bavua kabidi dijinga ne bintu bia ku mubidi. Dijinga diabu dia bintu bia ku mubidi edi ke divua dimupingajije kabidi mu tshimenga tshinene etshi. (Bien. 19:21) Nansha muvuaye mua kupeta njiwu, wakafika anu ku dienza tshivua mu meji ende.

² Mmalu kayi adi mamuindile ku Yelushalema mpindieu? Bumue budi ne: kakumvuangana ne bamue bayidi ba Kristo to, bualu malu ende adibu bumvue mmabasamishe mutu. Lutatu lunene nelufumine kudi baluishi ba Kristo. Nebamushiminyine malu, bobu kumukuma ne kumufunyina bua kumushipa. Ntatu yonso eyi neyipeteshe kabidi Paulo mpunga wa yeye kudilumbuluila. Uvua ne budipuekeshi ne dikima ne ditabuja pavuaye mutuilangane ne ntatu yonso ayi. Mmutushile tshilejilu tshimpe tshia tuetu kulonda. Tutshimonayi.

3-5. a) Ntshisangilu kayi tshivua Paulo mubuele mu Yelushalema? Mmalu kayi avuabu bakulamu? b) Tshisangilu tshivua Paulo muenze ne bakulu ba ku Yelushalema tshidi tshitulongesha malu kayi?

³ Paulo ne bena diende bakafika ku Yelushalema. Pakatshiabu, bakaya kumonangana ne bakulu bavua batangila tshisumbu. Muaba eu Bible kena utela mupostolo nansha umue wa ku bapostolo batshivua ne muoyo to; pamuapa dîba adi bavua baye benda bayisha miaba mikuabu. Kadi Yakobo muanabu ne Yezu utshivua yeye muaba au. (Gal. 2:9) Yakobo ke uvua mua kuikala mulombole tshisangilu tshia dîba divua  “bakulu bonso bavua muaba au” batuilangane ne Paulo.​—Bien. 21:18.

⁴ Paulo wakela bakulu muoyo, “pashishe kutuadijaye kubalondela malu onso avua Nzambi muenze munkatshi mua bisamba bikuabu ku diambuluisha dia mudimu wende.” (Bien. 21:19) Bualu abu buvua anu ne bua kuikala bubakankamije bikole! Lelu tutu petu tusanka patutu tumvua ne: mudimu wetu wa kuyisha udi uya kumpala mu matunga makuabu.​—Nsu. 25:25.

⁵ Pavua Paulo wenda wakula, pamuapa wakakula kabidi bua bintu bivuaye mufume nabi ku Mputu. Pavua bakulu abu bamone muvua bena Kristo nabu ba miaba ya kule baditatshishe bua kubambuluisha, bivua ne bua kuikala bibasankishe bikole, bualu pakajikija Paulo kuakula, Bible udi wamba ne: “[Bakulu] bakatuadija kutumbisha Nzambi”! (Bien. 21:20a) Nansha lelu kabidi, patu bena Kristo netu bambuluisha bana babu badi bipupu bikuate anyi badi ne masama makole ne bintu anyi babakankamija, bana babu aba batu basanka bikole bualu diambuluisha edi ditu difika anu pa dîba diadi.

6. Ntshilumbu kayi tshivua Paulo mumvue?

⁶ Pashishe bakulu bakambila Paulo ne: mu Yudaya muvua tshilumbu kampanda tshivua tshimutangila anu yeye. Bakamba ne: “Muanetu, udi mumone mudi munkatshi mua bena Yuda muikale binunu ne binunu bia bena kuitabuja, ne buonso buabu badi ne tshisumi bua Mikenji. Kadi mbumvue bantu banungana bua bualu buebe ne: uvua wenda ulongesha bena Yuda bonso badi munkatshi mua bisamba bikuabu bua kutombokela Mose, ubambila bua kabatengudi bana babu anyi kabalondi bilele bidi bimanyike bimpe.” a​—Bien. 21:20b, 21.

7, 8. a) Nngelelu mubi kayi wa meji uvua nende bena Kristo ba bungi ba mu Yudaya? b) Bua ntshinyi ngelelu mubi wa meji wa bamue bena Kristo bena Yuda kavua mulue butontolodi?

⁷ Bua tshinyi bena Kristo ba bungi batshivua ne tshisumi bua Mikenji ya Mose, payi mimana kushipa kukavua bidimu bipite pa 20? (Kolos. 2:14) Mu 49 P.Y., bapostolo ne bakulu bavua benze tshisangilu ku Yelushalema bavua batumine bisumbu mukanda bua kubaleja ne: bena kuitabuja ba mu bisamba bikuabu kabavua ne bualu bua kutengudibua anyi kutumikila Mikenji ya Mose to. (Bien. 15:23-29) Kadi mukanda au kawuvua muakule bua bena kuitabuja bena Yuda to; ba bungi ba kudibu kabavua bajingulule ne: Mikenji ya Mose ikavua mifue to.

 ⁸ Ngelelu mubi wa meji au uvuaku mua kupangisha bena kuitabuja bena Yuda abu bua kuikalabu bena Kristo anyi? Tòo. Kabivua bienze bu ne: kumpala bavua batendeledi ba nzambi ya dishima ne mpindieu bakavua batungunuka ne kulonda bilele bia mu malu a ntendelelu uvuabu kumpala to. Mikenji ivua ne mushinga wa bungi kudi bena kuitabuja bena Yuda ayi, Yehowa ke uvua muyele. Kayivua ne bubi munda muayi anyi ne malu a bademon to. Yoyi ivua mimanyine pa tshipungidi tshia kale, kadi bena Kristo bobu bavua batumikila tshipungidi tshipiatshipia. Bu mukavua ntendelelu mukezuke mu tshialu, kakutshivua kabidi bualu bua kunemekela tshipungidi tshia Mikenji ya Mose to. Bena Kristo bena Yuda bavua balamate Mikenji ya Mose kabavua bajingulule bimpe tshivua tshisumbu tshia bena Kristo ne kabavua batshieyemena to. Bivua bikengela bashintulule meji abu bua apetangane ne bulelela buvuabu benda bamanyisha. b​—Yel. 31:31-34; Luka 22:20.

9. Ntshinyi tshivua Paulo mulongeshe bua Mikenji ya Mose?

⁹ Kadi netuambe tshinyi bua manunganyi a ne: Paulo uvua ulongesha  bena Yuda ba mu bisamba bikuabu “bua kabatengudi bana babu anyi kabalondi bilele bidi bimanyike bimpe”? Paulo uvua mupostolo mutuma bua bisamba bikuabu, ne wakabajadikila bualu bua dipangadika dia ne: bena mu bisamba bikuabu kabavua ne bualu bua kutumikila Mikenji ya Mose to. Wakaleja kabidi ne: muntu yonso uvua ujinga kusaka bena mu bisamba bikuabu bavua balue bena kuitabuja bua kutengudibua bua kulejabu mudibu bakokela Mikenji ya Mose uvua wenza tshilema. (Gal. 5:1-7) Wakayisha kabidi bena Yuda lumu luimpe mu bimenga bivuaye mupitshile. Wakumvuija kabidi bantu bavua bateleja lumu luimpe ne: lufu lua Yezu luvua lushipe Mikenji ya Mose, kabidi ne: muntu udi ubadibua muakane bua ditabuja, kadi ki mbua dienza malu a mu Mikenji to.​—Lomo 2:28, 29; 3:21-26.

10. Mmunyi muvua Paulo muleje muvuaye umvuila bakuabu mu tshilumbu tshia Mikenji ya Mose ne ditengudibua?

¹⁰ Nansha nanku, Paulo uvua umvuila bantu bavua basue kunemekela bimue bilele bia buena Yuda, bu mudi kubenga kuenza mudimu dia Nsabatu anyi kubenga bimue biakudia. (Lomo 14:1-6) Kakelelangana mikenji bua ditengudibua to. Yeye muine si wakatenguishisha Timote bua bena Yuda kabalu kumumona mu mushindu mubi, bu muvua tatuende muena Greke. (Bien. 16:3) Muntu nkayende ke uvua ne bua kuditenguisha anyi kubenga kuditenguisha. Paulo wakambila bena Galatiya ne: “Ditengudibua anyi dibenga kutengudibua kadiena ne mushinga to, kadi ditabuja didi dikuata mudimu ku diambuluisha dia dinanga ke didi ne mushinga.” (Gal. 5:6) Kadi pavua muntu utengudibua bua kuleja muvuaye utumikila Mikenji ya Mose anyi bua kuleja ne: kuenza nanku ke kudi kuenza bua Yehowa amuanyishe, bivua bileja muvuaye kayi ne ditabuja.

11. Mmubelu kayi uvua bakulu bapeshe Paulo? Bua kuwutumikila bivua bilomba tshinyi? (Tangila kabidi dimanyisha dia kuinshi kua dibeji.)

 ¹¹ Nanku nansha muvua manunganyi au a dishima, atshivua anu atatshisha bena kuitabuja bena Yuda. Bua bualu abu, bakulu bakapesha Paulo mubelu eu: “Tudi ne bantu balume banayi badi baditshipe mutshipu. Ndaku ne bantu aba, udilengeje nabu bilondeshile mikenji ne ubafutshile bionso bidi bikengedibua bua bamone mua kukunguisha mitu yabu. Dîba adi bantu bonso nebamanye ne: manunganyi onso adibu bumvue buebe wewe ki mmalelela to, kadi udi wenda mu bulongame, utumikila kabidi Mikenji.” c​—Bien. 21:23, 24.

12. Pavua bakulu bapeshe Paulo mubelu, ntshinyi tshivuaye muenze bua kuleja ne: utu wenza tshitu bakuabu bamba ne musue kueleshangana nabu diboko?

¹² Paulo uvua mua kuikala mubenge, wamba ne: tshilumbu ki ntshia bidi bantu benda bamuamba to, kadi ntshia tshisumi tshidi natshi bena kuitabuja bena Yuda abu bua Mikenji ya Mose.  Kadi uvua mudiakaje bua kuenza malu onso avua bakulu bamuambila pavuawu kaayi ashipa mêyi manene a Nzambi to. Ukavua mufunde ne: “Kudi badi muinshi mua mikenji ngakalua bu udi muinshi mua mikenji, nansha mundi meme tshiyi muinshi mua mikenji, bua meme kupeta badi muinshi mua mikenji.” (1 Kol. 9:20) Musangu eu, Paulo wakalonda tshivua bakulu ba mu Yelushalema bamuambile, kuluaye “bu [uvua] muinshi mua mikenji.” Mmutushile tshilejilu tshimpe lelu tshia kutumikila bakulu, katuyi tusumisha bua kuenza malu anu mutudi tuetu basue to. ​—Eb. 13:17.

13. a) Bua tshinyi bamue bena Yuda bavua bajule tshimvundu mu ntempelo? b) Mmushindu kayi uvuabu basungile Paulo?

¹³ Malu kaakenda bimpe ku ntempelo to. Pakavua matuku a dijikija mitshipu pa kujika, bena Yuda ba ku Asia bakamona Paulo, kumushiminyinabu malu, bamba ne: uvua ubueja bantu ba mu bisamba bikuabu mu ntempelo, ne kujudijabu tshimvundu. Bu kamanda ka basalayi ka bena Lomo kakayi kalue, bavua mua kuikala bamushipe ne mututu. Nansha nanku, kamanda ka basalayi aku kakela Paulo mu buloko. Kutuadijila ku dituku adi, bavua mua kulua kulekelela Paulo anu panyima pa bidimu bipite pa binayi. Kadi utshivua anu mu kantu kaluka. Pavua kamanda ka basalayi kebeje bena Yuda bua kumanya tshivuabu baluishila Paulo, bakela mbila bamubanda ne malu mashilashilangane. Mu mitoyi ayi, kamanda ka basalayi kakavua mua kumvua bualu nansha bumue to. Ndekelu wa bionso, bakangata Paulo, kuyabu nende. Pakavua Paulo ne basalayi bena Lomo bakeba kubuela mu kamponyi ka basalayi, Paulo wakambila kamanda aku ne: “Ndi nkulomba, nganyishila ngambile bantu dîyi.” (Bien. 21:39) Kamanda ka basalayi kakitaba, Paulo kutuadijaye kuakuila ditabuja diende ne dikima dionso.

14, 15. a) Mbualu kayi buvua Paulo mumvuije bena Yuda? b) Mmalu kayi avua kamanda ka basalayi kenze bua kumanya bua tshinyi bena Yuda bavua bafiike munda?

¹⁴ Wakatuadija, wamba ne: “Umvuayi mundi ndilumbuluila.” (Bien. 22:1) Bu muvua Paulo muakule mu tshiena Ebelu, bantu bakashala bapuwe. Wakabumvuija bua tshinyi ukavua muyidi wa Kristo, kayi udia tshibanga to. Pakenzaye nanku, wakaleja malu avua bena Yuda mua kukeba bua kudijadikila bobu basue, mualeje ne budimu buonso. Malu au ngowu aa: bavua bamulongeshe kudi Gamaliele, muntu uvua mumanyike bikole, ne uvua mukengeshe bayidi ba Kristo, anu muvua bamue bantu bavua muaba au mua kuikala bamanye. Kadi pakavuaye upingana ku Damaseke, wakamona Kristo ukavua mubishibue ku lufu wakula nende mu tshikena kumona. Bantu bavuaye nabu mu luendu  bakamona bukenke ne kumvuabu dîyi, kadi kabavua bumvua tshintu to. Bu muvua tshikena kumona tshimufofomije, bantu bavuaye nabu mu luendu bakaya nende ku Damaseke. Pakafikabu, muntu mukuabu uvua bena Yuda ba kuntu aku bamanye, diende Anania, wakamutabeja mu tshishima.

¹⁵ Paulo wakabanga kuamba ne: pakavuaye mupingane ku Yelushalema, Yezu wakamumuenekela mu ntempelo. Wamba anu nanku, kutondabi bena Yuda bikole, kuelabu mbila, bamba ne: “Umbusha muntu wa nunku pa buloba, bualu ki mmukumbane bua kuikala ne muoyo to!” (Bien. 22:22) Kamanda ka basalayi kakamba bua baye ne Paulo mu kamponyi ka basalayi bua kumupandisha. Bu muvua kamanda aku kasue anu kumanya bua tshinyi bena Yuda bavua bafiikile Paulo munda, kakamuambila bua adilongolole bua bamuele nkonko mu mfimbu mikole. Paulo uvua mumanye ne: mikenji ya mbulamatadi ivua imukuba, ke kubuelelaye muaba au ne kulejaye ne: uvua muena Lomo. Lelu mikenji ya mbulamatadi itu kabidi ikuba batendeledi ba Yehowa. Batu pabu babuelela pa mikenji ayi bua kuakuila ditabuja diabu. (Tangila kazubu ka “ Mikenji ya bena Lomo ne bena Lomo,” ne ka “ Mvita ya ku tubadi ya matuku etu aa.”) Pakamanya kamanda ka basalayi ne: Paulo uvua muena  Lomo, wakamona ne: bivua bikengela akebe mushindu mukuabu wa kumanya malu avuaye ukeba. Pakatshiabu, wakaya ne Paulo mu tshisangilu tshia pa buatshi ku Tshilumbuluidi tshinene anyi tubadi tunene tua bena Yuda.

16, 17. a) Umvuija tshivua tshienzeke padi Paulo wakula ku Tshilumbuluidi tshinene. b) Pavuabu bakume Paulo, ntshinyi tshivuaye muenze bua kubalongesha budipuekeshi?

¹⁶ Padi Paulo ubanga kudilumbuluila ku Tshilumbuluidi tshinene, udi wamba ne: “Balumiana, bana betu, ndi muenze malu kumpala kua Nzambi ne kondo ka muoyo katoke menemene too ne ku dituku dia lelu edi.” (Bien. 23:1) Ki mmusakidile malu makuabu to. Bible udi wamba ne: “Pakumvua muakuidi munene Anania mêyi aa, wakatumina bantu bavua bimane ku luseke luende dîyi bua kumukuma ku mishiku.” (Bien. 23:2) Bibi be! Bualu ebu buvua buleja muvuabu bamona malu mu mushindu mubi, bamba Paulo muvuaye muena dishima kabayi banji kumvua bijadiki bivuaye ufila! Ke bualu kayi Paulo wakandamuna ne: “Nzambi neakukume, wewe tshimanu tshitokesha. Udi musombe bua kundumbuluisha bilondeshile Mikenji eku ushipa Mikenji paudi utuma dîyi bua bobu kunkuma anyi?”​—Bien. 23:3.

¹⁷ Bamue bantu bavua muaba au bakakema, kabiyi bua muntu uvua mukume Paulo to, kadi bua tshivua Paulo muambe! Bakebeja ne: “Udi upenda muakuidi munene wa Nzambi anyi?” Pakabandamunaye, wakabalongesha mua kuikala ne budipuekeshi ne mua kunemeka Mikenji. Wakamba ne: “Bana betu, tshivua mumanye ne: mmuakuidi munene to. Bualu mbafunde ne: ‘Kuena ne bua kuakula bibi bua mukokeshi wa tshisamba tshienu to.’” d (Bien. 23:4, 5; Ekes. 22:28) Paulo  udi wangata mpindieu mayele makuabu. Bu muvuaye mumanye ne: Tshilumbuluidi tshinene tshivua tshienza ne Bafalese ne Basadoke, wakamba ne: “Balumiana, bana betu, ndi Mufalese, muana wa Bafalese. Badi bandumbuluisha bua ditekemena dia dibishibua dia bafue.”​—Bien. 23:6.

18. Bua tshinyi Paulo uvua mudibikile ne: Mufalese? Mmunyi mutudi mua kuyukila petu ne bantu mu imue nsombelu mushindu au?

¹⁸ Bua tshinyi Paulo uvua mudibikile ne: Mufalese? Bualu uvua “muana wa Bafalese,” wa mu dîku divua mu kasumbu ka Bafalese aku. Ke bualu kayi bantu ba bungi batshivua bamumona anu nanku. e Kadi bua tshinyi Paulo uvua wamba muvuaye witaba dilongesha dia Bafalese mu bualu bua dibishibua dia bantu ku lufu? Bafalese bavua bamba ne: padi muntu ufua, anyima wende udi ushala ne muoyo, kabidi ne: anyima ya bantu bakane ivua ibuela kabidi mu mibidi ya bantu. Paulo yeye kavua witaba malongesha a nanku to. Yeye uvua witabuja dibishibua  dia bantu ku lufu divua Yezu mulongeshe. (Yone 5:25-29) Tshidibi, Paulo uvua upetangana ne Bafalese muaba wa ne: kudi ditekemena dia ne: muntu yeye mufue, udi mua kupetulula muoyo. Kadi Basadoke bobu kabavua bitabuja nanku to. Tuetu tuyisha bena Katolike anyi bena Mishonyi, tudi mua kuyukila nabu mushindu eu. Tudi mua kuamba ne: tudi tuitabuja petu Nzambi anu bu bobu. Bushuwa, bobu badi bitabuja Busatu bunsantu, kadi tuetu tudi tuitabuja Nzambi muena Bible. Nansha nanku, tuetu nabu tudi tuitabuja ne: Nzambi udiku.

19. Bua tshinyi kuakenzeka tshimvundu mu tshisangilu tshia ku Tshilumbuluidi tshinene?

¹⁹ Bualu buvua Paulo muambe buakapandulula bena ku Tshilumbuluidi tshinene. Bible udi wamba ne: “Mutoyi mukole wakajuka, ne bamue bafundi ba ku luseke lua Bafalese bakajuka, kutuadijabu kubenga ne luonji luonso bamba ne: ‘Katuena bapete muntu eu ne bualu bubi nansha bumue to, kadi bikala nyuma anyi muanjelu muakule nende . . .’” (Bien. 23:9) Basadoke kabavua basue kumvua tshiambilu tshia ne: muanjelu uvua mua kuikala muakule ne Paulo to, bualu bobu kabavua bitaba ne: banjelu batuku to! (Tangila kazubu ka “ Basadoke ne Bafalese.”) Tshimvundu tshiakakola, kufikishabi kamanda ka basalayi ku disungila kabidi Paulo. (Bien. 23:10) Kadi Paulo utshivua anu mu kantu kaluka. Tshidi mua kumufikila mpindieu ntshinyi? Netumanye malu a bungi mu nshapita udi ulonda.